Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  August 2015

Muŵanaŵaniyengi Chanju Chambula Kumala Chaku Yehova

Muŵanaŵaniyengi Chanju Chambula Kumala Chaku Yehova

“Ndiŵanaŵaniyengi ntchitu zinu zosi.”SUMU 77:12.

SUMU: 18, 61

1, 2. (a) Nchifukwa wuli musimikizga kuti Yehova watanja ŵanthu ŵaki? (b) Kumbi ŵanthu akulengeka ndi mtima wuli?

NCHIFUKWA wuli musimikizga kuti Yehova watanja ŵanthu ŵaki? Mwechendamuki fumbu ili, ŵanaŵaniyani dankha azichi yaŵa. Kwa vyaka vinandi, abali ndi azichi anguwovya mzichi munyaki zina laki Taylene kuti wawonengi vinthu mwakwenere kweniso waleki kulimbana ndi vinthu vo wangatondeka kufiska. Iyu wangukamba kuti: “Asani Yehova wandiyanjanga cha, mphanyi wakuleka kundipaska ulongozgi.” Brigitte waleranga yija ŵana ŵaki ŵaŵi murumu waki wati watayika. Iyu wangukamba kuti: “Kulera ŵana m’charu chaku Satana ichi nkhwakusuzga, ndipu visuzga ukongwa asani mpapi yumoza watayika. Kweni ndisimikizga kuti Yehova watindiyanja chifukwa wandiwovya pa nyengu yosi yo ndasuzgikanga. Iyu wanguzomerezga cha kuti ndisuzgiki mpaka kutondeka kukunthiyapu.” (1 Ŵakor. 10:13) Sandra wenga ndi matenda ngambula kuchizgika. Pa unganu unyaki, muwolu wa m’bali munyaki wangulongo kuti watimwanja. Murumu waku Sandra wangukamba kuti: “Chinanga kuti tamuziŵanga cha, kweni tingukondwa ukongwa chifukwa chakulongo  kuti watitiyanja. Ndipu chinanga ndi vinthu vimanavimana vo abali ndi azichi atindichitiya vitindovya kuziŵa kuti Yehova watitiyanja ukongwa.”

2 Ŵanthu akulengeka ndi mtima wakukhumba kwanja anyawu ndi kwanjika. Chingaŵa chipusu kudandawula asani anyidu aleka kutiyanja chifukwa chakuti titama, tilivi ndalama, uteŵeti widu utenda umampha cha pamwenga chifukwa cha vinthu vinyaki vamabuchibuchi. Asani tayamba kuwona kuti Yehova waleka kutiyanja, tingachita umampha kukumbuka kuti te akuzirwa ukongwa kwaku iyu. Titenere so kukumbuka kuti ‘wako janja lidu lamaryi’ kuti watiwovyi. Iyu watiluwengi cha asani titimugomezga.—Yes. 41:13; 49:15.

3. Kumbi ndi vinthu vuli vo vingatiwovya kusimikizga kuti Yehova watitiyanja ukongwa?

3 Ŵanthu wo akambika m’ndimi yakwamba, asimikizga kuti Chiuta wanguŵawovya pa nyengu ya masuzgu. Nasi titenere kusimikizga kuti watiwovyengi. (Sumu 118:6, 7) Nkhani iyi yikonkhoska vinthu vinayi vo vilongo kuti Yehova watitiyanja. Vinthu ivi ndi (1) vo wakulenga, (2) Mazu ngaki, (3) rombu, ndi (4) sembi yaku Yesu. Kuŵanaŵaniya vinthu vamampha vo Yehova watitichitiya, kutiwovyengi kuti tiwongengi chanju chaki chambula kumala.Ŵerengani Sumu 77:11, 12.

MUŴANAŴANIYENGI VO YEHOVA WAKULENGA

4. Kumbi tilongonji asani tiŵanaŵaniya vo Yehova wakulenga?

4 Kumbi vo Yehova wakulenga vitikuwovyani kuziŵa kuti we ndi chanju chambula kumala? Vinthu vo Chiuta wakulenga vilongo nadi kuti watitiyanja. (Ŵar. 1:20) Wakupanga charu chapasi kuti isi tijengemu ndi umoyu wamampha. Kweni kuti tilutirizgi kuja ndi umoyu tikhumbika kurya. Mwaviyo, Yehova wanguwoneseska kuti charu chije ndi vimiti vakupambanapambana kuti vitipasengi chakurya chakunowa. Iyu wakuchitiska so kuti kurya kujengi kwakunozga ndi kwakukondweska! (Wak. 9:7) Mu nyengu yachipwepwi, mzichi munyaki ku Canada zina laki Catherine, wakondwa ukongwa kuwona vo Chiuta wakulenga. Iyu wangukamba kuti: “Vakukondweska ukongwa kuwona mo vinthu vo Chiuta wakulenga vichitiya. Ndikondwa asani ndiwona maluŵa ngabuka ndipuso asani tiyuni tiwere ko tija, kusazgiyapu tamsongu to tijumpha pa windu la khichini langu. Yehova watenere kuti watanja ta ŵanthu pakutipaska vinthu vakukondweska venivi.” Awuskefwi akuchanya akondwa ndi vinthu vo akulenga ndipu akhumba kuti nasi tikondwengi navu.Mac. 14:16, 17.

5. Kumbi Yehova walongo wuli kuti watitiyanja?

5 Yehova wakutilenga kuti tigwirengi ntchitu. Ivi vichitiska kuti tikondwengi. (Wak. 2:24) Iyu wakhumbanga kuti ŵanthu azazi charu chapasi, achithereski, alamuliyengi somba, viyuni ndi vakulengeka vinyaki. (Chiy. 1:26-28) Yehova wakutilenga so ndi mijalidu yamampha yo yititiwovya kuti tichitengi vo wakhumba! Vosi ivi vilongo kuti watitiyanja.Ŵaef. 5:1.

MUWONENGI KUTI MAZU NGAKU CHIUTA NGAKUKHUMBIKA

6. Kumbi Bayibolu lingatiwovya kuziŵanji?

6 Chiuta wakulongo kuti watitiyanja ukongwa pakutipaska Mazu ngaki. Bayibolu lingatiwovya kuziŵa vakukwaskana ndi iyu kweniso mo wachitiya ndi ŵanthu. Mwakuyeruzgiyapu, Malemba ngakamba vo wanguchita ndi Ayisraele wo amubudiyanga kaŵikaŵi. Lemba la Sumu 78:38 likamba kuti:  “Kweni wanguŵalenge lisungu. Waŵagowokiyanga maubudi ngawu, ndipu waŵananganga cha. Nyengu zinandi wajikonga ku kandundu ndipu walutirizganga cha kuŵakwiyiya.” Kuŵanaŵaniya fundu za pa lemba ili, kungakuwovyani kuziŵa kuti Yehova watikuyanjani kweniso watikuŵanaŵaniyani. Ziŵani kuti Yehova wawona kuti mwe akukhumbika ukongwa kwaku iyu.Ŵerengani 1 Petro 5:6, 7.

7. Nchifukwa wuli tikhumbika kuwona kuti Bayibolu ndakukhumbika ukongwa?

7 Tiwonengi kuti Bayibolu ndakukhumbika ukongwa chifukwa ndilu Chiuta wagwiriskiya ntchitu pakulongoro nasi. Asani apapi ndi ŵana akambiskana umampha, vingawovya kuti agomezganengi kweniso ayanjanengi. Kumbi Yehova walongoro nasi wuli? Chinanga kuti teche ndamuwonepu pamwenga kuvwa mazu ngaki, iyu walongoro nasi kuporote m’Bayibolu ndipu isi tikhumbika kuvwisiya. (Yes. 30:20, 21) Yehova wakhumbisiska kutilongozga kweniso kutivikiliya. Iyu wakhumba so kuti timuziŵi ndi kumugomezga.Ŵerengani Sumu 19:7-11; Nthanthi 1:33.

Chinanga kuti Yehu wangumuchenya Yehosafati kweni Yehova wanguwona “vinthu vamampha” mwaku iyu (Wonani ndimi 8 ndi 9)

8, 9. Kumbi Yehova wakhumba kuti tiziŵenji? Perekani chakuwoniyapu cha m’Bayibolu.

8 Yehova wakhumba kuti tiziŵengi kuti iyu watitiyanja ndipuso wawona vamampha vo tichita chinanga kuti te ambula kufikapu. (2 Mik. 16:9) Ivi ndivu wanguchita ndi Yehosafati, Fumu ya Yuda. Nyengu yinyaki, Yehosafati wanguchita vinthu mwambula zeru. Iyu wanguzomera kuluta ku nkhondu ndi Ahabu  fumu ya Yisraele. Yiwu akhumbanga kuchilonda msumba wa Ramoti-gileada ku Siriya. Chinanga kuti achimi aboza 400 angusimikizgiya Ahabu kuti wamupunda, kweni mchimi waku Yehova Mika wangukamba kuti amuthereskeka. Ahabu wangufwa pa nkhondu iyi ndipu Yehosafati wanguthaŵa. Wati wawere ku Yerusalemu, wanguchenyeka chifukwa cha kukoliyana ndi Ahabu. Chinanga kuti venga viyo, Yehu mwana waku Hanani wangukambiya Yehosafati kuti: “Pe vinthu vamampha vo vawoneka mwaku iwi.”2 Mik. 18:4, 5, 18-22, 33, 34; 19:1-3.

9 Kukwamba kwa muwusu waki, Yehosafati wangukambiya nduna, Alevi ndi asembi kuti ayendi m’misumba yosi ya Yuda ndi chilatu chakuti akasambizi ŵanthu Dangu laku Yehova. Ivi vinguwovya ukongwa, mwakuti mitundu yapafupi yingwamba kopa Yehova. (2 Mik. 17:3-10) Mbuneneska kuti Yehosafati wanguchita vinthu vambula kwenere, kweni Yehova wanguwona vinthu vamampha vo wanguchita. Nkhani yaku Yehosafati yititikumbuska kuti chinanga kuti te ambula kufikapu, Yehova walutirizgengi kutiyanja asani tichita vinthu vakumukondweska kutuliya pasi pa mtima.

MUROMBENGI KWAKU YEHOVA

10, 11. (a) Nchifukwa wuli rombu nchawanangwa chapade cho Yehova wakutipaska? (b) Kumbi Chiuta wamuka wuli marombu ngidu? (Wonani chithuzi cho che papeji 9.)

10 Da wachanju wasaniya nyengu yakuvwisiya ŵana ŵaki asani akhumba kulongoro nayu. Iyu wakhumba kuziŵa vo vitiŵafipiska mtima chifukwa watiŵayanja. Mwakuyana waka, Yehova wavwisiya asani tiromba.

11 Tingaromba kwaku Yehova nyengu yeyosi. Wakutipaska nyengu cha yakurombe. Ndi mubwezi widu ndipu nyengu zosi ngwakunozgeka kutivwisiya. Taylene yo wakambika pakwamba, wangukamba kuti: “Ungamukambiya chechosi cho ukhumba.” Asani tikambiya Chiuta vo ve m’mtima widu, wangatimuka kuporote mwa abali ndi azichi, m’nkhani yinyaki ya m’Bayibolu, pamwenga nkhani ya m’magazini ngidu. Chinanga kuti pangaŵavi yo wangativwisa kweni Yehova watuvwa vo tipempha. Asani watimuka marombu ngidu, walongo kuti watitiyanja ukongwa.

12. Nchifukwa wuli titenere kuŵanaŵaniya marombu ngo nge m’Bayibolu? Perekani chakuwoniyapu.

12 Tingasambira vinandi ku marombu ngo nge m’Bayibolu. Nyengu zinyaki, tingachita umampha kukambiskana marombu ngenanga pakusopa kwa pabanja. Kuŵanaŵaniya mo ateŵeti aku Yehova a m’nyengu yakali arombiyanga, kungatiwovya kuziŵa fundu zo tingasazgiyamu m’marombu ngidu. Mwakuyeruzgiyapu, mungakambiskana vo Yona wanguromba po wenga mumoyu mwa chisomba. (Yona 1:17–2:10) Kweniso, mungakambiskana rombu lakutuliya pasi pa mtima lo Solomoni wangupereka pakupaturiya nyumba yakusopiyamu. (1 Ŵakar. 8:22-53) Ŵanaŵaniyani rombu lakuwoniyapu lo Yesu wangupereka. (Mat. 6:9-13) Chakukhumbika ukongwa nchakuti nyengu zosi ‘vo mupempha viziŵiki kwaku Chiuta.’ Ndipu ‘chimangu chaku Chiuta cho chiluska kuŵanaŵana kwekosi chivikiliyengi mtima winu ndi maŵanaŵanu nginu mwaku Khristu Yesu.’ Asani tiromba tingasazgiyaku kuwonga chanju chambula kumala cho Yehova wenachu.Ŵaf. 4:6, 7.

MO TINGALONGORE KUTI TIWONGA SEMBI YAKU YESU

13. Kumbi sembi yaku Yesu yititiwovya wuli?

13 Yesu wakupereka sembi kuti ‘tizisaniyi umoyu.’ (1 Yoh. 4:9) Pakukamba za chanju  chikulu ichi cho Chiuta wakulongo, wakutumika Paulo wangulemba kuti: “Khristu wakufwiya ŵanthu ambula kusopa Chiuta. Pakuti nkhwakusuzga kuti munthu wafwiyi murunji. Mbuneneska, panyaki munthu munyaki wangafwiya munthu wamampha. Kweni Chiuta wakutilongo chanju chaki mwakuti po tenga akunanga, Khristu wangutifwiya.” (Ŵar. 5:6-8) Ivi vilongo kuti Chiuta watitiyanja ukongwa ndipu vititiwovya kuja nayu pa ubwezi.

14, 15. Kumbi sembi yaku Yesu yitiŵawovya wuli (a) Akhristu akusankhika? (b) wo azamuja pacharu chapasi?

14 Pe ŵanthu amanavi wo Yehova watiŵayanja mwapade. (Yoh. 1:12, 13; 3:5-7) Yiwu asankhika ndi mzimu wakupaturika kuti aje “ŵana aku Chiuta.” (Ŵar. 8:15, 16) Paulo wangukamba kuti Akhristu akusankhika ‘akukwezeka pamoza ndi kujalikika pamoza m’malu nga kuchanya mwakukoliyana ndi Khristu Yesu.’ (Ŵaef. 2:6) Yiwu aja m’malu ngauzimu ngenanga chifukwa chakuti ‘akudindika chidindu cha mzimu wakupaturika wo ukulayizgika, wo nchikoli cha chihara chawu cha munthazi.’Ŵaef. 1:13, 14; Ŵakol. 1:5.

15 Kweni ŵanthu anandi wo agomezga sembi yaku Yesu aja mabwezi ngaku Yehova. Yiwu alindizga kuti azije ŵana aku Chiuta ndi kuzilonde umoyu wamuyaya mu Paradayisu pacharu chapasi. Mwaviyo, Yehova walongo kuti watanja ŵanthu chifukwa cha sembi yo wakupereka. (Yoh. 3:16) Asani tikhumba kuzija ndi umoyu wamuyaya pacharu chapasi ndipu tilutirizga kumuteŵete mwakugomezgeka, tingaja ndi chigomezgu kuti wazakutiwovya kuja ndi umoyu wamampha m’charu chifya. Sembi yo Chiuta wakutipaska mbukaboni wakuti watitiyanja ukongwa. Asani tiwona viyo, ndikuti tichita umampha.

TIMUYANJENGI YEHOVA

16. Kumbi kuŵanaŵaniya nthowa zo Yehova walongore kuti watitiyanja kungatiwovya wuli?

16 Tikhumbika kusaniya nyengu kuti tiŵerengengi vinthu vo Yehova watitichitiya vo vilongo kuti watitiyanja ukongwa. Davidi wanguti: ‘Kwaku ini, maŵanaŵanu nginu ngakuzirwa ukongwa, imwi a Chiuta, ndipu nganandi ukongwa! Asani ndingayesa kungaŵerenga, ngangaja nganandi ukongwa kuluska mchenga.’ (Sumu 139:17, 18) Maŵanaŵanu ngenanga ngangatiwovya kuja ndi mtima wakwanja Yehova chifukwa chakuti nayu watitiyanja ukongwa. Titenere so kuyesesa kumuteŵete ndi mtima wosi.

17, 18. Kumbi ndi nthowa nizi zinyaki zo tingalongore kuti titanja Yehova?

17 Pe nthowa zinandi zo tingalongore kuti titanja Yehova. Mwakuyeruzgiyapu, tingalongo kuti titanja Chiuta ndi ŵanthu asani tipharazga mwaphamphu uthenga wa Ufumu. (Mat. 24:14; 28:19, 20) Kweniso tingalongo kuti titanja ukongwa Yehova asani tigomezgeka pa nyengu yo titeseka. (Ŵerengani Sumu 84:11; Yakobe 1:2-5.) Asani tayamba kuyeseka ukongwa, titenere kugomezga kuti Chiuta waziŵa masuzgu ngidu ndipu watiwovyengi chifukwa te akukhumbika ukongwa kwaku iyu.Sumu 56:8.

18 Kwanja Yehova kutitiwovya kuŵanaŵaniya vo wakulenga kweniso vinthu vinyaki vamampha ukongwa vo wachita. Tilongo kuti titanja Chiuta ndipu tiwona kuti Mazu ngaki ngakukhumbika asani tisambira Bayibolu mwaphamphu. Kwanja Yehova kutitiwovya kuti tirombengi kwaku iyu nyengu zosi. Kweniso titimuyanja ukongwa Chiuta asani tiŵanaŵaniya sembi yo wakupereka chifukwa cha maubudi ngidu. (1 Yoh. 2:1, 2) Takambiskana vifukwa vimanavi waka vo tingalongore kuti titanja Yehova chifukwa chakuti we ndi chanju chambula kumala.