Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  November 2015

 NKHANI YA PAPEJI LAKWAMBA

Kumbi Akaboni Aku Yehova Mbayani?

Kumbi Akaboni Aku Yehova Mbayani?

“Mike ndikuziŵana nayu kali ukongwa. Iyu ndi Kaboni waku Yehova. Kweni chisopa chaki nditichivwisa umampha cha. Kumbi Yehova ndiyani? Nchifukwa wuli Akaboni aku Yehova akondwere cha maholidi? Kumbi Mike we mu gulu la ŵanthu ampatuku?”—Becky, wa ku California, U.S.A.

“Ŵanthu wo tajanga nawu pafupi ŵati ayamba kusambira Bayibolu ndi Akaboni aku Yehova ndingujifumba kuti: ‘Kumbi zina lakuti Akaboni aku Yehova ling’anamuwanji? Zina ili landiŵiya lachilendu ukongwa!’”—Zenon, wa ku Ontario, Canada.

“Ini ndi muwolu wangu taŵanaŵananga kuti Akaboni aku Yehova atuza ku nyumba kwidu chifukwa chakuti talutanga cha kutchalitchi. Ndipu taŵanaŵananga kuti asani matchalitchi ngakulungakulu ndingu ngaleka kusambiza vinthu vakukhorwesa ndikuti kagulu ka Akaboni aku Yehova kangasambiza cha vinthu vakukhorwesa.”—Kent, wa ku Washington, U.S.A.

“Kukamba uneneska, ndaŵaziŵanga umampha cha Akaboni aku Yehova.”—Cecilie, wa ku Esbjerg, Denmark.

Panyaki mukuŵawonapu Akaboni aku Yehova achipharazga mu nyumba za ŵanthu, m’misewu kweniso achigaŵiya mabuku ndi kusambiza ŵanthu Bayibolu. Panyaki magazini iyi wakupasani ndi Kaboni waku Yehova. Kweni vingachitika kuti mutiŵaziŵa umampha cha ndipu mukukambapu nge vo ŵanthu wo taŵazumbuwa kukwamba kwa nkhani iyi angukamba.

Kumbi mungasaniya nunkhu kwamuka kwa mafumbu ngo mwenangu? Kumbi mungachita wuli kuti muziŵi vo Akaboni aku Yehova agomezga, mo achitiya uteŵeti wawu, mo asaniliya ndalama zo agwiriskiya ntchitu ndipuso chifukwa cho apharazgiya m’nyumba za ŵanthu kweniso mumsewu?

Cecilie wangukamba kuti: “Ndiŵerenga vinthu vinandi vakukwaskana ndi Akaboni aku Yehova pa intaneti. Ndinguvwa nkhani zinandi zaboza ndipuso kuti ŵe ndi sankhu ukongwa. Ivi vinguchitisa kuti ndiyambi kutinkha Akaboni aku Yehova.” Cecilie wangukumana ndi Akaboni aku Yehova ndipu wangukhorwa ndi vo angumumuka.

Kumbi mungayanja kuziŵa uneneska wakukwaskana ndi Akaboni aku Yehova? Titikupemphani kuti mukumani ndi Akaboni aku Yehova kuti akukambiyeni uneneska. (Nthanthi 14:15) Nkhani zakulondopu zikuwovyeningi kuti muŵaziŵi umampha Akaboni aku Yehova. Zikuwovyeningi so kuziŵa vo agomezga ndipuso ntchitu yo achita.