Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  January 2015

Wongani Yehova Kuti Mutumbikiki

Wongani Yehova Kuti Mutumbikiki

“Wongani Ambuya chifukwa mbamampha.”SUMU 106:1.

1. Nchifukwa wuli tikhumbika kumuwonga Yehova?

TIKHUMBIKA nadi kumuwonga ukongwa Yehova chifukwa watitipaska “mpasku wosi wamampha ndi chawezi chosi chizirima.” (Yak. 1:17) Nge Msambizi widu wamampha, iyu watitiphwere mwakuliŵavu ndipuso mwauzimu. (Sumu 23:1-3) Iyu walongo kuti “nchakudinganyamu [nchakubisamamu] chidu ndi nthazi yidu” ndipu wachita ivi ukongwa asani takumana ndi masuzgu. (Sumu 46:1) Kukamba uneneska, te ndi vifukwa vinandi vakuzomerezge vo munthu munyaki yo wakulembaku Bayibolo wangukamba kuti: “Wongani Ambuya chifukwa mbamampha, chifukwa chanju chawu chakufikapu ncha muyaya.”Sumu 106:1.

Lemba la chaka cha 2015 ndakuti: Wongani Yehova chifukwa ngwamampha.”Sumu 106:1

2, 3. (a) Kumbi ndi vinthu wuli vo vingachitika asani tileka kuwonga vitumbiku vo tasaniya? (b) Kumbi ndi mafumbu nanga ngo tikambiskanengi m’nkhani iyi?

2 Nchifukwa wuli tikhumbika kukambiskana nkhani ya kuwonga? Nge mo Bayibolo likambiya, ŵanthu m’charu ichi awonga cha. (2 Tim. 3:2) Ŵanthu mamiliyoni nganandi awonga cha vinthu vo Yehova watiŵapaska. Anyaki anyengeka ndi chuma ndipuso vinthu va m’charu ndipu agutiskika cha ndi vo ŵenavu. Nasi tingayamba kuja ndi mtima  wambula kuwonga. Nge mo Ayisraele anguchitiya, nasi tingaleka kuwonga vitumbiku vo Yehova watitipaska ndipu ivi vingachitiska kuti tileki kuja nayu paubwezi.Sumu 106:7, 11-13.

3 Ŵanaŵaniyani so vo vingachitika asani takumana ndi masuzgu. Pa nyengu iyi, tingayamba kuwere vuli mwauzimu ndipu vingachitiska kuti tileki kuwonga vitumbiku vo Yehova watitipaska. (Sumu 116:3) Mwaviyo, kumbi tingachita wuli kuti tiwongengi kweniso kuti tilutirizgi kuchita viyo? Nanga ndi vinthu wuli vo vingatiwovya kuti tije ndi maŵanaŵanu ngamampha chinanga kuti tikumana ndi masuzgu ngakulu? Tiyeni tiwoni kwamuka kwa mafumbu ngenanga.

YEHOVA WATITICHITIYA VITHU VINANDI

4. Kumbi tingachita wuli kuti tilutirizgi kuwonga vitumbiku vo tasaniya?

4 Asani tikhumba kulutirizga kuwonga vitumbiku vo tasaniya, titenere kuziŵa kweniso kuŵanaŵaniya vitumbiku vo Yehova watipaska. Titenere so kuŵanaŵaniya mo walongore kuti watitanja ukongwa. Munthu munyaki yo wakulembaku Bayibolo wati waŵanaŵaniya mo Yehova walongore chanju chaki, wanguzizwa ukongwa kuwona vinthu vakuziziswa vo wamuchitiya.Ŵerengani Sumu 40:5; 107:43.

5. Kumbi tisambiranji kwaku Paulo pa nkhani ya kuwonga?

5 Tingasambira vinandi kwaku Paulo pa nkhani ya kuwonga. Viwoneke limu kuti iyu waŵanaŵaniyanga vitumbiku vo wangusaniya chifukwa kanandi wawonganga kutuliya pasi pamtima. Paulo waziŵanga umampha kuti pakwamba wenga “mtokota ndi wakuŵemba ndi wamtonyoru.” Mwaviyo, iyu wawonganga Chiuta ndipuso Khristu kuti angumuchitiya lisungu ndipuso angumupaska uteŵeti chinanga kuti wenga wakubuda. (Ŵerengani 1 Timote 1:12-14.) Paulo wawonganga so Akhristu anyaki chifukwa chakuti ŵenga ndi mijalidu yamampha kweniso ateŵetiyanga Yehova mwakugomezgeka. Ndipu kanandi wawonganga Chiuta chifukwa cha vo Akhristu ŵenaŵa achitanga. (Ŵaf. 1:3-5, 7; 1 Ŵat. 1:2, 3) Paulo wawonganga Yehova mwaliŵi asani wakumana ndi masuzgu chifukwa chakuti Akhristu anyaki amuwovyanga pa nyengu yaki. (Mac. 28:15; 2 Ŵakor. 7:5-7) Ndichu chifukwa chaki, fundu yo Paulo wangukamba yichiska Akhristu mazuŵa nganu. Iyu wanguti: “Muŵi akuwonga . . . , kuchinyirana mu zeru yosi, ndi penipo mutumba m’buku la sumu ndi . . .  sumu za mzimu, kumuwonga Chiuta mumitima yinu.”Ŵakol. 3:15-17.

KULUNGURUKA NDIPUSO KUROMBA KUTITIWOVYA KUTI TIWONGENGI

6. Kumbi muwonga vitumbiku nivi vo Yehova wakupaskani?

6 Kumbi tingalondo wuli chakuwoniyapu chamampha chaku Paulo pa nkhani ya kuwonga? Nge mo Paulo wanguchitiya, nasi tikhumbika kuŵanaŵaniya vo Yehova watitichitiya. (Sumu 116:12) Kumbi mungamuka wuli asani munthu wangakufumbani kuti, ‘Kumbi muwonga vitumbiku nivi vo Yehova wakupaskani?’ Kumbi mungamuka kuti muwonga kuti mwe pa ubwezi ndi Yehova? Pamwenga muwonga kuti Yehova wakukugowokiyani maubudi nginu chifukwa cha kugomezga sembi yaku Khristu? Kumbi mungazumbuwa abali ndi azichi wo angukuwovyani pa nyengu yo mungukumana ndi masuzgu ngakulu? Tikayika cha kuti mungayamba kuzumbuwa yo mukutorana nayu pamwenga ŵana ŵinu. Kuŵanaŵaniya vitumbiku vo Yehova yo ndi Da wachanju watitipaska, kungakuwovyani kuti mumuwongengi zuŵa lelosi.Ŵerengani Sumu 92:1, 2.

7. (a) Nchifukwa wuli tikhumbika kuwonga asani tiromba? (b) Kumbi mungayanduwa wuli asani mupereka marombu ngakuwonga kwaku Yehova?

7 Asani tiziŵa ndipuso tiŵanaŵaniya vitumbiku vo tasaniya, ndikuti te akunozgeka kuromba kwaku Yehova kuti timuwongi. (Sumu 95:2; 100:4, 5) Ŵanthu anandi awona kuti tikhumbika ŵaka kupempha vinthu asani tiromba kwaku Chiuta. Kweni isi tiziŵa kuti Yehova  wakondwa ukongwa asani titimuwonga chifukwa cha vitumbiku vo tasaniya. M’Bayibolo mwe vakuyeruzgiyapu vinandi va ŵanthu a mtima wamampha wo angupereka marombu ngakuwonga nge Hana kweniso Hezekiya. (1 Sam. 2:1-10; Yes. 38:9-20) Mwaviyo, nasi titenere kupereka marombu ngakuwonga nge mo anguchitiya ateŵeti akugomezgeka ŵenaŵa. Asani muromba, mumuwongengi Yehova chifukwa cha vitumbiku vo wakupaskani. (1 Ŵat. 5:17, 18) Kuchita viyo nkhwamampha ukongwa chifukwa kukuwovyeningi kuti mumuyanjengi ukongwa Yehova.Yak. 4:8.

Kumbi ndi vitumbiku nivi vakutuliya kwaku Yehova vo muwonga? (Wonani ndimi 6 ndi 7)

8. Kumbi ndi vinthu wuli vo vingachitiska kuti tileki kuwonga vo Yehova watitichitiya?

8 Nchifukwa wuli tikhumbika kutcheŵa ndi vinthu vo vingachitiska kuti tileki kuwonga vinthu vamampha vo Yehova watitichitiya? Kanandi titondeka kuwonga chifukwa chakuti tikutole jalidu lenili kwaku Adamu ndi Eva. Mwakuyeruzgiyapu, Yehova wanguŵaŵika mu Paradayisu kweniso wanguŵapaska chechosi cho akhumbikanga. Yiwu ŵenga ndi mwaŵi wakuja ndi umoyu wamuyaya kweniso mwachimangu. (Chiy. 1:28) Kweni anguwonga cha vitumbiku vo angupaskika ndipu akhumbanga vinthu vinandi chifukwa cha mbunu. Ivi vinguchitiska kuti atayi vitumbiku vosi vo ŵenga navu. (Chiy. 3:6, 7, 17-19) Chifukwa chakuti tija ndi ŵanthu ambula kuwonga, nasi tingayamba jalidu lakuleka kuwonga vo Yehova watichitiya. Kweniso, tingayamba kuwutole mwasaza ubwezi widu ndi Yehova. Tingaleka kuwonga mwaŵi wo tenawu wakuja m’gulu la abali ndi azichi lapacharu chosi. Tingayamba so kwanja vinthu va m’charu ichi cho chibwangandulikengi pambula kuswera. (1 Yoh. 2:15-17) Kuti tileki kutoleka ndi vinthu venivi, tikhumbika kuŵanaŵaniya vitumbiku vo tasaniya kweniso kulutirizga kuwonga Yehova chifukwa chakuja ŵanthu ŵaki.Ŵerengani Sumu 27:4.

KUKUNTHIYAPU MASUZGU

9. Asani takumana ndi masuzgu ngakulu, nchifukwa wuli tikhumbika kuŵanaŵaniya so vitumbiku vo tasaniya?

9 Kuwonga kungatiwovya kuti tikunthiyengepu asani takumana ndi masuzgu ngakulu. Tingaguŵa ukongwa asani takumana ndi masuzgu mwamabuchibuchi ngo ngangachitiska kuti umoyu widu usinthi. Mwakuyeruzgiyapu, tingatama mwakayakaya, munthu yo tikutorana nayu wangaleka kugomezgeka, munthu yo titanjana nayu wangatayika ndipuso tingakumana ndi ngozi zachilengedu zo zingananga katundu widu. Pa nyengu iyi, tingachiskika ukongwa asani tingaŵanaŵaniya vitumbiku vo tasaniya. Tiyeni tiwoni vo vikuchitikiyapu abali ndi azichi anyaki.

10. Kumbi Irina wayanduwa wuli chifukwa cha kuŵerengese vitumbiku vo wasaniya?

 10 Irina * yo wachita upayiniya wa nyengu zosi ku United States wangutorana ndi mura mumpingu. Murumu waki wakulongo kuti ngwambula kugomezgeka chifukwa wakumuthaŵa ndipu wakumusiriya ŵana atatu. Kumbi nchinthu wuli cho chingumuwovya kuti walutirizgi kuteŵete Yehova mwakugomezgeka? Iyu wangukamba kuti: “Ndiwonga kuti Yehova watindiphwere ukongwa. Zuŵa lelosi ndiŵerengese vitumbiku vo ndasaniya. Ivi vitindiwovya kuziŵa kuti nde ndi mwaŵi ukulu ukongwa wakuziŵika kweniso kwanjika ndi Awuskefwi akuchanya wo atitivikiliya. Ndiziŵa kuti anditayengi cha.” Chinanga kuti Irina wakumana ndi masuzgu nganandi pa umoyu waki, iyu walutirizga kuteŵete Yehova mwalikondwa ndipu venivi vitovya so anyaki.

11. Nchinthu wuli cho chinguwovya Kyung-sook kuti wakunthiyepu khansa ya m’mapapu?

11 Kyung-sook yo waja ku Asia wanguchitapu upayiniya ndi murumu waki kwa vyaka vakujumpha 20. Mwamabuchibuchi, adokotala angusaniya kuti we ndi khansa ya m’mapapu ndipu angumukambiya kuti kwaja myezi yitatu pamwenga 6 kuti wafwi. Chinanga kuti iyu ndi murumu waki akumananga ndi masuzgu nganandi, kweni aŵanaŵaniyanga ukongwa va umoyo wawu cha. Kyung-sook wangukamba kuti: “Ndingutama ukongwa ndipu ndingutaya chigomezgu kweniso ndinguchita mantha ukongwa.” Nchinthu wuli cho chingumuwovya kuti wakunthiyepu? Iyu wangukamba kuti: “Zuŵa lelosi ndechendagoni, ndalutanga pachanya panyumba ndipu ndarombanga mwakukweza mazu, kumuwonga Yehova chifukwa cha vinthu vinkhondi vo wandichitiya pa zuŵa lo. Pavuli paki, nthazi zaweriyangamu ndipu vandiwovyanga kuti ndimuyanjengi ukongwa Yehova.” Kumbi venivi vamuwovya wuli? Iyu wangukamba kuti: “Ndawona kuti Yehova watitivikiliya asani takumana ndi masuzgu ndipu masuzgu ngo tikumana nangu ngamana ukongwa kuluska vitumbiku vo tisaniya pa umoyu widu.”

We ndi mzichi waki, John (Wonani ndimi 13)

12. Kumbi nchinthu wuli cho chingumuwovya Jason muwolu waki wati wafwa?

12 Jason yo wateŵete pa ofesi ya nthambi yinyaki ku Africa wachitapu uteŵeti wa nyengu zosi kwa vyaka vakujumpha 30. Iyu wangukamba kuti: “Pajumpha vyaka 7 kutuliya po muwolu wangu wakufwiya, ndipu ndisuzgika maŵanaŵanu ukongwa asani nditimukumbuka. Kweniso, ndidandawula ukongwa asani ndikumbuka mo wangusuzgikiya ndi khansa.” Kumbi nchinthu wuli cho chinguwovya Jason kuti wakunthiyepu? Iyu wangukamba kuti: “Nyengu yinyaki, ndakumbukanga vinthu vamampha vo ini ndi muwolu wangu tachitanga ndipu ndingumuwonga Yehova chifukwa cha kundiwovya kukumbuka vinthu vamampha. Pavuli paki, ndingwamba kuvwa umampha ndipu ndingwamba kuwonga Yehova mwakuwerezawereza chifukwa cha kundikumbuska vinthu vamampha venivi. Kuwonga kwandiwovya kuti ndiyambi kuwona vinthu mwakwenere. Chinanga kuti ndidandawula mbwenu asani ndakumbuka muwolu wangu, kweni ndiwonga Yehova chifukwa chakuti wangundipaska munthukazi wamampha ndipuso mwaŵi wakumuteŵete limoza ndi munthu yo wamuyanjanga ukongwa. Ivi vitindiwovya kuti ndilutirizgi kuwona vinthu mwakwenere.”

“Ndiwonga ukongwa kuti Yehova ndiyu Chiuta wangu.”—Sheryl

13. Nchinthu wuli cho chinguwovya Sheryl kuti wakunthiyepu kufwa kwa ŵanthu a m’banja laki?

13 Ku Philippines kunguputa chimphepu chikulu kukumaliya kwa chaka cha 2013. Sheryl yo wenga ndi vyaka 13 pa nyengu iyi, wangutaya vinthu vinandi ukongwa. Iyu wangukamba kuti: “Ŵanthu anandi a m’banja langu akutayika ndipuso nyumba yidu yikuwa.” Awiski, anyina, mzichi waki ndipuso avurwa ŵaki ŵaŵi akufwa pa ngozi yeniyi. Kumbi nchinthu wuli cho chinguwovya Sheryl kuti wakunthiyepu masuzgu ngenanga kwambula kuguŵa ukongwa? Iyu  wawonga ndipu walutirizga kuŵanaŵaniya vitumbiku vo wenavu. Iyu wangukamba kuti: “Ndinguwona kuti abali ndi azichi anguza kuziwovya ndipuso kuzichiska ŵanthu wosi wo akhumbikanga chovyu. Ndinguziŵa kuti abali ndi azichi pacharu chosi andirombiyanga.” Iyu wangukamba so kuti: “Ndiwonga ukongwa kuti Yehova ndiyu Chiuta wangu. Nyengu zosi, watitipaska vinthu vo tikhumbika.” Kukamba uneneska, kuŵanaŵaniya vitumbiku vo tasaniya ndiyu nthowa yamampha ukongwa yo yingatiwovya kuti tikunthiyengepu masuzgu. Kuwonga kungatiwovya kuti tilutirizgi kuteŵete Yehova chinanga kuti tikumana ndi masuzgu nganandi.Ŵaef. 5:20; Ŵerengani Ŵafilipi 4:6, 7.

“NDIKONDWENGI MU AMBUYA”

14. Kumbi ndi vinthu vakukondwesa nivi vo mulindiza? (Wonani chithuzi cho che papeji 8.)

14 Kwambiya kali, ateŵeti aku Yehova akondwa ndi vitumbiku vo asaniya. Mwakuyeruzgiyapu, Ayisraele angwamba kumba sumu zakuwonga ndi kuthamika Yehova ŵati ataskika kwaku Farao ndi magulu ngaki ngankhondu pa Nyanja Yiyera. (Chit. 15:1-21) Mazuŵa nganu, tilindizga kuzitaskika ku masuzgu ngo tikumana nangu. Ichi nchimoza mwa vitumbiku vakukhumbika ukongwa vo Yehova watisungiya. (Sumu 37:9-11; Yes. 25:8; 33:24) Ŵanaŵaniyani mo tazamukondwe pa nyengu yo Yehova wazamutuzgiyapu arwani ŵaki ndi kutipaska charu chifya cho mwazamuja chimangu ndipuso urunji. Lazamuja zuŵa lamampha ukongwa lo tazamuwonga vitumbiku vo Yehova wazakutipaska!Chiv. 20:1-3; 21:3, 4.

15. Kumbi mwasimikizga kuti muchitengenji m’chaka chinu cha 2015?

15 Tigomezga kuti Yehova watitumbikengi ukongwa m’chaka chinu cha 2015. Chinanga kuti vingaŵa viyo, tiziŵa kuti tikumanengi mbwenu ndi masuzgu. Kweni tigomezga kuti Yehova watitayengi cha. (Mar. 31:8; Sumu 9:9, 10) Iyu walutirizgengi kutipaska vinthu vakukhumbika pa umoyu kuti tilutirizgi kumuteŵete mwakugomezgeka. Mwaviyo, tiyeni tilutirizgi kuja ndi mtima nge waku Habakuku yo wangukamba kuti: “Chinanga mkuyu ureki kubuska, pamwenga vipasu ku ulevi ku mphereska, maolivi ngatondeki kupasa, ndi minda yitondeki vakurya, mskambu umari mukhola, ndi ng’ombi muulevi mukhola, ndipuuli ndikondwengi mu Ambuya, ndi kusekere mwaku Chiuta, mtaski wangu.” (Hab. 3:17, 18) Hinya, vingaja umampha ukongwa asani chaka chosi ichi tingalutirizga kukondwa ndi vitumbiku vo tapaskika ndipuso kulondo ulongozgi wa mu lemba la chaka cha 2015 wakuti: “Wongani Yehova chifukwa ngwamampha.”Sumu 106:1, NW.

^ ndimi 10 Mazina nganyaki ngasinthika m’nkhani iyi.