Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  October 2014

Kumbi Mukondwa Kuti Mugwira Nchitu ndi Yehova?

Kumbi Mukondwa Kuti Mugwira Nchitu ndi Yehova?

“Te ŵanchitu ŵanasi ŵaku Chiuta.”1 ŴAKOR. 3:9.

1. Kumbi Yehova watiyiwona wuli nchitu yo wagwira nanga venivi vitimuchitiska kuti wachitenji?

YEHOVA wakondwa ndi nchitu yo wagwira. (Sumu 135:6; Yoh. 5:17) Kuti angelu nawu akondwengi, Iyu wanguŵapaska nchitu yamampha ndipuso yakukondwesa. Mwakuyeruzgiyapu, iyu wangugwira nchitu yakulenga limoza ndi Mwana waki. (Ŵerengani Ŵakolose 1:15, 16.) Bayibolo likamba kuti Yesu wechendazi pacharu chapasi, wenga pamoza ndi Chiuta kuchanya nge “kapitawu wa nchitu.”Nthanthi 8:30.

2. Kumbi ndi vinthu wuli vo vilongo kuti angelu apaskika nchitu yamampha?

2 Kutuliya kukwamba mpaka kukumaliya, Bayibolo le ndi vakuwoniyapu vo vilongo kuti Yehova wapaskanga nchitu angelu. Adamu ndi Eva ŵati ananga ndipuso ŵati adikiskika m’munda wa Edene, Chiuta “wanguŵikaku ŵa Kerubi, ndi lipanga lakulipuka lo lang’anamukiyanga kosi kosi, kuvikiriya nthowa yakuya ku muti wa umoyu.” (Chiy. 3:24) Kweniso lemba la Chivumbuzi 22:6 likamba kuti “watuma mungelu waki kuŵalongo ŵaŵanda ŵaki venivo vitenere kuŵapu liŵi.”

 ŴANTHU NAWU ANGUPASKIKA NCHITU

3. Kumbi Yesu wangulondo wuli chakuwoniyapu cha Awiski weche pacharu chapasi?

3 Yesu weche pacharu chapasi, wagwiranga nchitu yo Yehova wangumupaska. Iyu wangulondo chakuwoniyapu chamampha cha Awiski ndipu wangupaska akusambira ŵaki nchitu yakuti agwirengi. Wanguŵawovya kuti aziŵi vo angafiska ndipu wanguŵakambiya kuti: “Nadidi ndikuneneskiyani, wakuvwana mwaku ini, nchitu zo ini ndichita, wachitengi iyu nayu; ndipu zikuru zakuzungura izi wakachitanga; chifukwa ini nditiya ku Dada.” (Yoh. 14:12) Iyu wanguŵakambiya so kuti nchitu iyi yikhumbika kugwirika mwaliŵi ndipu wanguti: “Titenere kuzitata nchitu za Wakundituma, kweche msana: kutuza usiku, penipo palivi yumoza waziŵa kutata nchitu.”Yoh. 9:4.

4-6. (a) Nchifukwa wuli tikhumbika kuwonga kuti Nowa ndi Mosese angufiska nchitu yo Yehova wanguŵapaska? (b) Kumbi nchitu zosi zo Chiuta wapaska ŵanthu ziyanana wuli?

4 Chinanga mphanyengu yo Yesu wenga wechendazi pacharu chapasi, ŵanthu anyaki angupaskika nchitu. Yiwu angugwira nchitu mo Chiuta wakhumbiyanga chinanga kuti Adamu ndi Eva angutondeka. (Chiy. 1:28) Nowa wangupaskika ulongozgi wa mo wangakhome chingaraŵa kuti vamoyu vileki kufwa pa Zandi. Iyu wanguchita nadi vosi vo Yehova wangumukambiya. Tiwonga ukongwa kuti wanguvwiya. Ndichu chifukwa chaki te ndi umoyu sonu.Chiy. 6:14-16, 22; 2 Pet. 2:5.

5 Mosese wangupaskika so ulongozgi wa mo wakhumbikiyanga kuzenge chihema ndipuso kunozga kuti paje asembi. Iyu wanguvwiya ulongozgi wenuwu. (Chit. 39:32; 40:12-16) Sonu napu tiyanduwa chifukwa chakuti wangugwira mwakugomezgeka nchitu yo wangupaskika. Kumbi tiyanduwa wuli? Wakutumika Paulo wangukamba kuti vinthu vo vikulembeka mu Chilangulu vamiyanga vinthu “vamampha vo” vatingi vizichitikengi kunthazi.Ŵah. 9:1-5, 9; 10:1.

6 Nchitu yo Chiuta wapaska ateŵeti ŵaki yisintha nyengu ndi nyengu kuti chilatu chaki chifiskiki. Nchitu yawu yitumbika Yehova kweniso yitovya ŵanthu akugomezgeka. Ivi viyanana ndi vo Yesu wanguchita pacharu chapasi kweniso kuchanya, wechendazi pacharu chapasi. (Yoh. 4:34; 17:4) Mwakuyana ŵaka, nchitu yo nasi tapaskika yitumbika Yehova. (Mat. 5:16; ŵerengani 1 Ŵakorinte 15:58.) Nchifukwa wuli tikamba viyo?

JANI NDI MAŴANAŴANU NGAMAMPHA PA NCHITU YINU

7, 8. (a) Konkhoskani nchitu yo Akhristu agwira mazuŵa nganu. (b) Kumbi tikhumbika kuchitanji ndi ulongozgi wo Yehova wapereka?

7 Vakukondwesa ukongwa kuti Yehova wazomerezga ŵanthu ambula kufikapu kuti agwirengi nayu nchitu. (1 Ŵakor. 3:9) Wo agwiraku nchitu yakuzenga malu nga unganu, Nyumba za Ufumu ndipuso maofesi nga nthambi agwira nchitu nge yo Nowa ndi Mosese agwiranga. Mukondwengi ndi nchitu yo mwapaskika, kaya munozga Nyumba ya Ufumu pamwenga muzenga likulu lidu mutawuni ya Warwick, ku New York. (Wonani chithuzi cho che papeji 23.) Wenuwu nawu mbuteŵeti wakupaturika. Kweni kupharazga ndiyu nchitu yikulu yo Mkhristu weyosi wakhumbika kugwira. Nchitu yeniyi nayu yitumbika Yehova ndipuso yitovya ŵanthu. (Mac. 13:47-49) Gulu laku Chiuta lipereka ulongozgi wa mo tingagwiriya umampha nchitu yeniyi. Ivi vingasazgapu kupempheka kuti tichiti uteŵeti unyaki.

8 Nyengu zosi ateŵeti aku Yehova akhumbisiska kuvwiya ulongozgi wo Yehova wapereka kuziya m’gulu laki. (Ŵerengani Ŵahebere 13:7, 17.) Pakwamba, tingavwisa cha ulongozgi wa mo tingagwiriya nchitu yinyaki yo tapaskika. Kweni tiziŵa kuti kukoliyana ndi Yehova pa vinthu vosi vo vasintha nkhwamampha ukongwa asani iyu wawona kuti mphakwenere nadi kusintha.

9. Kumbi ŵara alongo chakuwoniyapu wuli mumpingu?

 9 Vo ŵara achita mumpingu vilongo kuti akhumbisiska kuchita vo Yehova wakhumba. (2 Ŵakor. 1:24; 1 Ŵat. 5:12, 13) Yiwu agwira nchitu mwaphamphu ndipu ayesesa kulondo ulongozgi asani gulu lasintha vinthu. Achita ivi asani apaskika ulongozgi wasonu wakukwaskana ndi nchitu yakupharazga Ufumu. Panyaki pakwamba anyaki awopanga kupharazga pa foni, m’malu ngo mutuma sitima ndipuso m’malu ngo musanirika ŵanthu anandi kweni pavuli paki anguwona umampha waki. Mwakuyeruzgiyapu, apayiniya anayi a ku Germany akhumbanga kuchipharazga kumalu nga bizinesi ko kanandi kwapharazgikanga cha. Michael wangukamba kuti: “Tinguja vyaka vinandi techendachitepu uteŵeti uwu, mwaviyo, tachitanga mantha. Yehova wanguziŵa venivi, ndichu chifukwa chaki wangutiwovya kuti tichiti umampha uteŵeti. Tingukondwa ukongwa chifukwa chakuti tingulondo ulongozgi wa mu Uteŵeti Widu wa Ufumu ndipuso tathembanga Yehova kuti watiwovyengi.” Kumbi namwi mukhumbisiska kuti muyesi nthowa zasonu zakupharazgiya m’chigaŵa chinu?

10. Kumbi ndi vinthu wuli vo vasintha m’gulu laku Yehova?

10 Nyengu zinyaki pangakhumbika kusintha vinthu vinyaki m’gulu laku Yehova. Mwakuyeruzgiyapu, muvyaka vajumpha, maofesi nganyaki nga nthambi ngakusazgika pamoza. Chinanga kuti kusintha kwaviyo kungachitiska kuti abali ndi azichi wo ateŵetiyanga pa nthambi zenizi asinthi vinthu vinyaki pa umoyu, kweni wosi ataziwona umampha waki asani pajumpha nyengu. (Wak. 7:8) Vakukondwesa ukongwa kuti abali ndi azichi ŵenaŵa mbakukhumbisiska kugwiraku nchitu yeniyi. Ivi vitovya kuti mbiri ya ŵanthu aku Yehova yilutengi panthazi.

11-13. Kumbi ndi masuzgu nanga ngo anyaki akumana nangu chifukwa cha kusintha kwa vinthu m’gulu laku Yehova?

11 Tingasambira vinandi ku ŵanthu wo ateŵetiyanga m’nthambi zo zikusazgika. Anyaki mwa ŵanthu ŵenaŵa ateŵete kwa vyaka vinandi m’nthambi zenizi. Banja linyaki lo lateŵetiyanga pa nthambi yimana ku Central America, lingupempheka kuti likateŵetiyengi ku banja la Beteli ku Mexico. Kwenuku kwe abali ndi azichi anandi ukongwa kuluska ko ateŵetiyanga kali mwakuti nthambi yawu yakali yaserengamu maulendu 30. Rogelio wangukamba kuti: “Venga vakusuzga ukongwa kusiya ŵanthu a m’banja lidu ndipuso mabwezi.” Juan, yo nayu wangupempheka kuti wakateŵetiyengi ku Mexico wangukamba kuti: “Vinguja nge kuti ndabalika kachiŵi chifukwa ndakhumbikanga kusaniya mabwezi nganyaki. Ndakhumbikanga so kuziŵiriya midawuku yakweniko kweniso kusintha vinthu vinyaki pa umoyu wangu.”

12 Abali wo ateŵetiyanga panthambi zinyaki ku Europe angupempheka kuti akateŵetiyengi panthambi ya ku Germany ndipu nawu angukumana ndi masuzgu. Anyaki wo ayanjanga mapiri ngakutowa nga ku Switzerland, akamba kuti venga vakusuzga nadi kusiya malu ngamampha nga mumphepeti mwa mapiri. Ndipuso wo ateŵetiyanga ku Austria anguleka umoyu wamampha wo ajanga kweniko.

13 Abali ndi azichi wo atachiteŵete panthambi za m’charu chinyaki, akhumbikanga kuziŵiriya malu ngasonu ngakugonamu, kugwira nchitu ndi abali ndipuso azichi wo atiŵaziŵa cha kweniso akhumbikanga kusambira nchitu yinyaki. Akhumbikanga so kusintha mwakukoliyana ndi mpingu wasonu kweniso chigaŵa chasonu chakupharazgaku. Ivi vingang’anamuwa kuti akhumbikanga kusambira so chineneru chinyaki. Kuchita venivi nkhwakusuzga ukongwa. Kweni abali anandi wo ateŵete pa Beteli akunthiyapu vosi ivi. Nchifukwa wuli achita viyo?

14, 15. (a) Kumbi abali ndi azichi anandi alongo wuli kuti akondwa kuti agwira nchitu ndi Yehova? (b) Kumbi isi tisambiranji kwa abali ndi azichi ŵenaŵa?

14 Grethel wangukamba kuti: “Ndinguzomera kuti ndiluti ku Beteli yinyaki chifukwa  yenga nthowa yakulongore kuti nditanja Yehova kuluska nthambi ya m’charu cho ndateŵetiyanga.” Dayska nayu wangukamba kuti: “Ndinguwona kuti Yehova ndiyu watindikambiya kuti ndikateŵetiyengi ku charu chinyaki. Ndichu chifukwa chaki ndinguzomera ndi mtima wosi kuti ndiluti.” André ndi Gabriela angukamba kuti: “Tinguwona kuti uwu ndi mwaŵi ukulu wakuti titeŵete Yehova mwakuleka kuŵika vakukhumba vidu panthazi. Tinguwona so kuti, ‘Takhumbikanga kulondo ko mphepu yaku Yehova yaputiyanga, m’malu mwakuluta ko yatuwanga.’”

Te ndi mwaŵi ukulu ukongwa wakugwira nchitu yaku Yehova!

15 Asani nthambi zasazgika, abali ndi azichi anyaki apempheka kuti akachitengi upayiniya. Ivi ndivu vinguchitikiya abali ndi azichi anyaki pa nyengu yo nthambi ya ku Denmark, Norway, ndi ya ku Sweden zingusazgika kuja nthambi yimoza ya Scandinavia. Florian ndi Anja ŵenga pa gulu lenili ndipu angukamba kuti: “Tiwona kuti uteŵeti wo tichita sonu ngwamampha ukongwa. Tiwona so kuti nchinthu chamampha ukongwa kuti Yehova watigwiriskiyengi nchitu kwekosi ko iyu wangakhumba kuti tikateŵete. Tisimikizga kuti Yehova watitumbika ukongwa!” Chinanga kuti tanyaki aku isi tingasintha cha nge mo abali ndi azichi yaŵa achitiya kweni tikhumbika kulondo chakuwoniyapu chawu chamampha pakujipereka kuti alutiski panthazi vinthu va Ufumu. (Yes. 6:8) Nyengu zosi Yehova watumbika wosi wo akondwa kuti agwiriya nayu nchitu limoza kwekosi ko wangaŵatuma.

LUTIRIZGANI KUKONDWA KUTI MUGWIRA NCHITU LIMOZA NDI YEHOVA

16. (a) Kumbi lemba la Ŵagalatia 6:4 likamba kuti tichitengenji? (b) Kumbi ndi nchitu wuli yakukhumbika ukongwa yo munthu weyosi wangagwira?

16 Ŵanthu ambula kufikapu atanja kujiyeruzgiya ndi anyawu. Kweni Mazu Ngaku Chiuta ngatitikambiya kuti tikhumbika kuŵika maŵanaŵanu pa vo tingafiska. (Ŵerengani Ŵagalatia 6:4.) Tanandi aku isi tilivi maudindu m’gulu laku Yehova. Kweniso ndi tosi cha tingaja apayiniya, amishonale pamwenga kuteŵete pa Beteli. Kukamba uneneska, yanga nangu ndi mauteŵeti ngamampha. Kweni tingaluwanga cha kuti tosi tichita uteŵeti wakukhumbika ukongwa, wakugwira  nchitu yakupharazga limoza ndi Yehova. Mwaviyo, tikhumbika kukondwa ndi uteŵeti wenuwu.

17. Kumbi ndi vinthu wuli vo tingatondeka kuchita po te m’charu chaku Satana, kweni nchifukwa wuli venivi vitenere cha kutiguŵiska?

17 Chifukwa chakuti teche m’charu chaku Satana tingatondeka kuchita mauteŵeti nganyaki. Tingakhumbika kuphwere banja lidu, umoyu widu ndipuso vinthu vinyaki. Kweni ivi vingatiguŵiskanga cha. Lekani kujiwona kuti palivi cho muchitapu pa nchitu yo mugwiriya limoza ndi Chiuta yakuchitiya ukaboni zina laki ndipuso kuwovya ŵanthu kuti aziŵi Ufumu waki. Chinthu chakukhumbika ukongwa nchakuti mugwira nchitu ndi Yehova mwakukoliyana ndi mo vinthu viliri pa umoyu winu kweniso kuti muromba kwaku Chiuta kuti watumbiki abali wo achita vinandi kuluska imwi. Mutenere kukumbuka kuti munthu weyosi yo wathamika zina laki, Yehova watimuwona kuti ngwakuzirwa ukongwa!

18. Kumbi ndi vinthu wuli vo tikhumbika cha kuŵika panthazi?

18 Yehova wakondwa kuti tigwirengi nayu nchitu chinanga kuti te ambula kufikapu. Titenere kukondwa ukongwa kuti tigwira nchitu limoza ndi Chiuta m’mazuŵa nganu ngakumaliya. Mwaviyo, titenere kuteŵete Yehova m’malu mwakuŵika vakukhumba vidu panthazi chifukwa Yehova wazakutitumbika mwakutipaska ‘umoyu weniweni,’ wo mbumoyu wamuyaya m’charu chifya. M’charu ichi ŵanthu azamujanga mwakukondwa kweniso mwazamukuŵa chimangu.1 Tim. 6:18, 19.

Kumbi mukondwa ndi uteŵeti wo muchita? (Wonani ndimi 16-18)

19. Kumbi ndi vinthu wuli vo Yehova watilayizga kunthazi?

19 Chifukwa chakuti te pafupi kusere m’charu chifya, tiyeni tiŵanaŵaniyengi vo Mosese wangukambiya Ayisraele kwati kwaja nyengu yimanavi kuti asere M’charu Chakulayizgika. Iyu wangukamba kuti: “Ambuya Chiuta winu wakamusakatiskaningi kwakuzara mu nchitu yosi ya janja linu.” (Mar. 30:9) Pavuli pa Aramagedoni, ŵanthu wosi wo ayesesa kugwira nchitu ndi Chiuta azamuhara charu cho wakuŵalayizga. Pavuli paki, tazamugwira nchitu yinyaki yakunozga charu kuti chije paradayisu.