Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  October 2015

“Tisazgiyeniku Chivwanu”

“Tisazgiyeniku Chivwanu”

“Ndiwovyeni kuti ndije ndi chivwanu chakukho!”MARKO 9:24.

SUMU: 54, 24

1. Nchifukwa wuli chivwanu nchakukhumbika? (Wonani chithuzi cho che pachanya.)

MUKUJIFUMBAPU kuti, ‘Kumbi nde munthu yo Yehova wangataska pa chisuzgu chikulu ndi kumusereza m’charu chifya?’ Pe vinthu vinandi vo tingachita kuti tizitaskiki. Kweni Paulo wangulongo chinthu chakukhumbika ukongwa. Iyu wangukamba kuti: “Kwambula chivwanu, nkhwakusuzga kukondweska Chiuta.” (Ŵah. 11:6) Nkhani iyi yingawoneka yipusu ukongwa, kweni uneneska ngwakuti, ‘chivwanu che ndi ŵanthu wosi cha.’ (2 Ŵat. 3:2) Fundu izi zititiwovya kuziŵa kukhumbika kwakuja ndi chivwanu chakukho.

2, 3. (a) Kumbi tisambiranji kwaku Petro pa nkhani ya chivwanu? (b) Kumbi sonu tikambiskanengi mafumbu nanga?

2 Wakutumika Petro wanguwona kuti chivwanu nchakukhumbika ukongwa. Ndichu chifukwa chaki, wangukamba kuti ‘chivwanu cho chayeseka chingazitiwovya kuti tizilumbiki ndi kulonde unkhankhu asani Yesu Khristu wazivumbuka.’ (Ŵerengani 1 Petro 1:7.) Pakuti chisuzgu chikulu chiŵandika ukongwa, titenere kuwonesesa kuti te ndi chivwanu cho chingazitiwovya kuzija m’gulu la ŵanthu wo azamulumbika ndi Fumu ya unkhankhu pa nyengu yo yiziyengi. Ndipu tikhumba kuja mtundu wa ŵanthu wo ŵe “ndi chivwanu chakusunga umoyu.” (Ŵah. 10:39) Tikhumbika  so kupempha nge mo wanguchitiya munthu yo wangukamba kuti: “Ndiwovyeni kuti ndije ndi chivwanu chakukho.” (Marko 9:24) Pamwenga tingakamba nge mo akutumika aku Yesu angukambiya kuti: “Tisazgiyeniku Chivwanu.”Luka 17:5.

3 Pangaŵa mafumbu nganyaki ngo tingajifumba pa nkhani ya kusazgiyaku chivwanu. Kumbi tingachita wuli kuti tije ndi chivwanu? Kumbi tingalongo wuli kuti te ndi chivwanu? Kumbi te ndi ukaboni wuli wo utitovya kuziŵa kuti pemphu lidu lakuti Chiuta watisazgiyeku chivwanu limukikengi?

JANI NDI CHIVWANU CHAKUKHO

4. Kumbi mbayani wo angatiwovya kuja ndi chivwanu chakukho?

4 Chifukwa “vinthu vosi vo vikulembeka kali, vikulembeka kuti vitisambizi,” tingasambira vinandi kwa ŵanthu akali wo ŵenga ndi chivwanu. (Ŵar. 15:4) Asani tiŵerenga nkhani za ŵanthu nge Abrahamu, Sara, Isaki, Yakobe, Mosese, Rahabi, Gideoni ndi Baraki zingatiwovya kuti tiwoni asani te ndi chivwanu chakukho. (Ŵah. 11:32-35) Kweniso asani tiŵerenga nkhani za abali ndi azichi a mazuŵa nganu wo ŵe ndi chivwanu chakukho, tichiskika kuti nasi tiyesesi kuja ndi chivwanu chakukho. *

5. Kumbi Eliya wangulongo wuli kuti wagomezganga ukongwa Yehova, nanga vo wanguchita vingatiwovya wuli?

5 Vo Eliya wanguchita vilongo kuti wamugomezganga ukondwa Yehova. Po Eliya wakambiyanga Fumu Ahabu kuti kuŵengi chilala, wangukamba mwakusimikizga kuti: “Nge mo Yehova . . . walili wamoyu, . . . kuŵengi dungwi cha pamwenga vuwa, pijapija ini ndalamula.” (1 Ŵakar. 17:1) Eliya wangugomezga kuti Yehova waŵapaskengi vakukhumbika pa umoyu. (1 Ŵakar. 17:4, 5, 13, 14) Kweniso wangugomezga kuti Yehova wayuskengi mwana yo wangufwa. (1 Ŵakar. 17:21) Wangukayika cha kuti Yehova watumizengi motu kuti uwotchi sembi Paphiri la Karmele. (1 Ŵakar. 18:24, 37) Nyengu yati yakwana kuti Yehova wamalisi chilala, Eliya wangukambiya Ahabu kuti: “Lutanga, ukaryi ndi kumwa chifukwa kuvwika mphomu ya chivuwa.” Wangukamba viyo chinanga kuti kuchanya kungulongo cha kuti kuzengi vuwa. (1 Ŵakar. 18:41) Nkhani izi zingatiwovya kuti tiwoni asani nasi te ndi chivwanu chakukho viyo.

VO TINGACHITA KUTI TIJE NDI CHIVWANU

6. Kumbi Yehova wangatipaskanji cho chingatiwovya kuti tije ndi chivwanu?

6 Tingaja cha ndi chivwanu paku isi tija. Chivwanu nchipasu cha mzimu waku Chiuta. (Ŵag. 5:22) Mwaviyo, titenere kulondo ulongozgi waku Yesu wakuti tipemphengi mzimu. Iyu wakutisimikizgiya kuti Awuskefwi ‘apereka mzimu wakupaturika kwaku wo atimupempha.’Luka 11:13.

7. Kumbi tingachita wuli kuti chivwanu chidu chilutirizgi kuja chakukho? Perekani chakuyeruzgiyapu.

7 Asani taja ndi chivwanu, titenere kulutirizga kuchikulisa. Tingayeruzgiya chivwanu ndi motu. Asani motu wabuka, utamba kukole ukongwa. Kweni asani tileka kuwusonkhezge, ungayamba kuzimwa kamanakamana ndi kuja waka vyotu pe. Kweni asani tisonkhaku nkhuni kaŵikaŵi, ulutirizgengi kukole. Mwakuyana waka, chivwanu chidu chingaja chakukho asani tiŵerenga Mazu Ngaku Chiuta nyengu zosi. Kusambira Bayibolu nyengu zosi kungatiwovya kuliyanja ukongwa kweniso kwanja Yehova  yo wakulemba. Ivi vingatiwovya kuti chivwanu chidu chikho.

8. Kumbi ndi vinthu nivi vo vingatiwovya kuti chivwanu chidu chilutirizgi kuja chakukho?

8 Kumbi ndi vinthu wuli vinyaki vo mungachita kuti muje ndi chivwanu? Mungakhorwanga ndi vo mungusambira pa nyengu yo mwakhumbanga kubatizika pe cha. (Ŵah. 6:1, 2) Muziŵengi mauchimi ngo ngafiskika chifukwa ngangakuwovyani kuti muje ndi chivwanu. Kweniso mungagwiriskiya ntchitu Mazu Ngaku Chiuta kuti muwoni asani chivwanu chinu chiyanana ndi vo Bayibolu likamba pa nkhani ya ŵanthu wo ŵe ndi chivwanu chakukho.Ŵerengani Yakobe 1:25; 2:24, 26.

9, 10. Kumbi vinthu ivi vititiwovya wuli kuti tije ndi chivwanu: (a) mabwezi ngamampha? (b) maunganu? (c) uteŵeti wakumunda?

9 Wakutumika Paulo wangukambiya Akhristu anyaki kuti akhumbikanga ‘kuchiskana’ kuti aje ndi chivwanu chakukho. (Ŵar. 1:12) Asani nasi ticheza ndi Akhristu anyidu, chivwanu chawu ndi chidu chingakho. Ivi vingachitika asani ticheza ukongwa ndi ŵanthu wo chivwanu chawu chayesekapu. (Yak. 1:3) Mabwezi ngaheni ngananga chivwanu, kweni mabweni ngamampha ngatovya kuti chije chakukho. (1 Ŵakor. 15:33) Ichi nchifukwa chimoza cho tichiskikiya kuti tingalekanga cha “kuwungana,” kweni tilutirizgi “kuchiskana.” (Ŵerengani Ŵahebere 10:24, 25.) Chifukwa chinyaki nchakuti nkhani zo zikambika pa maunganu zitovya kuti chivwanu chidu chije chakukho. Fundu iyi yikoliyana ndi vo Paulo wangukamba. Iyu wanguti: “Munthu waja ndi chivwanu chifukwa cha vo wavwa.” (Ŵar. 10:17) Kumbi tiluta ku maunganu nyengu zosi?

10 Asani tipharazga tiwovya ŵanthu kuti aje ndi chivwanu kweniso chivwanu chidu chikuwa. Nge mo venge ndi Akhristu akwambiriya, tisambira kugomezga ukongwa Yehova ndipuso kulongoro mwachiganga.Mac. 4:17-20; 13:46.

11. Nchifukwa wuli Kalebe ndi Yoswa agomezganga ukongwa Yehova, nanga isi tingaŵayezga wuli?

11 Chivwanu chidu chikuwa asani tiziŵa kuti Yehova watitiwovya pa umoyu widu ndipuso mo wamukiya marombu ngidu. Ivi ndivu vinguchitikiya Kalebe ndi Yoswa. Yiwu angulongo kuti agomezganga Yehova pa nyengu yo anguchisyora Charu Chakulayizgika. Chivwanu chawu chingukuwa ukongwa ŵati aziŵa kuti Yehova watiŵalongozga. Ndichu chifukwa chaki Yoswa wangukambiya Ayisraele mwanthazi kuti: “Pa mazu ngosi ngamampha ngo Yehova Chiuta winu wangukukambiyani, palivi chinanga ngamoza ngo ngatondeka.” Pavuli paki, wangukamba so kuti: “Sonu wopani Yehova ndipu mteŵetiyeni mwakugomezgeka kwambula kunangisa kanthu . . . Kweni ini ndi a munyumba yangu titeŵetiyengi Yehova.” (Yos. 23:14; 24:14, 15) Asani tingalaŵa umampha waku Yehova, nasi tingasimikizga kuti timuteŵetiyengi mwakugomezgeka nge Yoswa.Sumu 34:8.

MO TINGALONGORE KUTI TE NDI CHIVWANU

12. Kumbi Yakobe wangulongo wuli kuti wenga ndi chivwanu?

12 Kumbi tingalongo wuli kuti te ndi chivwanu chakukho? Wakutumika Yakobe wangumuka fumbu ili. Iyu wangukamba kuti: “Ini ndikulongongi chivwanu changu mu ntchitu zangu.” (Yak. 2:18) Vakuchita vidu ndivu vingalongo kuti te ndi chivwanu cheneku. Tiyeni tiwonepu ŵanthu anyaki wo angulongo kuti ŵe ndi chivwanu.

Ŵanthu wo asazgiyaku uteŵeti wawu alongo kuti ŵe ndi chivwanu chakukho (Wonani ndimi 13)

13. Kumbi tingalongo wuli kuti te ndi chivwanu asani tigwiraku ntchitu yakupharazga?

13 Kugwiraku ntchitu yakupharazga ndiyu nthowa yamampha ukongwa yo tingalongole  kuti te ndi chivwanu. Nchifukwa wuli tikamba viyo? Ntchitu iyi yikhumba kuti munthu waje ndi chivwanu. Wagomezgengi vo Chiuta wakukamba kuti nyengu yo charu ichi chimaliyengi “yiswerengi cha.” (Hab. 2:3) Tingaziŵa kuti te ndi chivwanu chakukho asani titijipereka mu uteŵeti. Kumbi titesesa kupharazga pamwenga kuyesa nthowa zinyaki kuti tisazgiyeku uteŵeti widu? (2 Ŵakor. 13:5) Kukamba uneneska, asani tipharazga pakweru, tilongo kuti te ndi chivwanu.Ŵerengani Ŵaroma 10:10.

14, 15. (a) Kumbi tingalongo wuli kuti te ndi chivwanu? (b) Kumbi Rebecca ndi murumu waki angulongo wuli kuti ŵenga ndi chivwanu chakukho?

14 Tingalongo so kuti te ndi chivwanu asani tikunthiyapu masuzgu ngo tikumana nangu zuŵa lelosi. Chinanga tingatama, tingadandawula, tingasuzgika maŵanaŵanu, tingaŵa akavu pamwenga tingakumana ndi masuzgu nganyaki, tigomezga kuti Yehova ndi Mwana waki atiwovyengi “pa nyengu yakwenere.” (Ŵah. 4:16) Tilongo chivwanu asani tipempha Yehova kuti watiwovyi mwakuliŵavu. Yesu wangukamba kuti tingapempha vinthu vakuliŵavu nge “chakurya chakukhumbika pa zuŵa.” (Luka 11:3) Bayibolu lititiwovya kugomezga kuti Yehova wangatipaska chakurya. Pa nyengu yo ku Yisraele kwenga chilala, Yehova wangupaska Eliya chakurya ndi maji. Nge mo Yehova wangukambiya, “achaholi amupaskanga chiŵandi ndi nyama mulenji ndi mazulu, ndipu wamwanga maji mumsinji.” (1 Ŵakar. 17:3-6) Nasi tigomezga kuti Yehova watiwovyengi kusaniya vinthu vo tikhumba.

Tilongo kuti te ndi chivwanu asani tikunthiyapu masuzgu ngo tikumana nangu zuŵa lelosi (Wonani ndimi 14)

15 Te ndi chigomezgu kuti asani tilondo fundu za m’Bayibolu, Yehova watiwovyengi kusaniya chakurya. Rebecca yo waja ku Asia wanguwona kuti fundu iyi njauneneska. Iyu ndi murumu waki angugwiriskiya ntchitu ulongozgi wo usanirika pa Mateyu 6:33 ndi Nthanthi 10:4. Aŵikanga vinthu va Ufumu pakwamba ndipuso agwiranga ntchitu mwaphamphu. Rebecca wangukamba kuti zuŵa linyaki murumu waki wawonanga kuti ntchitu yo wagwiranga yaŵikanga umoyu wawu wauzimu pangozi ndipu wanguyileka. Kweni ŵenga ndi ŵana anayi wo akhumbikanga kuŵaphwere.  Rebecca wangukamba kuti: “Tingwamba kubika mandazi ndi kugulisa. Tinguchita ivi kwa vyaka vinandi ndipu Yehova wangutisiya cha. Pa nyengu iyi tasoŵanga chakurya cha.” Kumbi namwi mugomezga kuti Bayibolu le ndi ulongozgi wamampha ukongwa mazuŵa nganu?

16. Nchinthu wuli chingachitika asani tithemba Chiuta?

16 Tingakayikanga cha kuti asani tilondo ulongozgi waku Chiuta vinthu vitiyendiyengi umampha. Paulo wanguko mazu ngaku Habakuku. Iyu wanguti: “Murunji wajengi ndi umoyu ndi chivwanu chaki.” (Ŵag. 3:11; Hab. 2:4) Mwaviyo, titenere kuja ndi chivwanu mwaku Yo wangatiwovya nadi. Paulo watitikumbuska kuti Chiuta “wangachita vinthu vikulu ukongwa kuluska vosi vo tipempha pamwenga kuŵanaŵana, mwakukoliyana ndi nthazi yaki yo yigwira ntchitu mwaku isi.” (Ŵaef. 3:20) Ateŵeti aku Yehova atesesa kuchita khumbu laku Chiuta. Kweni chifukwa chakuziŵa kupeleŵe kwawu, yiwu athemba Yehova kuti ndiyu watumbikengi vo achita. Kukamba uneneska, vakukondwesa ukongwa kuziŵa kuti Chiuta widu we nasi.

PEMPHU LAWU LINGUMUKIKA

17. (a) Kumbi pemphu la akutumika lingumukika wuli? (b) Nchifukwa wuli nasi tigomezga kuti Chiuta watimukengi pemphu lidu lakuti watisazgiyeku chivwanu?

17 Pavuli pakukambiskana nkhani iyi, tingakamba nge mo akutumika angukambiya. Yiwu anguti: “Tisazgiyeniku chivwanu.” (Luka 17:5) Pemphu lawu lingumukika pa Pentekoste wa mu 33 C.E. Yiwu angulonde mzimu wakupaturika ndipu angwamba kuziŵa vinthu vinandi vakukwaskana ndi khumbu laku Chiuta. Ivi vinguwovya kuti chivwanu chawu chikho. Pavuli paki, angwamba kupharazga mwaphamphu. (Ŵakol. 1:23) Kumbi nasi Chiuta watimukengi asani tingamupempha kuti wasazgiyeku chivwanu chidu? Bayibolu lilongo kuti wangatimuka asani “tipempha mwakukoliyana ndi khumbu laki.”1 Yoh. 5:14.

18. Kumbi Yehova watumbika wuli ŵanthu wo ŵe ndi chivwanu?

18 Yehova wakondwa ndi ŵanthu wo atimugomezga ukongwa. Iyu wamukengi pemphu lidu lakuti watisazgiyeku chivwanu. Ndipu chivwanu chidu chikhongi ukongwa. Ivi vichitiskengi kuti “tije akwenere Ufumu waku Chiuta.”2 Ŵat. 1:3, 5.

^ ndimi 4 Mwakuyeruzgiyapu, wonani mbiri ya umoyu waku Lillian Gobitas Klose (Galamukani! ya July 22, 1993), Feliks Borys (Galamukani! ya February 22, 1994), ndi yaku Josephine Elias (Galamukani! ya September 2009).