Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  September 2015

Kumbi Tingalongo Wuli Kuti Titanja Yehova?

Kumbi Tingalongo Wuli Kuti Titanja Yehova?

“Tilongo chanju chifukwa iyu ndiyu wangwamba kutiyanja.”1 YOH. 4:19.

SUMU: 6, 1

1, 2. Mwakukoliyana ndi 1 Yohane 4:19, kumbi Yehova wakuchitanji kuti nasi timuyanjengi?

ŴANTHU anandi awona kuti nthowa yamampha yo da wangasambiziya ŵana ŵaki nkhuporote mu vakuchita vaki. Wakutumika Yohane wangulemba kuti “tilongo chanju chifukwa [Chiuta] ndiyu wangwamba kutiyanja.” (1 Yoh. 4:19) Mwaviyo, Yehova watipasa chakuwoniyapu chamampha ukongwa kuti timuyanjengi.

2 Kumbi Chiuta “wangwamba kutiyanja” mu nthowa wuli? Wakutumika Paulo wangukamba kuti: “Chiuta watitilongo chanju, mwakuti po tenga akunanga, Khristu wangutifwiya.” (Ŵar. 5:8) Yehova wakutipaska Mwana waki kuti wazitiwombo. Ivi vititiwovya kuti tije nayu pa ubwezi kweniso kuti timuyanjengi. Pakupereka mwana waki, Yehova wakutipasa chakuwoniyapu chamampha. Iyu wakutisambiza mo tingalongore chanju.1 Yoh. 4:10.

3, 4. Kumbi titenere kumuyanja wuli Chiuta?

3 Chanju ndi jalidu likulu laku Yehova. Mwaviyo, tingavwisa chifukwa cho Yesu wangumukiya munthu munyaki yo wangumufumba. Iyu wangumumuka kuti: “Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi ndi nthazi zaku zosi.” (Marko 12:30) Mazu  yanga ngalongo kuti titenere kwanja Chiuta kutuliya m’mtima. Yehova wakondwa cha asani chanju chidu nchakugaŵikana. Kweni kwanja Chiuta kusazgapu vinandi kuruska ŵaka kumwanja kutuliya m’mtima. Ivi ve viyo chifukwa Yesu wangukamba so kuti titenere kumuyanja ndi umoyu widu wosi, maŵanaŵanu ngidu ngosi ndi nthazi zidu zosi. Mwakukoliyana ndi vo mchimi Mika wangukamba, ivi ndivu Yehova wakhumba kuti tichitengi.Ŵerengani Mika 6:8.

4 Kumbi tingalongo wuli kuti titanja Chiuta? Titenere kumwanja ndi mtima wosi. Nge mo Yesu wangukambiya, titenere so kumwanja ndi nthazi zidu zosi, maŵanaŵanu ngidu ngosi ndi umoyu widu wosi. Mu nkhani yaluta, tingusambira nthowa zinayi zo Yehova walongore kuti watanja ŵana ŵaki. Sonu tiyeni tikambiskani mo isi tingalongore kuti titanja Yehova.

TIWONGENGI VO YEHOVA WATITIPASA

5. Kumbi tingalongo wuli kuti tiwonga vo Yehova watitichitiya?

5 Kumbi muchita wuli asani munthu wakupaskani chawanangwa? Tikayika cha kuti muwonga. Kweniso mutichigwiriskiya ntchitu umampha. Yakobe wangukamba kuti: “Chawanangwa chosi chamampha ndi chawezi chosi chaurunji chituwa kuchanya, pakuti chisika kutuwa kwa Ada a ukweru wakuchanya, ndipu yiwu asintha cha nge mo muduzi uchitiya.” (Yak. 1:17) Yehova watitipasa vakukhumbika kuti tije ndi umoyu kweniso kuti tikondwengi. Kumbi ivi vititiwovya cha kuti timuyanjengi?

6. Kumbi Ayisraele akhumbikanga kuchitanji kuti Yehova walutirizgi kuŵatumbika?

6 Yehova wanguwovya Ayisraele kwa vyaka vinandi ndipu waŵatumbikanga mwakuliŵavu ndipuso mwauzimu. (Mar. 4:7, 8) Kweni kuti Chiuta walutirizgi kuŵatumbika, akhumbikanga kuvwiya Dangu laki. Dangu ili lasazgangapu kupasa Yehova “vipasu vamampha ukongwa vo vayamba kufya.” (Chit. 23:19) Ivi vatingi vilongongi kuti Ayisraele awonga kuti Yehova watiŵayanja kweniso watiŵatumbika.Ŵerengani Marangu 8:7-11.

7. Kumbi tingagwiriskiya wuli ntchitu “chuma chidu” kuti tilongo kuti titanja Yehova?

7 Kumbi isi tingalongo wuli kuti titanja Chiuta? Chinanga wuli isi tikhumbika cha kupereka sembi chayizu, kweni tingalongo kuti titanja Chiuta asani titimutumbika ndi “chuma chidu.” (Nthanthi 3:9) Kumbi tingamutumbika wuli Yehova ndi chuma chidu? Tingapereka vinthu vidu kuti tiwovyi pa ntchitu za Ufumu za pa mpingu widu ndipuso pacharu chosi. Iyi ndi nthowa yamampha ukongwa yo tingalongore kuti titanja Yehova, kaya ndisi akukhupuka pamwenga akavu. (2 Ŵakor. 8:12) Pe so nthowa zinyaki zo tingalongore kuti titanja Yehova.

8, 9. Kumbi asani tigomezga vo Yehova watilayizga tilongo wuli kuti titimuyanja? Kambani chakuwoniyapu.

8 Kumbukani vo Yesu wangukambiya akutumika ŵaki. Iyu wanguŵakambiya kuti angafipanga mtima cha kuti aryengenji pamwenga kuti avwalengenji, kweni akhumbikanga kupenja dankha Ufumu. Iyu wangukamba so kuti Awiskemwi akuchanya aziŵa vo mukhumbika. (Mat. 6:31-33) Asani tigomezga vo Yesu wangukamba yapa ndikuti tilongo kuti titanja Yehova chifukwa chanju ndi kugomezga vitenderana. Tingamuyanja cha munthu yo tileka kumugomezga. (Sumu 143:8) Mwaviyo, tingajifumba kuti: ‘Kumbi vilatu vangu ndi vo nditanja vilongo kuti nditanja nadi Yehova? Kumbi vo ndichita zuŵa lelosi vilongo  kuti ndigomezga kuti Yehova wandipaskengi vo ndipenja pa umoyu?’

9 Mike wangulongo kuti watanja Chiuta kweniso watimugomezga. Weche munamana, wakhumbisiskanga kuchiteŵete ku charu chinyaki. Pavuli paki, wanguto ndipu wangubala ŵana ŵaŵi, kweni khumbu laki lingumala cha. Mike ndi banja laki ŵati aŵerenga ndi kuvwisiya nkhani zo zakonkhoskanga kuchiteŵete ko kukhumbika chovyu, angwamba kuja umoyu wambula kukhumba vinandi. Yiwu angugulisa nyumba yawu ndipu angwamba kuchita lendi mukanyumba kamana. Pavuli paki, Mike wangwamba kugwira ntchitu kwa nyengu yimanavi. Banja losi lingusamuka ndipu ŵati ateŵete kwa vyaka viŵi, Mike wangukamba kuti: “Tingujiwone tija kuti vo Yesu wangukamba pa Mateyu 6:33 vauneneska.”

MUYANJENGI UNENESKA WO CHIUTA WATITISAMBIZA

10. Nge mo venge ndi Davidi, kumbi kuŵanaŵaniya uneneska wo Yehova watitisambiza kungatiwovya wuli?

10 Vyaka 3,000 vo vajumpha, Fumu Davidi yinguchiskika ndi vo yinguwona kuchanya. Iyu wangulemba kuti: “Vinthu vakuchanya vipharazga unkhankhu waku Chiuta, ndipu mitambu yikonkhoska ntchitu za manja ngaki.” Pavuli paki, wangukwaskika ndi zeru zo ze m’Dangu laku Chiuta ndipu wangukamba kuti: “Dangu laku Yehova ndaurunji, liwezgiyapu umoyu. Vikumbusku vaku Yehova vakuthembeka, ndipu vipasa zeru munthu wambula kuziŵa vinthu.” Kumbi kuŵanaŵaniya vinthu ivi kungumuwovya wuli Davidi? Iyu wangulutirizga kuti: “Mazu nga pa mulomu wangu ndi kuŵanaŵana kwa mtima wangu vikukondweseni imwi Yehova, Jarawi langu ndi Wakundiwombo.” Yapa viwoneke limu kuti Davidi wenga pa ubwezi wamampha ndi Chiuta.Sumu 19:1, 7, 14.

11. Asani titanja Chiuta, kumbi tichitengenji ndi vo watitisambiza mazuŵa nganu? (Wonani chithuzi cho che papeji 23.)

11 Mazuŵa nganu, tiziŵa vinandi vakukwaskana ndi vo Yehova wakulenga ndi khumbu laki. Charu chichiska ŵanthu kuti ajengi ndi masambiru ngapachanya. Kweni ukaboni ulongo kuti wo apenja masambiru yanga, chivwanu chawu chimala ndipu aleka kwanja Chiuta. Bayibolu likamba kuti tikhumbika kuziŵa vinthu, kuja ndi zeru kweniso kuvwisa vinthu. Ivi ving’anamuwa kuti tikhumbika kuziŵa mo tingagwiriskiya ntchitu vo Chiuta watitisambiza kuti tiyanduwi ndi kovya anyidu. (Nthanthi 4:5-7) Chiuta “wakhumba kuti ŵanthu wosi kaya aje amtundu wuli, ataskiki ndi kuziŵa uneneska.” (1 Tim. 2:4) Tingalongo kuti titanja Yehova asani tipharazga uthenga wamampha wa Ufumu ndi kovya ŵanthu kuti aziŵi vo Chiuta wakhumba kuchitiya ŵanthu.Ŵerengani Sumu 66:16, 17.

12. Kumbi Shannon wangulongo wuli kuti wawonga vinthu vauzimu vo Yehova watitipasa?

12 Achinyamata nawu angalongo kuti atanja Yehova asani awonga vinthu vauzimu. Shannon wangukamba kuti po wenga ndi vyaka 11 iyu ndi mvurwa waki anguluta ku unganu wachigaŵa ndi apapi ŵawu. Unganu uwu wenga wa mutu wakuti “Kujipereka Kwaku Chiuta.” Zuŵa linyaki pa nyengu yakupumuwa, ŵana wosi angupempheka kuti aje pamalu ngamoza. Shannon wanguchita mantha. Kweni wangukondwa ukongwa kulonde buku lakutowa la mutu wakuti, Mayankho a Zimene Achinyamata Amafunsa. Kumbi Shannon wanguvwa wuli? Iyu wangukamba kuti: “Ndati ndalonde buku ili ndipu ndinguziŵiya kuti Yehova waliku nadi ndipu watindiyanja  ukongwa.” Iyu wangukamba so kuti: “Tikondwa ukongwa kuti Yehova Chiuta watitipasa vinthu vamampha nge ivi.”

MULONDIYENGI ULONGOZGI NDI CHILANGU

13, 14. Kumbi mo tiwone ulongozgi wo Yehova watitipasa vingalongo wuli kuti titimuyanja?

13 Bayibolu likamba kuti “Yehova wachenya munthu yo watanja, nge mo da wachitiya ndi mwana yo wakondwa nayu.” (Nthanthi 3:12) Kumbi isi titenere kuchita wuli asani tapaskika ulongozgi? Wakutumika Paulo wangukamba kuti: “Palivi chilangu cho chiwoneka chakukondwesa, kweni chija chakuŵaŵa.” Pakukamba viyo, Paulo wapepuwanga chilangu cha, chifukwa wangulutirizga kuti: “Kweni pavuli paki ku ŵanthu wo asambirapu kanthu, chibala chipasu cha chimangu cho mburunji.” (Ŵah. 12:11) Asani titanja Yehova, tikwiyengi cha asani watitipasa ulongozgi. Kweni ivi vakusuzga kwa anyaki. Kwanja Chiuta kungatiwovya ukongwa.

14 Mu nyengu yaku Malaki, Ayuda anandi akananga ulongozgi waku Chiuta. Yiwu aziŵanga vo Dangu lakambanga pa nkhani ya sembi yo angapereka kweni alilondonga cha. Ivi vinguchitiska kuti Yehova waŵapaski ulongozgi wanthazi. (Ŵerengani Malaki 1:12, 13.) Chinanga kuti Yehova waŵapaskanga ulongozgi kaŵikaŵi, kweni amuvwiyanga cha. Mwaviyo, wanguŵakambiya kuti: “Ndikutumiyeningi thembu ndipu nditembengi vitumbiku vinu. Ndatemba kali vitumbiku vinu chifukwa chakuti mungusunga cha [dangu langu] mu mtima.” (Mal. 2:1, 2) Ivi vilongo kuti asani tileke dala kuvwiya ulongozgi waku Yehova tikumanengi ndi masuzgu ngakulu.

Mulondongi ulongozgi waku Chiuta m’malu mwakutole zeru za charu ichi (Wonani ndimi 15)

15. Kumbi titenere kutcheŵa jalidu wuli lo ŵanthu anandi ŵe nalu mazuŵa nganu?

15 Chifukwa chakuti ŵanthu mazuŵa nganu mbamuvwa zawu, nchakusuzga ukongwa kuŵapaska ulongozgi. Kweniso akana kuwulonde asani waŵapasa. Ndipu wo atiwulonde, kanandi adinginyika nawu. Akhristu atenere cha kuchita viyo. Bayibolu lititikambiya kuti  tileki kutole zeru za charu ichi. Kweni titenere kuziŵa khumbu laku Chiuta ndi kulichita. (Ŵar. 12:2) Kuporote m’gulu laki, Yehova watitipasa ulongozgi kuti utiwovyi pa nkhani zakupambanapambana. Mwakuyeruzgiyapu, watitikambiya mo titenere kuchitiya ndi munthu yo ndi munthukazi pamwenga munthurumi munyidu cha, wo angaja mabwezi ngidu ndipuso vakusangaluska. Asani tilonde ulongozgi ndi mtima wosi, vingalongo kuti tiwonga kweniso titanja Yehova kutuliya pasi pa mtima.Yoh. 14:31; Ŵar. 6:17.

TITHEMBENGI YEHOVA KUTI NDIYU WATIVIKILIYENGI NDI KUTITASKA

16, 17. (a) Nchifukwa wuli tikhumbika kuŵanaŵaniya dankha vo Yehova wakhumba asani tisankha vakuchita? (b) Kumbi Ayisraele angulongo wuli kuti amuyanjanga cha Yehova ndipuso amuthembanga cha?

16 Asani ŵana awona chinthu chakofya achimbiliya kwa apapi ŵawu. Kweni asani akuwa, atamba kujithemba ndipu asankha ŵija vakuchita. Ivi ndivu munthu wachita asani wakuwa. Kweni wo atanjana ndi apapi ŵawu, afwatuka kuŵafumba maŵanaŵanu ngawu asani akhumba kusankha vakuchita. Ndimu viliri pakati paku isi ndi Yehova. Iyu wakutipasa wanangwa wakusankha tija vakuchita. Kweni asani titimuthemba, nyengu zosi timupemphengi kuti watiwovyi asani tipenja kusankha vakuchita. Asani titimugomezga nadi, watipaskengi mzimu waki kuti utiwovyi kuchita cho nchakwenere.Ŵaf. 2:13.

17 Mu nyengu yaku Samuele, Ayisraele anguthereskeka ndi Afilisti. Ŵanthu aku Chiuta akhumbanga chovyu. Kumbi anguchita wuli? Yiwu angukamba kuti: “Tiyeni tikato bokosi la phanganu laku Yehova ku Shilo, alinga kuti lizije ndi isi ndi kutitaska kujanja la arwani ŵidu.” Kumbi ndi vinthu wuli vo vinguchitika ŵati ŵaza nalu? Bayibolu likamba kuti: “Ayisraele anandi angufwa, ndipu asilikali akwenda pasi akukwana 30,000 angubayika. Kweniso Bokosi la phanganu laku Chiuta lingulondeka.” (1 Sam. 4:2-4, 10, 11) Yapa Ayisraele aŵanaŵananga kuti asani ato Bokosi la phanganu Yehova waŵawovyengi. Kweni yiwu angufumba Yehova cha, ayendiyanga maŵanaŵanu ngawu. Ivi vinguchitiska kuti akumani ndi masuzgu ngakulu.Ŵerengani Nthanthi 14:12.

18. Kumbi tingalongo wuli kuti tithemba Yehova?

18 Wakulemba sumu wangulongo mtima wamampha po wangulemba kuti: “Lindizgani Chiuta, ndipu ndimulumbengi chifukwa iyu ndiyu Mtaski wangu Mula. Chiuta wangu, ini ndataya mtima. Ndichu chifukwa chaki nditikukumbukani.” (Sumu 42:5, 6) Mazu yanga ngalongo kuti munthu uyu wamuthembanga kweniso wamuyanjanga ukongwa Yehova? Kumbi namwi mutimuthemba ndi kumuyanja viyo Yehova? Mungasazgiyaku chigomezgu chinu mwakuyana ndi vo Bayibolu likamba. Lititi: “Gomezga Yehova ndi mtima waku wosi, ndipu ungathembanga zeru zaku cha. Umukumbukengi mu nthowa zaku zosi, ndipu iyu wanyoroskengi nthowa zaku.”Nthanthi 3:5, 6.

19. Kumbi ndi nthowa nizi zo mukhumba kulongore kuti mutanja Yehova?

19 Pakuti Yehova ndiyu wangwamba kutiyanja, wakutiwovya kuti nasi timuyanjengi. Nyengu zosi tiŵanaŵaniyengi mo iyu watitiyanjiya. Mwaviyo, tiyeni tilutirizgi kumuyanja ‘ndi mtima widu wosi, ndi umoyu widu wosi, ndi maŵanaŵanu ngidu ngosi ndi nthazi zidu zosi.’Marko 12:30.