Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 3 2017

 NKHANI YA PACHIKONKHOMBI | ŴANTHU ANAYI WO AKWERA PA MAHACHI—KUMBI VO ACHITA VITIKUKWASKANI WULI?

Mo Ŵanthu Anayi wo Akwera Pamahachi Atikukwaskiyani

Mo Ŵanthu Anayi wo Akwera Pamahachi Atikukwaskiyani

Yeruzgiyani kuti mutuvwa mahachi ngatchimbiya ukongwa! Hachi yakwamba, njituŵa ndipu yo wakwerapu ndi munthu yo wasankhika ŵaka kuja fumu ndipu we ndi mazaza. Hachi yachiŵi njiyera ndipu yo wakwerapu watuzapu chimangu pacharu chapasi. Pavuli paki, patuza hachi yachitatu. Hachi yeniyi njifipa nge mdima ndipu yo wakwerapu wapinga sikelu yakupimiya kweniso pavwika uthenga wachitima wakuti chakurya chisoŵengi pacharu. Pakumaliya, patuza hachi yachinayi. Hachi iyi njakuti mbuu ndipu yimiya kuti kujengi matenda ndipuso milili yakupambanapambana. Yo wakwera pahachi iyi ndi Nyifwa. Ndipu Masanu ngatiyilondo pafupi ukongwa kuti ngawunganisi ŵanthu wo atufwa. Asani tiŵerenga nkhani iyi m’Bayibolu, tija nge kuti titiŵawona nadi ŵanthu anayi.—Chivumbuzi 6:1-8.

“Ndinguchita mantha ukongwa ndati ndaŵerenga kakwamba nkhani ya ŵanthu anayi wo akwera pamahachi. Ndaŵanaŵananga kuti Zuŵa la Cheruzgu lepafupi ndipu ndibayikengi chifukwa chakuti ndingunozgeka cha.”—Crystal.

“Ndakhumbisisanga kuziŵa ŵanthu anayi wo akwera pamahachi nga mitundu yakupambanapambana. Ndingukondwa ukongwa ndati ndavwisa vo ŵanthu ŵenaŵa amiya.”—Ed.

Kumbi namwi mutuvwa nge mo Crystal wanguvwiya wati waŵerenga vakukwaskana ndi ŵanthu anayi wo akwera pamahachi? Pamwenga mutuvwa nge mo Ed wanguvwiya? Nkhani ya ŵanthu anayi wo akwera pamahachi, njimoza mwa nkhani zakuziŵika ukongwa zo ze m’buku la Chivumbuzi. Kumbi muziŵa kuti mungayanduwa ukongwa asani mungavwisa vo chiwona chenichi ching’anamuwa? Chiuta wakulayizga kuti mungasaniya likondwa chayilu asani muŵerenga, musambira kweniso mugwirisiya ntchitu vo vikulembeka m’buku la m’Bayibolu lenili.—Chivumbuzi 1:1-3.

Chinanga kuti ŵanthu anyaki atopa asani aŵerenga nkhani yeniyi, kweni yikulembeke kuti yikuchitiseningi mantha cha. Ŵanthu mamiliyoni nganandi awona kuti chiwona chenichi chitiŵawovya kuti aje ndi chivwanu chakukho kweniso kuti alindizengi vinthu vamampha. Namwi so nkhani iyi yingakuwovyani. Chondi yiŵerengeni.