Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  August 2015

 YATULIYA MUNKHANI ZIDU ZAKALI

“Yehova Wakukudaniyani Kunu ku France Kuti Muzisambiri Uneneska”

“Yehova Wakukudaniyani Kunu ku France Kuti Muzisambiri Uneneska”

ANTOINE SKALECKI weche mwana, wayanjanga hashi. Wayendanga nayu m’mdima. Ndipu wapinganga maka nganandi m’mugodi wa mamita 500. Awiski aku Antoine angupwetekeke mumugodi. Ivi vinguchitiska kuti banja lawu likambiyi Antoine kuti wakagwirengi ntchitu mumugodi maora 9 pa zuŵa. Nyengu yinyaki, Antoine wanguja kamanavi kufwa chifukwa chakuti mugodi ungudirizika.

Vipangizu vo ŵanthu a ku Poland agwiriskiyanga ntchitu mumigodi kweniso mugodi wa ku Dechy pafupi ndi tawuni ya Sin-le-Noble, ko Antoine Skalecki wagwiranga ntchitu

Antoine wenga yumoza mwa ŵana anandi wo anguwiya ku France mu vyaka va m’ma 1920 ndi m’ma 1930. Kweni apapi ŵawu ŵenga a ku Poland. Nchifukwa wuli ŵanthu a ku Poland anguza ku France? Nkhondu Yakwamba Yapacharu Chosi yati yamala, charu cha Poland chingwamba kujiwusa chija. Ivi vinguchitiska kuti m’charu ichi mujengi ŵanthu anandi ukongwa. Kweni m’charu cha France, ŵanthu mamiliyoni nganandi angufwa pa nkhondu ndipuso akhumbanga ŵanthu kuti akagwirengi ntchitu mumigodi ya maka. Mwaviyo, mu September 1919 boma la France ndi Poland angukoliyana kuti ŵanthu a ku Poland akengi ku France. Mu 1931, ku France kwenga ŵanthu 507,800 a ku Poland ndipu anandi ajanga muvigaŵa va migodi.

Ŵanthu a ku Poland anguza ku France ndi midawuku yawu kweniso ayanjanga visopa vawu. Antoine yo sonu we ndi vyaka 90 wangukamba kuti: “Ambuya a Joseph akambanga vakukwaskana ndi Malemba Ngakupaturika ngo awuskewu anguŵasambiza.” Pa Sabata peposi, mabanja nga ŵanthu a ku Poland ngo ngagwiranga ntchitu mumigodi ngavwalanga malaya ngakutowa asani ngatiya ku tchalitchi nge mo achitiyanga kwawu. Kweni ŵanthu anyaki a ku France akondwanga cha ndi venivi.

Ku chigaŵa cha Nord-Pas-de-Calais ndiku ŵanthu anandi a ku Poland angwamba kukumana ndi Akusambira Bayibolu. Yiwu apharazganga mwaphamphu muchigaŵa ichi kwambiya mu 1904. Mu 1915, Chigongwi cha Alinda chingwamba kusindikizika mu Chipolishi. Ndipu Galamukani! yingwamba kusindikizika mu 1925. Mabanja nganandi ngayanjanga fundu za m’Malemba za m’magazini ngenanga. Yiwu ayanjanga so nkhani za m’buku la The Harp of God la Chipolishi.

Ŵanthu a m’banja laku Antoine anguziŵa vakukwaskana ndi Akusambira Bayibolu kwa asibweni ŵaki. Asibweni ŵaki angwamba kuwungana ndi Akusambira Bayibolu mu 1924. M’chaka ichi, Akusambira  Bayibolu anguchita unganu wawu wakwamba mu Chipolishi. Unganu uwu unguchitikiya mu chigaŵa cha Bruay-en-Artois. Pati pajumpha mazuŵa ngamanavi, Joseph F. Rutherford yo wangumiya likulu la Akusambira Bayibolu, wanguchitiska unganu unyaki ndipu penga ŵanthu akukwana 2,000. M’bali Rutherford wangukondwa ukongwa kuwona ŵanthu anandi a ku Poland wo anguza pa unganu uwu. Iyu wanguŵakambiya kuti: “Yehova wakukudaniyani kunu ku France kuti muzisambiri uneneska. Mwaviyo, imwi ndi ŵana ŵinu mutenere kovya ŵanthu a ku France kuti nawu aziŵi uneneska. Peche ntchitu yikulu yakupharazga. Yehova wasaniyengi apharazgi kuti agwiri ntchitu iyi.”

Yehova Chiuta wanguchita nadi venivi! Akhristu a ku Poland apharazganga mwaphamphu nge mo achitiyanga pakugwira ntchitu mumigodi. Anyaki anguwere kwawu ku Poland kuti akapharazgi uneneska wo angusambira. Pa gulu ili, penga Teofil Piaskowski, Szczepan Kosiak ndi Ja Zabuda. Yiwu angupharazga uthenga wamampha mu vigaŵa vinandi va ku Poland.

Kweni apharazgi anandi wo alongoro Chipolishi angujaliya ku France. Yiwu angulutirizga kupharazga mwaphamphu pamoza ndi abali ndi azichi a m’charu ichi. Pa unganu wo unguchitika mu 1926 mutawuni ya Sin-le-Noble, ŵanthu 1,000 ŵenga a Chipolishi ndipu 300 ŵenga a Chifulenchi. Buku Lapachaka la 1929 lingukamba kuti: “M’chaka ichi, ŵanthu 332 angubatizika.” Nkhondu Yachiŵi Yapacharu Chosi yechendayambi, ku France kwenga mipingu 84. Pa mipingu iyi, 32 yenga ya Chipolishi.

Abali ndi azichi a ku Poland wo ŵenga ku France awe ku unganu wachigaŵa. Chikwangwani chingulembeka kuti, “Akaboni aku Yehova”

Mu 1947, boma la Poland lingupempha Akaboni aku Yehova wo ŵenga ku France kuti awere ku Poland ndipu anandi anguzomera. Chinanga kuti anguwere kwawu, ntchitu yakupharazga yo yiwu ndi apharazgi a ku France anguchita yinguwovya kuti chiŵerengeru cha apharazgi chikuwi. Ndipu mu 1948 mpaka 1950 chiŵerengeru cha apharazgi chingusazgikiyaku so ukongwa. Kuti apharazgi asonu ŵenaŵa asambiziki, mu 1948 ofesi ya nthambi ya ku France yingusankha akuwonere madera 5. Pa akuwonere madera yaŵa, anayi alongoronga Chipolishi ndipu Antoine Skalecki nayu wenga pa gulu lenili.

Akaboni aku Yehova anandi wo ŵe ku France ŵeche kuziŵika ndi mazina nga apapi ŵawu a ku Poland wo agwiranga ntchitu mwaphamphu mumigodi kweniso mu uteŵeti. Mazuŵa nganu napu, ŵanthu anandi wo aluta ku France asambira uneneska. Kaya ŵanthu akutuliya m’vyaru vinyaki awere kwawu, pamwenga aja kweniko ku France, yiwu apharazga mwaphamphu uthenga wa Ufumu nge mo achitiyanga ŵanthu a ku Poland.—Yatuliya munkhani zidu zakali ku France.