Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  September 2015

 NKHANI YA PAPEJI LAKWAMBA | KUMBI MUNGACHITA WULI KUTI MULEKI KUSUZGIKA MAŴANAŴANU?

Ŵanthu Wosi Asuzgika Maŵanaŵanu!

Ŵanthu Wosi Asuzgika Maŵanaŵanu!

“Ndati ndaluta kuchigula vakurya ndingusaniya ŵaka mabisiketi ngakudula ukongwa! Mawa laki m’masitolu ngosi mwengavi vakurya.”—Paul, wa ku Zimbabwe.

“Mulumu wangu wangundikambiya kuti watuwapu panyumba nthengwa yamala. Kumbi ndatingi ndimalanengi nalu wuli suzgu ili? Nanga ŵana ndatingi ndichitengi nawu wuli?”—Janet, wa ku United States.

“Alamu yati yayamba kumba ndingutchimbiya kuti nkhabisami ndipu ndingugona pasi panyengu yo mabomba ngaphulikanga. Manja ngangu ngangunjenjeme kwa maola nganandi.”—Alona, wa ku Israel.

Mazuŵa nganu ŵanthu anandi asuzgika maŵanaŵanu. (2 Timote 3:1) Anandi akumana ndi masuzgu nga ndalama, kumala kwa nthengwa, nkhondu, matenda ngakofya kweniso masoka ngachilengedu pamwenga masuzgu nganyaki ngo ŵanthu atambisa. Anyaki asuzgika so maŵanaŵanu ndi vinthu vinyaki ndipu atijifumba kuti: ‘Kumbi chakutupa ichi ndi kansa?’ ‘Kumbi azuku ŵangu akuwengi umampha m’charu chiheni ichi?’

Kusuzgika maŵanaŵanu kunyaki nkhuheni cha. Tosi tisuzgika maŵanaŵanu asani tepafupi kulemba mayesu, pamwenga kuchita ma intavyu. Kopa vinthu vo vingananga umoyu kutovya kuti tileki kukumana ndi masuzgu. Kweni kusuzgika maŵanaŵanu ukongwa nkhwakofya. Kafukufuku yo wanguchitika pa arara 68,000, walongo kuti munthu wangafwa liŵi chinanga kuti wasuzgika maŵanaŵanu kamanavi. Ndichu chifukwa chaki Yesu wangufumba kuti: “Ndiyani waku imwi yo wangasazgiyaku kamanavi umoyu waki chifukwa cha kufipa mtima?” Kukamba uneneska munthu wangasazgiyaku cha umoyu waki chifukwa cha kufipa mtima. Mwaviyo Yesu wanguchenjeza kuti: “Lekani kufipa mtima.” (Mateyu 6:25, 27) Kumbi tingachita wuli kuti tileki kusuzgika maŵanaŵanu?

Kuti tileki kusuzgika maŵanaŵanu, titenere kuchita vinthu mwazeru, kugomezga ukongwa Chiuta ndipuso malayizgu ngaki. Chinanga kuti sonu tingakumana ndi masuzgu ngakulu cha chifukwa cha kusuzgika maŵanaŵanu, kweni kunthazi tingazikumana nangu. Mwaviyo, tiyeni tiwoni mo fundu izi zinguwovye Paul, Janet, ndi Alona kuti aleki kusuzgika ukongwa maŵanaŵanu.