Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  July 2015

 NKHANI YA PAPEJI LAKWAMBA | KUMBI CHARU CHEPAFUPI KUMALA?

Ŵanthu Anandi Azamutaskika Namwiso Mungazitaskika

Ŵanthu Anandi Azamutaskika Namwiso Mungazitaskika

Pakukamba za vo vazamuchitika, Bayibolu lititi: “Pa nyengu yo kwazamukuŵa chisuzgu chikulu chakuti chechendachitikepu kutuwa po charu chikulengeke mpaka sonu . . . Kukamba uneneska, asani mazuŵa ngo nganguleka kufupikiskika, palivi yo watingi wataskikengi.” (Mateyu 24:21, 22) Kweni Chiuta watitilayizga kuti ŵanthu anandi azamutaskika. Iyu watiti: “Charu chiluta . . . , kweni yo wachita khumbu laku Chiuta wajengi kwamuyaya.”1 Yohane 2:17.

Kumbi ndi vinthu wuli vo mungachita kuti muzitaskiki? Kumbi mukhumbika kusunga katundu kuti munozgeke? Awa. Bayibolo lititichiska kuti titenere kuchita vinthu vinyaki m’malu mwa kusunga katundu. Ilu likamba kuti: “Pakuti vinthu vosi ivi vazamusongonoka, ŵanaŵaniyani kuti mukhumbika kuja munthu wa mtundu wuli. Mutenere kuja ŵanthu amijalidu yamampha ndipuso muchitengi ntchitu zakulongo kuti mukujipereka kwaku Chiuta. Muchitengi venivi muchilindizga ndipuso muchikumbuka zuŵa laku Yehova.” (2 Petro 3:10-12) Nkhani iyi yilongo kuti “vinthu” vinyaki vo vazamusongonoka, ndi mafumu nga charu ichi kweniso wosi wo asankha kuja kuchigaŵa chawu, m’malu mwakuja kuchigaŵa chaku Chiuta. Kukamba uneneska, kutangwanika ndi kusunga katundu, kungatiwovya cha kuti tizitaskiki.

Kuti tizitaskiki, tikhumbika kujipereka kwaku Yehova Chiuta, kusambira mijalidu yamampha ndipuso kuchita vinthu vo vitimukondwesa. (Zefaniya 2:3) M’malu mwakuchita vinthu vo ŵanthu anandi achita kweniso kuzerezga vinthu viheni vo vichitika vakulongo kuti te mu nyengu yapade, tikhumbika ‘kukumbuka zuŵa laku Yehova.’ Akaboni aku Yehova angakuwovyani mwakugwiriskiya ntchitu Bayibolu kuti muziŵi vo mungachita kuti muzitaskiki.