Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  September 2015

 BAYIBOLU LISINTHA ŴANTHU

Nkharu Yangu Yingunangika Ukongwa

Nkharu Yangu Yingunangika Ukongwa
  • CHAKA CHAKUWIYA: 1952

  • CHARU CHO NDIKUWIYA: UNITED STATES

  • MBIRI YANGU: MUNTHU WANDEWU

UMOYU WANGU WAKALI:

Ndikukuliya m’msumba wa Los Angeles, ku California, U.S.A., m’msumba wo wenga ndi vigeŵenga kweniso ŵanthu anandi wo amwanga munkhwala wakutimbanyizga wongu. Apapi ŵangu ŵenga ndi ŵana 6 ndipu ini ndenga wachiŵi.

Ndingukuliya mu chisopa cha evangelical cho ama ŵengamu. Ndeche m’nyamata ndalutanga kutchalitchi kweniso ndachitanga vinthu viheni. Pa Sabata ndalutanga kuchimba makwaya kutchalitchi. Mukati mwa sabata ndalutanga ku maphwandu, ndamwanga munkhwala wakutimbanyizga wongu ndipuso ndachitanga ureŵi.

Ndenga wandewu ukongwa ndipu ndasweranga cha kukwiya. Ndagwiriskiyanga ntchitu chidya chechosi kuti ndiwini ndewu. Vo ndasambiranga kutchalitchi vandiwovyanga cha. Kanandi ndakambanga kuti “Chiuta wawezge ŵanthu aheni kuziya mwaku ini!” Pa nyengu yo ndenga ku yunivesite cha m’ma 1960, ndingukopeka ukongwa ndi gulu landali (Black Panthers) lo latinkhanga azungu wo achitiyanga nkhaza ŵanthu afipa. Ndingusere kagulu ka ŵana asukulu ko katinkhanga so azungu wo achitiyanga nkhaza ŵanthu afipa. Kanandi tachitanga vivulupi, ndipu ivi vachitisanga kuti ajalengi sukulu.

Ndingukhorwa mbwenu cha ndi vivulupi vo tachitanga. Mwaviyo, ndingwamba kuchita vinthu vinyaki vachiŵembu. Zuŵa linyaki ini ndi anyangu tinguwonere filimu yo yalongonga mo akayidi afipa atombozekiyanga ku United States. Chifukwa cha kukwiya ndi vinthu vambula urunji venivi, tingupuma azungu wosi wo ŵenga muholu yakuwonesiyamu mafilimu. Pavuli paki, tinguluta munyumba za azungu kuti tikaŵakwechuwi.

Pa nyengu yo ndenga ndi vyaka va pakati pa 13 ndi 19, ini ndi muku wangu ndipuso muvurwa wangu tachitanga vinthu vinandi vankhaza. Apolisi atipenjangapenjanga. Muvurwa wangu munyaki wenga mugulu la vigeŵenga ndipu nani so ndenga mugulu lenili. Nkharu Yangu Yingunangika ukongwa.

MO BAYIBOLO LINGUSINTHIYA UMOYU WANGU:

Apapi amunyangu ŵenga Akaboni aku Yehova. Zuŵa linyaki angundidaniya ku maunganu ngawu ndipu ndinguluta. Kutuwa zuŵa lenili ndinguziŵa kuti Akaboni aku Yehova apambana ukongwa ndi ŵanthu anyaki. Weyosi pa maunganu wenga ndi Bayibolu laki ndipu waŵerenganga pa nyengu ya maunganu. Ŵana nawu akambanga nkhani pa maunganu. Ndingukondwa ukongwa ndati ndaziŵa kuti zina laku Chiuta ndi Yehova ndipuso kuti atilizumbuwa.  (Sumu 83:18.) Mumpingu uwu mwenga ŵanthu amitundu yinandi kweni asankhananga mitundu cha.

Pakwamba ndakhumbanga cha kusambira Bayibolu ndi Akaboni aku Yehova, kweni ndayanjanga waka kuluta ku maunganu ngawu. Zuŵa linyaki usiku ndinguluta ku maunganu nga Akaboni aku Yehova, kweni anyangu anguluta kudansi. Kwenuku angupuma mnyamata munyaki mpaka kumubaya chifukwa cha jeketi laki. Kwati kwacha, angwamba kujitumbwa kuti abaya munthu. Yiwu awonanga kuti vo anguchita venga vamampha ukongwa. Anandi anguyeruzgika kuti akaje mujeri umoyu wawu wosi. Ndingukondwa ukongwa chifukwa chakuti ndenga nawu cha usiku wo anguchitiya vinthu ivi. Ndingusimikiza mtima kuti ndisinthi umoyu wangu ndipu ndingwamba kusambira Bayibolu.

Chifukwa chakuti ndinguja nyengu yitali ndi ŵanthu asankhu, ndinguzizwa ukongwa ndi vo Akaboni achitanga. Mwakuyeruzgiyapu, asani Kaboni muzungu waluta kucharu chinyaki, ŵana ŵaki waŵasiyanga kuti aje ndi banja la ŵanthu afipa. Kweniso banja linyaki lachizungu laleranga mnyamata wachifipa yo wasoŵanga pakuja. Ivi vingundichitiska kuti ndisimikizi kuti Akaboni aku Yehova ndiwu afiska mazu nga pa Yohane 13:35, ngakuti: “Mwaku ichi wosi azamuziŵa kuti ndimwi akusambira ŵangu asani muyanjana.” Ndingusimikiza kuti ndasaniya mabwezi ngauneneska.

Ndati ndayamba kusambira Bayibolu ndinguwona kuti ndikhumbika kusintha maŵanaŵanu. Ndakhumbikanga kusintha umoyu wangu ndipuso kulutirizga kuchita vinthu mwachimangu. (Ŵaroma 12:2) Ndingwamba kusintha kamanakamana. Ndingubatizika mu January 1974 nge Kaboni waku Yehova.

Ndakhumbikanga kusintha umoyu wangu ndipuso kulutirizga kuchita vinthu mwachimangu

Ndati ndabatizika, ndakhumbikanga kuyesesa mbwenu kujiko kuti ndileki jalidu lakukwiya liŵi. Mwakuyeruzgiyapu, zuŵa linyaki po ndapharazganga nyumba ndi nyumba munthu munyaki wangundibiya wayilesi mugalimotu yangu ndipu ndingwamba kumutchimbiza. Ndepafupi kumuko wangutaya wayilesi pasi ndipu wanguthaŵa. Ndati ndakonkhoske anyangu vo vinguchitika, mura munyaki wangundifumba kuti, “Stephen, watingi uchitengi wuli asani ungumuko?” Fumbu ili lingundiwovya kuti ndiŵanaŵaniyepu ukongwa ndipu ndinguwona kuti ndakhumbikanga kuyesesa mbwenu kuti ndije munthu wachimangu.

Mu October, 1974, ndingwamba kuchita uteŵeti wa nyengu zosi wakusambiza ŵanthu Bayibolu kwa maora 100 pamwezi. Pavuli paki, ndingwamba kuteŵete ku likulu la Akaboni aku Yehova ku Brooklyn, New York. Mu 1978, ndinguwere ku Los Angeles kuti nkhaphwere ama wo atamanga. Pati pajumpha vyaka viŵi, ndingutorana ndi Aarhonda. Iyu wangundiwovya ukongwa pa nyengu yo taphweriyanga ama mpaka po angufwiya. Pati pajumpha nyengu, ini ndi muwolu wangu Aarhonda tingusere sukulu yakusambiza Bayibolu ya Giliyadi ndipu pavuli paki tingutumizika ku Panama, ko tingulutirizga kuchita umishonale.

Kutuliya pa nyengu yo ndikubatizikiya, ndakumana ndi vinthu vinandi vo vatingi vindichitisengi kupumana ndi ŵanthu. Ndasambira kuti nditenere cha kuja pafupi ndi ŵanthu wo angandikwiyisa. Ndipuso ndikhumbika kuwuko mtima asani ŵanthu andikwiyisa. Ŵanthu anandi kweniso muwolu wangu atindilumba nyengu zosi chifukwa chakuleka kukwiya liŵi. Nani so ndizizwa mo ndichitiya vinthu sonu. Ndiwona kuti ndija ndatingi ndifiskengi cha kusintha. Bayibolu ndilu landiwovya kuti ndisinthi.—Ŵahebere 4:12.

MO NDAYANDULIYA:

Bayibolu landiwovya kuti ndije ndi umoyu wamampha ndipuso wachimangu. Ndikuleka kupuma ŵanthu, m’malu mwaki nditiŵawovya kuti achili mwauzimu. Ndingwamba kusambira Bayibolu ndi munthu yo tatinkhananga ukongwa ku Yunivesite. Wati wabatizika tingujapu chipinda chimoza kwa nyengu yitali. Titanjana ukongwa mpaka sonu panu. Ini ndi muwolu wangu tawovya ŵanthu akukwana 80 kuja Akaboni aku Yehova mwakusambira nawu Bayibolu.

Nditimuwonga ukongwa Yehova chifukwa chakundipaska umoyu wamampha ndipuso mabwezi ngamampha.