Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Jani Masu!  |  Na. 5 2017

Tawuni ya Astana

 ŴANTHU NDIPUSO VYARU

Charu Cha Kazakhstan

Charu Cha Kazakhstan

KALI ŵanthu a ku Kazakhstan ajanga umoyu wakusamasama. Kweni mazuŵa nganu aliska a viŵetu ndiwu asamasama kuti asaniyi uteka wakuryiska viŵetu vawu. Muchihanya, yiwu ndi viŵetu vawu asamiya kumapiri ko kuja uteka wamampha ndipuso ko kuzizira ukongwa. Asani chipwepwi chayamba, yiwu aweku kumapiri, ndipu asikiya kumalu ngakusika ko kufunda.

Ŵanthu anyaki a ku Kazakhstan aja mumatawuni ngakutukuka. Kweni midawuku yawu, vakurya kweniso vinthu vinyaki vo aŵika munyumba zawu vilongo nadi kuti ŵanthu a ku Kazakhstan asamangasamanga. Yiwu ŵe ndi ndakatulu ndi sumu. Agwirisiya ntchitu vipangizu vakupanga pamanja pakumba sumu zinyaki. Vinthu venivi akutole kwa apapi ŵawu akali.

 M’charu ichi, ŵanthu atanja kuzenga nyumba zakuzunguliya zo zija nge tenti. Nyumba izi zilongo kuti ŵanthu ŵenaŵa ananga chilengedu cha. Mazuŵa nganu, aliska a mbereri ndiwu atanja kuzenga nyumba zenizi. Ŵanthu wo aja mumatawuni nawu atizigwirisiya ntchitu asani ŵe ndi vakuchitika vapade. Ŵanthu akutuwa ku vyaru vinyaki wo atuza kuziwona malu, agona mu nyumba zenizi. Mkati mwaki muja vinthu vinandi vakutowa vo anthukazi aluka.

Mkati mwa nyumba yakuzunguliya yo yiwoneka nge tenti

Ŵanthu a ku Kazakhstan wo aja kumizi atanja kuŵeta mahachi. M’charu ichi, mahachi nge ndi mazina pafupifupi 21 ndipu zina lelosi le ndi vo ling’anamuwa. Kweniso kwe mazu ngakujumpha 30 ngo ngakonkhosa mtundu wa hachi. Hachi yambula kutamatama yija yakudula ukongwa ndipu ŵeneku atiyiwona kuti njakukhumbika ukongwa. Kumizi, anyamata asambira kwendesa hachi ŵeche anamana.

Ŵanthu a ku Kazakhstan atanja nyama, kweni atanja cha kudaku masipayisi pamwenga kuti vakunowese dendi. Yiwu atanja kumwa koumiss yo we ndi mavitamini nganandi kweniso shubat yo wanthyanthyama. Koumiss wapangika kutuliya ku mkaka wa hachi ndipu Shubat wapangika kutuwa ku mkaka wa ngamila.

Ofesi ya Akaboni aku Yehova ye ku Almaty ndipu weyosi ngwakulondereka kuluta kuti wakawoni malu.

Muchihanya, mitundu yinyaki ya nyalubwi yija kumapiri nga ku Kazakhstan ko kuzizira ukongwa