Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  July 2015

Malu Ngidu Ngakusopiyamu Yehova

Malu Ngidu Ngakusopiyamu Yehova

‘Kujipereka panyumba yinu kwazakundirya.’YOH. 2:17.

SUMU: 127, 118

1, 2. (a) Kumbi ateŵeti aku Yehova akali asopiyanga nunkhu? (b) Kumbi Yesu wayiwonanga wuli nyumba yakusopiyamu yo yenga ku Yerusalemu? (c) Kumbi tikambiskanengenji mu nkhani iyi?

ATEŴETI aku Chiuta akwamba kali kuja ndi malu ngakusopiyapu. Abelu watenere kuti wangugwiriskiya ntchitu jocheru po wangupereka sembi kwaku Chiuta. (Chiy. 4:3, 4) Ndipu Nowa, Abrahamu, Yisaki, Yakobe ndi Mosese nawu anguzenga jocheru. (Chiy. 8:20; 12:7; 26:25; 35:1; Chit. 17:15) Yehova wangukambiya Ayisraele kuti apangi chihema. (Chit. 25:8) Pavuli paki, yiwu anguzenga nyumba yakusopiyamu Yehova. (1 Ŵakar. 8:27, 29) Ayuda ŵati aweku ku ukapolu ku Babiloni, awungananga m’masinagogi. (Marko 6:2; Yoh. 18:20; Mac. 15:21) Ndipu Akhristu akwamba awungananga mu nyumba za abali. (Mac. 12:12; 1 Ŵakor. 16:19) Mazuŵa nganu, ŵanthu aku Yehova awungana mu Nyumba za Ufumu kuti asopi Chiuta.

2 Yesu wayiyanjanga ukongwa nyumba yakusopiyamu Yehova yo yenga ku Yerusalemu. Ndichu chifukwa chaki Yohane wangukamba kuti uchimi wa pa Sumu 69:9 ungufiska paku iyu. Uchimi  waki ngwakuti: ‘Kujipereka panyumba yinu kwandirya.’ (Yoh. 2:17) Palivi Nyumba ya Ufumu yo tingakamba kuti yiyanana ndi nyumba yakusopiyamu yo yenga ku Yerusalemu kali. (2 Mik. 5:13; 33:4) Chinanga kuti ve viyo, Bayibolu le ndi fundu zo zingatiwovya mo titenere kuchitiya ndi malu ngo tisopiyamu Yehova mazuŵa nganu. Mu nkhani iyi, tikambiskanengi fundu zenizi. Ndipu zitiwovyengi kuziŵa mo titenere kuwone Nyumba za Ufumu kweniso vo tingachita kuti tiwovyepu pa kuzenga ndi kunozga nyumba izi. *

MUWONENGI KUTI KUSOPA NKHWAKUZIRWA UKONGWA

3-5. Kumbi Nyumba ya Ufumu yigwira ntchitu wuli, nanga titenere kungawona wuli maunganu?

3 Nyumba ya Ufumu ndi malu ngakusopiyamu Yehova. Mu nyumba iyi ndimu Yehova watitipaskiya chakurya chauzimu sabata yeyosi. Ndipu tichiskika ndi kulonde ulongozgi kuporote mu gulu laki. Ndi mwaŵi ukulu ukongwa kudanika ndi Yehova kweniso Mwana waki kuti ‘tiziryi pa thebulu laku Yehova’ sabata yeyosi. Mwaviyo, tikhumbika cha kuwuwona mwakupepuka mwaŵi uwu.1 Ŵakor. 10:21.

4 Yehova wawona kuti kuwungana ngwakuzirwa ukongwa. Ndichu chifukwa chaki wangukambiya wakutumika Paulo kuti watichiski kuti tingalekanga cha kuwungana. (Ŵerengani Ŵahebere 10:24, 25.) Kumbi tingalongo kuti titumbika Yehova asani tija ku maunganu kwambula chifukwa chakuvwika? Kukamba uneneska, tingalongo kuti tiwonga vo Yehova watitichitiya asani tinozgeke maunganu ndi kumukapu ndi mtima wosi.Sumu 22:22.

5 Titenere kuwona kuti Nyumba ya Ufumu njakuzirwa. Kweniso, tikhumbika kuchita vinthu mwaulemu asani te pa maunganu. Mo tiwone Nyumba ya Ufumu vingalongo mo tiwone zina laku Chiuta lo le pachikwangwani cha Nyumba ya Ufumu.—Yeruzgiyani ndi 1 Ŵakaronga 8:17.

6. Kumbi ŵanthu anyaki akambanji vakukwaskana ndi Nyumba za Ufumu kweniso ŵanthu wo awungana mu nyumba zenizi? (Wonani chithuzi cho che papeji 27.)

6 Kanandi ŵanthu wo mbakaboni cha aziŵa asani isi tiwona kuti malu ngakusopiyamu ngakuzirwa. Mwakuyeruzgiyapu, munthurumi munyaki ku Turkey wangukamba kuti: “Ndingukwaskika ukongwa ndati ndawona kuti pa Nyumba ya Ufumu mphakutowa ndipuso vinthu vichitika mwandondomeku. Ŵanthu wo anguza ku Nyumba iyi anguvwala mwaulemu, amwemwetiyanga ndipuso angunditawuzga. Ivi vingundikwaska ukongwa.” Munthu uyu wangwamba kuwungana. Pavuli paki, wangubatizika. Mutawuni yinyaki ku Indonesia, mpingu ungudana ŵaraŵara aboma ndi ŵanthu anyaki pa nyengu yo apaturiyanga Nyumba ya Ufumu. Meya nayu wanguza. Iyu wangukondwa kuwona kutowa kwa Nyumba ya Ufumu, kutowa kwa maluŵa ndi kuvwa ntchitu yaki. Iyu wangukamba kuti: “Kutowa kwa nyumba iyi kulongo kuti vo mugomezga vauneneska.”

Nkharu yidu yitenere kulongo kuti titumbika Chiuta (Wonani ndimi 7 ndi 8)

7, 8. Kumbi titenere kukumbukanji asani te pa maunganu?

7 Kuti titumbiki Chiuta yo wakhumba kuti tiwunganengi, titenere kuja ndi nkharu yamampha, kuvwala mwaulemu ndi kujitoweska umampha. Tikhumbika cha kuchita vinthu mwakujumphisa. Viwoneka kuti anandi  ayesesa kuvwala umampha ku maunganu, kweni anyaki avwala mwambula ulemu. Mbuneneska kuti Yehova wakhumba kuti ateŵeti ŵaki ndi ŵanthu anyaki avwalengi mo akhumbiya asani ŵaza ku Nyumba ya Ufumu. Kweni tikhumbika cha kuvwala mwambula ulemu, kutumiziyanga anyidu mamesegi, kulongoro ndi anyidu, kurya, kumwa ndi kuchita vinthu vinyaki pa maunganu. Apapi atenere kusambiza ŵana ŵawu kuti akhumbika cha kutchimbiya pamwenga kuseŵe mu Nyumba ya Ufumu.Wak. 3:1.

8 Yesu wati wawona kuti ŵanthu achitiyamu malonda mu nyumba yakusopiyamu, wangukwiya ukongwa ndipu wanguŵadikiska wosi. (Yoh. 2:13-17) Nyumba za Ufumu nazu tisopiyamu Yehova ndi kusambiriyamu vinthu vauzimu. Mwaviyo, tikhumbika cha kuchitiyamu pamwenga kukambiskana vinthu vakukwaskana ndi malonda.—Yeruzgiyani ndi Nehemiya 13:7, 8.

KUZENGA NYUMBA ZA UFUMU KWENISO KUPEREKA NDALAMA

9, 10. (a) Kumbi ndalama zakuzenge Nyumba za Ufumu zituwa pani, nanga ivi vawovya wuli? (b) Kumbi abali ndi azichi wo atingi afiskengi cha kuzenga Nyumba ya Ufumu awovyeka wuli?

9 Gulu laku Yehova litesesa kuwovya kuti Nyumba za Ufumu zizengeki. Abali ndi azichi akujipereka ndiwu alemba mapulani ndi kuzenga Nyumba za Ufumu. Kumbi ivi vawovya wuli? Kwambiya pa November 1, 1999, Nyumba za Ufumu zakujumpha 28,000 zazengeka. Ichi ching’anamuwa kuti pa avareji, Nyumba za Ufumu zinkhondi zizengeka zuŵa lelosi pacharu chosi chapasi.

10 Gulu ligwiriskiya ntchitu ndalama zo abali ndi azichi apereka kuti lizenge Nyumba za Ufumu kwekosi ko zikhumbika. Gulu lichita viyo chifukwa lilondo fundu ya m’Malemba yakuti wo ŵe ndi vinthu vinandi awovyi wo alivi kuti paje kuyanana. (Ŵerengani 2 Ŵakorinte 8:13-15.) Abali ndi azichi atingi afiskengi cha kuzenga nyumba izi pakuŵija.

11. Kumbi abali ndi azichi anyaki akambanji asani Nyumba ya Ufumu yamala kuzengeka, nanga imwi mutuvwa wuli kuvwa mazu yanga?

11 Gulu lati lazenge Nyumba ya Ufumu mpingu unyaki ku Costa Rica, abali ndi azichi angulemba kalata yakuti: “Asani te pa Nyumba ya Ufumu, tiwona nge kuti nkhutulu. Tigomezga cha kuti te pa nyumba yidu. Nyumba iyi yinguzengeka m’mazuŵa 8 pe. Tiziŵa kuti ivi vikuchitika chifukwa chaku Yehova ndi gulu laki. Malu ngakusopiyamu ngenanga nchawanangwa chamampha ukongwa cho Yehova watipasa. Tikondwa ukongwa ndi nyumba iyi.” Kumbi mukondwa cha kuvwa  mazu yanga ngo abali ndi azichi akamba pacharu chosi chapasi chifukwa cha Nyumba za Ufumu zo gulu laŵazenge? Ntchitu yakuzenga Nyumba za Ufumu njaku Yehova, chifukwa asani zamala ŵaka kuzengeka, muzaza ŵanthu wo akhumba kuziŵa vinandi vakukwaskana ndi Mulengi widu.Sumu 127:1.

12. Kumbi mungawovyaku wuli pa ntchitu yakuzenga Nyumba za Ufumu?

12 Abali ndi azichi anandi akondwa ukongwa kugwiraku ntchitu yakuzenga Nyumba za Ufumu. Kaya tigwiraku ntchitu yakuzenga pamwenga cha, tosi tingawovyaku ntchitu iyi mwakupereka ndalama. Ŵanthu wo ayanjanga kusopa kwa uneneska ndiwu awovyanga ntchitu zakuzenga m’nyengu yakali. Ndimu so viliri mazuŵa nganu, ndipu Yehova watumbikika.Chit. 25:2; 2 Ŵakor. 9:7.

KUTOWESA NYUMBA YA UFUMU

13, 14. Kumbi ndi fundu nizi za m’Malemba zo zingatiwovya kuti nyumba zidu za ufumu zijengi zakutowa?

13 Asani Nyumba ya Ufumu yazengeka, yikhumbika kuja yakutowa nyengu zosi chifukwa ndimu Chiuta yo tisopa waliri. Iyu wachita vinthu mwalusu. (Ŵerengani 1 Ŵakorinte 14:33, 40.) Bayibolu lilongo kuti pe kukoliyana pakati pa kutowa kwakuliŵavu ndi kutowa kwauzimu. (Chiv. 19:8) Mwaviyo, asani ŵanthu akhumba kuti Yehova wakondwengi nawu, atenere kuja achanda.

14 Mwakukoliyana ndi fundu izi, Nyumba ya Ufumu yitenere kuja yakutowa kuti tifwatukengi kudaniyaku ŵanthu akunweka ku maunganu. Asani yiwu afika ku Nyumba ya  Ufumu, awonengi kuti tichita vo titiŵapharazgiya vakuti charu chazamukuŵa chakutowa. Azamuziŵa kuti tisopa Chiuta wakutowa yo wazamusintha charu chapasi kuja paradayisu.Yes. 6:1-3; Chiv. 11:18.

15, 16. (a) Nchifukwa wuli nyengu zinyaki vingaŵa vakusuzga kutowesa Nyumba ya Ufumu, kweni nchifukwa wuli nkhwakuzirwa? (b) Kumbi pa mpingu winu pe ndondomeku wuli yakutowesa Nyumba ya Ufumu, nanga weyosi we ndi udindu wuli?

15 Ŵanthu anyaki mbachanda ukongwa kuruska anyaki. Ivi ve viyo chifukwa cha mo akuliya. Anyaki aja ko kwe fuvu ukongwa, pamwenga nthowa zo apitamu za ulambwi. Penipo anyaki aja ku malu ko maji ngakusuzga kweniso kulivi vinthu vinyaki vakutowese nyumba. Mwe mosi mo vingaŵiya, Nyumba ya Ufumu yikhumbika kuja yakutowa chifukwa ndi malu ngakusopiyamu kweniso yiziŵika ndi zina laku Yehova.Mar. 23:14.

16 Titenere kutowesa Nyumba ya Ufumu po takumbukiya cha. Kweni wupu wa ŵara utenere kupanga ndondomeku ndi kugula vo vikhumbika. Ntchitu zinyaki zikhumbika kuchitika pafupipafupi. Zinyaki zitenere kuchitika asani pajumpha kanyengu. Mwaviyo, ŵara atenere kuchita vinthu mwakukoliyana ndi chilatu chakuti awonesesi kuti vosi vichitika. Weyosi we ndi udindu wakukoliyana ndi vo ŵara anozga pa mpingu.

KUNOZGA MALU NGIDU NGAKUSOPIYAMU

17, 18. (a) Kumbi m’Bayibolu mwe vakuwoniyapu wuli pa nkhani yakunozga malu ngakusopiyamu? (b) Nchifukwa wuli tikhumbika kunozga Nyumba za Ufumu?

17 Ateŵeti aku Yehova atesesa kunozga vo vanangika pa malu ngawu ngakusopiyamu. Yoashi yo wenga Fumu ya Ayuda, wangulamula asembi kuti agwiriskiyi ntchitu ndalama zo ŵanthu angupereka kuti ‘anozgi vosi vo vingunangika pa nyumba yaku Yehova.’ (2 Ŵakar. 12:4, 5) Pati pajumpha vyaka 200, Fumu Yosiya nayu yingugwiriskiya ntchitu ndalama zo ŵanthu angupereka kuti anozge nyumba yakusopiyamu.Ŵerengani 2 Mikoka 34:9-11.

18 Maofesi nga nthambi nganandi ngakamba kuti mu vyaru vinyaki ŵanthu atoliyaku kanthu cha kunozga nyumba pamwenga vinthu vinyaki asani vanangika. Panyaki achita viyo chifukwa chakuti aziŵa cha kunozga vinthu pamwenga alivi vipangizu vakugwiriya ntchitu. Kukamba uneneska asani tileka kunozga Nyumba ya Ufumu mbwenu yinangikengi mwaliŵi. Ivi vingachitiska kuti ŵanthu wo aja muchigaŵa chidu anyozengi Yehova. Kweni asani tosi mumpingu titesesa kunozga Nyumba ya Ufumu kuti yiwonekengi umampha, Yehova walumbika. Ivi vitovya so kuti tileki kunanga ndalama zo Akhristu anyidu apereka.

Tikhumbika kutowesa ndi kunozga Nyumba ya Ufumu (Wonani ndimi 16 ndi 18)

19. Kumbi mungalongo wuli kuti mutumbika malu nginu ngakusopiyamu?

19 Nyumba ya Ufumu njaku Yehova. Mwaviyo, tingakamba cha kuti nja munthu pamwenga mpingu. Nge mo tawone mu nkhani iyi, fundu za m’Bayibolu zingatiwovya kuti tiwonengi mwakwenere malu ngidu ngakusopiyamu Chiuta. Chifukwa chakuti titumbika Yehova, titenere so kutumbika maunganu ndi Nyumba ya Ufumu. Pa chifukwa ichi, tipereka ndalama zakuzenge Nyumba za Ufumu, tigwiraku ntchitu yakutowesa ndi kunozga Nyumba ya Ufumu. Asani tichita viyo, ndikuti te akujipereka pa nyumba yaku Yehova nge mo Yesu wanguchitiya.Yoh. 2:17.

^ ndimi 2 Chinanga kuti nkhani iyi yikamba Nyumba za Ufumu, kweni fundu zaki zikwaska so malu ngakuchitiyaku mawunganu ngakulungakulu kweniso nyumba zinyaki zo gulu ligwiriskiya ntchitu.