Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  August 2015

Vo Tingasambira Kwaku Joana

Vo Tingasambira Kwaku Joana

ŴANTHU anandi aziŵa kuti Yesu wenga ndi akutumika 12. Kweni aziŵa cha kuti wenga so ndi akusambira anthukazi wo amuyanjanga ukongwa. Joana wenga m’gulu la anthukazi ŵenaŵa.Mat. 27:55; Luka 8:3.

Kumbi Joana wachitanganji mu nyengu yaku Yesu, ndipu isi tingasambiranji kwaku iyu?

KUMBI JOANA WENGA YANI?

Joana wenga “muwolu waku Khuza, kapitawu waku Herode.” Khuza watenere kuti wawoneriyanga nyumba yaku Herode Antipasi. Joana njumoza mwa anthukazi wo Yesu wanguŵachizga. Iyu pamoza ndi anthukazi anyaki, ayendanga limoza ndi Yesu kweniso akutumika ŵaki.Luka 8:1-3.

Asambizi achiyuda akhumbanga cha kuti anthukazi achezengi ndi anthurumi bweka, kweni abali ŵawu pe. Akhumbanga so cha kuti alongozganengi nawu. Ndipu anthurumi achiyuda alongoronga ukongwa cha ndi anthukazi. Kweni Yesu wanguzomerezga kuti Joana ndi anthukazi anyaki aje pa gulu laki.

Joana waziŵanga kuti ŵanthu amususkengi chifukwa chakwenda ndi Yesu kweniso akutumika, kweni wavitoliyanga kanthu cha. Ŵanthu wosi wo ayendanga ndi Yesu akhumbikanga kusintha vinthu vinyaki pa umoyu wawu. Pakukamba za akusambira ŵaki, Yesu wanguti: “Ama ndi abali ŵangu ndi yaŵa wo atuvwa mazu ngaku Chiuta ndi kungachita.” (Luka 8:19-21; 18:28-30) Kumbi muchiskika cha kuziŵa kuti Yesu watanja ŵanthu wo atijipereka kuti aje akusambira ŵaki?

WATEŴETIYANGA NDI CHUMA CHAKI

Joana ndi anthukazi anyaki anandi “ateŵetiyanga” Yesu kweniso akutumika 12 “ndi chuma chawu.” (Luka 8:3) Pakukonkhoska lemba ili, munthu munyaki wakulemba kuti: “Luka wang’anamuwanga kuti anthukazi yaŵa abikanga, kusuka mbali pamwenga kusona vakuvwala cha. Panyaki achitanga nadi venivi . . . , kweni ndivu Luka wakamba cha.” Lemba ili lilongo kuti anthukazi yaŵa agwiriskiyanga ntchitu ndalama ndi katundu wawu kuti awovyi Yesu ndi akutumika.

Yesu ndi akutumika ŵaki agwiranga ntchitu cha. Mwaviyo, ŵengavi ndalama zakuguliya chakurya ndi vinthu vinyaki kuti aphwere ŵanthu pafupifupi 20 wo ŵenga pa gulu lawu. Chinanga kuti ŵanthu  anyaki aŵawovyanga, kweni Khristu ndi akutumika ŵaki apinganga “bokosi la ndalama.” Ivi vilongo kuti athembanga waka chovyu cha ŵanthu cha. (Yoh. 12:6; 13:28, 29) Joana ndi anthukazi anyaki atenere kuti aperekanga ndalama kuti Yesu ndi akutumika ŵaki aguliyengi vinthu vakukhumbika.

Ŵanthu anyaki asuska kuti anthukazi achiyuda ajanga ndi ndalama. Kweni mabuku nganyaki ngalongo kuti anthukazi achiyuda asaniyanga ndalama mu nthowa zinandi: (1) alondiyanga chihara asani awiskewu afwa kwambula mwana munthurumi, (2) asani munthu munyaki waŵapasa chinthu, (3) asani arumu ŵawu aŵapata, (4) asani arumu ŵawu atayika, pamwenga (5) asani achita bizinesi.

Tikayika cha kuti akusambira aku Yesu ayesesanga kupereka vo angafiska. Akusambira ŵaki anyaki atenere kuti ŵenga anthukazi akukhupuka. Chifukwa chakuti Joana wenga muwolu waku Khuza, wantchitu waku Herode, anyaki awona kuti wenga wakukhupuka. Munthu wakukhupuka ndiyu watenere kuti wangupereka chakuvwala chambula musonu cho Yesu wavwalanga. Munthu munyaki wangukamba kuti chakuvwala ichi chenga chakuti “chingatuwa ku muwolu wa mulovi cha.”Yoh. 19:23, 24.

Malemba ngakamba mwakudunjika cha kuti Joana waperekanga ndalama. Kweni wanguchita vo wangufiska ndipu isi tingasambirapu kanthu. Kaya tipereka vinthu wuli kuti tiwovyi pa ntchitu ya Ufumu, kweni Chiuta wakondwa asani tipereka ndi mtima wosi.Mat. 6:33; Marko 14:8; 2 Ŵakor. 9:7.

PA NYENGU YO YESU WAFWIYANGA KWENISO PAVULI PAKI

Viwoneka kuti Joana wengapu pa nyengu yo Yesu amubayanga. Penga so anthukazi anyaki wo “ayendanga nayu ndi kumuteŵete po wenga ku Galile ndi anthukazi anyaki anandi wo anguluta nayu ku Yerusalemu.” (Marko 15:41) Ŵati atuzgapu liŵavu laku Yesu pa chimiti kuti akaŵiki, “anthukazi wo anguza pamoza nayu kutuwa ku Galile, angulondo pavuli, ndipu anguwona muunda ndi mo linguŵikikiya liŵavu laki. Ndipu anguwe kuti akanozgi vyema ndi mafuta.” Luka wangukamba kuti anthukazi yaŵa ŵenga “Mariya Magadala, Joana ndi Mariya nyina waku Yakobe.” Zuŵa la sabata lati lajumphapu, yiwu anguwere kumuunda ndipu anguwona mungelu yo wanguŵakambiya kuti Yesu wayuka.Luka 23:55–24:10.

Joana ndi anyaki anguchita vo angafiska kuti awovyi pa nyifwa ya Ambuya

Joana watenere kuti wenga limoza ndi akusambira, anyina aku Yesu ndi avulwa ŵaki wo anguwungana ku Yerusalemu pa Pentekoste mu 33 C.E. (Mac. 1:12-14) Chifukwa chakuti murumu waku Joana wagwiranga ntchitu kunyumba kwaku Herode, Joana watenere kuti ndiyu wakambiyanga Luka vinthu vinyaki vakukwaskana ndi Herode Antipasi. Ivi ve viyo chifukwa ndi Luka pe yo wazumbuwa zina laku Joana.Luka 8:3; 9:7-9; 23:8-12; 24:10.

Tisambira vinandi kwaku Joana. Iyu wanguteŵete Yesu ndi mtima wosi. Watenere wangukondwa ukongwa kuti ndalama zo wangupereka zinguwovya Yesu ndi akutumika ŵaki pa ntchitu yakupharazga. Ndipu Yesu wati wakumana ndi masuzgu, Joana wanguleka cha kumuteŵete. Anthukazi achikhristu nawu atenere kuja ndi mtima nge waku Joana.