Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 1 2017

 BAYIBOLU LISINTHA ŴANTHU

Ndakhumbanga Cha Kufwa!

Ndakhumbanga Cha Kufwa!
  • NDIKUWA MU: 1964

  • CHARU CHO NDIKUWIYA: ENGLAND

  • MBIRI YANGU: NDINGWAMBA MIJALIDU YIHENI NDECHE MWANA

UMOYU WANGU WAKALI

Ndikuwiya ku Paddington, chigaŵa cho muja ŵanthu anandi ukongwa mutawuni ya London, ku England. Ndajanga ndi ama kweniso aku ŵangu ŵatatu. Ada azangapu kamozakamoza panyumba chifukwa ayanjanga kumwa moŵa.

Ndeche mwana, ama angundisambiza kuti ndipempherengi usiku wewosi. Ndenga ndi ka Bayibolu kamana ko kenga ndi buku la Sumu pe. Ndingupanga sumu kutuliya m’buku lenili zo ndambanga. Ndenga so ndi buku linyaki lo ndinguŵerengamu mazu ngo ndangaluwanga cha. Mazu ngaki ngenga ngakuti:“Zuŵa linyaki weyosi wazamukufwa.” Mazu yanga ngandichitisanga kuti ndilekengi kugona usiku chifukwa ndaŵanaŵaniyanga waka vamunthazi. Ndaŵanaŵananga kuti, ‘Patenere kuti pe chifukwa cho tikupasikiya umoyu. Ntchifukwa wuli ini nde ndi umoyu?’ Ndakhumbanga cha kufwa!

Ndingwamba kwanja vamasenga. Ndalongoronga ndi akufwa, ndakanga kumasanu ndi anyangu a kusukulu ndipuso tawoneriyanga limoza mafilimu ngakofya. Chinanga kuti tachitanga mantha tichiwonere kweni ngatikondwesanga.

Ndingwamba kuchita mijalidu yiheni ndati ndakwanisa waka vyaka 10. Ndakweŵanga foja ndipu wanguswera cha kusere muviwanga. Pavuli paki, ndingwamba kukweŵa chamba. Ndati ndafika vyaka 11 ndingwamba kumwa moŵa. Chinanga kuti wandinowiyanga cha, kweni ndakondwanga ndi kuloŵe. Ndayanjanga so sumu ndi kuvina. Ndalutanga ku maphwandu kweniso ku mabala. Usiku ndathaŵanga munyumba ndipu ndaserenga so mwakubisa kwechendachi. Chifukwa cha kuvuka, kanandi ndakanga cha kusukulu. Kweni asani ndaluta, pa buleki ndamwanga moŵa.

Chaka chakumaliya pa sukulu, ndingukwera umampha cha. Nyengu yeniyi ndiyu ama anguziŵiya kuti ndachitanga mijalidu yiheni ndipu anguguŵa kweniso angukwiya ukongwa. Tinguhohotiyana ukongwa ndipu pavuli paki ndingutuwapu pa nyumba. Ndinguchija ndi Tony yo wenga chibwezi changu kweni ndinguchijalisaku cha. Iyu wagulisanga munkhwala wakutimbanyiza wongu, wayanjanga ndewu, wenga Rasi kweniso wachitanga mijalidu yinyaki yiheni. Ndinguto nthumbu ndati ndafika vyaka 16, ndipu ndingubala mwana munthurumi.

 MO BAYIBOLU LINGUSINTHIYA UMOYU WANGU

Ndingukumana ndi Akaboni aku Yehova kakwamba pa nyengu yo ndajanga munyumba yo asungiyamu asungwana ambula kuyirwa, wo ŵe ndi ŵana. Wo awoneriyanga nyumba yeniyi, angundipasa chipinda. Akaboni aku Yehova ŵaŵi anthukazi ayanjanga kwende asungwana anyaki wo ajanga kwenuku. Zuŵa linyaki, ndingujapu achikambisana. Ndapenjanga ŵaka kuŵalongo kuti agomeza vaboza. Kweni angundimuka mafumbu nganandi ngo ndenga nangu. Angundimuka mwakuzika kweniso mwakuvwika umampha kutuliya m’Bayibolu. Yiwu achitanga nani vinthu mwalisungu kweniso andivwisanga. Venivi vingundikondwesa ukongwa. Mwaviyo, ndinguzomera kuti asambirengi nani Bayibolu.

Pavuli paki, ndingusambira fundu yinyaki m’Bayibolu yo yingusintha umoyu wangu. Kutuliya pa unamana wangu, ndawopanga kufwa. Kweni pa nyengu iyi, ndingusambira vo Yesu wangukamba pa nkhani ya chiyuka. (Yohane 5:28, 29) Ndingusambira so kuti Chiuta watindiŵanaŵaniya. (1 Petro 5:7) Ndingukwaskika ukongwa ndi vo lemba la Yeremiya 29:11 likamba. Lemba ili lititi: “‘Pakuti Ini ndiziŵa umampha maŵanaŵanu ngo nde nangu paku imwi,’ watiti Yehova, ‘ndiŵanaŵana za chimangu m’malu mwakuŵanaŵaniya soka, kuti mulindizengi vinthu vamampha munthazi.’” Ndingwamba kugomeza kuti ndingazija kwamuyaya m’Paradayisu pacharu chapasi.—Sumu 37:29.

Akaboni aku Yehova angundilongo kuti atindiyanja ukongwa. Ndati ndaluta ku maunganu ngawu kakwamba, weyosi wangundilondere umampha ukongwa. (Yohane 13:34, 35) Ivi vachitikanga cha kutchalitchi lo ndakanga. Akaboni aku Yehova angundilondere chinanga kuti vinthu venga umampha cha pa umoyu wangu. Yiwu angundiphwere, andivwisiyanga kweniso andiwovyanga munthowa zinyaki. Ndajivwanga nge kuti nde m’banja la ŵanthu anandi.

Ndichisambira Bayibolu, ndinguwona kuti ndikhumbika kusintha vinthu vinyaki pa umoyu wangu kuti ndichitengi vinthu mwakukoliyana ndi mo Chiuta wakhumbiya. Ndingusuzgika kuti ndileki kukweŵa foja. Kweniso ndinguwona kuti sumu zo ndayanjanga kuvwisiya, zandichitisanga kuti ndiyanjengi chamba. Mwaviyo ndinguleka kuvwisiya sumu zenizi. Ndinguleka so kuluta ku maphwandu ndi ku mabala ndi chilatu chakuti ndileki kumwa moŵa mwawuloŵevu. Ndingusaniya mabwezi ngamampha ngo ngangundiwovya kuti ndisinthi nkharu yangu.—Nthanthi 13:20.

Pa nyengu iyi, Tony nayu wasambiranga Bayibolu ndi Akaboni aku Yehova. Iyu wangusimikiza kuti wasaniya uneneska chifukwa chakuti Akaboni amukanga mafumbu ngaki kutuliya m’Bayibolu. Iyu wangusintha ukongwa. Wanguleka kuchitiya vinthu limoza ndi anyaki wo ŵenga andewu, kukweŵa chamba kweniso mijalidu yinyaki yiheni. Kuti tikondwesi Yehova kweniso tileri umampha mwana widu, tinguwona kuti tikhumbika kusintha umoyu widu. Tingutorana mu 1982.

“Sonu ndigona ndi usiku chifukwa ndikuleka kuŵanaŵaniya vakunthazi kweniso kopa nyifwa”

Nyengu yinyaki ndafufuzanga nkhani za ŵanthu wo angusintha mijalidu yo ini ndakhumbikanga kusintha. Ndafufuzanga m’magazini nga Chigongwi cha Alinda kweniso Jani Masu! * Vakuwoniyapu vawu vingundichiska ukongwa. Ndinguwona kuti ndingachitanga mphwayi cha kusintha nkharu yangu. Ndingulutiriza kupempha Yehova kuti wangandilekanga ndija cha. Ini ndi Tony tingubatizika mu July 1982 ndipu tinguja Akaboni aku Yehova.

MO NDAYANDULIYA

Kuja pa ubwezi ndi Yehova kukutaska umoyu wangu. Ini ndi Tony tawona kuti Yehova watiwovya pa nyengu ya masuzgu. Tawona so kuti tikhumbika kuthemba Yehova asani takumana ndi masuzgu. Nyengu zosi iyu watitiwovya ndi kuphwere banja lidu.—Sumu 55:22.

Nde wakukondwa ukongwa chifukwa chakuwovya mwana widu munthurumi ndi munthukazi kuti aziŵi Yehova. Ndikondwa so ukongwa chifukwa chakuti nawu atesesa kovya ŵana ŵawu kwanja Chiuta.

Sonu ndigona ndi usiku chifukwa ndikuleka kuŵanaŵaniya vakunthazi kweniso kopa nyifwa. Ini ndi Tony tikondwa ukongwa kwende mipingu yakupambanapambana ya Akaboni aku Yehova kuti tiyichiski. Asani tafika pa mpingu wewosi, tigwiriya limoza ntchitu yakusambiza ŵanthu kuti asani angavwana mwaku Yesu, nawu azisaniyi umoyu wamuyaya.

^ ndimi 17 Magazini ya Jani Masu!, nayu yipharazgika ndi Akaboni aku Yehova.