Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  March 2015

Anthurumi—Muchitengi Vinthu Mwachanju ndi Awolu Ŵinu

Anthurumi—Muchitengi Vinthu Mwachanju ndi Awolu Ŵinu

KUMBI munthurumi wangavikiliya wuli muwolu waki? Ŵanthu anandi awona kuti chinthu chakukhumbika ukongwa cho munthurumi watenere kuchita nkhusaniriya ndalama banja laki. Kweni viwoneka kuti anthukazi anyaki asuzgika mbwenu maŵanaŵanu chinanga kuti akutorana ndi munthurumi wakukhupuka. Mwakuyeruzgiyapu, Rosa wa ku Spain wangukamba kuti, “Asani te pagulu la ŵanthu murumu wangu wawonekanga nge munthu wamampha, kweni asani tafika kunyumba wachitanga vinthu mwankhaza.” Joy wa ku Nigeria wangukamba kuti, “Asani tapambana maŵanaŵanu ndi murumu wangu, wandikambiyanga kuti, ‘Uchitengi vosi vo ndakamba chifukwa nde murumu waku.’”

Kumbi munthurumi wangafiska wuli udindu waki mwachanju? Kumbi wangachita wuli kuti nyumba yaki yije nge malu “ngakupumuliyapu” muwolu waki?Ruti 1:9, NW.

KUMBI BAYIBOLO LIKAMBA KUTI MUNTHURUMI WE NDI UDINDU WULI M’BANJA?

Chinanga kuti Chiuta wawona kuti munthurumi ndi munthukazi ayanana ŵaka, kweni Bayibolo likamba kuti weyosi we ndi udindu waki m’banja. Lemba la Ŵaroma 7:2 likamba kuti munthukazi wakuyirwa “wamangika ndi dangu ku murumu waki.” Nge mo mawupu ngakupambanapambana ngasankhiya munthu kuti walongozgengi vakuchita, Chiuta nayu wakusankha munthurumi m’banja kuti waje mutu wa muwolu waki. (1 Ŵakorinte 11:3) Anthurumi ndiwu atenere kulongozga mabanja ngawu.

Kumbi anthurumi angalongozga wuli mabanja ngawu? Bayibolo likambiya anthurumi kuti, “Yanjani awolu ŵinu, uli ndimo Khristu nayu wangwanjiya eklesiya.” (Ŵaefesu 5:25) Chinanga kuti Yesu wenga wambula kuto, kweni chakuwoniyapu chaki chingawovya anthurumi kuti alongozgengi umampha mabanja ngawu. Tiyeni tiwoni mo angachitiya.

ATHURUMI ATENERE KUCHITA VINTHU NGE MO YESU WACHITIYANGA

Yesu wayesesanga kupembuzga ŵanthu ndipuso kuŵawovya. Yesu wangukambiya ŵanthu wosi wo asuzgikanga m’nthowa zakupambanapambana kuti: “Zani kwaku ini, . . . ndipu ini ndikupumuzganingi.” (Mateyu 11:28, 29) Kanandi iyu waŵawovyanga mwakuliŵavu kweniso kuti aje pa ubwezi ndi Yehova. Ndichu chifukwa chaki ŵanthu anandi azanga kwaku Yesu ndipu agomezganga ndi mtima wosi kuti waŵawovyengi.

Mo anthurumi angayezge Yesu. Muyesesengi kuŵawovya nchitu awolu ŵinu. Anthukazi anandi adandawula nge mo Rosa wangukambiya  kuti: “Murumu wangu wandiwonanga nge wanchitu waki.” Munthu munyaki yo we ndi banja lalikondwa zina laki Kweku, wangukamba kuti: “Kanandi nditimufumba muwolu wangu asani pe nchitu zinyaki zo ndingamuwovya. Chifukwa chakuti nditimuyanja ukongwa nditimuwovya nchitu zapakhomu.”

Yesu waŵanaŵaniyanga ŵanthu ndipu waŵachitiyanga lisungu. Munthukazi munyaki wangutama nthenda yakusuluwa ndopa kwa vyaka 12. Wati wavwa vakuziziswa vo Yesu wachitanga, nyengu zosi wakambanga kuti, “Asani ndingakwaska chinanga ndi minjilira yaki pe nkhachiranga.” Waneneskanga nadi. Iyu wanguza kwaku Yesu ndipu wanguko mphonji za chakuvwala chaki ndipu wanguchira nyengu yeniyo. Chinanga kuti ŵanthu anyaki awonanga nge kuti munthukazi uyu wanguchita vinthu mwakujikuzga, kweni Yesu wanguziŵa kuti chenga chifukwa chakuti wakhumbanga chovyu. * Yesu wangumukambiya  mwachanju kuti: “Mwana munthukazi we, . . . uchizgiki ku nthenda yaku.” Iyu wangukhumba cha kuti wamuchitiski soni pamwenga kumunena. M’malu mwaki, wanguzomera kuti wamuchizgi. Ivi vingulongo kuti Yesu wenga wachanju ndipuso wachitiyanga ŵanthu lisungu.Marko 5:25-34.

Mo anthurumi angayezge Yesu. Asani muwolu winu watama, longoni kuti mutimuyanja. Yesesani kuchita vinthu mwakukoliyana ndi maŵanaŵanu ngaki ndipuso mumuvwisisengi. Mwakuyeruzgiyapu, Ricardo wangukamba kuti, “Asani muwolu wangu wakwiya ukongwa nditesesa kujiko kuti ndileki kukamba vinthu vo vingamukwiyisa so ukongwa.”

Yesu wakambiskananga ndi akusambira ŵaki. Yesu wakambiskananga ndi akusambira ŵaki vinthu vakupambanapambana. Iyu wangukamba kuti, “Ndakuziŵiskani vosi vo ndavwa ku Ada.” (Yohane 15:15) Mbuneneska kuti nyengu zinyaki Yesu wakhumbanga malu ngakuyija kuti walunguruki kweniso kuromba. Kweni kanandi waŵakambiyanga akusambira ŵaki vo waŵanaŵana mumtima. Usiku wakuti wafwengi mawa, wangukambiya akusambira ŵaki kutuliya pasi pamtima kuti wenga ‘walisungu ukongwa.’ (Mateyu 26:38) Chinanga kuti nyengu zinyaki akusambira ŵaki amuguŵiskanga, Yesu walekanga cha kukambiskana nawu.Mateyu 26:40, 41.

Kuchita vinthu nge mo Yesu wachitiyanga kungawovya anthurumi kuti aje mitu yamampha ya mabanja

Mo anthurumi angayezge Yesu. Mukambiskanengi ndi awolu ŵinu mwakufwatuka. Nyengu zinyaki munthukazi wangadandawula kuti murumu waki wafwatuka kukambiskana ndi ŵanthu anyaki, kweni kunyumba waja ŵaka cheti. Chifukwa chakuti murumu waki wakambiskana nayu mwakufwatuka, Ana wangukamba kuti, “Ndiwona kuti murumu wangu watindiyanja ukongwa ndipu nani nditimuyanja.”

Lekani kuja ŵaka cheti ndi chilatu chakuti mukhawuliski awolu ŵinu. Munthukazi munyaki wangukamba kuti, “Asani murumu wangu wandikwiyiya, wajanga mazuŵa nganandi kwambula kukambiskana nani. Ndajimbanga mlandu ndipuso ndajiwonanga nge wambula kukhumbika.” Kweni Edwin wayesesa kuyezga Yesu. Ndipu iyu wanguti, “Asani ndakondwa navu cha, ndimuka nyengu yeniyo cha. Ndisaniya nyengu yamampha kuti tikambiskani.”

Joy yo tamuzumbuwa kukwamba kwa nkhani iyi, wawona kuti murumu waki wasintha ukongwa kutuliya po wangwambiya kusambira Bayibolo ndi Akaboni aku Yehova. Iyu wangukamba kuti, “Wasintha ukongwa ndipu wayesesa kuchita nani vinthu mwachanju nge mo Yesu wachitiyanga ndi ŵanthu.” Mabanja nganandi ngawovyeka ndi ulongozgi wa m’Bayibolo. Kumbi namwi mungayanja kusambira Bayibolo? Kambiskanani ndi Akaboni aku Yehova kuti musambirengi Bayibolo kwawezi.

^ ndimi 10 Mwakukoliyana ndi Chilangulu chaku Mosese, munthukazi uyu wenga wakufipiskika ndipu weyosi yo watingi wamukwaskengi watingi waŵengi wakufipiskika.Ŵalevi 15:19, 25.