Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Jani Masu!  |  Na. 3 2017

 VO BAYIBOLU LIKAMBA

Angelu

Angelu

Kanandi, angelu atiŵajambula mumabuku, vithuzi kweniso m’mafilimu. Kumbi yiwu mbayani, nanga agwira ntchitu wuli?

Kumbi angelu mbayani?

VO BAYIBOLU LIKAMBA

 

Chiuta wechendalengi taŵanthu ndipuso vinthu vosi, wangulenga dankha vakulengeka vinyaki vapachanya ukongwa. Vakulengeka venivi vanthazi ukongwa kuphara taŵanthu ndipu vija ko Chiuta waja. Kumalu ngenanga, isi tingafikaku cha pamwenga kuwonaku. (Jobu 38:4, 7) Bayibolu likamba kuti vakulengeka venivi ndi “mizimu” ndipuso “angelu.”—Sumu 104:4; Sumu 103:20. *

Kumbi angelu alipu alinga? Alipu anandi. Chiŵerengeru cha angelu wo azunguliya mpandu waku Chiuta ‘ntchikulu ukongwa’ pamwenga “masawuzandimasawuzandi.” (Chivumbuzi 5:11) Asani nambala iyi tingayisazga, ndikwesa angelu alipu mamiliyoni nganandi!

“Ndinguwona . . . angelu anandi wo anguzunguliya mpandu waufumu . . . , ndipu chiŵerengeru chawu chenga chikulu ukongwa kweniso masawuzandimasawuzandi.”—Chivumbuzi 5:11.

Kumbi angelu agwiranga ntchitu wuli munyengu yakali?

VO BAYIBOLU LIKAMBA

 

Kanandi angelu alongoronga m’malu mwaku Chiuta pamwenga kuti ndiwu aperekanga uthenga waki. * Nyengu zinyaki, Bayibolu lilongo kuti Chiuta waŵagwirisiyanga ntchitu pakuchita vinthu vinyaki vakuziziswa. Chiuta wangutuma mungelu kuti wakatumbiki Abrahamu ndipuso kuti wakamulekesi kupereka sembi mwana waki Yisaki. (Chiyambo 22:11-18) Mungelu waku Chiuta wanguwoneke kwaku Mosese pa chivwati cho chakoliyanga motu ndipu wangumukambiya uthenga wo ungusintha umoyu waki. (Chituwa 3:1, 2) Mchimi Danyele wati waponyeka muzenji la nkharamu, ‘Chiuta wangutuma mungelu waki kuti wakajali milomu ya nkharamu.’—Danyele 6:22.

“Ndipu mungelu waku Yehova wanguwoneke kwaku [Mosese] kuziya mu motu wo wakoliyanga pakati pa chivwati cha minga.”Chituwa 3:2.

 Kumbi angelu agwira ntchitu wuli mazuŵa nganu?

VO BAYIBOLU LIKAMBA

 

Tingaziziŵa cha ntchitu zosi zo angelu agwira mazuŵa nganu. Kweni Bayibolu lilongo kuti yiwu atovya pa ntchitu yakusambiza ŵanthu wo apenja kuziŵa vinandi vakukwaskana ndi Chiuta.—Machitidu 8:26-35; 10:1-22; Chivumbuzi 14:6, 7.

Yehova wanguchitisa kuti Yakobe waloti malotu. M’malotu ngenanga Yakobe wangulota angelu achikwera ndi kusika “pamakweleru” ngo ngenga ngatali kutuwa pacharu chapasi mpaka kuchanya. (Chiyambo 28:10-12) Malotu yanga nganguwovya Yakobe kuziŵa kuti Yehova Chiuta watuma angelu ŵaki pacharu chapasi kuti aziwovyi ŵanthu wo mbakugomezgeka asani akumana ndi masuzgu. Nasi tigomezga kuti venivi ndivu vichitika nadi.—Chiyambo 24:40; Chituwa 14:19; Sumu 34:7.

“Wanguwona makweleru ngo ngenga ngatali kutuwa pacharu chapasi mpaka kuchanya. Ndipu angelu aku Chiuta akweranga ndi kusika pamakweleru ngenanga.”—Chiyambo 28:12.

^ ndimi 6 Bayibolu lilongo kuti angelu anyaki angugalukiya Chiuta. Ndipu lidana angelu aheni ŵenaŵa kuti “viŵanda.”—Luka 10:17-20.

^ ndimi 11 Mazu nga Chihebere kweniso Chigiriki ngo m’Bayibolu akungafwatuliya kuti “mungelu” ngang’anamuwa “mthenga.”