Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Jani Masu!  |  Na. 3 2017

 FUNDU ZAKOVYA MABANJA | KULERA ŴANA

Umampha Wakuti Ŵana Agwirengi Ntchitu Zapanyumba

Umampha Wakuti Ŵana Agwirengi Ntchitu Zapanyumba

SUZGU LO LIŴAPU

M’mabanja nganyaki ŵana agwira ntchitu zapanyumba kwambula kudinginyika. Penipo mu mabanja nganyaki apapi akhumba cha kuti ŵana ŵawu agwirengi ntchitu. Mwaviyo, ŵana akhumba cha kugwira ntchitu.

Kafukufuku walongo kuti venivi vichitika muvyaru vinandi. Mu vyaru venivi ŵana anandi akhumba waka kupasika vinthu m’malu mwakugwira ntchitu. Mpapi munyaki zina laki Steven wangukamba kuti: “Mazuŵa nganu apapi atiŵalekere waka ŵana ŵawu kuti atchayengi magemu, achezengi pa Intaneti kweniso awoneriyengi TV. Venivi vichitisa kuti ŵana alekengi kugwira ntchitu.”

Kumbi imwi muwona wuli? Kumbi ntchitu zenizi zitovya waka kuti panyumba pajengi pakutowa pamwenga zingawovya so kuti mwana waziŵengi ntchitu?

VO MUTENERE KUZIŴA

Apapi anyaki akhumba cha kuŵapasa ntchitu ŵana ŵawu, ukongwa asani ŵana atangwanika ndi homuweki pamwenga vinthu vinyaki va kusukulu. Chinanga kuti ve viyo, tiyeni tiwoni kukhumbika kwakuti ŵana agwirengi ntchitu zapanyumba.

Kugwira ntchitu zapanyumba kutovya kuti mwana waje ndi zeru. Ŵana anandi wo agwira ntchitu panyumba, aja ndi zeru kusukulu. Asani mwana wagwira ntchitu panyumba waja wachiganga, watijikayikiya cha ndipuso waja ndi nkharu yamampha. Mijalidu yeniyi yingawovya mwana kuti wasambirengi vinthu.

Kugwira ntchitu zapanyumba kutovya kuti ŵana awovyengi ŵanthu anyaki. Ŵanthu anyaki asaniya kuti ŵana wo agwira ntchitu zapanyumba, agwiraku so ntchitu zo zichitika muchigaŵa asani akuwa. Ivi vakuziziswa cha chifukwa ntchitu zapanyumba zo agwira, zitiŵawovya kuti aŵanaŵaniyengi ŵanthu anyaki m’malu mwakuŵanaŵaniya vakukhumba vawu pe. Steven yo wazumbulika kukwamba wangukamba so kuti: “Asani ŵana agwira ntchitu cha panyumba, awona kuti ŵanthu anyaki ndiwu atenere kuŵachitiya chechosi ndipu asani akuwa alutiriza kuja ndi maŵanaŵanu ngenanga kweniso awona kuti atenere cha kugwira ntchitu mwaphamphu.”

Kugwira ntchitu zapanyumba kutovya kuti banja losi likoliyanengi. Asani ŵana agwira ntchitu mwaphamphu, vitiŵawovya kuziŵa kuti mbakukhumbika. Kweniso atijivwa kuti nawu ŵe ndi udindu wakugwiraku ntchitu panyumba. Kweni ivi vingachitika cha asani apapi awona kuti homuweki pamwenga vinthu vinyaki va kusukulu ndivu vakukhumbika ukongwa kuluska ntchitu zapanyumba. Jifumbeni kuti: ‘Kumbi pangaŵa phindu wuli asani mwana wangu watanja ukongwa timu ya bola kuphara ŵanthu a m’banja laki?’

VO MUTENERE KUCHITA

Yambani kuŵapasa ntchitu ŵeche anamana. Anyaki akamba kuti apapi atenere kwamba kuŵapasa ntchitu ŵana ŵawu asani akwanisa vyaka vitatu. Penipo anyaki atiti apapi atenere kwamba kuchita ivi asani ŵana akwanisa vyaka viŵi pamwenga ŵechendafiki vyaka venivi. Kweni fundu njakuti, ŵana anamana atanja kugwira ntchitu ndi apapi ŵawu ndipu atole vo apapi ŵawu achita.—Lemba lakovya: Nthanthi 22:6.

Muŵapasengi ntchitu zakukoliyana ndi msinkhu wawu. Mwakuyeruzgiyapu, mwana wa vyaka vitatu mungamupasa ntchitu yakupanganya vidoli vaki, kupuputa po padikiya vinthu pamwenga kusankha malaya ngo ngakhumbika kuchapa. Ŵana alaku mungaŵapasa ntchitu yakupeya munyumba, kusuka galimotu pamwenga kubika chakurya. Muŵapasengi ntchitu zakukoliyana ndi msinkhu wawu. Ivi vingachitisa kuti akhumbisisengi kugwira ntchitu zapanyumba.

Muwonengi kuti kugwira ntchitu nkhwakukhumbika. Ivi vingaŵa vakusuzga ukongwa asani zuŵa lelosi mwana winu watangwanika ndi homuweki. Kweni buku linyaki likamba kuti kuleka kuŵapasa ntchitu ŵana ndi chilatu chakuti akwerengi sukulu, “vilongo kuti apapi awona kuti ntchitu zapanyumba zambula kukhumbika.” (The Price of Privilege) Nge po takambiya kali, asani ŵana agwira ntchitu zapanyumba aja ndi zeru. Ndipu vo asambira, vitaziŵawovya asani azija ndi banja lawu.—Lemba lakovya: Ŵafilipi 1:10.

Muŵanaŵaniyengi chifukwa cho mutiŵapasiya ntchitu m’malu mwakuŵanaŵaniya mo agwiriya ntchitu. Pangato nyengu yitali kuti mwana wamalizi kugwira ntchitu yo mwamupasa. Panyaki mungawona so kuti wayigwira umampha cha. Asani ivi vachitika, mukhumbika cha kumulonda kuti mumalizi ndimwi ntchitu yo. Lekani kuŵanaŵana kuti mwana winu wangagwira ntchitu nge munthu mura. Kweni mujengi ndi chilatu chakuti mumuwovyi kuti waziŵi ntchitu kweniso kusaniya likondwa chifukwa chakugwira ntchitu.—Lemba lakovya: Wakutaula 3:22.

Muwovyengi ŵana kuti agwirengi ntchitu ndi chilatu chakwenere. Anyaki akamba kuti kupasa ŵana ndalama asani agwira ntchitu kutiŵawovya kuti ayanjengi kugwira ntchitu. Anyaki akamba kuti ivi vichitisa kuti ŵana aŵanaŵaniyengi ukongwa vinthu vo apasika, m’malu mwakuŵanaŵaniya kuti vo achita vitovya banja lawu. Yiwu akamba so kuti asani ŵana aŵapasa ndalama zinandi, angakana kugwira ntchitu. Ivi vingachitisa kuti ŵana aleki kusambira ntchitu. Yapa tisambirapu kuti titenere cha kupasa ŵana ndalama chifukwa chakuti agwira ntchitu zapanyumba. Kweni tingaŵapasa nyengu yinyaki.