Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  January 2015

 NKHANI YA PAPEJI LAKWAMBA | MUNGAJA PA UBWEZI WAKUKHO NDI CHIUTA

Kumbi Zina Laku Chiuta Mutiliziŵa ndi Kuligwiriskiya Nchitu?

Kumbi Zina Laku Chiuta Mutiliziŵa ndi Kuligwiriskiya Nchitu?

Kumbi mwe ndi mubwezi winu munyaki yo zina laki muleka kuliziŵa? Ivi vingachitika cha. Munthukazi munyaki wa ku Bulgaria, zina laki Irina, wangukamba kuti: “Mungaja cha pa ubwezi wakukho ndi Chiuta asani zina laki muleka kuliziŵa.” Nge mo tawone m’nkhani yajumpha, Chiuta wakhumba kuti muziŵi zina laki kweniso muje nayu pa ubwezi. Ndichu chifukwa chaki kuporote m’Bayibolo Chiuta watitikambiya kuti: “Ndini Ambuya [“Yehova,” NW], lo ndilu zina langu.”Yesaya 42:8.

Chiuta wakhumba kuti mumuziŵi ndipu kuporote m’Bayibolo wakamba kuti: “Ndini Ambuya [“Yehova,” NW], lo ndilu zina langu.”Yesaya 42:8

Kumbi Yehova wawona kuti imwi mutenere nadi kuziŵa zina laki ndi kuligwiriskiya nchitu? Ŵanaŵaniyani ivi: Zina laku Chiuta lo lilembeka ndi vilembu vinayi va Chihebere (Tetragrammaton), lisanirika maulendu 7,000, m’mipukutu yakwamba ya Malemba Ngachihebere. Zina ili lizumbulika maulendu nganandi m’Bayibolo kuluska zina linyaki lelosi. Uwu mbukaboni wakuti Yehova wakhumba kuti tiziŵi zina laki ndi kuligwiriskiya nchitu. *

Kanandi ŵanthu wo akhumba kuja pa ubwezi atamba kuziŵana mazina. Kumbi zina laku Chiuta mutiliziŵa?

Kweni ŵanthu anyaki angaŵanaŵana kuti kugwiriskiya nchitu zina laku Chiuta nkhumudelera chifukwa chakuti iyu ndi mutuŵa kweniso Ngwanthazizosi. Mbuneneska nadi kuti kugwiriskiya nchitu zina laku Chiuta m’nthowa yambula kwenere nkhunanga, nge mo vingaŵiya ndi zina la munthu yo mutimuyanja. Kweni Yehova wakhumba kuti weyosi yo watimuyanja, watumbikengi zina laki ndi kovya anyaki kuti aliziŵi. (Sumu 69:30, 31; 96:2, 8) Yesu wangusambiza akusambira ŵaki kuti arombengi kuti: “Awuskefwi mwaŵakuchanya, lipaturiki zina linu.” Nasi tingalongo kuti titumbika zina laku Chiuta mwakovya ŵanthu anyaki kuti aliziŵi. Ndipu ivi vititovya kuti tije nayu pa ubwezi wakukho.Mateyu 6:9.

Bayibolo lilongo kuti Chiuta wakondwa ukongwa ndi ŵanthu wo ‘aŵanaŵaniya pa zina laki.’ (Malaki 3:16) Ndipu Yehova watiŵalayizga kuti: ‘Ndiŵavikiriyengi wo ŵatindiziŵa. Ŵakandidananga, ndikaŵamukanga; ŵachiŵa musuzgu.’ (Sumu 91:14, 15) Kuziŵa ndi kugwiriskiya nchitu zina lakuti Yehova nkhwakukhumbika ukongwa asani tikhumba kuja pa ubwezi wakukho ndi iyu.

^ ndimi 4 Kweni vakupaska chitima limu kuti m’Mabayibolo nganandi kusazgiyapu la Chitonga la Mazgu Ghaku Chiuta, akutuzgamu zina laku Chiuta chinanga kuti lisanirika maulendu nganandi m’mipukutu yakwamba ya Malemba Ngachihebere ngo ŵanthu anandi atingadana kuti Chipanganu Chakali. M’malu mwaki, akulembamu mazina nga udindu nge “Ambuya” pamwenga “Chiuta.” Kuti muziŵi vinandi pa nkhani iyi, wonani buku la, Kumbi Bayibolo Lisambizanji Weniukongwa? peji 195 mpaka 197 lakupharazgika ndi Akaboni aku Yehova.