Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  January 2015

Nchifukwa Wuli Tichita Mwambu wa Chakurya Chamazulu cha Ambuya?

Nchifukwa Wuli Tichita Mwambu wa Chakurya Chamazulu cha Ambuya?

“Chenichi chitani kwachikumbuka ini.”1 ŴAKOR. 11:24.

1, 2. Kumbi Yesu wanguchitanji pa Nisani 14, 33 C.E.? (Wonani chithuzi cho che pachanya.)

MDIMA wati wayamba, mwezi ungutuwa wosi ndipu ukweru ungwamba kuwoneka ku Yerusalemu. Ili lenga zuŵa la Nisani 14, 33 C.E. Pa nyengu iyi, Yesu ndi akusambira ŵaki ndipu achita kali Phaska. Yiwu akumbukiyanga mo Yehova wangutaskiya Ayisraele ku ukapolu ku Egipiti. Kweniso, pa nyengu iyi ndipu pajumpha vyaka 1500. Ivi vati vachitika, Yesu wenga ndi akusambira ŵaki 11 akugomezgeka ndipu iyu wangwambisa mwambu wapade wakukumbukiya nyifwa yaki yo yinguchitika zuŵa ili lechendamali. *Mat. 26:1, 2.

2 Yesu wati waromba, wangupereka chiŵandi chambula mtupu kwa akusambira ndipu wanguti: “Rondani, ryani.” Pavuli paki, wanguto kapu wa vinyu. Iyu wanguromba so ndipu wangukamba kuti: “Mwiyanimu mosi.” (Mat. 26:26, 27) Yesu wanguŵapaska chakurya chinyaki cha kweni wenga ndi vinandi vakuti wakambiyi akusambira ŵaki akugomezgeka pa zuŵa lambula kuluwika lenili.

3. Kumbi ndi mafumbu nanga ngo tikambiskanengi m’nkhani iyi?

 3 Pa nyengu iyi, Yesu wangwambisa mwambu wakukumbukiya nyifwa yaki wo udanika so kuti Chakurya Chamazulu cha Ambuya. (1 Ŵakor. 11:20) Pa nkhani ya mwambu wenuwu, anyaki angafumba kuti: Nchifukwa wuli tikumbukiya nyifwa yaku Yesu? Kumbi chiŵandi ndi vinyu vimiyanji? Kumbi tinganozgeke wuli mwambu wenuwu? Mbayani wo atenere kurya chiŵandi ndipuso kumwa vinyu? Nanga Akhristu angalongo wuli kuti vo Malemba ngakamba vakukwaskana ndi chilindizga chawu vakukhumbika ukongwa?

NCHIFUKWA WULI TIKUMBUKIYA NYIFWA YAKU YESU?

4. Kumbi nyifwa yaku Yesu yititiwovya wuli?

4 Nge ŵana aku Adamu ndi Eva, nasi tikutoliyaku ubudi ndi nyifwa. (Ŵar. 5:12) Palivi munthu wambula kufikapu yo wangapereka sembi kwaku Chiuta kuti yitaski umoyu waki ndipuso wa ŵanthu anyaki. (Sumu 49:6-9) Kweni Yesu ndiyu yija yo wakupereka sembi yakuzomerezgeka kwaku Chiuta, mwakupereka liŵavu laki lakufikapu ndipuso ndopa zaki. Sembi yeniyi njakukhumbika ukongwa chifukwa yikutiwombo ku ubudi ndi nyifwa kweniso yititiwovya kuti tizilonde umoyu wamuyaya.Ŵar. 6:23; 1 Ŵakor. 15:21, 22.

5. (a) Kumbi tiziŵa wuli kuti Chiuta ndi Khristu atanja ŵanthu? (b) Nchifukwa wuli titenere kusanirikapu pa mwambu wakukumbukiya nyifwa yaku Yesu?

5 Sembi yaku Yesu yilongo kuti Chiuta watanja ŵanthu. (Yoh. 3:16) Kujipereka kwaku Yesu kulongo so kuti nayu watitiyanja. Nchifukwa wuli tikamba viyo? Yesu wechendazi pacharu chapasi, wenga “kapitawu” waku Chiuta ndipu wakondwanga ndi ‘ŵana ŵa ŵanthu.’ (Nthanthi 8:30, 31) Tingalongo kuti tiwonga Chiuta ndipuso Mwana waki asani tisanirika pa mwambu wakukumbukiya nyifwa yaku Yesu. Asani tichita viyo ndikuti tivwiya dangu lakuti: “Chenichi chitani kwachikumbuka ini.”1 Ŵakor. 11:23-25.

KUMBI CHIŴANDI NDI VINYU VIMIYANJI?

6. Kumbi chiŵandi ndi vinyu vimiyanji?

6 Pa nyengu yo wangwambisa Chikumbusku, Yesu wangusintha chiŵandi ndi vinyu mwakuziziswa cha kuti vije liŵavu ndipuso ndopa zaki chayizu. M’malu mwaki, iyu wangukamba vakukwaskana ndi chiŵandi kuti: ‘Ichi chimiya liŵavu langu.’ Pa nkhani ya vinyu, iyu wangukamba kuti: ‘Chenichi chimiya ndopa zangu, za phanganu, zakudikiya pa ŵanandi.’ (Marko 14:22-24) Ivi viwoneke limu kuti chiŵandi ndi vinyu venga vakuyeruzgiya ŵaka.

7. Kumbi chiŵandi cho tigwiriskiya nchitu pa Chikumbusku chimiyanji?

7 Pa mwambu wapade wenuwu wo unguchitika mu 33 C.E., Yesu wangugwiriskiya nchitu chiŵandi chambula mtupu cho chingujaku pa nyengu ya Phaska. (Chit. 12:8) M’malemba, chiŵandi cha mtupu chimiya chinyengu pamwenga ubudi. (Mat. 16:6, 11, 12; Luka 12:1) Mwaviyo, chiŵandi chambula mtupu cho Yesu wangugwiriskiya nchitu chenga chakwenere nadi chifukwa chamiyanga liŵavu laki lakufikapu. (Ŵah. 7:26) Mazuŵa nganu, tigwiriskiya so nchitu chiŵandi chambula mtupu pa Chikumbusku.

8. Kumbi vinyu yo tigwiriskiya nchitu pa Chikumbusku wamiyanji?

8 Vinyu yo Yesu wangugwiriskiya nchitu pa Nisani 14, 33 C.E., wamiyanga ndopa zaki. Mwakuyana ŵaka, vinyu yo tigwiriskiya nchitu pa Chikumbusku mazuŵa nganu wamiya ndopa zaku Yesu. Iyu wangudira ndopa zaki pamalu ngo ngadanikanga kuti Golgota, kubwalu kwa Yerusalemu kuti Yehova watigowoke “vilakwa” vidu. (Mat. 26:28; 27:33) Chifukwa chakuti chiŵandi ndi vinyu vimiya sembi yapachanya yo Yesu wangupereka chifukwa cha ŵanthu akuvwiya kweniso chifukwa chakuti tiwonga kuti wakutifwiya, tikhumbika nadi kunozgeke kuti tizisanirikepu pa mwambu wa Chakurya Chamazulu cha Ambuya wo uchitika chaka chechosi.

 MO TINGANOZGEKE MWAMBU WENUWU

9. (a) Nchifukwa wuli tikhumbika kuŵerenga Malemba ngo tipaskika pa nyengu ya Chikumbusku? (b) Kumbi sembi yaku Yesu yititikwaska wuli?

9 Asani tiŵerenga Malemba ngo nge mukabuku ka Kukambiskana Malemba Zuŵa Lelosi ngo ngakhumbika kuŵerengeka pa nyengu ya Chikumbusku, vitiwovyengi kuti tiŵanaŵaniyengi vo Yesu wanguchita wechendafwi. Kweniso, vingatiwovya kunozgeke mwambu wa Chakurya Chamazulu cha Ambuya. * Mzichi munyaki wangukamba kuti: “Mwambu wa Chikumbusku uja wapade ukongwa chaka chechosi ndipu tikondwa ukongwa asani nyengu iyi yafika. Ndikumbuka kuti ada wo ndaŵayanjanga ukongwa ŵati ŵafwa . . . ndinguwona liŵavu lawu ndipu ndingwamba kuŵanaŵana kukhumbika kwa sembi yaku Yesu. . . . Nditingaziŵa Malemba ngosi ngo ngakamba za sembi yeniyi kweniso ndingangakonkhoska umampha. Ivi vati vachitika, ndingwamba kuŵanaŵana vo vazamuchitika kunthazi chifukwa cha sembi yaku Yesu. Pavuli paki, ndingwamba kuvwa umampha mumtima.” Asani tinozgeke Chikumbusku, tingachita umampha kuŵanaŵaniya mo tikuwomboleke ku nyifwa ndi ubudi chifukwa cha kujipereka kwaku Yesu.

Mugwiriskiyengi nchitu vinthu vo mupaskika kuti munozgeke Chikumbusku (Wonani ndimi 9)

10. Kumbi kunozgeke Chikumbusku kungatiwovya wuli?

10 Kusazgiyaku uteŵeti widu mwakuchita upayiniya wakovya, ndi nthowa yinyaki yo tinganozgeke Chikumbusku. Pa nyengu iyi, tingachita umampha kudaniya akusambira Bayibolo ndipuso ŵanthu anyaki ku mwambu wa Chakurya Chamazulu cha Ambuya. Mwaviyo, tikondwengi ukongwa asani tikambiyaku ŵanthu anyaki vakukwaskana ndi Chiuta, Mwana waki kweniso vitumbiku vo Yehova wanozge ŵanthu ŵaki wo atimuthamika.Sumu 148:12, 13.

11. Kumbi Akhristu anyaki ku Korinte achitanga wuli pa nkhani ya kurya chiŵandi ndipuso kumwa vinyu pa Chikumbusku?

11 Po munozgeke Chakurya Chamazulu cha Ambuya mungachita so umampha kuŵanaŵaniya vo wakutumika Paulo wangulembe Akhristu a ku Korinte. (Ŵerengani 1 Ŵakorinte 11:27-34.) Paulo wangukamba kuti weyosi yo waturya chiŵandi ndipuso kumwa vinyu mwambula kwenere, “wakaŵanga wakalema ku liŵavu ndi ndopa va Ambuya,” Yesu Khristu. Mwaviyo, Mkhristu wakusankhika “wadankhi wajesa” ndipu pavuli paki wangarya chiŵandi ndi kumwa vinyu. Kweni asani waleka kuchita  ivi, iyu “watijiryiya ndi watijimwiya chisuska.” Chifukwa chakuryiyamu bweka, Akhristu anandi a ku Korinte ŵenga ‘akutomboroka ndipuso arwali,’ ndipu anandi aku yiwu anguleka kuja pa ubwezi ndi Yehova. Panyaki ivi venga viyo chifukwa chakuti anyaki angurya kweniso angumwa ukongwa, Chikumbusku chechendachitiki pamwenga pa nyengu yo chachitikiyanga ndipu mitu yawu yitenere kuti yayendanga umampha cha. Kweniso atenere kuti ŵenga ambula kukho mwauzimu. Mwaviyo, kurya chiŵandi pamwenga kumwa vinyu mwambula kwenere kwachitiskanga kuti Chiuta waleki kukondwa nawu.

12. (a) Kumbi Paulo wanguyeruzgiya Chikumbusku ndi vinthu wuli, nanga wanguŵatcheŵeskanji ŵanthu? (b) Asani Mkhristu yo waturya chiŵandi ndi kumwa vinyu wachita ubudi ukulu, wakhumbika kuchitanji?

12 Paulo wanguyeruzgiya Chikumbusku ndi kurya chakurya limoza ndi ŵanthu anyaki ndipu wangutcheŵeska ŵanthu wo aryanga chakurya chenichi kuti: “Kuti muziŵa cha kumwa chandi cha Mbuya ndi chandi cha ŵademoni: kuti muziŵa cha kusanganapu gomi la Mbuya ndi gomi la ŵademoni.” (1 Ŵakor. 10:16-21) Asani Mkhristu wakusankhika, yo nyengu zosi waturya chiŵandi kweniso watumwa vinyu pa Chakurya Chamazulu cha Ambuya wachita ubudi ukulu, wakhumbika kupempha ŵara kuti amuwovyi. (Ŵerengani Yakobe 5:14-16.) Asani wayamba kubala “vipasu vakwenere chipe,” wangalongo kuti wanyoza sembi yaku Yesu cha asani waturya chiŵandi ndi kumwa vinyu pa Chikumbusku.Luka 3:8.

13. Nchifukwa wuli tikhumbika kuromba ndipuso kuŵanaŵaniya chilindizga chidu?

13 Po tinozgeke Chikumbusku, tingachita so umampha kuromba ndi kuŵanaŵaniya chilindizga chidu. Chifukwa chakuti tikujipereka kwaku Yehova ndipuso tilondo Yesu mwakugomezgeka, tingakhumba cha kunyoza sembi yaku Yesu mwakurya chiŵandi kweniso kumwiya dala vinyu pa Chikumbusku asani tiziŵa umampha cha kuti tikusankhika. Mwaviyo, kumbi tingaziŵa wuli kuti tikhumbika kurya pamwenga cha?

MBAYANI WO ATENERE KURYA CHIWANDI NDI KUMWA VINYU?

14. Kumbi phanganu lifya likoliyana wuli ndi kurya chiŵandi kweniso kumwa vinyu pa Chikumbusku?

14 Wo mbakwenere kurya chiŵandi ndi kumwa vinyu pa Chikumbusku asimikizga kuti ŵe mu phanganu lifya. Pa nkhani ya vinyu, Yesu wangukamba kuti: ‘Nkhombu iyi yimiya phanganu lifya mu ndopa zangu.’ (1 Ŵakor. 11:25) Kuporote mwa mchimi Yeremiya, Chiuta wangukambiya limu kuti Iyu wazamupanga phanganu lifya lo latingi lipambanengi ndi phanganu la Chilangulu lo wanguchita ndi Ayisraele. (Ŵerengani Yeremiya 31:31-34.) Chiuta wakuchita phanganu lifya ndi Yisraele wauzimu. (Ŵag. 6:15, 16) Phanganu ili lingwamba kugwira nchitu Yesu wati wadira ndopa zaki nge sembi. (Luka 22:20) Yesu ndi Mwendapakati wa phanganu lifya ndipu Akhristu akusankhika wo ŵe mu phanganu ili amuwusiya nayu limoza kuchanya.Ŵah. 8:6; 9:15.

15. (a) Kumbi mbayani wo ŵe mu phanganu la Ufumu? (b) Kumbi ndi mwaŵi wuli wo ŵanthu ŵenaŵa ŵenawu?

15 Wo mbakwenere kurya chiŵandi ndi kumwa vinyu pa Chikumbusku aziŵa kuti ŵe mu phanganu la Ufumu. (Ŵerengani Luka 12:32.) Yesu wanguchita phanganu ili ndi akusambira ŵaki akugomezgeka wo anguzija akusankhika. Yiwu ŵenga akwenere kuchiwusiya nayu limoza kuchanya chifukwa chakuti asuzgikiyanga nayu limoza. (Ŵaf. 3:10) Chifukwa chakuti ŵe mu phanganu la Ufumu, Akhristu akusankhika wo mbakugomezgeka amuwusa kwamuyaya ndi Khristu kuchanya. (Chiv. 22:5) Akhristu ŵenaŵa ndiwu mbakwenere kurya chiŵandi ndi kumwa vinyu pa Chakurya Chamazulu cha Ambuya.

16. Konkhoskani mwakudumuwa vo lemba la Ŵaroma 8:15-17 ling’anamuwa.

16 Akhristu ŵija wo mzimu utiŵachitiya ukaboni kuti mbana aku Chiuta ndiwu mbakwenere kurya chiŵandi ndi kumwa vinyu pa Chikumbusku. (Ŵerengani Ŵaroma 8:15-17.) Paulo wangukamba kuti Akhristu akusankhika adanirizga kuti “Aba,” kung’anamuwa kuti “Ada!” Mwana wangagwiriskiya nchitu mazu ngenanga pakudana  awiski chifukwa ngalongo kuti munthu utimwanja. Mazu yanga ngapangika kutuliya ku mazu ngaŵi ngaulemu ngakuti “papa” ndipuso ngakuti “ada.” Akhristu wo akulonde “mzimu” aja ŵana aku Chiuta. Mzimu waku Yehova uchitiya ukaboni kuti mbana ŵaki akusankhika. Yiwu akana cha kuja pacharu chapasi, kweni asimikizga kuti amuwusiya limoza ndi Yesu mu Ufumu waki kuchanya asani alutirizgengi kuja akugomezgeka mpaka nyifwa. Mazuŵa nganu, Akhristu a 144,000 wo ayesesa kulondo Khristu ajapu ŵaka amanavi. Yiwu ŵe “ndi chitukutizga chakutuliya ku Wakupaturika,” yo ndi Yehova. (1 Yoh. 2:20; Chiv. 14:1) Mzimu waki utiŵachitiska kuti adanirizgengi kuti “Aba, Ada!” Ivi viwoneke limu kuti ŵe ndi ubwezi wapade ukongwa ndi Chiuta!

KUMBI TICHITA WULI NDI CHILINDIZGA CHIDU?

17. Kumbi Akhristu akusankhika alindizganji, nanga atichiwona wuli chilindizga chawu?

17 Asani ndimwi Mkhristu wakusankhika, chilindizga chakuti muluta kuchanya ndiyu nkhani yakukhumbika ukongwa kuti muyirombiyengi. Asani Bayibolo likamba za kutorana ndi munthurumi wakuchanya yo ndi Yesu Khristu, muwona kuti vitikukwaskani chifukwa mulindizga kuzija m’gulu laku “mwali” waku Khristu. (2 Ŵakor. 11:2; Yoh. 3:27-29; Chiv. 21:2, 9-14) Asani Bayibolo likamba kuti Chiuta watanja ŵana ŵaki auzimu, mumuka kuti, “Akamba ini penapa.” Asani Mazu ngaku Yehova ngapereka ulongozgi ku ŵana ŵaki akusankhika, mzimu wakupaturika utikuwovyani kuti muvwiyengi ndipuso kukamba mumtima winu kuti, “Ulongozgi uwu ukwaska ini.” Mzimu waku Chiuta ndi mzimu winu uchitiya ukaboni kuti muluta kuchanya.

18. Kumbi ‘ambereri zinyaki’ alindizganji, nanga atichiwona wuli chilindizga chawu?

18 Kweni asani mwe m’gulu la “mzinda ukuru” wa “mbereri zinyaki,” Chiuta wakhumba kuti muzije pacharu chapasi. (Chiv. 7:9; Yoh. 10:16) Mukhumba kuzija kwamuyaya mu Paradayisu ndipu mukondwa ukongwa kuŵanaŵaniya vo Bayibolo likamba vakukwaskana ndi mo umoyu wazamuŵiya pacharu chapasi. Mulindizga kuzija mwachimangu pamoza ndi ŵanthu a m’banja linu kweniso ŵanthu anyaki amampha. Mukhumbisiska kuziwona kuti ŵanthu asuzgika so cha ndi nja, ukavu, matenda ndipuso nyifwa. (Sumu 37:10, 11, 29; 67:6; 72:7, 16; Yes. 33:24) Kweniso, mukhumbisiska kuzilonde ŵanthu wo azamuyuskika kuti aje pacharu chapasi kwamuyaya. (Yoh. 5:28, 29) Mutenere kuti muwonga ukongwa kuti Yehova wakutumbikani kuti muzije pacharu chapasi! Chinanga kuti muryaku cha chiŵandi ndipuso mumwaku cha vinyu, kweni musanirika mbwenu pa Chikumbusku. Ivi vilongo kuti muwonga ukongwa sembi yaku Yesu Khristu.

KUMBI MWAZAMUSANIRIKAPU?

19, 20. (a) Kumbi mungachita wuli kuti muzije ndi umoyu wamuyaya? (b) Nchifukwa wuli mukhumbika kuzisanirika pa mwambu wa Chakurya Chamazulu cha Ambuya?

19 Mungazija ndi umoyu wamuyaya kaya kuchanya pamwenga pacharu chapasi pijapija asani mugomezga Yehova Chiuta, Yesu Khristu ndipuso sembi yaki. Asani mwaziluta ku Chikumbusku, mwazamuja ndi mwaŵi wakuŵanaŵaniya vo mulindizga ndipuso kukhumbika kwa nyifwa yaku Yesu. Mwaviyo, yesesani kuti muzije m’gulu la ŵanthu mamiliyoni wo azamusanirika pa mwambu wa Chakurya Chamazulu cha Ambuya pa Chinkhondi, April 3, 2015 asani lumwi lasere. Mwambu uwu wazamuchitikiya ku Nyumba ya Ufumu ya Akaboni aku Yehova pamwenga m’malu nganyaki pacharu chosi.

20 Chikumbusku chazakukuwovyani kuti mulutirizgi kuwonga ukongwa sembi yaku Yesu. Asani mwazamuvwisiya mwakuphwere nkhani yo yazamukambika, vazakukuwovyani kuti muyanjengi ŵanthu wo muja nawu pafupi ndipu mwazakuŵakambiyaku vo mwazamusambira vakukwaskana ndi chanju chaku Yehova ndipuso chilatu chaki chikulu chakukwaskana ndi ŵanthu. (Mat. 22:34-40) Muziyesesi kuzisanirika pa mwambu wa Chakurya Chamazulu cha Ambuya.

^ ndimi 1 Kwa Ayuda, zuŵa layambanga asani lumwi lisere ndipu lamalanga zuŵa linyaki asani lumwi lisere.

^ ndimi 9 Wonani chigaŵa 16 mu Kabuku Kakusambiriya Mazu Ngaku Chiuta.