Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  November 2015

 MBIRI YA UMOYU WANGU

Ndingusaniya Chinthu Chamampha Ukongwa Kuluska Kutchuka

Ndingusaniya Chinthu Chamampha Ukongwa Kuluska Kutchuka

Zuŵa linyaki ndi usiku m’chaka cha 1984, umoyu wangu ungusintha ukongwa. Ndingusankhika kuti ndije Miss Hong Kong ndipu ndingwamba kutchuka. Chithuzi changu chinguŵikika papeji lakwamba la magazini ndi nyuzipepala. Ndambanga sumu, kuvina, kupasika mwaŵi wakulongoro m’vakuchitika vinyaki, kuchitisa mapulogilamu nga pa TV, kuvwala vakuvwala vakutowa ndipuso kucheza ndi ŵanthu akutchuka nge mura wa boma la Hong Kong.

Mu 1985, ndingwamba kupanga mafilimu, ndipu maulendu nganandi ini ndini ndalongozganga m’mafilimu ngenanga. Atolankhani apenjanga kulemba vakukwaskana ndi ini, akujambula apenjanga kundijambula. Ŵanthu anyaki andidananga kuti nkhajuliyi malu ngo ngazengeka sonu, kweniso andidananga kuti nkharyi nawu chakurya chamusana ndi chamazulu. Ŵanthu andilondonga kwekosi ko ndingaluta.

Pa nyengu yo ndachitanga mafilimu ngankhondu

Kamana ndi kamana ndingwamba kuziŵa kuti vo ndachitanga venga vakuzirwa ukongwa cha. Kanandi ndachitanga mafilimu nga nkhondu ndipu ivi vachitiskanga kuti umoyu wangu uje pangozi. Ivi venga viyo chifukwa ku Hollywood, ŵanthu wo apanganga mafilimu agwiriskiyanga ntchitu ŵanthu anyaki kuti achiti vinthu vakuŵika umoyu pangozi. Kweni ku Hong Kong ŵanthu wo apanganga mafilimu achitanga ŵija vinthu venivi. M’mafilimu nganyaki ndandwikanga pachanya pa magalimotu ndichiyendesa m’thuthuthu. Mafilimu nganandi ngo ndapanganga ngawonesanga ndewu ndipuso ureŵi. Kweniso nganyaki ngawonesanga vamizimu.

Mu 1995, ndingutorana ndi munthu yo walongozganga ntchitu yakupanga mafilimu. Chinanga kuti ndenga wakutchuka, wakukhupuka, ndipuso murumu wangu wandiyanjanga ukongwa, kweni ndakondwanga cha. Ndingusankha kuti ndileki waka kupanga mafilimu.

NDINGUKUMBUKA VO NDAGOMEZGANGA NDECHEMWANA

Ndingwamba kukumbuka ukongwa vo ndagomezganga ndechemwana. Chisulu chechosi ini ndi mku wangu talutanga kuchicheza kunyumba yinyaki ya Akaboni aku Yehova. A Joe McGrath atisambizanga Bayibolu pamoza ndi ŵana ŵawu atatu anthukazi. Yiwu ŵenga amampha ukongwa ndipu aliyanjanga ukongwa banja lawu. Ndipuso achitanga vinthu mwaulemu ukongwa ndi awolu ŵawu kweniso ŵana ŵawu. Ndakondwanga ukongwa kuluta nawu ku maunganu ngachikhristu. Nyengu zinyaki talutanga nawu ku maunganu ngakulungakulu ndipu ndakondwanga ukongwa nyengu yeniyi. Ndajanga mwachimangu ukongwa ndi Akaboni aku Yehova.

 Kweni kunyumba kwidu kwachitikanga vinthu vamampha cha. Ama asuzgikanga ukongwa maŵanaŵanu chifukwa cha vo ada achitanga. Nyengu yo ndenga ndi vyaka 10, Ama anguleka kuwungana ndi Akaboni aku Yehova. Ini ndingulutirizga kuwungana kweni ndachitanga ivi ndi mtima wosi cha. Ndingubatizika ndati ndafika vyaka 17. Pavuli paki ndingwamba kuchita vinthu viheni ndipu ndinguleke limu kuwungana.

NDINGUŴANAŴANA KUTI NDISINTHI

Tati takwatisa, ŵara ŵaŵi a m’mpingu wa Akaboni aku Yehova wo ndawungananga anguza kuzicheza nani. Angundikonkhose vo ndingachita kuti ndiwere kwaku Yehova Chiuta ndipu angukambiya mumishonale munyaki zina laki Cindy kuti wandiwovyi. Panyengu iyi ndipu ndawere vuli ukongwa mwauzimu. Sonu ndingumufumba kuti wandilongo ukaboni wakuti Bayibolu ndi Mazu ngaku Chiuta nadi. Wangundilongo mauchimi nga m’Bayibolu ngo ngakufiskika. Tingwamba kuyanjana ukongwa ndipu wangundipempha kuti wayambi kusambira nani Bayibolu ndipu ndinguzomera. Ndati ndayamba kusambira ndingwamba kuziŵa kuti Yehova ndi Chiuta wachanju ndipu wakhumba kuti ndikondwengi.

Ndati ndayamba kuluta ku Nyumba ya Ufumu, ndinguwona kuti ndikondwa ukongwa asani nde ndi Akaboni aku Yehova kuluska ŵanthu wo ndachitanga nawu mafilimu. Kweni chifukwa cha mo ndingukuliya, ndagomezanga munthu weyosi cha ndipu ndajitinkhanga. Munthu munyaki wangundiwovya ndi Bayibolu kuziŵa mo ndingakunthiyapu masuzgu, ndipuso ndingusambira mo ndingasankhiya mabwezi ngamampha.

CHINTHU CHAMAMPHA KULUSKA KUTCHUKA

Mu 1997, ini ndi murumu wangu tingusamiya ku Hollywood, California, U.S.A. Pa nyengu yo ndenga kwenuku ndatangwamikanga ukongwa ndi kusambiza ŵanthu zeru za m’Mazu ngaku Chiuta. Sonu ndikondwa ukongwa chifukwa chakuti ndisambiza ŵanthu Bayibolu kuluska kali po ndachitanga mafilimu. Mu 2002, ndingukumana ndi munyangu wakali wa ku Hong Kong zina laki Cheri. Vinthu vinandi vo Cheri wachitanga vayanananga waka ndi vo ini ndachitanga. Nayu wangujapu Miss Hong Kong. Ndati ndawina iyu ndiyu wandivwalikanga vakuvwala vo ŵanthu wo awina avwala. Cheri nayu wapanganga so mafilimu, walongozganga ntchitu zakupanga mafilimu kweniso wachezanga ukongwa ndi ŵanthu akutchuka. Nayuso wangusamukiya ku Hollywood.

Ndingumuvwiya lisungu ukongwa Cheri ndati ndavwa kuti chibwezi chaki chikutayika chifukwa cha nthenda ya mtima. Ŵanthu achisopa chaki cha Chibuda amupembuzganga cha. Mwakuyanana ndi ini, Cheri wangutchuka ukongwa ndipu ŵanthu anyaki amukhumbiranga kweni wakondwanga cha ndipu wagomezganga munthu weyosi cha. Ndingwamba kumukambiyaku vo ndasambiranga m’Bayibolu kweni watoliyangaku kanthu cha chifukwa cha chisopa chaki cha Chibuda.

Mubwezi wangu Cheri panyengu yo wachitiyanga mafilimu

Zuŵa linyaki mu 2003 wangundimbiya foni panyengu yo wapanganga filimu ku Vancouver, Canada. Wangundikambiya kuti panyengu yo wayendiyanga m’malu ngakupambapambana, wangwamba kuromba mwakukweza kuti: “Ndikambiyeni, kumbi Chiuta wauneneska Ndiyani? Zina linu ndimwi yani?” Wati wamaliza ŵaka kuromba, wangufika pa malu po penga Nyumba ya Ufumu ndipu wanguwona zina lakuti Yehova. Iyu wanguwona kuti Chiuta wamuka rombu laki, ndipu wangwamba kupenja Akaboni aku Yehova kuti wakumani nawu. Ndingukambiskana ndi Akaboni aku Yehova kuti akumani nayu ndipu pati pajumpha mazuŵa ngamanavi Cheri wanguluta ku mawunganu ku mpingu wa Chitchayinizi ku Vancouver.

Cheri wangundikambiya kuti, “Ŵanthu wo ndiwungana  nawu atindiyanja ukongwa. Nditiŵakambiya vakukhosi kwangu.” Ndingukondwa ukongwa ndati ndavwa viyo, chifukwa panyengu yo Cheri wachitiyanga mafilimu wengavi mabwezi. Cheri wangulutirizga kuwungana ndi Akaboni aku Yehova. Kweni mu 2005 wangusayina kontilakiti kuti watuzgi mafilimu ngaŵi mu Chitchayina. Ivi vinguchitiska kuti wawere ku Hong Kong. Mu 2006, Cheri wangubatizika pa unganu unyaki wa Akaboni aku Yehova ku Hong Kong. Chinanga kuti wakhumbisiskanga kuteŵete Yehova ndi mtima wosi, kweni watangwamikanga ukongwa ndi ntchitu yaki ku kampani yakupanga mafilimu ndipu ivi vachitisanga kuti walekengi kukondwa.

TAKONDWANGA CHIFUKWA CHA KUSAMBIZA ŴANTHU BAYIBOLU

Mu 2009, Cheri wangusintha ukongwa vakuchita. Wanguleka kugwira ntchitu ku kampani yakupanga mafilimu kuti wasaniyi nyengu yakukwana yakuteŵete Yehova. Wangusaniya mabwezi nganandi mu mpingu wachikhristu. Nyengu zosi wapharazganga uthenga wamampha wa Ufumu ndipu wakondwanga ukongwa kuwovya ŵanthu kuti asinthi umoyu wawu.Mateyu 24:14.

Cheri wangwamba kusambira chineneru cha ku Nepal. Iyu wakhumbanga kuwovya ŵanthu a ku Nepal wo ajanga ku Hong Kong kuti asambiri uneneska. Ŵanthu a ku Hong Kong atiŵatoliyaku kanthu cha ŵanthu aku Nepal wo aja Hong Kong chifukwa chakuti atondeka kulongoro umampha Chizungu ndi Chitchayinizi kweniso chifukwa chakupambana midawuku. Cheri wangundikambiya kuti wakondwa ukongwa kusambiza Bayibolu ŵanthu ŵenaŵa. Mwakuyeruzgiyapu, zuŵa linyaki wachipharazga nyumba ndi nyumba wangukumana ndi munthukazi munyaki wa ku Nepal yo wamuziŵanga kamanavi Yesu kweni Yehova Chiuta wamuziŵanga cha. Cheri wangumulongo lemba m’Bayibolu lo likamba kuti Yesu warombanga kwa Awiski a kuchanya. Munthukazi uyu wati waziŵa kuti wakhumbika kuromba kwaku Chiuta wauneneska, zina laki Yehova, wanguzomera kuti wamusambizengi Bayibolu. Pavuli paki murumu waki ndi mwana waki munthukazi nawu angwamba kusambira Bayibolu.Sumu 83:18; Luka 22:41, 42.

Cheri mazuŵa nganu

Ndati ndawona mo Cheri wakondwiyanga ndi ntchitu ya kupharazga ndingujifumba kuti, ‘Kumbi nchinthu wuli chitinditondekeska kupharazga nyengu zosi?’ Panyengu iyi nani ndajanga ku Hong Kong. Ndinguŵanaŵana kusintha vinthu vinyaki pa umoyu wangu kuti ndisaniyengi nyengu yinandi yakusambiziya ŵanthu uneneska wa m’Bayibolu. Kuziŵa vo ŵanthu agomezga ndipuso kuŵawovya kuvwisa Mazu Ngaku Chiuta, kwandiwovya kuti ndikondwengi ukongwa.

Ndikondwa ukongwa kuwovya ŵanthu kuvwisa Mazu Ngaku Chiuta

Mwakuyeruzgiyapu, ndisambira Bayibolu ndi munthukazi munyaki wa ku Vietnam. Iyu wakondwanga cha ndipu nyengu zosi wajaliyanga waka kuliya. Sonu wakondwa ukongwa ndipu waungana ndi Akaboni aku Yehova.

Ini ndi Cheri tikusaniya chinthu chamampha ukongwa kuluska kutchuka. Chinanga kuti kupanga mafilimu kwenga kwakukondweska ndipuso kungutichitisa kuti titchuki, kweni kusambiza ŵanthu vakukwaskana ndi Yehova Chiuta nkhwakukondweska ukongwa chifukwa iyu watumbikika. Ndipu tawona kufiskika kwa mazu ngaku Yesu ngakuti: “Kupasa kuchitisa munthu kuja wakukondwa kuluska kulonde.”Machitidu 20:35.