Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  December 2015

 MBIRI YA UMOYU WANGU

Nde pa Chimangu ndi Chiuta Kweniso ndi Ama

Nde pa Chimangu ndi Chiuta Kweniso ndi Ama

AMA angundifumba kuti: “Nchifukwa wuli uleka kusopa ambuyaku wo akufwa? Kumbi uziŵa cha kuti we ndi umoyu chifukwa chaku yiwu? Kumbi ungaŵawonga cha? Nchifukwa wuli uleka kulondo midawuku yo yikwamba kali? Kukana kutumbika ambuyafwi wo akufwa kuyanana waka ndi kukamba kuti tisopa vinthu vauzereza.” Ama ŵati akamba mazu yanga, angwamba kuliya.

Ndinguzizwa ukongwa kuti Ama angulongoro viyo chifukwa yiwu ndiwu angukambiya Akaboni kuti asambirengi nani Bayibolu. Angukamba kuti ndiyambi kusambira nawu chifukwa yiwu akhumbanga cha kusambira. Nyengu zosi ndaŵavwiyanga. Kweni chifukwa chakuti ndakhumbanga kukondwesa Yehova, yapa ndinguŵavwiya cha. Kuchita viyo kwenga kwakusuza kweni Yehova wangundiwovya.

KUJA MKHRISTU

Tenga muchisopa cha Chibuda cho ŵanthu anandi ku Japan asopa. Ndati ndasambira Bayibolu kwa myezi yiŵi ndi Akaboni aku Yehova, ndingukhorwa kuti Bayibolu ndauneneska. Ndingusambira kuti nde ndi Ada kuchanya. Mwaviyo, ndingukhumbisisa kuti ndiŵaziŵi. Pakwamba, ini ndi Ama takambiskana vo ndasambiranga. Ndingwamba kuluta ku mawunganu pa Sabata. Ndati ndayamba kuziŵa vinandi va mu Bayibolu, ndingukambiya Ama kuti ndichitengeku so cha miyambu ya Chibuda. Yiwu angusintha ukongwa ndati ndaŵakambiya viyo. Anguti: “Nchakulengesa kuja ndi munthu yo waleka kwanja ambuyafwi wo akufwa.” Angundikambiya kuti ndileki kusambira Bayibolu ndi kuwungana. Ndinguzizwa kuti ama akambi viyo. Yiwu angusintha ukongwa nge kuti ndiwu so cha.

Ada nawu angwamba kundisusa. Mu buku la Ŵaefesu chaputala 6, ndingusambira kuti Yehova wakhumba kuti ndivwiyengi apapi. Pakwamba ndaŵanaŵananga kuti asani ndiŵavwiyengi, nawu avwengi vo ndikamba. Ndawonanga kuti ivi vingawovya kuti mu banja mwidu muje chimangu. Kweniso, ndenga pafupi kulemba mayesu ngakulutiya ku sekondale, ndipu ndakhumbikanga kunozgeke. Mwaviyo, ndingukambiya apapi ŵangu kuti ndilutengeku cha ku mawunganu kwa myezi yitatu. Kweni ndingukambiya Yehova kuti ndazamukwamba so kuwungana asani myezi yitatu yamala.

Vo ndingusankha venga viheni munthowa ziŵi. Chakwamba, ndaŵanaŵananga kuti ndilekengi cha kwanja uneneska asani pajumba myezi yitatu. Kweni pati pajumpha nyengu yimanavi ndingwamba kulopwa. Chachiŵi, Ama ndi Ada andichichizanga kuti ndileke limu kusopa Yehova.

 APAPI ANDISUSANGA KWENI ABALI ANDIWOVYANGA

Ku Nyumba ya Ufumu, ndakumananga ndi abali anandi wo asusikanga ndi ŵanthu a mu banja lawu. Yiwu andikambiyanga kuti Yehova wandiwovyengi. (Mat. 10:34-37) Yiwu andikonkhoskiyanga kuti asani ndilutirizgengi kuja wakugomezgeka kwaku Yehova, ŵanthu m’banja langu angasambira uneneska. Mwaviyo, ndingwamba kuromba kutuliya pasi pa mtima. Ivi vingundiwovya kuthemba Yehova.

Ama ndi Ada andisusanga munthowa zakupambanapambana. Mwakuyeruzgiyapu, Ama andipemphanga kuti ndileki kusambira Bayibolu. Kweniso andikambiyanga vifukwa vo nditenere kuleke kusambira. Nyengu zinandi ndajanga waka cheti. Kweni asani ndamukapu, kanandi tapindananga chifukwa weyosi wakhumbanga kulongo kuti vo wakamba vauneneska. Sonu ndiŵanaŵana kuti asani ndakambanga nawu mwaulemu Ama, tatingi tipindanengi ukongwa cha. Apapi ŵangu andipasanga ntchitu zinandi kuti ndileki kutuwapu pa nyumba. Nyengu zinyaki andijaliyangaku kukhomu kuti ndileki kusere mu nyumba pamwenga andinolanga chakurya.

Ama angupempha ŵanthu anyaki kuti aŵawovyi. Mwakuyeruzgiyapu, angukambiya asambizi ŵangu. Kweni ivi vinguwovya cha. Pavuli paki, anguluta nani kwa abwana a ku ntchitu kwawu. Yiwu akhumbanga kuti abwana ŵawu akandisimikiziyi kuti visopa vosi vambula ntchitu. Ama ambiyanga so foni abali ŵawu kuti aŵawovyi ndipu achitanga kuliya pakuŵakambiya. Ivi vandikwiyisanga. Kweni ku mawungani, ŵara andichiskanga ukongwa. Yiwu angundikambiya kuti asani Ama akambiya ŵanthu nkhani yangu, ndikuti atiŵapharazgiya.

Kweni penga so nkhani yinyaki yo yingusuza.  Apapi ŵangu akhumbanga kuti ndiluti ku yunivesite. Yiwu awonanga kuti asani ndaluta ku yunivesite, ndazamusaniya ntchitu yamampha. Tatondekanga kukambiskana umampha chifukwa chakukwiya. Mwaviyo, ndinguŵalembe waka makalata Ama ndi Ada kuti ndiŵakonkhoske vo ndikhumba. Ada angukwiya ukongwa ndipu angukamba kuti: “Asani uwona kuti ungasaniya ntchitu, uyisaniyi mawa viyo. Kweni asani ulekengi kuyisaniya, utuwepu panu.” Ndingukambiya Yehova nkhani iyi. Mawa laki po ndenga mu uteŵeti, ndingukumana ndi azichi ŵaŵi. Weyosi wangundipempha kuti nkhagwirengi ntchitu yakusambiza mwana waki. Ada angukondwa cha ndi vo ndinguchita. Anguleka kulongoro nani ndipu anditoliyangaku kanthu cha. Ama angundikambiya kuti nkhanthu kuti ndije chigaŵenga kuluska kuja Kaboni waku Yehova.

Yehova wangundiwovya kuti ndisinthi maŵanaŵanu ngangu

Nyengu zinyaki, ndajifumbanga asani Yehova wakhumba nadi kuti ndileki kuchita vo apapi ŵangu akhumba. Mwaviyo, ndarombanga kwaku Yehova ndi kuŵanaŵaniya vo Bayibolu likamba pa nkhani ya chanju chaki. Ivi vingundiwovya kuwona vinthu mwakwenere ndipuso kuvwisa kuti apapi ŵangu andisusanga chifukwa chakuti andifipiyanga mtima. Yehova wangundiwovya kuti ndisinthi maŵanaŵanu ngangu. Wangundiwovya so kuziŵa vakuchita. Kweniso kusere mu uteŵeti pafupipafupi kwandiwovyanga kuti ndiyanjengi ukongwa kupharazga. Mwaviyo, ndakhumbanga kuchita upayiniya.

KUCHITA UPAYINIYA

Azichi anyaki ŵati ŵavwa kuti ndikhumba kuchita upayiniya, angundikambiya kuti ndilindizi dankha kuti apapi ŵangu aziki mtima. Ndingupempha Chiuta kuti wandipasi zeru, ndingujifumba chifukwa cho ndakhumbiyanga kuchita upayiniya kweniso ndingukambiskana ndi abali ndi azichi wo aziŵa vinthu. Pavuli paki, ndingusankha kukondwesa Yehova. Ndinguwona kuti kuswera kwamba upayiniya kungapangisa apapi ŵangu kuti asinthi cha.

Ndingwamba kuchita upayiniya mu chaka chakumaliya cha sukulu ya sekondale. Ndati ndachita upayiniya kwa nyengu yimanavi, ndakhumbanga kuchiteŵete ko kukhumbika apharazgi anandi. Kweni Ama ndi Ada akhumbanga cha kuti ndituwepu pa nyumba. Mwaviyo, ndingulindiza mpaka po ndingukwanisiya vyaka 20. Pavuli paki, ndingupempha ofesi ya nthambi kuti ndikateŵetiyengi kumwela kwa Japan chifukwa kwajanga abali ŵidu. Ndinguchita viyo kuti Ama aleki kufipa ukongwa mtima.

Ko ndinguluta kuchiteŵete, ŵanthu anandi wo ndasambiranga nawu Bayibolu angubatizika. Ivi vingundikondwesa ukongwa. Ndingwamba kusambira Chingelezi kuti ndisaziyeku uteŵeti wangu. Mumpingu widu mwenga abali ŵaŵi wo achitanga upayiniya wapade. Ndati ndawona mo abali yaŵa ateŵetiyanga mwaphamphu ndipuso mo awovyiyanga ŵanthu, nani ndakhumbanga kuchita upayiniya wapade. Pa nyengu iyi, Ama angutama ukongwa, kaŵi kosi. Posi paŵi ndinguluta dankha kunyumba kuchiŵaphwere. Ivi vinguŵaziziswa ukongwa, mwakuti angwamba kusintha.

YEHOVA WANDITUMBIKA UKONGWA

Pati pajumpha vyaka 7, ndingulonde kalata kutuwa kwaku Atsushi. Iyu wenga yumoza mwa apayiniya apade ŵaŵi wo ndaŵazumbuwa pakwamba. Wakhumbanga kuziŵa asani ndingayanja kutorana nayu. Pati pajumpha mwezi, ndingumukambiya kuti tiziŵani dankha. Tati tayamba kuziŵana, tingusaniya kuti penga vinandi vo tayanananga. Mwakuyeruzgiyapu, tosi takhumbanga kuchita uteŵeti wanyengu zosi kweniso kuchita uteŵeti wewosi wo tingapasika. Pavuli paki, tingutorana. Ndingukondwa ukongwa kuti Ama, Ada ndi abali ŵangu anandi anguza ku zowara zangu!

Nepal

Tati tachitapu upayiniya wanyengu zosi kwa nyengu yimanavi, Atsushi wanguŵikika kuti waje wakovya kuwonere dera. Yehova wangutitumbika so munthowa yinyaki. Angutisankha kuti tije apayiniya  apade. Pavuli paki, Atsushi wangupempheka kuti waje wakuwonere dera. Tati tayende mipingu yosi mdera lo angutipasa, ofesi ya nthambi yingutimbiya foni. Yingupempha Atsushi kuti wakateŵetiyengi nge wakuwonere dera ku Nepal.

Kuteŵete mu vyaru vinandi kwandiwovya kumuziŵa umampha Yehova

Ndingujifumba mo apapi ŵangu angavwiya asani ndingaluta kutali. Mwaviyo, ndinguŵambiya foni kuti ndiŵakambiyi. Ada angumuka kuti: “Uluta kucharu chamampha ukongwa.” Kwati kwaja Sabata yimoza kuti ndiŵambiyi foni, mubwezi wawu wanguŵapasa kabuku. Kabuku yaka kakonkhoskanga za ku Nepal. Mwaviyo, Ada nawu awonanga kuti ndi malu ngamampha ukongwa kulutaku.

Pa nyengu yo tateŵetiyanga ku Nepal, tingulonde so uteŵeti unyaki. Atsushi wangupempheka kuti wayendiyengi so mipingu ya ku Bangladesh. Chinanga kuti charu ichi chenga kufupi ukongwa ndi ku Nepal, kweni vyaru ivi vipambana munthowa zinandi. Mu uteŵeti takumananga ndi ŵanthu amitundu yakupambanapambana. Pati pajumpha vyaka 5 tingupempheka kuti tiwere so ku Japan. Ndiku sonu Atsushi wateŵete nge wakuwonere dera.

Kuteŵete ku Japan, Nepal ndi ku Bangladesh, kwandiwovya kuti ndimuziŵi umampha Yehova. Charu chechosi che ndi mbiri kweniso midawuku yaki. Ndipu munthu weyosi ngwapade. Ndawona mo Yehova waphwere munthu weyosi pakuyija. Iyu watiŵalondere mu gulu laki, watiŵawovya ndi kuŵatumbika.

Yehova wanditumbika ukongwa. Mwakuyeruzgiyapu, wandiwovya kuti ndimuziŵi, wandipasa uteŵeti kweniso munthurumi wamampha. Wandiwovya so kusankha vinthu umampha. Sonu nde pa ubwezi wamampha ndi iyu kweniso ŵanthu a mu banja langu. Yehova wandiwovya kuti ndiyambi so kuyanjana ndi Ama. Ndiwonga ukongwa kuti sonu nde pa chimangu ndi Chiuta kweniso ndi Ama.

Tikondwa ukongwa mu ntchitu yakuwonere dera