Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  October 2014

Mwazamuja Ufumu wa Asembi

Mwazamuja Ufumu wa Asembi

“Mukaŵanga ufumu wa azukuru [asembi, NW] ŵangu ndi mtundu wakupaturika wangu.”CHIT. 19:6.

1, 2. Kumbi mbewu ya munthukazi yakhumbikanga kuyivikiliya wuli, nanga nchifukwa wuli?

UCHIMI wakwamba wo ukulembeka m’Bayibolo ngwakukhumbika ukongwa chifukwa utovya kuti chilatu chaku Yehova chifiskiki. Pa nyengu yo wangukambiya layizgu laki mu Edene, Chiuta wauneneska wangukamba kuti: “Ndikaŵikangapu umawongu pakati paku [Satana, NW] ndi munthukazi, ndi pakati pa mphapu yaku ndi mphapu yaki.” Kumbi kutinkhana kwenuku kwatingi kuŵengi kukulu wuli? Yehova wangukamba kuti: “Iyu [mbewu ya munthukazi, NW] watemengi mutu waku [Satana], ndipu iwi utemengi chitendi chaki.” (Chiy. 3:15) Njoka ndi munthukazi atinkhana ukongwa mwakuti Satana wakhumbisiska kunanga mbewu ya munthukazi.

2 Ndichu chifukwa chaki munthu munyaki yo wangulembaku buku la sumu wangukamba mu rombu laki vakukwaskana ndi ŵanthu akusankhika aku Chiuta kuti: “Alereskani, arwani ŵinu ŵe mu chivurupi, ndipu wo atinkha imwi agaruka. Apangana wupu pa ŵanthu ŵinu muchibisibisi; apangirana pa ŵanthu wo imwi mutiŵavikiriya. Ŵatiti, ‘Zaninga,  tiyeni tipalanyi mtundu wawu.’” (Sumu 83:2-4) Ŵanthu wosi wo mwatingi mutuliyengi mbewu akhumbikanga kuvikilika kuti aleki kubayika ndipuso kufipiskika. Kuti ivi vifiskiki, Yehova wangupanga mapanganu ngo ngatingi ngawovyengi kuti chilatu chaki chifiskiki.

PHANGANU LO LAVIKILIYANGA MBEWU

3, 4. (a) Kumbi phanganu la Chilangulu likwamba zukwanji kugwira nchitu, nanga Ayisraele anguzomera kuchitanji? (b) Kumbi phanganu la Chilangulu lavikiliyanganji?

3 Ŵana aku Abrahamu, Yisake ndi Yakobe ŵati ayandana, Yehova wangupanga mtundu wasonu kutuliya mwaku yiwu ndipu wadanikanga kuti Yisraele wakali. Kuziya mwaku Mosese, Yehova wanguchita nawu phanganu lapade mwakuŵapaska Chilangulu ndipu mtundu wosi wa Ayisraele unguzomera kuti uvwiyengi phanganu lenili. Bayibolo likamba kuti: “[Mosese, NW] wanguto buku la chipanganu, ndi wanguliŵerenga mu makutu nga ŵanthu; ndipu yiwu ŵanguti, ‘Vosi vo Ambuya akamba tikachitanga, ndipu tikaŵanga ŵakuvwiya.’ Ndipu Mosese wanguto ndopa [za ŵana a ng’ombi zo angupereka sembi, NW] ndi wanguwaziya ku ŵanthu ndi wanguti, ‘Awonani ndopa za chipanganu cho ŵachita ndi imwi Ambuya kwakulingana ndi mazu yanga ngosi.’”Chit. 24:3-8.

4 Phanganu la Chilangulu lingwamba kugwira nchitu paphiri la Sinai mu 1513 B.C.E. Phanganu lenili linguchitiska kuti Ayisraele aje mtundu wapade waku Chiuta. Yehova wanguja ‘Mweruzgi wawu, Karonga wawu,’ ndipuso wanguŵapaska Chilangulu. (Yes. 33:22) Mbiri ya Ayisraele yilongo vo vachitikanga asani ŵanthu alondo fundu zaurunji zaku Chiuta pamwenga cha. Chifukwa chakuti Chilangulu chakanizganga Ayisraele kuti angatorananga ndi mitundu yinyaki cha kweniso kusopa angoza, chavikiliyanga mbewu yaku Abrahamu kuti yileki kufipiskika.Chit. 20:4-6; 34:12-16.

5. (a) Kumbi phanganu la Chilangulu latingi liŵawovyengi wuli Ayisraele? (b) Nchifukwa wuli Chiuta wanguŵakana?

5 Phanganu la Chilangulu linguwovya so kuti paje asembi wo amiyanga vinthu vo vatingi vizichitikengi kunthazi. (Ŵah. 7:11; 10:1) Kweni phanganu ili latingi liwovyengi Ayisraele kuti aje mafumu ndipuso asembi pijapija asani anguvwiya marangu ngaku Yehova. (Ŵerengani Chituwa 19:5, 6.) Kweni yiwu angutondeka kuvwiya. M’malu mwakukondwa ndi kuza kwaku Mesiya yo nchigaŵa chakwamba cha mbewu yaku Abrahamu, yiwu angumukana. Pakumaliya paki, Chiuta nayu wanguwukana mtundu wenuwu.

Phanganu la Chilangulu lingutondeka cha kufiskika chifukwa cha kuleka kuvwiya kwa Ayisraele (Wonani ndimi 3-6)

6. Kumbi Chilangulu chingufiskanji?

6 Chilangulu chingutondeka cha kufiska chilatu chaku Yehova chakuti ŵanthu anyaki aje ufumu wa asembi chifukwa cha kuleka kuvwiya kwa Ayisraele. Chilangulu chavikiliyanga  mbewu ndipuso kuwovya ŵanthu kuti aziŵi Mesiya. Chilatu chenichi chingufiskika pa nyengu yo Khristu wanguziya ndipuso ŵanthu ŵati amuziŵa. Bayibolo likamba kuti: “Khristu mbumari wa [Chilangulu, NW].” (Ŵar. 10:4) Kweni pe fumbu lo tingajifumba lakuti: Nanga mbayani wo atingi aŵengi ndi mwaŵi wakuja mafumu ndipuso asembi? Yehova Chiuta wangupanga phanganu linyaki kuti wasankhi mtundu wasonu.

KWAMBA KWA MTUNDU WASONU

7. Kumbi Yehova wangumukambiyanji Yeremiya vakukwaskana ndi phanganu lifya?

7 Phanganu la Chilangulu lechendamali, Yehova wangukambiya limu kuziya mwa mchimi Yeremiya kuti wachitengi “phanganu lifya” ndi mtundu wa Ayisraele. (Ŵerengani Yeremiya 31:31-33.) Phanganu lenili lakhumbikanga kupambana ndi phanganu la Chilangulu chifukwa latingi liwovyengi kuti ŵanthu agowokereki maubudi ngawu kwambula sembi za nyama. Kumbi venivi vatingi vichitikengi wuli?

8, 9. (a) Kumbi ndopa zo Yesu wangudira zititiwovya wuli? (b) Kumbi ŵanthu wo ŵe muphanganu lifya ŵe ndi mwaŵi wuli? (Wonani chithuzi cho che papeji 13.)

8 Pati pajumpha vyaka vinandi, Yesu wangwambisa Chakurya Chamazulu cha Ambuya pa Nisan 14, mu 33 C.E. Pakukonkhoske akusambira ŵaki 11 akugomezgeka vakukwaskana ndi kapu, Yesu wangukamba kuti: “Jomera lenili nchipanganu chifya mu ndopa zangu, zakudikiya pa chifukwa chaku imwi.” (Luka 22:20) Nkhani ya m’buku la Mateyu yikonkhoska vo Yesu wangukamba vakukwaskana ndi vinyu kuti: ‘Izi ndi “ndopa zangu za chipanganu” chifya, zakudikiya pa chifukwa cha ŵanandi kuti agowokereki ubudi wawu.’Mat. 26:27, 28.

9 Phanganu lifya lingwamba kugwira nchitu kutuliya po ndopa zaku Yesu zingudikiya. Ndopa zenizi zitovya kuti Yehova wagowokiyengi ŵanthu maubudi ngawu mpaka muyaya. Yesu we muphanganu lifya cha chifukwa chakuti ngwambula kunanga. Mwaviyo, iyu wakhumbika kugowokereka cha. Kweni Chiuta wagwiriskiya nchitu ndopa zaku Yesu kuti wataski ŵana aku Adamu. Iyu wagwiriskiya nchitu mzimu waki wakupaturika kuti wasankhi ŵanthu anyaki akujipereka kuti aje “ŵana” ŵaki. (Ŵerengani Ŵaroma 8:14-17.) Chifukwa chakuti Chiuta watiŵawona kuti mbambula kalema, yiwu aja nge Yesu yo ndi Mwana waku Chiuta wambula kunanga. Akhristu akusankhika ŵenaŵa amuwusiya limoza ndi Khristu ndipu ŵe ndi mwaŵi wo mtundu wa Ayisraele wo alondonga Chilangulu atingi aŵengi nawu wakuja mafumu ndipuso asembi. Wakutumika Petro wangukamba za Akhristu ŵenaŵa kuti: “Ndimwi fuku lakusankhika, uzukuru waufumu, mtundu wakupaturika, khamu lapamtima waki, viyo kuti mutaulengi maumampha ngaku mweniyo wangumudanani mumdima kuyiya ku ukweru waki wakuziziswa.” (1 Pet. 2:9) Mwaviyo, phanganu lifya ndakukhumbika ukongwa chifukwa litovya akusambira aku Yesu kuti aje chigaŵa chachiŵi cha mbewu yaku Abrahamu.

PHANGANU LIFYA LITAMBA KUGWIRA NCHITU

10. Kumbi phanganu lifya lingwamba zukwanji kugwira nchitu, nanga nchifukwa wuli lingwamba nyengu yeniyo?

10 Kumbi phanganu lifya lingwamba zukwanji kugwira nchitu? Lingwamba pa nyengu yo Yesu wangulikambiya cha. Kuti liyambi kugwira nchitu, Yesu wakhumbikanga kudira ndopa zaki, kuluta kuchanya kuti wakakambiyi Yehova kuti wadira ndopa zaki ndipuso kupereka mzimu wakupaturika kwa Akhristu wo wamuwusa nawu. Mwaviyo, phanganu lifya lingwamba kugwira nchitu pa Pentekoste wa mu 33 C.E. po akusambira aku Yesu angusankhika ndi mzimu wakupaturika.

11. Kumbi phanganu lifya linguwovya wuli Ayuda ndipuso ŵanthu ambula kudumulika kuti aje chigaŵa cha Yisraele wauzimu, ndipu mbalinga wo ŵe muphanganu lenili?

 11 Phanganu la Chilangulu lingumala nthazi Yehova wati wakambiya Yeremiya kuti wachitengi phanganu lifya ndi Yisraele kweni linguzileke limu kugwira nchitu, phanganu lifya lati layamba kugwira nchitu. (Ŵah. 8:13) Mwaviyo, Chiuta wangwamba kuwona Ayuda ndipuso ŵanthu ambula kudumulika kuti mbakuyanana chifukwa ‘mchinju wawu ngwa mtima kuporote mu mzimu’ ndipu ngwa m’marangu ngakulembeka cha. (Ŵar. 2:29) Chiuta wati wachita nawu phanganu lifya, iyu wanguŵika marangu “mu vinjeru vawu” ndipuso wangungalemba “pa mitima yawu.” (Ŵah. 8:10) Ŵanthu wo ŵe muphanganu lifya akwana 144,000 ndipu apanga mtundu wasonu wo ndi “Yisraele yo waku Chiuta” pamwenga kuti Yisraele wauzimu.Ŵag. 6:16; Chiv. 14:1, 4.

12. Kumbi phanganu la Chilangulu lipambana wuli ndi phanganu lifya?

12 Kumbi phanganu la Chilangulu lipambana wuli ndi phanganu lifya? Phanganu la Chilangulu lenga pakati paku Yehova ndi Yisraele wakuliŵavu, po phanganu lifya le pakati paku Yehova ndi Yisraele wauzimu. Mosese wenga mwendapakati wa phanganu lakali kweni Yesu ndiyu Mwendapakati wa phanganu lifya. Phanganu la Chilangu lagwiranga nchitu chifukwa cha ndopa za nyama, po phanganu lifya lingwamba kugwira nchitu chifukwa cha ndopa zaku Yesu. Yisraele wakuliŵavu walongozgekanga ndi Chilangulu chaku Mosese, kweni wo ŵe muphanganu lifya alongozgeka ndi Yesu yo ndi Mutu wa mpingu.Ŵaef. 1:22.

13, 14. (a) Kumbi phanganu lifya likoliyana wuli ndi Ufumu? (b) Nchinthu wuli cho chikhumbika kuti Yisraele wauzimu wakawusiyi limoza ndi Khristu kuchanya?

13 Phanganu lifya likoliyana ndi Ufumu chifukwa chakuti lipanga mtundu wakupaturika wo we ndi mwaŵi wakuja mafumu ndipuso asembi mu Ufumu wakuchanya. Mtundu wenuwu ndiwu chigaŵa chachiŵi cha mbewu yaku Abrahamu. (Ŵag. 3:29) Mwaviyo, phanganu lifya lifiska phanganu laku Abrahamu.

14 Kweni pe chigaŵa chinyaki cha Ufumu cho chechendafiskiki. Phanganu lifya lipanga Yisraele wauzimu ndipu litovya kuti ŵanthu wo ŵe muphanganu lenili akawusiyi limoza ndi Khristu. Mwaviyo, pakhumbika phanganu linyaki kuti akaje mafumu ndipuso asembi limoza ndi Yesu mu Ufumu waki kuchanya.

PHANGANU LO LITOVYA KUTI ANYAKI AKAWUSI NDI KHRISTU

15. Kumbi ndi phanganu nili lo Yesu wanguchita ndi akusambira ŵaki?

15 Yesu wati wayambisa mwambu wa Chakurya cha Mazulu cha Ambuya, wanguchita phanganu ndi akusambira ŵaki. Phanganu lenili lidanika kuti, phanganu la Ufumu. (Ŵerengani Luka 22:28-30.) Phanganu ili lipambana ndi nganyaki chifukwa Yehova walimu m’mapanganu nganyaki ngosi, kweni ili nda pakati paku Yesu ndi Akhristu akusankhika pe. Iyu wati wakamba kuti “uli ndimo Ada akumikiya ini,” Yesu wang’anamuwanga phanganu lo Yehova wanguchita ndi iyu kuti waje wasembi mpaka muyaya nge Melkizedeke.Ŵah. 5:5, 6.

16. Kumbi phanganu la Ufumu laŵawovya wuli Akhristu akusankhika?

16 Akusambira 11 aku Yesu ‘angujaririya pamoza nayu mu mesedu ngaki.’ Phanganu la Ufumu laŵasimikizgiyinga kuti amuja ndi iyu kuchanya ndipu amuja pamipandu yachifumu kuti akawusi nge mafumu kweniso kuchiteŵete nge asembi. Kweni ŵenga 11 pe cha wo atingi aŵengi ndi mwaŵi wenuwu. Yesu wanguwoneke wakutumika Yohane muchiwona ndipu wangukamba kuti: “Yo wapunda ndimpaskengi kwachija pamoza nani pachitengu changu chaufumu uli ndimo ini nani ndikupundiya, ndipu ndija pasi pamoza ndi Ada pachitengu  chawu chaufumu.” (Chiv. 3:21) Mwaviyo, Akhristu akusankhika a 144,000 ndiwu ŵe muphanganu la Ufumu. (Chiv. 5:9, 10; 7:4) Phanganu lenili ndilu litiŵawovya kuti akawusi limoza ndi Yesu kuchanya. Ivi viyanana ndi munthukazi yo watorana ndi fumu, nayu waja so ndi mazaza ngakuwusa. Ndichu chifukwa chaki Malemba ngakamba kuti Akhristu akusankhika ŵe nge “muwolu” waku Khristu, “mwali” yo wangukambika kuti watoranengi nayu.Chiv. 19:7, 8; 21:9; 2 Ŵakor. 11:2.

MUWUGOMEZGENGI UKONGWA UFUMU WAKU CHIUTA

17, 18. (a) Konkhoskani mapanganu ngo takambiskana ngakukwaskana ndi Ufumu. (b) Nchifukwa wuli tikhumbika kuwugomezga ukongwa Ufumu?

17 Mapanganu ngosi ngo takambiskana m’nkhani ziŵi izi ngakoliyana ukongwa ndi chigaŵa chimoza pamwenga vinandi va Ufumu. (Wonani tchati chamutu wakuti, “Mo Chiuta Wazamufiskiya Chilatu Chaki” cho che munkhani yajumpha.) Fundu iyi yilongo kuti Ufumu ukujalikiskika ndi mapanganu. Mwaviyo, te ndi chifukwa chakuvwika chakugomezge ukongwa Ufumu waku Chiuta wo Yesu wazamuwusa. Ufumu wenuwu ndiwu so Chiuta wagwiriskiya nchitu kuti wafiski chilatu chaki chakukwaskana ndi charu chapasi kweniso ŵanthu.Chiv. 11:15.

Yehova wagwiriskiyengi nchitu Ufumu waki kuti wafiski chilatu chaki chakukwaskana ndi charu chapasi (Wonani ndimi 15-18)

18 Kumbi tingakayikiya kuti vo Ufumu uchita viwovyengi ŵanthu kuti azilonde vitumbiku vamuyaya? Chifukwa chakuti te ndi chigomezgu chakukho, titenere kupharazga kuti Ufumu waku Chiuta ndiwu wija wo ungamaliska masuzgu ngosi ngo ŵanthu akumana nangu. Mwaviyo, tiyeni tipharazgengi mwaphamphu uneneska wenuwu!Mat. 24:14.