Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  July 2015

 NKHANI YA PAPEJI LAKWAMBA | KUMBI CHARU CHEPAFUPI KUMALA?

Kumbi “Umaliru” Ung’anamuwanji?

Kumbi “Umaliru” Ung’anamuwanji?

Kumbi muŵanaŵananji asani mwavwa mazu ngakuti “umaliru wepafupi”? Kumbi muŵanaŵana kuti mya yikuluyikulu yituwengi kuchanya ndi kuzibaya ŵanthu wosi? Pamwenga muŵanaŵana kuti kuchitikengi masoka ngachilengedu pamwenga nkhondu yachitatu yapacharu chosi? Ŵanthu anyaki angafipa mtima ukongwa ndi venivi. Anyaki awona kuti vingachitika cha, kweni anyaki angavitoliyaku kanthu cha.

Bayibolu likamba kuti “umaliru uzengi.” (Mateyu 24:14) Chakuchitika chenichi chidanika so kuti “zuŵa likulu laku Chiuta” pamwenga kuti nkhondu ya “Aramagedoni.” (Chivumbuzi 16:14, 16) Viwoneka kuti visopa ve ndi maŵanaŵanu ngakupambanapambana ndipuso ngambula kuvwika umampha pa nkhani iyi. Kweni Bayibolu likonkhoska umampha nkhani ya kumala kwa charu. Chakukondwesa so ukongwa nchakuti lititikambiya vo tingachita kuti tizitaskiki. Kumbi Bayibolu likambanji pa nkhani yakumala kwa charu? Tiyeni tiwoni fundu zaboza zo ŵanthu akamba ndipuso fundu zauneneska zo Bayibolu likamba.

 MAŴANAŴANU NGABOZA NGAKUKWASKANA NDI KUMALA KWA CHARU

  1. CHARU CHAZAMUNYEKA NDI MOTU.

    Bayibolu likamba kuti: “Chiuta wakujalikiska charu paviŵanja vakukho, ndipu chisukunyikengi cha mpaka muyaya.” (Sumu 104:5) Lemba ili lilongo kuti Chiuta wazamunanga charu chayichu ichi cha. Kweniso, pe malemba nganandi ngo ngasimikiziya fundu yeniyi. Chiuta wazomerezengi cha kuti ŵanthu achinangiyi limu charu.—Wakutaula 1:4; Yesaya 45:18.

  2. CHIUTA WAKUŴIKIYA LIMU CHA ZUŴA LAKUNANGIYA CHARU.

    Bayibolu likamba kuti: “Kukamba za zuŵa lo pamwenga ora laki, palivi yo waziŵa, chinanga mbangelu kuchanya, chinanga ndi Mwana, kweni Ada pe.” (Marko 13:32, 33) Ivi vilongo kuti Chiuta (yo ndi “Ada”) wakuŵikiya limu zuŵa lo wanangiyengi charu.

  3. UMALIRU WAZAMUKWAMBA NDI ŴANTHU PAMWENGA MYA YO YAZAMUKUWA KUTULIYA KUCHANYA.

    Kumbi nchinthu wuli cho chiyambisengi umaliru? Lemba la Chivumbuzi 19:11 likamba kuti: “Ndipu ndinguwona kuchanya kwakujulika; pavuli paki, ndinguwona kavalu mutuŵa. Ndipu yo wangukwera pachanya paki wadanika kuti Wakugomezgeka ndipuso Wauneneska.” Vesi 19 lilutirizga kuti: “Ndipu ndinguwona chinyama chakofya, mafumu nga charu, ndi ŵanthu ŵawu wo anguwungana kuti arwani nkhondu ndi yo wangukwera pakavalu ndi gulu laki lankhondu.” (Chivumbuzi 19:11-21) Chinanga kuti mazu nganandi pa lemba ili ngakuphiphirisa, kweni tingavwisa fundu yakuti Chiuta watumengi gulu laki lankhondu, wo mbangelu kuti azibayi arwani ŵaki wosi.

Uthenga wa m’Bayibolu wakumala kwa charu ngwakukondwesa

 FUNDU ZAUNENESKA ZAKUKWASKANA NDI UMALIRU

  1. MABOMA NGA ŴANTHU NGAZAMUBWANGANDULIKA.

    Bayibolu likamba kuti: “Chiuta wakuchanya wazamujalikiska ufumu wo wazamubwangandulika cha, ndipu ufumu waki wazamuperekeka ku mtundu wewosi cha wa ŵanthu. Kweni wazamuphwanya maufumu ngosi, ndipu wazamuwusa mpaka muyaya.” (Danyele 2:44) Ivi vikoliyana ndi fundu yachitatu yakuti mafumu nga charu ngazamuwungana kuti ‘ngarwani nkhondu ndi yo wakwera pakavalu’ ndi gulu laki lankhondu, kweni ngazamutuzgikapu.Chivumbuzi 19:19.

  2. NKHONDU, NKHAZA NDIPUSO VINTHU VAMBULA URUNJI VAZAMUMALA.

    Bayibolu likamba kuti, “[Chiuta] walekeska nkhondu pacharu chosi.” (Sumu 46:9) Likamba so kuti, “Arunji azamuja pacharu, ndipu ŵanthu ambula kunanga ndiwu azamujaliya pacharu; kweni aheni azamutuzgikamu mucharu ndipu achinyengu azamuchesekamu.” (Nthanthi 2:21, 22) Chiuta wakamba kuti, “Wonani! Ndipanga vinthu vosi kuti vije vifya.”Chivumbuzi 21:4, 5.

  3. VISOPA VABOZA VAZAMUMALA.

    Bayibolu likamba kuti, “Achimi akamba vaboza, ndipu asembi akandirizga ŵanthu mwakugwiriskiya ntchitu mazaza ngawu. . .  Kweni mwazamuchitanji asani umaliru waza?” (Yeremiya 5:31) Yesu wangukamba kuti, “Pazuŵa lo, anandi azamukamba kuti, ‘Ambuya, Ambuya, asi isi tachimanga mu zina linu, ndi kutuzga viŵanda ndipuso kuchita vakuziziswa vinandi mu zina linu?’ Kweni ini ndazakuŵakana kuti, ‘Nditikuziŵani cha! Tuwanipu yapa, mwaŵanthu ambula kuvwiya marangu imwi!’”Mateyu 7:21-23.

  4. ŴANTHU WO ACHITA VINTHU VIHENI AZAMUBAYIKA.

    Yesu Khristu wangukamba kuti: “Sonu chifukwa chakupereke cheruzgu ndi ichi, ukweru wafika m’charu, kweni ŵanthu ayanja ukongwa mdima m’malu mwa ukweru, chifukwa ntchitu zawu ziheni.” (Yohane 3:19) Bayibolu liyeruzgiya mo Yehova wangubayiya ŵanthu aheni m’nyengu yaku Nowa ndi mo wazamubayiya so ŵanthu aheni pa umaliru wa charu. Likamba kuti: “Ndi mazu ngenanga, kuchanya ko kulipu sonu limoza ndi charu chapasi avisungiya motu pa zuŵa la cheruzgu ndi lakunangiya ŵanthu wo aleka kopa Chiuta.”—2 Petro 3:5-7.

Lemba ili lilongo kuti pa “zuŵa la cheruzgu” Yehova wazamunanga charu nge mo wanguchitiya m’nyengu yaku Nowa. Kumbi ncharu wuli cho chingunangika? Charu chayichu chingunangika cha, kweni ‘ŵanthu ambula kopa Chiuta’ ndiwu angubayika. Ivi ndivu so vazamuchitikiya ŵanthu wo aleka kopa Chiuta pa “zuŵa la cheruzgu.” Kweni ŵanthu wo ŵe pa ubwezi ndi Chiuta azamutaskika nge mo venge ndi Nowa ndi banja laki.Mateyu 24:37-42.

Ŵanaŵaniyani mo charu chazamutowe asani Chiuta wazituzgapu vinthu vosi viheni! Mwaviyo, uthenga wa m’Bayibolu wakumala kwa charu ngwakukondwesa ukongwa. Kweni panyaki mungajifumba mbwenu kuti: Kumbi Bayibolu lizumbuwa kuti umaliru uzengi zukwanji? Kumbi wepafupi? Kumbi ndingachita wuli kuti ndizitaskiki?