Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  November 2015

Vo Akuŵerenga Afumba

Vo Akuŵerenga Afumba

Kumbi pe ukaboni wuli wo ulongo kuti msumba wa Yeriko anguwuzinga kwa nyengu yimanavi?

Mwakukoliyana ndi lemba la Yoswa 6:10-15, 20, Ayisraele anguzunguliya Yeriko kamoza pa zuŵa, kwa mazuŵa 6. Pa zuŵa la nambala 7, yiwu anguzunguliya msumba wa Yeriko maulendu 7, ndipu Chiuta wanguchitiska kuti mpanda wa Yeriko uwi. Ivi vinguwovya Ayisraele kusere m’msumba uwu ndi kuwubwanganduwa. Kumbi ŵanthu wo afukuwa vinthu vapasi akoliyana ndi vo Bayibolu likamba kuti msumba wa Yeriko anguwuzinga kwa nyengu yimanavi?

Kali asilikali ayanjanga kuzinga msumba asani akhumba kuwubwanganduwa. Kwali awuzinga kwa nyengu yitali wuli, yiwu atonga chechosi cho asaniya. Wo afukuwa vinthu vapasi angusaniya vakurya vinandi ukongwa pa malu po penga msumba wa Yeriko. Buku linyaki lingukamba kuti: “Pa malu po penga msumba wa Yeriko pangusanirika tirigu munandi. . . . Ichi nchachilendu ukongwa ku ŵanthu wo afukuwa vinthu vapasi ku Palestine. Mungasaniya vakurya vakuzaza chithini chimoza pamwenga mathini ngaŵi, kweni kusaniya vakurya vinandi viyo, vichitika kaŵikaŵi cha.”Biblical Archaeology Review.

Mwakukoliyana ndi Malemba, Ayisraele ŵenga ndi chifukwa chakuvwika chakuleke kuto tirigu m’msumba wa Yeriko. Yehova wanguŵalamula kuti angatonga cha. (Yoswa 6:17, 18) Ayisraele angulonda msumba wa Yeriko ŵanthu ŵati avuna waka. Mwaviyo, tirigu wenga munandi. (Yoswa 3:15-17; 5:10) Pakuti m’msumba wa Yeriko mungusanirika tirigu munandi, mbukaboni wakuti Ayisraele anguwuzinga kwa nyengu yimanavi, nge mo Bayibolu likambiya.