Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  March 2015

Kumbi Titenere Kuromba Kwaku Yesu?

Kumbi Titenere Kuromba Kwaku Yesu?

MUNTHU munyaki wangupereka mapepala nga mafumbu kwa ampupuka 800 a m’visopa vakupambanapambana kuti amuki asani agomezga kuti Yesu wamuka marombu. Ampupuka akujumpha 480 angumuka kuti hinya. Kweni msungwana munyaki wangubayapu zina lakuti Yesu ndipu wangulembapu kuti “Chiuta” ndiyu wamuka marombu.

Nanga imwi muŵanaŵana wuli? Kumbi tikhumbika kuromba kwaku Yesu pamwenga Chiuta? * Kuti tisaniyi kwamuka, tiyeni tiwoni dankha mo Yesu wangusambiziya akusambira ŵaki mo angarombe.

KUMBI YESU WANGUKAMBA KUTI TIROMBENGI KWAKU YANI?

Yesu wangulongo yo tingarombaku.

Yesu wangulongo chakuwoniyapu chamampha mwakuromba kwa Awiski akuchanya

MO WANGUSAMBIZIYA: Wakusambira munyaki wati wapempha Yesu kuti, “Ambuya, tilunguchizgeni ifwi kuromba,” Yesu wangumuka kuti: “Penipo muromba, nenani ‘Dada.’” (Luka 11:1, 2) Pa Upharazgi waki wa pa Phiri, Yesu wanguchiska wo amuvwisiyanga kuti arombengi. Iyu wanguŵakambiya kuti arombengi kwa Ada. Wanguŵakambiya so kuti: “Auskemwi aziŵa vo mukavuka, mweche mundaŵapemphi.” (Mateyu 6:6, 8) Usiku wakumaliya wakuti iyu wafwengi, Yesu wangukambiya akusambira ŵaki kuti: “Asani mwazamupempha Ada kanthu, mu zina langu azamukupaskani.” (Yohane 16:23) Yesu wakutisambiza kuti tirombengi kwa Awiski, Yehova Chiuta, wo nasi mba Da ŵidu.Yohane 20:17.

VO WANGUCHITA: Nge mo wangusambiziya anyaki, Yesu nayu wanguromba kwa Awiski kuti: “Nditikurumbani, Ada, Mbuya wa kuchanya ndi panupasi.” (Luka 10:21) Kweniso nyengu yinyaki, “Yesu wanguyunuskiya kuchanya masu ngaki, wanguti, ‘Ada, nditikuwongani kuti mwandivwa.’” (Yohane 11:41) We pafupi kufwa, Yesu wanguromba kuti: “Ada, mumanja nginu ndiŵika mzimu wangu!” (Luka 23:46) Yesu wangulongo chakuwoniyapu chamamapha kwaku tosi. Iyu wanguromba kwa Awiski yo ndi Chiuta, “mweni kuchanya ndi pasi.” (Mateyu 11:25; 26:41, 42; 1 Yohane 2:6) Kumbi venivi ndivu Akhristu akwamba achitanga pakuromba?

KUMBI AKHRISTU AKWAMBIRIYA AROMBANGA KWAKU YANI?

Pati pajumpha masabata ngamanavi Yesu wati wawere kuchanya, ŵanthu akususka angwamba kusuzga akusambira ŵaki ndipuso aŵawofyezanga. (Machitidu 4:18) Yiwu arombanga kuti asaniyi chovyu. Kumbi arombanga kwaku yani? Yiwu “angusamphuskiya mazu [ngawu] kwaku Chiuta,” kuti walutirizgi kuŵawovya kuziya “mu zina la muŵanda [waki] wakupaturika, Yesu.” (Machitidu 4:24, 30) Ivi vilongo kuti yiwu angulondo vo Yesu wanguŵakambiya pa nkhani ya rombu. Yiwu arombanga kwaku Yesu cha kweni kwaku Chiuta.

Pati pajumpha vyaka, wakutumika Paulo wangukonkhoska mo iyu ndi anyaki arombiyanga. Iyu wangulembe Akhristu anyaki kuti: “Tiwonga Chiuta Awiski a Mbuyafwi Yesu Khristu, pakurombe imwi nyengu zosi.” (Ŵakolose 1:3) Paulo wangulembe so Akhristu anyaki kuti nyengu zosi awongengi “Chiuta ndi Dada pa chifukwa chaku vosi mu zina la Ambuyafwi  Yesu Khristu.” (Ŵaefesu 5:20) Mazu yanga ngalongo kuti Paulo wachiskanga anyaki kuti arombengi kwaku Chiuta m’zina laku Yesu.—Ŵakolose 3:17.

Mwakuyanana ndi Akhristu akwamba, nasi tingalongo kuti titanja Yesu mwakuvwiya vo iyu wangukamba pa nkhani ya rombu. (Yohane 14:15) Asani tiromba kwa Awuskefwi akuchanya pe nyengu zosi, tiŵengi ndi chigomezgu kuti Yehova watuvwa marombu ngidu ndipu tikambengi mazu ngo wakulemba sumu munyaki wakukamba pa Sumu 116:1, 2. Iyu wangukamba kuti: ‘Nditanja Ambuya, chifukwa atindivwa; . . . nyengu zosi.’ *

^ ndimi 3 Malinga ndi vo Bayibolo likamba, Chiuta ndi Yesu ayanana cha. Kuti muziŵi vinandi, wonani mutu 4 m’buku lakuti Kumbi Bayibolo Lisambizanji Weniukongwa? lakupharazgika ndi Akaboni aku Yehova.

^ ndimi 11 Kuti Chiuta wamukengi marombu ngidu, tikhumbika kuyesesa kuvwiya vo iyu wakhumba. Kuti muziŵi vinandi, wonani mutu 17 m’buku lakuti Kumbi Bayibolo Lisambizanji Weniukongwa?