Julani

Lutani pa vo ve mukati

Kumbi Muziŵa?

Kumbi Muziŵa?

Kumbi mazu nga m’Bayibolo ngakuti “wamthenu” ngang’anamuwanji?

Chithuzi cha munthu wakutheneka wa ku Siriya

Nyengu zinyaki mazu yanga ngamiya munthurumi wakutheneka. Kali ŵanthu athenekanga kuti aŵakhawulisi pamwenga asani akoleka ukapolu. Anthurumi akutheneka wo ŵenga akugomezgeka aŵikikanga kuti awoneriyengi nyumba yakujamu anthukazi panyumba ya mafumu. Mwakuyeruzgiyapu, Hege kweniso Shashagazi wo ŵenga akutheneka, anguŵikika kuti awoneriyengi nyumba ya anthukazi aku Ahaswerusi, Fumu ya ku Perese. Fumu yeniyi ndiyu anandi awona kuti yenga Serese Wakwamba.Estere 2:3, 14.

Kweni mbanthu wosi cha wo Bayibolo litiŵadana kuti ‘amthenu’ wo ŵenga akutheneka nadi. Ŵanthu anyaki akusambira va Bayibolo akamba kuti mazu yanga angagwiriskiyanga so nchitu pakukamba za ŵanthu wo ŵenga ndi udindu m’bwalu la fumu. Panyaki ndichu chifukwa chaki Ebedimeleke yo wenga mubwezi waku Yeremiya kweniso munthu wa ku Etiopia yo Filipu wangumupharazgiya azumbulika kuti ‘mbamuthenu.’ Ebedimeleke watenere kuti wenga ndi udindu ukulu chifukwa wakambiskananga ndi Fumu Zedekiya masu ndi masu. (Yeremiya 38:7, 8) Munthu wa ku Etiopia wakambika kuti wenga wakuwonere chuma cha fumu ndipu “wanguza kuzachisopa mu Yerusalemu.”Machitidu 8:27-28.

Nchifukwa wuli kali aliska apatuwanga mbereri ndi mbuzi?

Po wakonkhoskiyanga akusambira ŵaki za zuŵa la cheruzgu lo lituza, Yesu wangukamba kuti: “Penipo wakazanga Mwana wa munthu mu unkhankhu waki, . . . wakaŵagawuwanga yumoza ku munyaki, uli ndimo mliska wagawuliya mbereri ku mbuzi.” (Mateyu 25:31, 32) Nchifukwa wuli aliska apatuwanga mbereri ndi mbuzi?

Kanandi ndi msana, mbereri zayendiyanga limoza ndi mbuzi ndipuso zaryinga limoza. Ndipu ndi mazulu azijaliyanga m’makhola kuti azivikiliyi ku vinyama vakofya, ankhungu ndipuso kuzizira. (Chiyambo 30:32, 33; 31:38-40) Nyama izi aziŵikanga m’makhola ngakupambana kuti mbereri zakufwasa, zinthukazi kweniso tana, zileki kupwetekeka ndi mbuzi zikali. Buku linyaki likamba kuti aliska apatuwanga mbereri ndi mbuzi asani zikhumba kubala, asani akama mkaka ndipuso asani atizimeta. Chakuyeruzgiyapu cho Yesu wangukamba chenga chakuvwika kwaku wo amuvwisiyanga chifukwa awonanga mo aliska achitiyanga ndi mbereri ndipuso mbuzi.