Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  December 2014

‘Wanguyiziŵa Nthowa’

‘Wanguyiziŵa Nthowa’

GUY HOLLIS PIERCE, yo wateŵetiyanga mu Wupu Wakulongozga wa Akaboni aku Yehova wangutayika pa Chiŵi, March 18, 2014. Iyu wangufwa we ndi vyaka 79. Pa nyengu iyi ndipu wakulutiya kuchanya nge yumoza wa abali aku Khristu.Ŵah. 2:10-12; 1 Pet. 3:18.

Guy Pierce wakuwiya mumsumba wa Auburn, ku California, U.S.A., pa November 6, 1934, ndipu wangubatizika mu 1955. Mu 1977, wangutorana ndi Penny ndipu pavuli paki angubala ŵana. Kulera ŵana kungumuwovya kuti wajengi umampha ndi ŵanthu nge mo mpapi wachitiya. Iyu ndi Penny achitanga upayiniya mwaphamphu mu 1982. Kweniso, kwambiya mu 1986 wanguteŵete nge wakuwonere dera kwa vyaka 11 m’charu cha United States.

Mu 1997, Guy Pierce ndi muwolu waki Penny angwamba kuteŵete pabanja la Beteli ku United States. M’bali Pierce wanguteŵetiyapu mu Dipatimenti ya Uteŵeti, ndipu mu 1998 wateŵetiyanga mu Komiti Yakuwonere Ateŵeti a pa Beteli ya Wupu Wakulongozga. Chipharazgu chakuti M’bali Pierce waŵikika kuti wateŵetiyengi mu Wupu Wakulongozga chinguperekeka pa October 2, 1999, pa unganu wapachaka wa Watch Tower Bible and Tract Society of Pennsylvania. Iyu wanguteŵetiyapu so mu Komiti ya Akukumaniska, Yakuwonere Ateŵeti a pa Beteli, Yakuwonere Nchitu Yakulemba ndipuso Komiti Yakuwonere Nchitu Yakusindikiza Mabuku.

Ŵanthu amitundu yakupambanapambana amuyanjanga ukongwa chifukwa wayanjanga kumwemwete ndi kuchita myati. Kweniso, ŵanthu amuyanjanga ukongwa chifukwa wenga wakujiyuyuwa, watumbikanga marangu ndi fundu zaurunji zaku Yehova ndipuso wamugomezganga ukongwa. Guy Pierce wawonanga kuti lumwi lingatondeka kutuwa kweni malayizgu ngaku Yehova ngangatondeka cha kufiskika ndipu wakhumbisiskanga kuti uneneska wenuwu upharazgiki pacharu chosi chapasi.

M’bali Pierce wateŵetiyanga Yehova mwaphamphu. Iyu wayambanga kugwira nchitu ndi mulenjilenji ndipu kanandi waŵerukanga usiku. Iyu wayendanga m’vyaru vinandi kuti wakachiski abali ndi azichi. Kweniso wenga wakufwatuka kucheza ndi weyosi pa Beteli ndipuso anyaki wo amupemphanga kuti waŵawovyi. Chinanga kuti pangajumpha vyaka vinandi, abali ndi azichi aluwengi cha umoyu waki wamampha, mo wachitiyanga vinthu mwaubwezi kweniso kuti waŵachiskanga kutuliya m’Malemba.

M’bali Pierce wakusiya munthukazi ndi ŵana 6, azuku kweniso azuku chivu. Iyu wakusiya so ŵanthu wo waŵasambizanga Baibolo. Mark Sanderson yo ŵateŵete so mu Wupu Wakulongozga ndiyu wangukamba nkhani ya maliru pa Chisulu, March 22, 2014. Pa fundu zakupambanapambana zo wangukamba m’nkhani yaki, wangukamba so va chilindizga cha M’bali Pierce. Iyu wanguŵerenga mazu ngaku Yesu ngakuti: “Munyumba ya Ada mwe malu nganandi ngakujamu. . . . Asani ndaruta ndi kukurongosoliyani malu, ndituza so, ndipu ndazamkukutoriyani kwaku ndamweni; alinga kuti ko nde ini, namwi so muŵi kweniko. Ndipu ko nditiya, muziŵa nthowa.”Yoh. 14:2-4.

Kukamba uneneska timuluwengi cha M’bali Pierce. Kweni tikondwa kuti wanguyiziŵa nthowa yakulutiya ‘kumalu ngakujaku’ ngamuyaya.