Julani

Lutani pa vo ve mukati

Milford Sound

 ŴANTHU NDIPUSO VYARU

Charu cha New Zealand

Charu cha New Zealand

VYAKA pafupifupi 800 vajumpha, ŵanthu a mtundu wa Maori angwenda ulendu utali ukongwa. Ŵanthu yaŵa atenere kuti atuwanga ku vilwa va ku Polynesia, ndipu anguchija ku New Zealand. Kwenuku, angusaniya malu ngo ngapambana ukongwa ndi ku Polynesia ko angutuwa. Ku New Zealand, kwe mapiri, ma ayisi ngo ngatenda kamanakamana, maji ngakotcha ngo ngatuwa pasi kweniso kusanirika maji ngakukhoma ngo ngatuwa kuchanya. Pati pajumpha vyaka pafupifupi 500, ŵanthu anyaki a ku Europe angusamiya so m’charu chenichi. Mazuŵa nganu, ŵanthu anandi a m’charu cha New Zealand alondo midawuku yosi yiŵi ya ŵanthu wo angutuwa ku Europe pamwenga kuti a mtundu wa Anglo-Saxon ndipuso ya ŵanthu wo angutuwa ku vilwa va Polynesia. Ŵanthu anandi a ku New Zealand aja mumatawuni. Likulu la charu chenichi ndi tawuni ya Wellington. Tawuni yeniyi yipambana ndi matawuni nga vyaru vinyaki pacharu chosi chifukwa ndi tawuni yija yikulu yo yisanirika kumwera ukongwa.

Vimaba vakotcha vo visanirika ku North Island

 Chinanga kuti tawuni yeniyi ye kwakuyija, kweni kwe vimiti, maluŵa ndi vinthu vinyaki vakutowa ukongwa. Venivi vichitisa kuti chaka chechosi, ku New Zealand kulutengi ŵanthu pafupifupi 3 miliyoni akutuwa muvyaru vinyaki kuti akawoni malu.

Chimiti cha ponga chingakuwa kujumpha mamita 10

Mu chaka cha 1948, ndipu ŵanthu anguleke kugomezga kuti viyuni va takahe vo vileka kuphululuka vikumala

Ku New Zealand kusanirika mitundu yakupambanapambana ya vinyama. Kuphara charu chinyaki chechosi, ku New Zealand kwe mitundu yinandi ya viyuni vo vileka kuphululuka. Kwe so nyama zo ziyanana ndi bomphu ndipu zingaja ndi umoyu kwa vyaka 100. Mazuŵa nganu, mu charu ichi mwe waka mitundu yimanavi ya nyama zo zikuleka kutuwa mu vyaru vinyaki nge akasusa kweniso somba za whale ndi dolphin.

Akaboni aku Yehova aja achipharazga m’charu cha New Zealand kwa vyaka pafupifupi 120. Yiwu asambiza ŵanthu Bayibolu mu vineneru pafupifupi 19 kusazgapu vineneru va ku Polynesia nge Chinyu, Chirarotongani, Chisamoa, ndi Chitongani.

Ŵanthu a mtundu wa Maori avwala vakuvwala vakwawu ndipu atumba sumu