Julani

Lutani pa vo ve mukati

Vo Mungachita Kuti Mulekengi Kusuzgika Maŵanaŵanu

Vo Mungachita Kuti Mulekengi Kusuzgika Maŵanaŵanu

Bayibolu litititcheŵeska kuti tingajanga ndi maŵanaŵanu ngaheni cha kweni tijengi ndi maŵanaŵanu ngamampha.

KUKWIYA

FUNDU YA M’BAYIBOLU: “Munthu yo waleka kukwiya liŵi ngwamampha kuluska munthu wanthazi.”​—Nthanthi 16:32.

VO FUNDU IYI YING’ANAMUWA: Tiyanduwa ukongwa asani tija ndi jalidu lakujiko. Chinanga kuti tosi tingakwiya nyengu zinyaki pa vifukwa vakwenere, kweni kuleka kuweza ukali widu kungayambisa masuzgu. Asani munthu wakwiya wangakamba pamwenga kuchita vinthu vinyaki kwambula zeru, vo pavuli paki wangadandawula navu.

VO MUNGACHITA: Mungazomerezanga cha kuti ukali ukulamuliyeningi. Ŵanthu anyaki aŵanaŵana kuti ŵanthu wo mbakali ndiwu ŵe ndi nthazi kweni ziŵani kuti ukali ndi nthazi cha. Bayibolu likamba kuti: “Munthu wambura kujiko we nge tawuni yo yabwangandulika ndipu yajowoleka kwambula mpanda.” (Nthanthi 25:28) Mutenere kuziŵa dankha vo vachitika mwechendachitepu kanthu. Bayibolu likamba so kuti: “Kuŵanaŵana umampha kuchitiska munthu kuweza ukali waki.” (Nthanthi 19:11) Asani pachitika nkhani yinyaki, tingachita umampha kuvwisiya vigaŵa vosi va nkhani yo. Ndipu venivi vitiwovyengi kuvwisa nkhani yo ndi kuleka kukwiya.

MUWONGENGI

FUNDU YA M’BAYIBOLU: “Longoni kuti muwonga.”​—Akolose 3:15.

VO FUNDU IYI YING’ANAMUWA: Fundu iyi yilongo kuti ŵanthu wo awonga ndiwu angaja mwakukondwa. Ndipu ŵanthu wo m’bali wawu wakutayika angasimikiza kuti fundu iyi njauneneska nadi. Yiwu awona kuti kuŵanaŵaniya vinthu vamampha vo ŵenavu m’malu mwa vo akutaya kwaŵawovya kuti aleki kusuzgika maŵanaŵanu.

VO MUNGACHITA: Zuŵa lelosi, muŵanaŵaniyengi pamwenga kulemba vinthu vo mukhumba kuwonga.  Vinthu vaki vitenere kuja vikuluvikulu pe cha. Mwakuyeruzgiyapu, mungaŵanaŵaniya vinthu vimanavimana nge kutowa kwa lumwi asani lituwa ŵaka, kukambiskana ndi wakwanjiwa winu pamwenga mungawonga chifukwa cha zuŵa linyaki lamampha. Kuŵanaŵaniya venivi kungakuwovyani kuti mujengi ndi maŵanaŵanu ngamampha.

Mungayanduwa ukongwa asani muŵanaŵaniya vinthu vo mungawonga ŵanthu a mubanja linu kweniso mabwezi nginu. Asani mwaziŵa vo mukhumba kuwonga ŵanthu anyaki, mungaŵakambiya pamasu ndi pamasu, kuŵalembe kalata pamwenga kuŵatumiziya meseji. Venivi vingakuwovyani kuti muje pa ubwezi wamampha ndi anyinu ndipu mukondwengi chifukwa chakuti muchitiya vinthu vamampha ŵanthu anyaki.​—Machitidu 20:35.

FUNDU ZINYAKI ZA M’BAYIBOLU

Mungapanga dawunilodi Bayibolu lakuvwisiya. Bayibolu lenili lisanirika muvineneru 40 pa webusayiti ya jw.org

MUTUWENGEPU MPHINDANU YECHENDABUKI.

“Kwambisa ndewu kwe nge kujuliya maji. Mphindanu yechendabuki, tuwapu.”​—NTHANTHI 17:14.

MUNGAFIPANGA MTIMA CHA NDI VINTHU VA KUNTHAZI.

“Lekani kufipiya mtima vamawa, chifukwa la mawa le ndi vakufipiska mtima vaki. Zuŵa lelosi le ndi masuzgu ngaki.”​—MATEYU 6:34.

MUNGATHAŴILIYANGA CHA KUCHITAPU KANTHU MWECHENDAŴANAŴANIYEPU.

“Lusu la kuŵanaŵana lijengi mulonda waku, ndipu kuwamu kukuvikiliyengi.”​—NTHANTHI 2:11.