Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  July 2015

Kumbi Mudandawula Asani Palivi yo Wawona vo Muchita?

Kumbi Mudandawula Asani Palivi yo Wawona vo Muchita?

NTCHITU yakupanga vinthu yenga yachilendu cha kwaku Bezalele ndi Oholiaba. Pa nyengu yo ŵenga ku ukapolu ku Egipiti, atenere kuti anguwumba vidina vinandi. Kweni pavuli paki angupaskika ntchitu yakuzirwa ukongwa, yakuzenga chihema. (Chit. 31:1-11) Chinanga kuti yiwu angupanga vinthu vakutowa ukongwa, mbanthu amanavi wo anguviwona. Kumbi yiwu angugongowa chifukwa chakuleka kutchuka? Kumbi angudandawula kuti mbanthu amanavi wo anguwona vo anguchita? Nanga yimwi mudandawula asani palivi yo wawona vo muchita?

VINTHU VAKUTOWA VO AVIWONANGA ŴANTHU AMANAVI

Vinthu vinyaki va muchihema venga vakutowa ukongwa. Mwakuyeruzgiyapu, akerubi agolidi wo ŵenga pachanya pa bokosi la phanganu, ŵenga akutowa ukongwa. Paulo wangukamba kuti ŵenga “a unkhankhu.” (Ŵah. 9:5) Vinthu vakupangika ndi golidi venivi venga vakutowa nadi!Chit. 37:7-9.

Asani vinthu vo Bezalele ndi Oholiaba angupanga vengaku sonu, atingi aviŵikengi munyumba yakusungiyamu vinthu vakali, ndipu ŵanthu anandi atingi avikhumbirengi. Kweni pa nyengu yo apangiyanga, kumbi mbalinga wo aŵanaŵanangaku za kutowa kwa vinthu ivi? Akerubi anguŵaŵika M’chipinda Chakupaturika Ukongwa cha chihema. Mwaviyo, wasembi mura pe ndiyu waviwonanga kamoza pa chaka, pa Zuŵa la Mphepeska. (Ŵah. 9:6, 7) Pa chifukwa ichi, vinthu vo Bezalele ndi Oholiaba angupanga anguviwona ŵanthu amanavi.

KUKONDWA NDI NTCHITU YO TIGWIRA CHINANGA ŴANTHU ANGALEKA KUTILUMBA

Asani yimwi mwenga Bezalele pamwenga Oholiaba, kumbi mwatingi muvwengi wuli kuti vinthu vakutowa vo mwapanga ativiwona ŵanthu amanavi? Mazuŵa nganu ŵanthu anandi awona kuti palivi cho achita asani ŵanthu atiŵalumba cha pa vo achita. Yiwu aŵanaŵana kuti vo achita vija vakuzirwa asani ŵanthu aŵalumba. Kweni ateŵeti aku Yehova achita viyo cha. Mwakuyana ndi Bezalele ndi Oholiaba, tikondwa asani tichita khumbu laku Yehova kweniso asani iyu wakondwa ndi vo tichita.

Pa nyengu yo Yesu wenga pacharu chapasi, alongozgi avisopa arombanga kuti ŵanthu aŵalumbi. Kweni Yesu wangukamba kuti tirombengi kutuliya  pasi pa mtima. Tingaŵanga ndi maŵanaŵanu ngakuti ŵanthu atilumbi cha, ndipu asani tichitengi viyo, ‘Awuskefwi wo atitiwona mu ubendi atiwerezgiyengepu.’ (Mat. 6:5, 6) Chakuzirwa ukongwa ndi mo ŵanthu awone marombu ngidu cha, kweni mo Yehova watingawone. Ndimu so viliri ndi vo tichita pakuteŵete Yehova. Vilivi kanthu kuti ŵanthu atiwuwona wuli uteŵeti widu, kweni chakuzirwa nchakuti ukondwesa Yehova, yo ‘wawona ku ubendi.’

Bezalele ndi Oholiaba ŵati amaliza kupanga chihema, mtambu “unguvimba pahema lakuwunganamu ndi unkhankhu wa Ambuya unguzaza hema lakupaturika.” (Chit. 40:34) Ivi vingulongo kuti Yehova wangukondwa nayu ntchitu yawu. Kumbi muŵanaŵana kuti Bezalele ndi Oholiaba anguvwa wuli pa nyengu iyi? Chinanga kuti mazina ngawu ngangulembeka cha pa vinthu vo angupanga, kweni atenere kuti angukondwa ukongwa kuziŵa kuti Chiuta watumbika vosi vo anguchita. (Nthanthi 10:22) Pati pajumpha vyaka, yiwu atenere kuti akondwanga ukongwa kuwona kuti Yehova wanguleka cha kugwiriskiya ntchitu vo angupanga. Asani Bezalele ndi Oholiaba aziyuka m’charu chifya, tikayika cha kuti azamukondwa so ukongwa kuzivwa kuti chihema chingugwira ntchitu kwa vyaka pafupifupi 500.

Chinanga kuti ŵanthu awona cha vo muchita pakuteŵete Yehova, kweni iyu wawona

Mazuŵa nganu, m’gulu laku Yehova mwe abali ndi azichi wo ŵe ndi malusu ngakupambanapambana nge kujambula, kumba sumu, kupanga mavidiyo, kufwatuliya kweniso kulemba nkhani. Abali ndi azichi yaŵa aziŵika cha kuti ndiwu agwira ntchitu zenizi. Pa fundu iyi tingakamba kuti palivi yo wawona vo achita. Ndimu so viliri ndi ntchitu zo zichitika m’mpingu ya Akaboni aku Yehova yakujumpha 110,000 pacharu chosi chapasi. Kumbi ndiyani yo wawona asani mteŵeti wa maakaunti walemba mo ndalama za mpingu zayende pakumaliya pa mwezi? Kumbi ndiyani yo wawona asani mlembi walemba lipoti la mpingu? Kumbi ndiyani yo wawona asani m’bali pamwenga mzichi wanozga pa Nyumba ya Ufumu?

Bezalele ndi Oholiaba angulonde mphotu cha chifukwa cha vinthu vakutowa vo angupanga. Kweni Yehova wanguwona vo anguchita ndipu wangukondwa navu. Nasi tikhumbika kuja akujiyuyuwa nge mo yiwu ŵenge kweniso titenere kuteŵete Yehova ndi mtima wosi.