Kwambiya pa 13 mpaka pa 15 November 2021, vigaŵa vinyaki va ku British Columbia kuzambwi kwa Canada, kunguwa chivuwa chanthazi. Chivuwa chanthazi ukongwa chinguwa kwa zuŵa lamphumphu mu malu ngakukwana 20 kuphara mazuŵa nganyaki ngosi, kumadera nganyaki. Muvigaŵa vinyaki vuwa yinguwa yanthazi pazuŵa la chitatu. Chivuwa chenichi, chinguchitiska kuti maji ngasapaliyi kweniso kuti charu chilindimuki. Venivi vinguchitiska kuti msewu ujaliki, ŵanthu achichizgiki kusama munyumba zawu ndipuso kuti ŵanthu atondeki kwenda maulendu.

• Palivi mubali pamwenga mzichi yo wakupwetekeka

• Apharazgi 144 akusama dankha munyumba zawu

• Nyumba pafufupi 35 zikunangika

• Ofesi ya Nthambi ku Canada yikujalikiska Komiti Yakovya pa Masoka (DRC)

• Abali ndi azichi wo angusama munyumba zawu ŵenga akunozgeka kuchija limoza ndi abali ŵawu ndipuso Akaboni anyawu kufupi ndi tawuni yawu muvigaŵa vo arara aboma angukambiya ŵanthu kuti asamiyeku

• Akuwonere madera ndi ŵara a mumpingu apembuzga ndipuso kuchiska mabanja ngo ngasuzgika chifukwa cha soka lenili

• Po arara aboma asankha kuti mbumampha kuchita viyo, abali a mukomiti ya DRC agwiriya ntchitu limoza ndi a mu Dipatimenti Yakupanga Mapulani ndi Kuzenga kuti awoni nyumba zo zanangika ndipuso vo vikhumbika kuti anozgi

• Abali ndi azichi wo agwira ntchitu yakovya pamasoka, alondo ulongozgi wa mo angajivikiliya ku COVID-19

Mabanja nganandi nga Akaboni ngo ngasuzgika ndi kusapaliya kwa maji, ngakusama kali chifukwa cha motu wo ungubuka myezi yitatu yo yajumpha mu August 2021. Chifukwa chakuti kusintha kwanyengu kweniso masoka ngachilengedu vichitika pafupipafupi, ŵanthu aku Yehova anozgeke limu mwakuvwiya ulongozgi wakuja ndi vikwama vakuwikamu katundu kweniso chakurya asani kwachitika masoka.

Abali ŵidu anandi asuzgika chifukwa cha masoka kweni tilutirizgengi kugomezga kuti Yehova waŵapaskengi nthazi.—Habakuku 3:17, 18.