Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  April 2015

Mugomezgengi Yehova Nyengu Zosi!

Mugomezgengi Yehova Nyengu Zosi!

“Gomezgani mwaku iyu nyengu zosi, mwa ŵanthu.”SUMU 62:8.

1-3. Kumbi nchinthu wuli chingovya Paulo kuti wagomezgengi ukongwa Yehova? (Wonani chithuzi cho che pachanya.)

VENGA vakofya ukongwa kuja Mkhristu ku Roma. Akulondo aku Khristu aŵachitiyanga nkhaza ukongwa chifukwa aŵapusikiziyanga kuti angotcha msumba mu 64 C.E., kweniso kuti atinkhanga ŵanthu. Asani mwenga Mkhristu pa nyengu yeniyi, namwi mwatingi mumangikengi ndi kutombozgeka zuŵa ndi zuŵa. Akhristu anyinu atingi apalulikengi ndi vinyama, kukhomeke pachimiti ndipuso kotcheka nge ndi nkhuni zakumbulikiya usiku.

2 Tikayika cha kuti wakutumika Paulo wangumangika kachiŵi ku Roma mu nyengu yakusuzga yeniyi. Kumbi Akhristu anyaki anguza kuzimuwovya? Awa. Kweni Paulo watenere kuti walindizanga kuti anyaki amuwovyengi chifukwa wangulembe Timote kuti: “Pa kwamuka kwangu kwachimoza pengavi yumoza wanguŵapu nani pamoza, kweni wosi ŵangundisiya: kuleki kupimikiya kwaku wo!” Chinanga kuti venga viyo, Paulo wajivwanga cha kuti wengavi wakumovya weyosi. Iyu wangulemba kuti: “Kweni Mbuya iyu wangumapu pamoza nani, ndipu wangundikhomeska.” Kukamba uneneska, Ambuya Yesu  angumupaska nthazi Paulo. Kumbi nthazi zenizi zingumovya wuli? Iyu wangukamba kuti: “Ndingutaskika ku mulomu wa nkharamu.”2 Tim. 4:16, 17. *

3 Paulo watenere kuti wachiskikanga ukongwa asani wakumbuka mo Yehova wangumovye pa nyengu iyi. Ivi vingumovya kugomezga kuti Yehova wamuwovyengi kukunthiyapu masuzgu ngosi ngo watingi wakumanengi nangu. Ndipu iyu wangulutirizga kukamba kuti: ‘Mbuya iyu wandipozomoskengi ku nchitu yosi yiheni.’ (2 Tim. 4:18) Kukamba uneneska, Paulo wanguziŵa kuti Yehova ndi Mwana waki atingi amuwovyengi chinanga kuti pengavi munthu weyosi wakumovya!

NYENGU YO ‘MUNGAGOMEZGE’ YEHOVA

4, 5. (a) Kumbi ndiyani yo wangakuwovyani nyengu zosi? (b) Kumbi mungachita wuli kuti ubwezi winu ndi Yehova uje wakukho?

4 Kumbi nyengu yinyaki mukuŵanaŵanapu kuti palivi yo watikuwovyani pa suzgu lo mulimbana nalu? Panyaki mwasuzgikanga kusaniya nchitu, anyinu akusuzganingi kusukulu, mwatamanga pamwenga mwakumananga ndi masuzgu nganyaki. Ndipu nyengu zinyaki mungupemphapu ŵanthu kuti akuwovyeni kweni munguguŵa ŵati atondeka kukuwovyani. Kukamba uneneska, ŵanthu angamaliska cha masuzgu nganyaki. Kweni asani mwakumana ndi masuzgu ngaviyo, mukhumbika kulondo ulongozgi wa m’Bayibolo wakuti, “Gomezga mu Ambuya.” (Nthanthi 3:5, 6) Kumbi ulongozgi uwu ungakuwovyani? Ee! Chifukwa nkhani zinandi za m’Bayibolo zilongo kuti ulongozgi waku Yehova utovya ukongwa.

5 M’malu mwakudandawula chifukwa chakuti palivi weyosi yo watikuwovyani, mutenere kuja ndi maŵanaŵanu ngo Paulo wenga nangu. Iyu wanguwona kuti iyi yenga nyengu yakugomezge ukongwa Yehova kweniso kuwona mo wawovye mwachanju. Kuchita viyo kukuwovyeningi kuti mumugomezgengi ukongwa Yehova ndi kuwona kuti mwe nayu nadi pa ubwezi.

CHIGOMEZGU NCHAKUKHUMBIKA UKONGWA KUTI TIJE PA UBWEZI NDI YEHOVA

6. Nchifukwa wuli kungaja kwakusuzga kugomezga Yehova asani takumana ndi masuzgu?

6 Mumukambiyengi Yehova suzgu lo mwakumana nalu ndipu ivi vikuwovyeningi kuti muje ndi chimangu m’mtima chifukwa chakuti mwayesesa kuchita vo mungafiska ndipu nayu wachitengi chigaŵa chaki. (Ŵerengani Sumu 62:8; 1 Petro 5:7.) Kuchita ivi nkhwakukhumbika ukongwa kuti muje pa ubwezi wakukho ndi Yehova. Kweni kugomezga kuti Yehova wakuwovyeningi nkhwakusuzga. Nchifukwa wuli tikamba viyo? Chifukwa chimoza nchakuti ndi nyengu zosi cha po Yehova wamuka mwaliŵi marombu ngidu.Sumu 13:1, 2; 74:10; 89:46; 90:13; Hab. 1:2.

7. Nchifukwa wuli nyengu zinyaki Yehova wamuka liŵi cha marombu ngidu?

7 Nchifukwa wuli nyengu zinyaki Yehova wamuka liŵi cha marombu ngidu? Kumbukani kuti Chiuta wayeruzgiya ubwezi widu ndi iyu ndi mo mwana wachitiya ndi awiski. (Sumu 103:13) Mpapi wangapereka cha chechosi cho mwana waki wapempha pamwenga kumuchitiya mwaliŵi vo wakhumba. Mpapi waziŵa kuti vinthu vinyaki vo mwana wapempha vija vakukhumbika ukongwa cha. Vinthu vinyaki vingakhumbika kulindizga nyengu yakwenere. Iyu waziŵa so kuti vo mwana wakhumba vingakwaska ŵanthu anyaki. Kuchita mwaliŵi chinthu chechosi cho mwana wapempha kungachitiska kuti mwana wawonekengi nge kuti ndiyu mpapi. Mwakuyana ŵaka, nyengu zinyaki Yehova wangazomerezga kuti pajumphi dankha nyengu wechendamuki marombu ngidu. Iyu we ndi udindu wakuchita viyo chifukwa ndi Mulengi widu wazeru, Mbuyafwi wachanju ndipuso Awuskefwi akuchanya. Kukamba uneneska, asani tikhumba kuti Yehova  watichitiyengi mwaliŵi vinthu vosi vo tingapempha, vingachitiska kuti tiwonekengi apachanya ukongwa kuluska iyu.—Yeruzgiyani ndi Yesaya 29:16; 45:9.

8. Kumbi Yehova watitisimikizgiyanji?

8 Fundu yinyaki njakuti Yehova watitiziŵa umampha ukongwa. (Sumu 103:14) Ndichu chifukwa chaki, nyengu zosi watitileka tija cha kweni watitiwovya nge mpapi widu. Nyengu zinyaki, tingawona kuti palivi chinthu chinyaki cho tingachita. Kweni Yehova watitisimikizgiya kuti wazomerezgengi cha kuti ateŵeti ŵaki asuzgikengi ukongwa mpaka kutondeka kukunthiyapu. Iyu waperekengi “nthowa yakupozomokiyapu.” (Ŵerengani 1 Ŵakorinte 10:13.) Mwaviyo, te ndi chifukwa chakuvwika chakugomezge kuti Yehova waziŵa umampha vo tingafiska pa nkhani yakukunthiyapu masuzgu.

9. Kumbi titenere kuchitanji asani tiwona kuti timukika liŵi cha vo tapempha?

9 Asani tiwona kuti timukika liŵi cha vo tapempha, titenere kulindizga Yo waziŵa nyengu yakwenere kutiwovye. Titenere kukumbuka kuti nayu wazizipizga chifukwa wakhumbisiska kuti watitaski. Bayibolo likamba kuti: “Ambuya alindizga kuŵa namwi ndi wezi; ndichu chifukwa atijikuzgiya kurongo lisungu paku imwi. Pakuti Ambuya ndi Chiuta wacheruzgu chirunji; mbakutumbikika wosi wo alindizga yiwu.”Yes. 30:18.

“MULOMU WA NKHARAMU”

10-12. (a) Kumbi Mkhristu yo watamizga m’bali waki yo watama nthenda yambula kuchizgika liŵi, wangakumana ndi masuzgu wuli? (b) Kumbi kugomezga Yehova pa nyengu ya masuzgu kungakwaska wuli ubwezi widu ndi iyu? Kambani chakuyeruzgiyapu.

10 Asani mwakumana ndi suzgu yikulu mungavwa nge mo Paulo wanguvwiya. Ndipu mungawona nge kuti mwe mu “mulomu wa nkharamu” pamwenga mwe nawu pafupi ukongwa. Nyengu ya viyo ndiyu yija yakusuzga ukongwa kugomezga Yehova kweni ndiyu nyengu yakukhumbika so ukongwa kumugomezge. Tiyeruzgiyi kuti mutamizga munthu munyaki m’banja linu yo watama nthenga yambula kuchizgika liŵi. Panyaki mwarombapu kuti Chiuta wakupaskeni zeru ndi nthazi. * Asani mwachita vosi vo mungafiska, kumbi mungachiskika cha kuziŵa kuti Yehova wawona mo musuzgikiya ndipu wakuwovyeningi kuti mukunthiyepu?Sumu 32:8.

11 Nyengu zinyaki vingaja viyo cha. Adokotala angakukambiyani vinthu vo vingakuguŵiskani. Pamwenga abali ŵinu angakuchitiyani vinthu vo vingachitiska kuti suzgu yikuwi ukongwa m’malu mwakukuchiskani. Lutirizgani kugomezga Yehova kuti wakupaskeni nthazi. Kweniso, lutirizgani kuja nayu pa ubwezi wakukho. (Ŵerengani 1 Samuele 30:3, 6.) Asani wakuwovyani, ubwezi winu ndi iyu ujengi wakukho.

12 Linda * wanguziŵa kuti Yehova watovya nadi pa nyengu ya suzgu, wati watamizga apapi ŵaki kwa vyaka vimanavi. Iyu wangukamba kuti: “Kanandi murumu wangu, mzichi wangu ndi ini tasoŵanga chakuchita pa nyengu yo tatamizganga apapi ŵidu. Ndipu tawonanga kuti palivi yo wangatovya. Kweni asani tikumbuka vo vachitikanga, tiwona kuti Yehova wangutovya ukongwa. Iyu wangutichiska ukongwa kweniso wangutipaska vinthu vo takhumbikiyanga nadi chinanga mphanyengu yo tasoŵanga chakuchita.”

13. Kumbi kugomezga Yehova kungovya wuli mzichi munyaki kuti wakunthiyepu musuzgu ngo wangukumana nangu?

13 Kugomezga ukongwa Yehova kungatovya so asani takumana ndi suzgu. Mwakuyeruzgiyapu, murumu waku Rhonda yo wenga Kaboni cha wakhumbanga kumupata. Pa nyengu iyi, mzichi waku Rhonda wangusanirika ndi nthenda yakofya ukongwa. Pati pajumpha myezi yimanavi, muwolu wa mzichi waki wangutayika. Rhonda  wati wawona kuti masuzgu yanga ngayamba kumala, wangwamba kuchita upayiniya wa nyengu zosi. Pambula kuswera, anyina nawu angutayika. Nchinthu wuli cho chingumuwovya kuti wakunthiyepu masuzgu ngenanga? Iyu wangukamba kuti: “Ndakambiskananga ndi Yehova zuŵa lelosi chinanga mphanyengu yo ndakhumbanga kusankha vinthu vimanavimana. Kuchita ivi kungundiwovya kuwona kuti Yehova waliku nadi. Kweniso, kungundiwovya kumuthemba ukongwa m’malu mwakujithemba pamwenga kuthemba ŵanthu anyaki. Iyu wangundiwovya nadi ndipu wangundipaska vosi vo ndakhumbanga. Ivi vingundiwovya kuwona kuti ndagwiranga nchitu limoza ndi Yehova.”

M’banja namu tingakumana ndi masuzgu ngo ngangayesa ubwezi widu ndi Yehova (Wonani ndimi 14 mpaka 16)

14. Kumbi Mkhristu wakugomezgeka yo m’bali waki wakusezgeka watenere kuja ndi chigomezgu wuli?

14 Ŵanaŵaniyani suzgu yinyaki. Tiyeruzgiyi kuti m’bali winu wasezgeka. Chifukwa cha vo musambira m’Bayibolo, muziŵa mo mungachitiya vinthu ndi munthu yo wakusezgeka. (1 Ŵakor. 5:11; 2 Yoh. 10) Kweni nyengu zinyaki mungawona kuti vakusuzga kulondo ulongozgi wakukwaskana ndi ŵanthu wo asezgeka pamwenga mungawona kuti mungafiska cha kuwulondo. * Kumbi mungaja ndi chigomezgu chakuti Awuskemwi akuchanya akuwovyeningi kuti muyesesi kulondo ulongozgi wa m’Bayibolo wakukwaskana ndi munthu wakusezgeka? Kumbi muwona kuti iyi yingaja nyengu yamampha yakulongore kuti mwe pa ubwezi wakukho ndi Yehova?

15. Nchifukwa wuli Adamu wanguleka kuvwiya Yehova mu Edene?

15 Ŵanaŵaniyani nkhani yaku Adamu. Kumbi iyu wagomezganga nadi kuti wafwengi cha asani wangaleka kuvwiya Yehova? Awa, chifukwa Malemba ngakamba kuti Adamu “wangufuvyika  cha” pamwenga kuti wangunyengeka cha. (1 Tim. 2:14) Nanga nchifukwa wuli wanguleka kuvwiya? Adamu wangurya chipasu cho Eva wangumupaska chifukwa chakuti wamuyanjanga ukongwa muwolu waki. Mwaviyo, iyu wangusankha kuvwiya muwolu waki m’malu mwakuvwiya Chiuta waki, Yehova.Chiy. 3:6, 17.

16. Kumbi tikhumbika kwanja ukongwa yani, nanga nchifukwa wuli?

16 Kumbi ivi ving’anamuwa kuti tikhumbika cha kuŵayanja abali ŵidu? Awa! Kweni ving’anamuwa ŵaka kuti tikhumbika kwanja ukongwa Yehova kuluska abali ŵidu. (Ŵerengani Mateyu 22:37, 38.) Kukamba uneneska, kaya abali ŵidu ateŵete Yehova pamwenga cha, tikhumbika kuŵayanja. Mwaviyo, lutirizgani kuja pa ubwezi wakukho ndi Yehova. Ndipu asani musuzgika maŵanaŵanu chifukwa cha m’bali winu yo wakusezgeka, mukambiyeni Yehova murombu. * (Ŵar. 12:12; Ŵaf. 4:6, 7) Chinanga kuti nkhani yakukwaskana ndi munthu wakusezgeka njakusuzga kweni ndiyu nyengu yo mungalongore kuti mutimuyanja ukongwa Yehova. Kweniso, yingakuwovyani kuti mumuthembengi ukongwa kuti vinthu vikuyendiyeni.

PA NYENGU YO TILINDIZA KUTI YEHOVA WATOVYI

Mulongongi kuti mugomezga Yehova mwakupharazga mwaphamphu (Wonani ndimi 17)

17. Asani tigwira nchitu yakupharazga mwaphamphu, kumbi tilongo wuli kuti tigomezga Yehova?

17 Nchifukwa wuli Paulo wangutaskika “ku mulomu wa nkharamu”? Iyu wangukamba kuti, ‘Alinga kuti mwaku ini mumemezu wo ufiskiki, ndipu kuti amitundu yosi awuvwi.’ (2 Tim. 4:17) Mwakuyana ndi Paulo, asani nasi tipharazga mwaphamphu, tigomezga kuti Yehova wawonesesengi kuti vinthu vinyaki vosi vo tikhumbika ‘vakuskikiyaku’ kwaku isi. (Mat. 6:33) Nge apharazgi a Ufumu, tapaskika nchitu yakupharazga “evangeli” ndipu Yehova watitiwona kuti te “ŵanchitu ŵanasi” ŵaki. (1 Ŵat. 2:4; 1 Ŵakor. 3:9) Asani tigwira nchitu yaku Chiuta mwaphamphu, tisuzgikengi cha kukunthiyapu masuzgu.

18. Kumbi tingachita wuli kuti tigomezgengi ukongwa Yehova ndi kuja nayu pa ubwezi wakukho?

18 Tiyeni tigwiriskiyengi nchitu mpaka wo te nawu kuti tikholeski ubwezi widu ndi Chiuta. Asani vinthu vinyaki vititifipiska mtima, tigwiriskiyengi nchitu nyengu yeniyi kuti tilongo kuti titanja ukongwa Yehova. Kukamba uneneska, asani tisambira mwaphamphu Mazu Ngaku Chiuta, tiromba nyengu zosi ndipuso asani titeŵete mwaphamphu, vitiwovyengi kugomezga kuti Yehova watiwovyengi kukunthiyapu masuzgu ngosi ngo tingakumana nangu sonu kweniso kunthazi.

^ ndimi 2 “Mulomu wa nkharamu” wo Paulo wangutaskikaku ungang’anamuwa nkharamu chayiyu pamwenga vinthu vakofya ukongwa.

^ ndimi 10 Pe nkhani zinandi zo zikusindikizika kuti ziwovyi Akhristu wo atama kukunthiyapu matenda kweniso kuti ziwovyi wo aphwere akutama. Wonani Galamukani! ya Chichewa ya February 8, 1994; February 8, 1997; June 8, 2000; ndi ya February 8, 2001.

^ ndimi 12 Mazina ngasinthika.

^ ndimi 14 Wonani nkhani yo ye m’magazini yinu ya mutu wakuti, “Kusezga Munthu Kutovya Ukongwa.”

^ ndimi 16 Pe nkhani zinandi zo zikusindikizika kuti ziwovyi ŵanthu akugomezgeka wo abali ŵawu akuleka kuteŵete Yehova. Wonani Chigongwi cha Alinda cha Chichewa cha September 1, 2006, peji 17 mpaka 21, ndi cha January 15, 2007, peji 17 mpaka 20.