Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  February 2015

 YATULIYA MUNKHANI ZIDU ZAKALI

“Nyengu Yakukhumbika Ukongwa”

“Nyengu Yakukhumbika Ukongwa”

MU 1870, kagulu kanyaki mumsumba wa Pittsburgh (Allegheny) ku Pennsylvania, U.S.A., kangwamba kufufuza Malemba. Kagulu yaka kalongozgekanga ndi Charles Taze Russell ndipu angwamba kufufuza nkhani yakukwaskana ndi sembi yaku Khristu. Pambula kuswera, angusaniya kuti sembi iyi njakukhumbika ukongwa pakufiska chilatu chaku Yehova. Yiwu angukondwa ukongwa kuziŵa kuti sembi iyi yitovya kuti ŵanthu azitaskiki chinanga ndi wo akuleka kuvwapu vaku Yesu. Ndichu chifukwa chaki angwamba kukumbukiya nyifwa yaku Yesu chaka chechosi kuti alongo kuwonga vo wakuŵachitiya.1 Ŵakor. 11:23-26.

M’bali Russell wangwamba kulemba magazini ya Chigongwi cha Alinda. Magazini iyi yakonkhoskanga kuti sembi yaku Yesu ndiyu nthowa yikulu yo Chiuta wakulongore kuti watitiyanja ukongwa. Magazini ya Chigongwi cha Alinda yingukamba kuti nyengu yakukumbukiya nyifwa yaku Khristu ndi “Nyengu Yakukhumbika Ukongwa” ndipu yinguchiska ŵanthu wo ayiŵerenganga kuti nawu akumbukiyengi nyifwa yaku Yesu mutimagulu, kaya ndi mumsumba wa Pittsburgh pamwenga muvigaŵa vinyaki. Magazini iyi yingukamba so kuti: “Kaya kungaja munthu yumoza, ŵaŵi pamwenga ŵatatu, mbakuzirwa ukongwa ndipu atuŵa ndi Ambuya.”

Chaka chechosi, ŵanthu anandi azanga mumsumba wa Pittsburgh kuzikumbukiya nyifwa yaku Yesu. Kapepala kakudaniya ŵanthu ku mwambu uwu kangukamba kuti: “Mwazamulondereka ndi manja ngaŵi.” Vakukondwesa ukongwa kuti Akusambira Bayibolo angupereka malu ngakugona kweniso chakurya kwa abali ndi azichi wo angutuwa kutali. Mu 1886, kunguchitika “Unganu Ukulu” kwa mazuŵa nganandi mu nyengu ya Chikumbusku. Magazini ya Chigongwi cha Alinda yingupempha ŵanthu kuti aluti ku unganu uwu chifukwa chakuti atanja ukongwa Yesu, abali ŵaki ndi uneneska.

Tchati cho chilongo mo ayendesiyanga chiŵandi ndi vinyu pa Chihema cha ku London

Kwa vyaka vinandi, Akusambira Bayibolo mumsumba wa Pittsburgh achitanga unganu ndi abali wo azanga ku Chikumbusku. Pavuli paki, chiŵerengeru cha Akusambira Bayibolo chingwamba kukuwa ndipu ivi vinguchitiska kuti ŵanthu anandi asanirikengi pa Chikumbusku pacharu chosi chapasi. Ray Bopp wa mpingu wa Chicago wangukamba kuti mu m’ma 1910, patonga nyengu yitali kuti mumalizi kwendesa vinyu ndi chiŵandi pa Chikumbusku chifukwa pafupifupi ŵanthu wosi aryanga ndi kumwa.

Kumbi ndi vinthu wuli vo agwiriskiyanga nchitu pa Chikumbusku? Chinanga kuti aziŵanga kuti Yesu wangugwiriskiya nchitu vinyu pa Chakurya cha Ambuya, kweni pa nyengu iyi magazini ya Chigongwi cha Alinda yinguzomerezga kugwiriskiya nchitu juwisi wa mphereska ziŵisi pamwenga zakumila kuti awovyi wo alekanga kumwa vinyu. Kweni anyaki apaskikanga vinyu chifukwa awonanga kuti ndiyu wakukhumbika kugwiriskikiya nchitu. Pavuli paki, Akusambira Bayibolo anguwona kuti vinyu muyera wambula kusazgaku chechosi ndiyu wamiya nadi ndopa zaku Yesu.

Pepala ndi pensulu ili ayendesanga mu selu yeyosi kuti alembi chiŵerengeru cha ŵanthu wo asanirika pa Chikumbusku kujeri ya ku Nicaragua

Chikumbusku chinguwovya ŵanthu kuŵanaŵaniya ukongwa nyifwa yaku Yesu. Ndipu abali ndi azichi a mipingu yinyaki achitanga chitima ukongwa pa Chikumbusku ndipu asani mwambu uwu wamala, weyosi wajanga ŵaka  cheti. Mu 1934, buku la Jehovah lingukamba kuti tikhumbika “kukondwa” pa nyengu ya Chikumbusku chifukwa chakuti Yesu wakwamba kuwusa nge Fumu kutuliya mu 1914 m’malu mwakuchita “chitima” chifukwa cha mo wangutombozgeke wachifwa.

Abali wo anguwungana pa Chikumbusku mu 1957 ku Mordvinia, Russia ko agwiranga nchitu zakutombozga

Mu 1935, vinthu vinyaki vingusintha. Abali anguvwisa fundu ya “mzinda ukulu” yo yisanirika pa Chivumbuzi 7:9 ndipu ivi vingukwaska ŵanthu wosi wo achitangaku Chikumbusku. Chechendafiki chaka ichi, ateŵeti aku Yehova awonanga kuti kagulu yaka nkha Akhristu akujipereka wo alekanga kuteŵete mwaphamphu. Kweni kutuliya nyengu iyi, abali angwamba kuziŵa kuti mzinda ukulu umiya ateŵeti akugomezgeka wo alindizga kuzija m’paradayisu pacharu chapasi. Chifukwa chakusintha kwenuku ndipuso wati wajisanda, Russell Pogense wangukamba kuti: “Yehova wakundisankha cha ndi mzimu waki kuti ndiluti kuchanya.” M’bali Pogense ndi ateŵeti anyaki akugomezgeka nge iyu, anguleka kurya chiŵandi ndi kumwa vinyu kweni angulutirizga kuchita Chikumbusku.

Pa “nyengu yakukhumbika ukongwa” iyi, nchitu yapade yakupharazga yinguwovya wosi kulongo kuti awonga sembi yaku Yesu. Uteŵeti Widu wa Ufumu wa 1932, wo pa nyengu iyi wadanikanga kuti Bulletin ungukamba kuti, abali ndi azichi wo aryanga chiŵandi ndi kumwa vinyu akhumbikanga cha kusanirika ŵaka pa Chikumbusku kweni akhumbikanga so kupharazga uneneska. Ndipu Uteŵeti Widu wa Ufumu wa 1934, ungupempha ŵanthu akujipereka kuti awovyi pa nchitu yakupharazga ndipu wenga ndi fumbu lakuti: “Kumbi kungasanirika ŵanthu 1,000 wo angapharazga pa nyengu ya Chikumbusku?” Pa nkhani ya Akhristu akusankhika, Uteŵeti Widu wa Ufumu unyaki wo pa nyengu iyi wadanikanga kuti Informant ungukamba kuti: “Yiwu angaja alikondwa pijapija asani apharazga nawu uthenga wa Ufumu.” Ndipu ivi ndivu abali ndi azichi wo alindizanga kuzija pacharu chapasi akhumbikanga so kuchita. *

Pa nyengu yo Harold King wenga mujeri yakuyija, wangulemba ndakatulu ndi sumu zakukwaskana ndi Chikumbusku

Zuŵa la Chikumbusku ndi nyengu yapade ukongwa ku ŵanthu wosi aku Yehova chaka chechosi. Yiwu atesesa kuchita Chikumbusku chinanga kuti nyengu zinyaki vija vakusuzga. Mwakuyeruzgiyapu, mu 1930, Pearl English ndi mzichi waki Ora angwenda mtunda wa makilomita pafupifupi 80 kuti akasaniriki pa Chikumbusku. Kweniso, pa nyengu yo m’mishonale Harold King wenga mujeri yakuyija ku China, wangulemba ndakatulu ndi sumu zakukwaskana ndi Chikumbusku ndipu wangupanga chiŵandi ndi vinyu kutuliya ku mpunga ndi mphereska zakumila. Ndipu abali ndi azichi ku zambwi kwa Europe, chigaŵa chapakati cha ku America ndipuso ku Africa angulongo chiganga chifukwa chakuti achitanga mbwenu Chikumbusku chinanga mphanyengu ya nkhondu pamwenga pa nyengu yo uneneska wakanizgikanga mu vyaru vawu. Kaya te nunkhu pamwenga tikumana ndi masuzgu wuli, tichita mbwenu Chikumbusku ndi chilatu chakutumbika Yehova Chiuta ndi Yesu Khristu ndipu tiwona kuti iyi ndi nyengu yakukhumbika ukongwa.

^ ndimi 10 Pakwamba Uteŵeti Widu wa Ufumu wadanikanga kuti Bulletin ndipu pavuli paki ungwamba kudanika kuti Informant.