Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  January 2015

 NKHANI YA PAPEJI LAKWAMBA | MUNGAJA PA UBWEZI WAKUKHO NDI CHIUTA

Kumbi Muchita vo Chiuta Wakhumba?

Kumbi Muchita vo Chiuta Wakhumba?

Mungamukambiya cha munthu yo muleka kumuziŵa pamwenga mulendu kuti, “nde wakunozgeka kukuchitiyani chechosi cho mukhumba.” Kweni mungasuzgika cha kukambiya mazu yanga munthu yo mutanjana nayu ukongwa. Kanandi mabwezi ngatanja kuchitirana vinthu vo munyaki wakhumba.

Bayibolo lilongo kuti nyengu zosi Yehova wachita vinthu vo vingakondweska ŵanthu ŵaki wo atimusopa. Mwakuyeruzgiyapu, Fumu Davidi yo wenga pa ubwezi wakukho ndi Chiuta wangukamba kuti: “Ambuya, Chiuta wangu, mwandaniska nchitu zinu zakuziziswa ndi maŵanaŵanu nginu nga paku ifwi. . . . Ngaŵa nganandi ngambura maŵerengeka.” (Sumu 40:5) Yehova wachitiya so vinthu vamampha ŵanthu wo aleka kumuziŵa ndipu ‘wagutiska mitima yawu ndi vakurya ndi likondwa.’Machitidu 14:17.

Tichitiya vinthu vamampha ŵanthu wo titiŵayanja ndi kuŵatumbika

Chifukwa chakuti Yehova watanja kuchita vinthu vo vikondweska anyaki, mphakuvwika kuti wo akhumba kuja nayu pa ubwezi achitengi vinthu vo ‘vingakondwereska mtima’ waki. (Nthanthi 27:11) Kweni kumbi ndi vinthu nivi vo imwi mungachita kuti mukondweski Chiuta? Bayibolo limuka kuti: “Kuchita umampha ndi kusangana kwawezi mungaluwanga cha: pakuti ndi visopu vaviyo Chiuta wakondwereskeka ukongwa.” (Ŵahebere 13:16) Kumbi ivi ving’anamuwa kuti kuchita vinthu vamampha ndipuso kusangana ndi anyaki ndivu vakukhumbika pe kuti tikondweski Yehova?

Bayibolo likamba kuti: “Kwambura chivwanu kutondeka kumkondweska [Chiuta].” (Ŵahebere 11:6) Ivi ndivu Abrahamu wanguchita. Iyu “wanguvwana mwaku Chiuta” dankha, ndipu “wangutamulika bwezi laku Chiuta.” (Yakobe 2:23) Yesu Khristu wangukamba so kuti titenere ‘kuvwana mwaku Chiuta’ asani tikhumba kuti Chiuta watitumbiki. (Yohane 14:1) Sonu kumbi mungachita wuli kuti muje ndi chivwanu cho Chiuta wakhumba kuti ŵanthu wo ŵe nayu pa ubwezi ajengi nachu? Mungayamba ndi kusambira Mazu Ngaku Chiuta, Bayibolo nyengu zosi. Ivi vingachitiska kuti “muzaziki ndi chiziŵisku cha khumbu laki,” cho chingakuwovyani kuti ‘mumukondweskengi.’ Ndipu asani mulutirizga kuziŵa vinandi vakukwaskana ndi Yehova ndi kugwiriskiya nchitu fundu zaurunji zo musambira, chivwanu chinu mwaku Yehova chikuwengi ndipu mujengi nayu pa ubwezi wakukho.Ŵakolose 1:9, 10.