Kumbi mungachita wuli asani liŵavu linu losi ligwira nchitu umampha cha, kupatuwaku masu? Ndimu viliri ndi mku wangu, Jairo. Kweni iyu waja umoyu walikondwa. Ndechendakonkhoski vo vitimuchitiska kuti wakondwengi, ndikukonkhoskiyeni dankha mbiri ya umoyu waki.

Jairo wakuwa ndi nthenda yinyaki yo yitimbanyizga mo wongu ugwiriya nchitu (spastic quadriplegia). * Chifukwa cha venivi, viŵaru vaki vinandi vigwira nchitu umampha cha. Nyengu zinyaki wanyutuka nge munthu wavizilirisi. Ivi vichitiska kuti wajipwetekengi pamwenga kupweteka ŵanthu wo aja pafupi asani aleka kuphwere. Mwaviyo, kanandi manja ndipuso malundi ngaki titingamangiriya kunjinga yo watendapu kuti waleki kujipweteka pamwenga kupweteka anyaki.

WAKUKUWA MWAKUSUZGIKIYA

Jairo wakukuwa mwakusuzgikiya ukongwa. Wati wakwaniska myezi yitatu, wangwamba kutamatama kweniso nyengu zinyaki wanyutukanga. Kanandi Ama awonanga nge kuti wafwa ndipu atchimbiriyanga nayu kuchipatala.

Jairo wakupunduka chifukwa chakunyutukanyutuka. Wati wafika vyaka 16, wangudengenduka chiwunu, mwaviyo wakhumbikanga kuchitika opaleshoni yikulu. Ndikumbuka mo iyu waliliyanga usiku wewosi pavuli pakuti amuchita opaleshoni.

Chifukwa chakuti viŵaru vaki vinandi vigwira nchitu cha, wakhumbika chovyu pa vinthu vosi nge kurya, kuvwala ndipuso kugona. Ama ndi Ada ndiwu kanandi atimuwovya. Chinanga kuti Jairo wathemba ŵanthu kuti amuwovyi, kanandi apapi ŵidu atimukumbuska kuti wakhumbika kuthemba so Chiuta.

NTHOWA YAKUKAMBISKIYANA NAYU

Apapi ŵidu Mbakaboni aku Yehova, ndipu akwamba kumuŵerenge Jairo nkhani za m’Bayibolo kutuliya weche mwana. Yiwu aziŵa kuti munthu wangaja walikondwa asani we pa ubwezi ndi Chiuta. Aziŵanga so kuti Jairo wangaja ndi likondwa kweniso chilindizga chamampha chinanga kuti viŵaru vaki vigwira nchitu cha ndipu nyengu zinyaki wanyutuka. Kweni akayikanga kuti wangavwa uneneska wa m’Bayibolo.

Zuŵa linyaki Jairo weche mwana, Ada angumukambiya kuti: “Jairo longoro nani asani utindiyanja.” Jairo wangwamba kuliya. Chinanga kuti wanguyesesa kuti walongoro, vo wangukamba  vinguvwika umampha cha. Ada angujimba mlandu chifukwa anguchitiska kuti Jairo waliyi. Vo Jairo wanguchita vingulongo kuti wavwanga vo Ada akambanga. Kweni iyu watondekanga kulongoro.

Pechendajumphi nyengu, apapi ŵidu angusaniya kuti nyengu zinyaki Jairo wayendesanga masu ngaki kuti wakambi vo wakhumba. Iyu wakondwanga cha asani taleka kuvwa vo wang’anamuwanga. Kweni wamwemwetiyanga asani wawona kuti apapi aziŵa vo iyu wang’anamuwa ndipuso vo wakhumba kuti amuchitiyi. Iyi ndiyu yenga nthowa yaki yakuwonge.

Dokotala munyaki wangutikambiya kuti tisoskengi manja asani tamufumba fumbu lakuti wazomeri pamwenga wakani. Janja lamaryi lamiyanga hinya ndipu lamazge lamiyanga awa. Mwaviyo, iyu watikambiyanga vo wakhumba mwakulereska janja lamaryi pamwenga lamazge.

CHINTHU CHAKUZIRWA UKONGWA PA UMOYU WAKU JAIRO

Akaboni aku Yehova achita maunganu ngakulungakulu katatu pachaka. Jairo wakondwanga ukongwa kuvwisiya nkhani ya ubatizu. Wati wafika vyaka 16, Ada angumufumba Jairo kuti, “Ukhumba kubatizika?” Iyu wangulereska janja lamaryi la Ada kulongo kuti wazomera. Ada angumufumba so kuti, “Wamulayizga Chiuta mu rombu kuti umuteŵetiyengi kwa umoyu waku wosi?” Iyu wangulereska so janja lamaryi la Ada. Yapa vinguwoneke limu kuti Jairo wakujipereka kuti wateŵetiyengi Yehova.

Wati wasambira Bayibolo, Jairo wanguziŵa vo ubatizu ung’anamuwa. Mu 2004, wangumuka fumbu lakukhumbika ukongwa pa umoyu waki lakuti, “Kumbi wajipatuliya kwaku Chiuta kuti uchiti khumbu laki?” Jairo wangumuka fumbu ili mwakulereska kuchanya. Venivi ndivu angumukambiya kuti wazichiti pakumuka kuti hinya. Iyu wangubatizika we ndi vyaka 17, ndipu wanguja Kaboni waku Yehova.

WAGWIRISKIYA NCHITU MASU PA VINTHU VAMAMPHA

Mu 2011, pangusanirika kompyuta yo tigwiriskiya nchitu pakukambiskana nayu. Pakompyuta iyi pe pulogilamu yinyaki yo ye ndi vithuzi kweniso mazu nganyaki ngo ngatimuwovya kukamba vo wakhumba. Asani walereska chithuzi chakuyanana ndi vo wakhumba, kompyuta iyi yilongoro mazu ngo nge pachithuzi cho.

 Wati wayamba kuvwisa vo Bayibolo likamba, Jairo wakhumbisiskanga kuwovya so anyaki. Asani tisambira Bayibolo sabata yeyosi nge banja, kanandi watindilereska kweniso walereska pakompyuta yaki. Yeniyi ndi nthowa yakundikambiya kuti ndimulembe ndemanga yo wakhumba kuchipereka pa maunganu nga mpingu.

Asani te pa maunganu, walereska pakompyuta yaki kuti wajuli ndemanga ndipu mpingu wosi uvwisiya vo iyu wakhumba kukamba. Nyengu zosi wasekere asani wapereka ndemanga ndipu venivi vichiska mpingu. Alex yo ndi mubwezi waki, wakamba kuti: “Ndikondwa ukongwa asani Jairo wapereka ndemanga.”

Jairo wagwiriskiya nchitu kompyuta yaki kuti wapereki ndemanga pa maunganu kweniso kuti wapharazgiyi ŵanthu

Jairo wagwiriskiya so nchitu masu ngaki kuti wapharazgiyi ŵanthu. Wachita ivi mwakulereska chithuzi chakulongo kuti kunthazi mu paradayisu, ŵanthu amitundu yakupambanapambana kweniso nyama azamuja pamoza mwachimangu. Asani chithuzi ichi chajulika, kompyuta yaki yilongolo mazu ngakuti, “Bayibolo lisambiza kuti charu chosi chazamuja paradayisu ndipu kwazamuŵavi matenda kweniso nyifwa, Chivumbuzi 21:4.” Asani munthu yo wakambiskana nayu walongo kuti wakhumba kuziŵa vinandi, kompyuta yaki yitimufumba kuti, “Mungayanja kusambira Bayibolo ndi ini?” Auskewu ŵa ama anguzomera kusambira Bayibolo ndi Jairo. Tingukondwa ukongwa kuti Kaboni munyaki wangujipereka kuwovya Jairo pakusambiza ambuya. Ambuya angubatizika pa unganu wachigaŵa wo unguchitikiya ku Madrid mu August 2014.

Asambizi wosi kusukulu kwaki aziŵa umampha kuti Jairo watanja ukongwa Chiuta. Mwakuyeruzgiyapu, Rosario wangukamba kuti: “Asani ndingakhumba kusere chisopa, ndingasere cha Akaboni aku Yehova. Jairo wakondwa chifukwa cha vo wagomezga chinanga kuti wakumana ndi masuzgu.”

Nyengu zosi Jairo wakondwa asani nditimuŵerenge layizgu la m’Bayibolo lakuti: “Akupunduka akaurukanga, uli ndi mphoyo, lilimi la wambuwu likambanga ndi likondwa.” (Yesaya 35:6) Chinanga kuti nyengu zinyaki waguŵa kweni kanandi waja walikondwa. Ivi ve viyo chifukwa chakuti we pa ubwezi wamampha ndi Chiuta kweniso wakusaniya mabwezi mumpingu wachikhiristu. Likondwa laki lilongo kuti kuteŵete Yehova nkhwakumbika ukongwa chinanga kuti tikumana ndi masuzgu.

^ ndimi 5 Pe matenda nganyaki ngo ngatimbanyizga wongu wa munthu ndipu viŵaru vaki vitondeka kugwira nchitu umampha. Matenda yanga ngadanika kuti Cerebral palsy (CP) ndipu ngachitiska so kuti munthu watamengi mwamabuchibuchi, wanyutukengi, wasuzgikengi kurya kweniso kulongoro. Spastic quadriplegia ndi nthenda yikulu ukongwa m’gulu la CP ndipu yichitiska kuti manja kweniso malundi ngaje ngakumila ndipuso khosi lije lakulopwa.