Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 3 2016

Kumbi Muziŵa?

Kumbi Muziŵa?

Kumbi awiski aku Yosefe ŵenga ayani?

A Yosefe wo agwiranga ntchitu ya ukalipentala ndiwu ŵenga awiski aku Yesu wo angumulela. Kumbi awiski aku Yosefe ŵenga ayani? Mbiri ya banja laku Yesu yo yikulembeka mubuku la Mateyu yikamba kuti Yosefe wenga mwana waku Yakobe kweni buku la Luka likamba kuti wenga “mwana waku Heli.” Ntchifukwa wuli malemba yanga ngakamba vakupambana?Luka 3:23; Mateyu 1:16.

Buku la Mateyu likamba kuti: “Yakobe wangubala Yosefe.” Mazu yanga ngalongo kuti a Yakobe ŵenga awiski chayiwu aku Yosefe. Mateyu wakonkhosanga mkoka waku Yosefe, kuti wanguwiya m’banja lachifumu laku Davidi. Ndipu ufumu wenuwu unguzipasika kwaku Yesu mwana yo wanguleleka ndi Yosefe.

Kweni buku la Luka likamba kuti: “Yosefe [wenga] mwana waku Heli.” Mazu ngakuti, “mwana waku,” ngangang’anamuwa so kuti “mkosanu waku.” Nkhani yakuyanana ndi yeniyi yisanirika so pa Luka 3:27 po pakamba kuti Shealtiele wenga “mwana waku Neri,” kweni awiski chayiwu ŵenga a Yekoniya. (1 Mikoka 3:17; Mateyu 1:12) Shealtiele wenga mukosanu waku Neri chifukwa wangutorana ndi mwana waki munthukazi yo zina laki likuzumbulika cha m’Bayibolu. Yosefe nayu wenga “mwana” waku Heli chifukwa wangutorana ndi Mariya mwana munthukazi waku Heli. Mwaviyo, Luka wakonkhosanga banja lo Yesu wanguwiyamu kuzifika pa anyina chayiwu wo angumubala a Mariya. (Ŵaroma 1:3) Bayibolu likamba za mkoka wa mabanja ngaŵi ngo Yesu wanguwiyamu.

Kumbi kali agwirisiyanga ntchitu uzu ndi dayi wa mtundu wuli?

Salu yakudaya yo yingusanirika mumphaku yinyaki kufupi ndi Nyanja Yakufwa chechendafiki chaka cha 135 C.E.

Ku Middle East agwirisiyanga ntchitu ukongwa weya wa mbereri, mbuzi ndipuso ngamila. Salu zinandi zapangikanga kutuliya ku weya wavinyama, ndipu kanandi Bayibolu likamba kuti asenganga weya wa mbereri. (1 Samuele 25:2; 2 Ŵakaronga 3:4; Jobu 31:20) Ku Yigipiti ndi ku Yisrayele apanganga salu kutuliya ku mtundu unyaki wa maluŵa wo wudanika kuti Fulakisi. (Chiyambo 41:42; Yoswa 2:6) Munyengu yakali Ayisrayele atenere kuti apandanga thonji cha. Malemba ngakamba kuti ku Persia ndiku agwirisiyanga ntchitu uzu wakutuliya ku thonji. (Estere 1:6) Kweni salu zakusililika zenga zakudula ukongwa ndipu kanandi zazanga ndi amalonda akwenda wo atuliyanga ku China, India ndi vyaru vinyaki.Chivumbuzi 18:11, 12.

Buku linyaki likamba kuti, “Salu zo zapangikanga kutuliya ku weya wa vinyama zajanga zamitundu yakupambanapambana. Zinyaki zajanga zituŵa, ndipu zinyaki zajanga zabulawuni ndi zamizerimizeri.” Kweniso kanandi weya wenuwu awudayanga. Ndipu dayi wakudula ukongwa wapangikanga kutuliya ku nkhonu. Dayi muyera, wantcheti, wabulu ndipuso mufipa wapangikanga kutuliya ku mitundu yinyaki ya vimiti, misisi, mani ndipuso vidononu vakuphululuka.