Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  February 2015

Chawanangwa cho Ŵanthu a ku Japan Angulonde

Chawanangwa cho Ŵanthu a ku Japan Angulonde

PA UNGANU unyaki wapade wo unguchitika pa 28 April, 2013, mumsumba wa Nagoya ku Japan, Anthony Morris wa mu Wupu Wakulongozga wangupereka chipharazgu cho chinguziziswa ŵanthu wosi. Iyu wangutuzga buku lifya la Chijapanizi la mutu wakuti, The BibleThe Gospel According to Matthew. Pa unganu uwu, penga ŵanthu akujumpha 210,000 ndipu anyaki awoneriyanga pa Intaneti. Ŵati ŵavwa chipharazgu ichi, angukondwa ukongwa ndipu angumba manja kwa nyengu yitali.

Buku la m’Bayibolo ili likusindikizika so kutuwa ku Bayibolo la New World Translation la Chijapanizi. Buku ili le ndi mapeji 128 ndipu likulembeka mwapade ukongwa. M’bali Morris wangukamba kuti buku ili likupangika kuti liwovyi ŵanthu a ku Japan. Kumbi mubuku lenili mwenji? Nchifukwa wuli likupangika? Nanga ŵanthu anguchita wuli ŵati alilonde?

KUMBI MUBUKU LENILI MWENJI?

Ŵanthu anandi anguzizwa ukongwa kuwona mo buku la Matthew likulembeke. Malembu nga Chijapanizi ngangalembeka mwakumika pamwenga mwakugoneka ndipu mabuku ngamanavi kusazgapu mabuku ngidu ngasonu ngalembeka mwakugoneka. Kweni buku la Matthew likulembeka mwakumika nge mo alembe manyuzipepala ndi mabuku nganyaki nga ku Japan. Ŵanthu anandi a m’charu ichi awona kuti kulemba viyo kusuzga cha kuŵerenga. Kweniso mitu yo kanandi yija pachanya papeji yikulembeka mukati mwa nkhani nge timitu timanatimana kuti ŵanthu angasuzgikanga cha kusaniya fundu zikuluzikulu.

Abali ndi azichi a ku Japan angwamba kuŵerenga buku la Matthew ŵati alonde ŵaka. Mzichi munyaki wa vyaka va m’ma 80 wangukamba kuti: “Ndaŵerenga buku la Mateyu maulendu nganandi kweni kulilemba so mwakumika ndi timitu taki vandiwovya ukongwa kuti ndivwisi umampha Upharazgi wa Paphiri.” Mzichi munyaki wampupuka wangukamba so kuti: “Ndingumaliza kuŵerenga buku la Matthew nyengu yimoza. Ndikuziŵiriya kuŵerenga mabuku ngo ngakulembeka mwakugoneka kweni ŵanthu anandi a ku Japan atanja ngo ngakulembeka mwakumika.”

LIKUPANGIKIYA ŴANTHU A KU JAPAN

Nchifukwa wuli buku la m’Bayibolo ili ndakukhumbika ukongwa ku ŵanthu a ku Japan? Ŵanthu anandi a ku Japan akhumbisiska kuliŵerenga chinanga kuti aziŵa vinandi cha vakukwaskana ndi Bayibolo. Ŵanthu anyaki wo ŵechendawonepu Bayibolo, sonu ŵe ndi mwaŵi wakusaniya buku limoza la m’Bayibolo ndi kuliŵerenga.

Nchifukwa wuli buku la Mateyu ndilu likusankhika? Ŵanthu anandi a ku Japan akumbuka Yesu Khristu asani atuvwa mazu ngakuti “Bayibolo.” Mwaviyo, buku ili likusankhika chifukwa likonkhoska mo Yesu wanguwiya, Upharazgi waki wakutchuka wa Paphiri ndipuso vinthu vo wangukambiya limu kuti vazamuchitika m’mazuŵa ngakumaliya. Ŵanthu a ku Japan akondwa ukongwa ndi nkhani zenizi.

 Apharazgi a Ufumu ku Japan angwamba kugaŵiya buku ili mu upharazgi wa nyumba ndi nyumba kweniso ku maulendu ngakuweriyaku. Mzichi munyaki wangulemba kuti: “Sonu nde ndi mwaŵi ukulu wakupharazgiya ŵanthu m’chigaŵa chidu Mazu Ngaku Chiuta. Ndipu ndingwamba kugaŵiya buku la Matthew ndi mazulu ndati ndalonde ŵaka pa unganu wapade!”

KUMBI ŴANTHU ANGUCHITA WULI ŴATI ALONDE?

Kumbi apharazgi agaŵiya wuli buku la Matthew? Ŵanthu anandi a ku Japan atingaziŵa umampha mazu ngakuti, “likomu lalifyakafyaka,” “ngare zinu mungaponya paurongo pa nguruŵi,” ndi ngakuti, “mungakweŵekiyanga la mawa cha.” (Mat. 6:34; 7:6, 13) Yiwu azizwa ukongwa kuvwa kuti Yesu Khristu ndiyu wangukamba mazu ngenanga. Asani awona mazu yanga m’buku la Uthenga waku Mateyu, anandi akamba kuti: “Kutuwa kali, ndakhumbisiskanga kuŵerengapu Bayibolo.”

Asani apharazgi aweriyaku ku ŵanthu wo angulonde buku lenili, anandi akamba kuti anguswera cha kuliŵerenga losi lamphumphu pamwenga chigaŵa chimanavi. Mwakuyeruzgiyapu, ada anyaki avyaka va m’ma 60 angukambiya mupharazgi munyaki kuti: “Ndaŵerenga buku ili maulendu nganandi ndipu landichiska ukongwa. Chondi ndisambizeni vinandi vakukwaskana ndi Bayibolo.”

Apharazgi agaŵiya so buku la Matthew m’malu ngo musanirika ŵanthu anandi. Mwakuyeruzgiyapu, mzichi munyaki wachipharazga, wangupereka imelu adiresi ku munthukazi yo wangulonde buku la Matthew. Pati pajumpha ora limoza, munthukazi uyu wangulembe mzichi imelu kuti waŵerenga chigaŵa chinyaki cha buku la m’Bayibolo lenili ndipu wakhumba kuziŵa vinandi. Iyu wangwamba kusambira nayu Bayibolo pati pajumpha sabata yimoza ndipu pambula kuswera, wangwamba so kuwungana.

Mabuku nga The BibleThe Gospel According to Matthew ngakujumpha 1,600,000, ngatumizika ku mipingu ya ku Japan ndipu mwezi wewosi, Akaboni agaŵiya masauzandi nganandi. Mazu ngakwamba m’buku ili ngalongo vo wo akulemba angukamba. Yiwu akulemba kuti: “Te ndi chigomezgu chakuti kuŵerenga buku ili kukuwovyeningi kuti muliyanjengi ukongwa Bayibolo.”