Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  January 2015

Jani ndi Nthengwa Yakukho Ndipuso Yalikondwa

Jani ndi Nthengwa Yakukho Ndipuso Yalikondwa

“Kwambura kuti Ambuya ndiwu azenga nyumba, atakataka kwa ŵaka ŵakuyizenga.”SUMU 127:1a.

1-3. Kumbi ŵanthu akutorana akumana ndi masuzgu wuli? (Wonani chithuzi cho che pachanya.)

MUNTHURUMI munyaki yo waja mwakukondwa m’banja kwa vyaka 38, wangukamba kuti: “Yehova wangakutumbika asani uyesesa nadi kuti banja laku liyendengi umampha.” Kukamba uneneska, ŵanthu akutorana angakondwa m’banja kweniso angawovyana pa nyengu ya masuzgu.Nthanthi 18:22.

2 Kweni vakuziziswa cha kuti mabanja ngakumana ndi “suzgu mu umoyu waliŵavu.” (1 Ŵakor. 7:28) Nchifukwa wuli ve viyo? Nchifukwa cha masuzgu ngo akumana nangu zuŵa lelosi. Mabanja ngatondeka kwenda umampha chifukwa cha kuguŵa, kuleka kuvwisisana kweniso kuleka kukambiskana umampha. (Yak. 3:2, 5, 8) Anyaki agwira nchitu zakusuzga kweniso aphwere ŵana. Anyaki asuzgika maŵanaŵanu kweniso avuka ndi nchitu ndipu atondeka kucheza ndi munthu yo akutorana nayu. Ivi vichitiska kuti nthengwa yawu yije yakuwayawaya. Anyaki atondeka kwanjana kweniso kupaskana ulemu chifukwa cha kusoŵa ndalama, kutama pamwenga masuzgu nganyaki. Nyengu zinyaki nthengwa yingayamba kuwayawaya chifukwa cha “milimu ya liŵavu” nge  ureŵi, kutinkhana, ndewu, sanji, kufya mtima, kupindana ndipuso mijalidu yinyaki yiheni.Ŵag. 5:19-21.

3 Mabanja ngakumana so ndi masuzgu chifukwa chakuti te mu “mazuŵa ngakumariya” ndipu ŵanthu anandi mbakujiyanja ndipuso ŵe ndi mijalidu yinyaki yiheni yo yitimbanyizga mabanja. (2 Tim. 3:1-4.) Kweniso, pe murwani munyaki muheni ukongwa yo watimbanyizga mabanja. Wakutumika Paulo watititcheŵeska kuti: “Diabolo yo, mphindikwa yinu, uli ndi nkharamu yakukoroma, wayingayinga ndi kupenja mweniyo wakamphi.”1 Pet. 5:8; Chiv. 12:12.

4. Kumbi tingachita wuli kuti nthengwa yidu yije yakukho ndipuso yalikondwa?

4 Munthurumi munyaki wa ku Japan wangukamba kuti: “Ndingusuzgika maŵanaŵanu pa nkhani ya ndalama. Muwolu wangu nayu wangwamba kusuzgika maŵanaŵanu chifukwa chakuti ndakambiskananga nayu viŵi cha, ndipu pavuli paki wangutama ukongwa. Masuzgu ngenanga ngachitiskanga kuti tilekengi kuvwisisana.” Chinanga kuti tikumana ndi masuzgu munthengwa kweni tingatondeka cha kumalana nangu. Yehova wangawovya ŵanthu akutorana kuti nthengwa yawu yije yakukho kweniso yalikondwa. (Ŵerengani Sumu 127:1.) Tiyeni tikambiskani vinthu vinkhondi vo vingawovya kuti nthengwa yije yakukho ndipuso kuti yileki kumala. Pavuli paki, tikambiskanengi mo chanju chingawovye pa nkhani iyi.

YEHOVA WALONGOZGENGI NTHENGWA YINU

5, 6. Kumbi ŵanthu akutorana angachita wuli kuti Yehova waŵalongozgengi?

5 Kugomezgeka ndipuso kuvwiya Yo wakwambisa nthengwa nkhwakukhumbika ukongwa kuti banja lije lakukho. (Ŵerengani Wakutaula 4:12.) Ŵanthu akutorana angalongozgeka ndi Yehova asani alondo ulongozgi waki. Bayibolo likamba vakukwaskana ndi ŵanthu ŵaki a mu nyengu yakali kuti: “Makutu nginu ngakavwanga mazu kuvuli kwinu, kuti, ‘Nthowa ndi iyi, yendani mwaku yo,’ penipo mupatukiya kumaryi ndi penipo mupatukiya kumazge.” (Yes. 30:20, 21) Mazuŵa nganu, ŵanthu akutorana ‘angavwa’ mazu ngaku Yehova asani aŵerenge limoza Mazu Ngaku Chiuta. (Sumu 1:1-3) Nthengwa yawu yingaja yakukho ndipuso angaluta panthazi mwauzimu asani achita Kusopa kwa Pabanja. Kurombe limoza kungaŵawovya so kuti nthengwa yawu yije yakukho po alimbana ndi vinthu va m’charu chaku Satana.

Asani ŵanthu akutorana achitiya limoza vinthu vauzimu, vitovya kuti aje pa ubwezi ndi Chiuta, ayanjanengi ukongwa ndipuso akondwengi (Wonani ndimi 5, 6)

6 Gerhard wa ku Germany wangukamba kuti: “Asani titondeka kukondwa chifukwa cha masuzgu pamwenga kuleka kuvwisisana, ulongozgi wa m’Malemba ungatiwovya kuti tizizipizgengi ndipuso tigowokiyanengi. Mijalidu yeniyi yitovya kuti banja liyendengi umampha.” Ŵanthu akutorana aja pa ubwezi wakukho ndi Chiuta kweniso atanjana ukongwa asani achitiya limoza vinthu vauzimu.

ANTHURUMI, LONGOZGANI BANJA LINU MWACHANJU

7. Kumbi anthurumi akhumbika kulongozga wuli banja lawu?

7 Vo munthurumi wangachita pakulongozga banja laki vingawovya kuti lije lakukho ndipuso lalikondwa. Bayibolo likamba kuti: “Munthurumi yosi mutu waki ndi Khristu; ndipu mutu wa munthukazi ndi murumu waki.” (1 Ŵakor. 11:3) Lemba ili litovya anthurumi kuti alongozgengi umampha mabanja ngawu nge mo Khristu watiŵalongozge. Yesu waŵanaŵaniyanga vaki pe cha ndipuso wenga mukali cha kweni wenga wachanju, walisungu, wakuŵanaŵaniya anyaki, wambula kukwiya liŵi kweniso wakujiyuyuwa.Mat. 11:28-30.

8. Kumbi anthurumi angachita wuli kuti awolu ŵawu aŵayanjengi kweniso kuŵatumbika

8 Anthurumi achikhristu akhumbika cha  kuchichizga awolu ŵawu kuti aŵatumbikengi. M’malu mwaki, yiwu atenere kulutirizga ‘kuja nawu mwakuŵaziŵa’ umampha. Atenere so kuŵaŵanaŵaniya ndipuso kuŵavwisisa. Yiwu akhumbika so kuŵapaska ulemu awolu ŵawu nge “chiyaŵi chakutomboroka.” (1 Pet. 3:7) Kaya ŵe pagulu pamwenga ŵe kwaku ŵija, anthurumi akhumbika kulongo kuti awolu ŵawu mbakuzirwa ukongwa mwakulongoro nawu mwaulemu kweniso kuchita vinthu vakulongo kuti atiŵayanja. (Nthanthi 31:28) Asani muchita ivi, awolu ŵinu akuyanjeningi ukongwa ndipuso akutumbikeningi. Ivi vingachitiska so kuti Chiuta watumbiki banja linu.

ANTHUKAZI ATENERE KUTHERA MWAULEMU

9. Kumbi munthukazi wangalongo wuli kuti ngwakuthera?

9 Kwanja Yehova kutuliya pasi pamtima kutitiwovya kuti tije akujiyuyuwa pasi pajanja laki lanthazi. (1 Pet. 5:6) Munthukazi wakuthera wakhumbika kuchita vinthu mwakukoliyana ndi murumu waki ndipuso kovya banja laki. Kuchita viyo nkhwakukhumbika ukongwa chifukwa kulongo kuti watumbika muwusu waku Yehova. Bayibolo likamba kuti: “Mwa awolu mujithereski ku arumu ŵinu, pakuti ichi nchakwenere mu Mbuya.” (Ŵakol. 3:18) Kukamba uneneska, ndi nyengu zosi cha po muthukazi wangakondwa ndi vo munthurumi wangakamba. Kweni munthukazi wakuthera ngwakunozgeka kulondo vo murumu waki wangakamba asani vikoliyana ndi marangu ngaku Chiuta.1 Pet. 3:1.

10. Nchifukwa wuli kuthera nkhwakukhumbika?

10 Munthukazi we ndi udindu ukulu wakuwovyana ndi murumu waki. (Mal. 2:14) Iyu watovya ukongwa m’banja ndipu wapereka maŵanaŵanu ngaki mwaulemu, kweniso walutirizga kuthera. Munthurumi nayu watenere kuvwisiya mwakuphwere asani muwolu waki wakamba maŵanaŵanu ngaki. (Nthanthi 31:10-31) Kuthera ndi mtima wosi kutovya kuti banja lije lakukondwa, lachimangu kweniso lakukoliyana. Munthurumi ndi muwolu waki  akondwa asani achita vo Chiuta wakhumba.Ŵaef. 5:22.

MUGOWOKIYANENGI NDI MTIMA WOSI

11. Nchifukwa wuli kugowokiyana nkhwakukhumbika?

11 Kugowokiyana nkhwakukhumbika ukongwa chifukwa kutovya kuti nthengwa yije yakukho. Ŵanthu akutorana atanjana ukongwa asani agowokiyana kutuliya pasi pamtima. (Ŵakol. 3:13) Nthengwa yingawayawaya asani munthurumi ndi munthukazi asungirana vifukwa ndipuso asani akumbuskana venivo asani ayambana. Nge mo lumwa lingawisiya nyumba, kusunga vifukwa ndipuso kufya mtima kungachitiska kuti kugowokiyana kuje kwakusuzga. Kweni nthengwa yingaja yakukho asani munthurumi ndi munthukazi agowokiyana nge mo Yehova watiŵagowoke.Mika 7:18, 19.

12. Kumbi chanju ‘chivimba wuli mulu wa vilakwa’?

12 Chanju chauneneska “chitundiriya pa uheni wo chikunthiyapu cha.” Kweni “chanju chivimba mulu wa vilakwa.” (1 Ŵakor. 13:4, 5; Ŵerengani 1 Petro 4:8.) Munthowa yinyaki, tingakamba kuti chanju chileka cha kugowoka ndipu chiŵerenga cha kuti chagowoke kalinga. Pa nyengu yo wakutumika Petro wangufumba kuti wangamugowoke kalinga munthu yo wamunangiya, Yesu wangumuka kuti: “Mpaka machumi ngankhondi ndi ngaŵi kuwerezga kankhondi ndi kaŵi,” pamwenga kuti maulendu 77. (Mat. 18:21, 22) Yesu wangulongo kuti Mkhristu walivi pakulekezge kugowoke munyaki.Nthanthi 10:12. *

13. Kumbi tingachita wuli kuti tilimbani ndi jalidu lakuleka kugowokiyana?

13 Annette wangukamba kuti: “Asani munthurumi ndi munthukazi aleka kugowokiyana, atamba kufya mtima ndipuso agomezgana cha. Ivi vichitiska kuti banja liyambi kuwayawaya. Kugowokiyana kutovya kuti banja lije lakukho kweniso kuti muyanjanengi ukongwa.” Nyengu zosi muyesesengi kuwonga vo munyinu wachita. Venivi vingakuwovyani kuti muleki jalidu la kuleka kugowoka. (Ŵakol. 3:15) Vikuwovyeningi so kuti muje ndi likondwa, chimangu, ndipuso Chiuta wakutumbikeningi chifukwa chakuti mugowokiyana.Ŵar. 14:19.

MUCHITENGI VO MUNGAKHUMBA KUTI MUNYINU WAKUCHITIYENI

14, 15. Kumbi Yesu wangukambanji, nanga fundu yeniyi yingawovya wuli m’banja?

14 Tikayika cha kuti mukhumba kuti ŵanthu akutumbikeningi ndipuso akupaskeningi ulemu. Kweniso mukondwa ukongwa asani ŵanthu atuvwa maŵanaŵanu nginu ndi kungagwiriskiya nchitu. Kweni kumbi mukuvwapu anyaki achikamba kuti, “Nani ndimulekengi cha”? Chinanga kuti nyengu zinyaki vingaja vakuvwika kuchita viyo, kweni Bayibolo likamba kuti: ‘Ungakambanga cha kuti, “Ndikamuchitiyanga uli ndimo iyu wachitiya kwaku ini.”’ (Nthanthi 24:29) M’malu mwaki, Yesu wangukamba nthowa yakwenere yo tingamaliskiya nkhani yakusuzga. Iyu wangukamba fundu yakukhumbika ukongwa yakuti: “Wuli ndimo mukhumbiya kuti ŵanthu achitiyi imwi, namwi so chitiyani iwu kwakulingana.” (Luka 6:31) Yesu wang’anamuwanga kuti tikhumbika kuchitiya ŵanthu vo nasi tingakhumba kuti atichitiyi kweniso tingaweziyanga chiheni pa chiheni cha. Asani ndi m’banja, Yesu wang’anamuwanga kuti tichitengi vinthu vo tingakhumba kuti munyidu watichitiyi.

 15 Ŵanthu akutorana angaja ndi banja lakukho asani aŵanaŵaniyana. Munthurumi munyaki wa ku South Africa wangukamba kuti: “Tiyesesa kugwiriskiya nchitu fundu yakuti muchitengi vo mungakhumba kuti anyinu akuchitiyeni. Chinanga kuti nyengu zinyaki tiguŵiskana kweni weyosi wayesesa kuchita vinthu vo wangakhumba kuti munyaki wamuchitiyi nge, kutumbikana ndipuso kupaskana ulemu.”

16. Kumbi ndi vinthu wuli vo ŵanthu akutorana akhumbika cha kuchita?

16 Mukhumbika cha kukambiya ŵanthu vinthu vo muwolu winu pamwenga murumu winu wanangisa, kweniso mungayesanga cha kukambiya ŵanthu vinthu venivi mwakuseka. Mutenere kukumbuka kuti banja ndi maphara cha kuti muziŵi yo we ndi nthazi ukongwa, yo wachawuta ukongwa kweniso yo wakuziŵa kukamba mazu ngakupweteka mtima. Kukamba uneneska, tosi tibuda, ndipu nyengu zinyaki tiguŵiska anyidu. Kweni ŵanthu akutorana atenere cha kukamba mazu ngaheni pamwenga ngambula ulemu ngo ngangakwiyisa munyawu.Ŵerengani Nthanthi 17:27; 31:26.

17. Kumbi anthurumi angalondo wuli fundu yakuti muchitengi vo mungakhumba kuti anyinu akuchitiyeni?

17 Chinanga kuti muvigaŵa vinyaki ŵanthu awona kuti munthurumi chayiyu wakhumbika kuchitiya nkhaza muwolu waki pamwenga kumupuma, kweni Bayibolo likamba kuti: ‘Mweniyo ngwakuwura kukwiya liŵi ngwamamphaku ku wanthazi, ndipu mweniyo wateruzga mtima waki waruska mweniyo wakwamphuwa msumba.’ (Nthanthi 16:32) Munthu wakhumbika kuyesesa kuti wavikiliyi mtima waki ndipuso kuti walondo Yesu Khristu. Munthurumi yo walongoro uheni ndi muwolu waki pamwenga kumupuma ngwanthazi nadi, kweni wangataya ubwezi waki ndi Yehova. Davidi yo wakulembaku buku la Sumu wenga munthu wanthazi ndipuso wachiganga kweni wangukamba kuti: “Kalipani, kweni lekani kunanga; kambani ndi mitima yinu pa vita vinu, ndi kuja chisisi.”Sumu 4:4.

“VWARANI, CHANJU”

18. Nchifukwa wuli chanju nchakukhumbika nyengu zosi?

18 Ŵerengani 1 Ŵakorinte 13:4-7. Chanju ndi jalidu lakukhumbika ukongwa m’banja. Ndichu chifukwa chaki Bayibolo likamba kuti: “Vwarani . . . chitima cha lisungu, ulemu, kujiyuyuwa, upovu, chilekerezga; Ndipu pachanya paku vosi ivi, vwarani, chanju chenicho chimanga pamoza vosi mu wanasi wakufikapu.” (Ŵakol. 3:12, 14) Chanju chakufwiya anyidu nge cho Khristu wenga nachu chitovya ukongwa kuti banja lije lakukho. Chanju chenichi chingakuwovyani kuti mukunthiyengepu mijalidu yinyaki yo munyinu wenayu, matenda ngakulu, kusoŵa ndalama ndipuso masuzgu nganyaki ngakukwaskana ndi abali ŵinu akuliŵavu.

19, 20. (a) Kumbi ŵanthu akutorana angachita wuli kuti nthengwa yawu yije yakukho? (b) Kumbi tikambiskanengenji m’nkhani yakulondopu?

19 Kukamba uneneska, tikhumbika kujipereka, kugomezgeka kweniso kuyesesa kuti banja lidu liyendengi umampha. M’malu mwakupatana chifukwa chakuti akumana ndi masuzgu, ŵanthu akutorana akhumbika kuyesesa kuti akondwengi munthengwa yawu kweniso kuti yileki kumala. Kwanjana ndipuso kwanja Chiuta kungaŵawovya kuti amaliski masuzgu mwachanju, chifukwa “chanju chipereŵe cha.”1 Ŵakor. 13:8; Mat. 19:5, 6; Ŵah. 13:4.

20 Mu “nyengu zizitu” zo tilimu nkhwakusuzga ukongwa kuja ndi nthengwa yakukho ndipuso yalikondwa. (2 Tim. 3:1) Kweni Yehova wangatiwovya. Chinanga kuti ve viyo, akutorana akhumbika mbwenu kulimbana ndi mijalidu yiheni yo yawanda m’charu ichi. Nkhani yakulondopu yikonkhoska vo akutorana angachita kuti mpanda wauzimu wa nthengwa yawu uje wakukho.

^ ndimi 12 Chinanga kuti munthurumi ndi munthukazi akhumbika kugowokiyana ndipuso kumaliska masuzgu, Bayibolo lizomerezga kugowokiyana pamwenga kupatana asani munyaki wachita ureŵi. (Mat. 19:9) Wonani nkhani yakuti, “Lingaliro la Baibulo: Chigololo—Kukhululukira Kapena Kusakhululukira?” mu Galamukani! ya Chichewa ya August 8, 1995.