DECEMBER 10, 2024
CAMEROON
Pa Nyengu ya Upharazgi Wapade ku Vigaŵa Vakutali ku Cameroon, Ŵanthu Akujumpha 1,700 Akupempha Kuti Asambirengi Bayibolu
Kwamba mu May mpaka September 2024, Akaboni aku Yehova akujumpha 1,000 ku Cameroon, angugwiraku ntchitu yapade yakupharazga ku vigaŵa vakutali va mucharu cho. Viwoneka kuti pafufupi 40 perecenti ya ŵanthu ku Cameroon aja kuvigaŵa vakumizi. Pakumaliya pa ntchitu yapade yeniyi, ŵanthu akujumpha 1,700 akupempha kuti asambirengi Bayibolu.
Omende, Cameroon
Mutawuni ya Ombessa, azichi ŵaŵi angwamba kukambiskana ndi munthu yo waja wachitama kwa nyengu yitali. Wati wakonkhoska kuti watondeka kusaniya chovyu chakwenere chakuchipatala, azichi ŵidu angumuŵerenge layizgu laku Yehova lo lisanirika pa Chivumbuzi 21:3, 4. Wati wavwa vo lemba ili likamba, munthu yo wangufumba kuti: “Kweni vingachitika nadi venivi?” Pakumumuka, azichi ŵidu angumuŵerenge so lemba la Daniyeli 2:44 ndipu angumukonkhoske kuti ndi Ufumu waku Chiuta pe wo ungamalisa masuzgu ngo ŵanthu akumana nangu. Chifukwa chakukhumbisiska kuziŵa vinandi, munthu uyu wanguzomera kwamba kusambira Bayibolu.
Azichi ŵaŵi achipharazga kunyumba ndi nyumba muchigaŵa cha Löwe, angukambiskana mwakudumuwa ndi munthukazi munyaki vakukwaskana ndi chilindizga chakuti ŵanthu akufwa azamuyuka. Pati pajumpha mazuŵa ngamanavi, anguweriyaku kuti akalutirizgi kukambiskana ndipu angukondwa ukongwa kuwona kuti munthukazi uyu wangudaniyapu abwezi ŵaki ŵaŵi pa sambiru. Anthukazi atatu ŵenaŵa angukondwa ukongwa ati aziŵa malayizgu nga mu Bayibolu. Ŵati amaliza sambiru 02 mu kabuku kakuti Kondwani ndi Umoyu Kwamuyaya! yumoza mwa anthukazi yaŵa wangukamba kuti wosi akhumbisiska kuti alutirizgi kusambira Bayibolu.
Bafou, Cameroon
Ku Mouanko, azichi ŵidu angwamba kukambiskana ndi munthukazi munyaki yo wagulisa mu sitolu. Munthulumi munyaki wakukota wati wavwa vo akambiskananga, nayu wanguza pamalu ngo. Azichi ŵidu angulongo ŵanthu yaŵa mo tisambiriya Bayibolu ndi ŵanthu ndipu anguŵapempha kuti azi kumaunganu nga mpingu. Yiwu angukondwa ukongwa ŵati awona kuti munthukazi yuwa waza kumaunganu limoza ndi ŵana ŵaki ŵaŵi, ndipuso kuti munthulumi wakukota yuwa nayu waza. Wosi anayi angukondwa kuvwisiya maunganu ngidu ndipu angulayizga kuti alutirizgengi kuza ku Nyumba ya Ufumu.
Titiŵawonga ukongwa abali ndi azichi ŵidu ku Cameroon chifukwa cha phamphu lawu kuti “ŵanthu amitundu yosi” avwi uthenga wamampha wa Ufumu waku Chiuta.—1 Timote 2:4.