Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  September 2014

Vo Akuŵerenga Afumba

Vo Akuŵerenga Afumba

Kumbi mazu ngaku Davidi ngo nge pa Sumu 37:25 ndipuso ngaku Yesu pa Mateyu 6:33 ngalongo kuti Yehova wazomerezgengi cha kuti Mkhristu wasuzgikengi ndi nja?

Davidi wangukamba kuti: ‘Ndilivi kuwona kuti murunji wasiyika pamwenga ŵana ŵaki achipempha chakurya.’ Iyu wangukamba viyo chifukwa cha vo vingumuchitikiya. Ndipu waziŵanga kuti Chiuta waphwere ateŵeti ŵaki nyengu zosi. (Sumu 37:25) Mwaviyo, mazu ngaku Davidi ngang’anamuwa kuti ateŵeti aku Chiuta alekengi cha kusoŵa vinthu vakukhumbika pa umoyu.

Nyengu zinyaki, Davidi nayu wasuzgikanga kuti wasaniyi chakurya. Mwakuyeruzgiyapu, iyu wangukumana ndi suzgu yeniyi po wathaŵanga Sauli. Chakurya chaku Davidi chingumala ndipu wangupempha chiŵandi kuti iyu ndi ŵanthu ŵaki ŵaryi. (1 Sam. 21:1-6) Yapa, Davidi nayu wapenjanga ‘chakurya.’ Chinanga kuti wangukumana ndi suzgu yeniyi, waziŵanga kuti Yehova wamuwovyengi. Kukamba uneneska, palivi po tiŵerenga kuti Davidi wapemphangapemphanga chakurya kuti waleki kufwa ndi nja.

Pa Mateyu 6:33, Yesu watitisimikizgiya kuti Chiuta waphwere ateŵeti ŵaki akugomezgeka wo aŵika panthazi vinthu va Ufumu pa umoyu wawu. Iyu wangukamba kuti: “Kweni [penjani] dankha Ufumu waku Chiuta ndi urunji waki, ndipu venivo vosi [nge chakurya, maji ndi vakuvwala, NW] vikuskikiyengeku kwaku imwi.” Kweni Yesu wangukamba so kuti “abali” ŵaki akhoza kuzija ndi nja chifukwa chakutombozgeka. (Mat. 25:35, 37, 40) Ivi ndivu vinguchitikiya wakutumika Paulo. Nyengu zinyaki, wajanga ndi nja ndipuso wasoŵanga maji.2 Ŵakor. 11:27.

Yehova wakamba kuti titombozgekengi munthowa zakupambanapambana. Iyu wangazomerezga kuti tikumani ndi masuzgu kuti timuki vo Diabolo watimumba mulandu. (Jobu 2:3-5) Mwakuyeruzgiyapu, Abali ŵidu anyaki wo anguŵikika mujeri mu nyengu ya chipani cha Nazi, angukumana ndi masuzgu nganandi chifukwa cha kutombozgeka ndipuso kusoŵa chakurya. Iyi yenga nthowa yimoza yo Diabolo wagwiriskiyanga nchitu kuti aleki kuvwiya Yehova. Abali ŵenaŵa angulutirizga kuvwiya Yehova ndipu iyu wanguŵataya cha. Iyu wanguzomerezga kuti akumani ndi masuzgu ngenanga nge mo Akhristu anyaki wosi akumaniyana ndi masuzgu ngakupambanapambana. Kweni Yehova watovya wosi wo asuzgika chifukwa cha zina laki. (1 Ŵakor. 10:13) Mungachita umampha kukumbuka mazu nga pa Ŵafilipi 1:29. Lemba ili likamba kuti: “Kwaku imwi kwapaskika kwawezi pa chifukwa chaku Khristu kuvwaniya mwaki pe cha, kweni so kukomwe pa chifukwa chaku iyu.”

Yehova walayizga kuti wawovyengi ateŵeti ŵaki. Mwakuyeruzgiyapu, lemba la Yesaya 54:17 likamba kuti: “Palivi chidya cho chapangikiya paku iwi chikachitanga kanthu.” Layizgu lenili kweniso nganyaki ngachitiska ŵanthu wosi aku Chiuta nge gulu kuziŵa kuti waŵavikiliyengi. Kweni Mkhristu weyosi wakhoza kukumana ndi masuzgu ngo ngangachitiska kuti wafwi.