Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Jani Masu!  |  Na. 3 2017

 NKHANI YA PACHIKONKHOMBI | KUMBI BAYIBOLU NDAKUTULIYA NADI KWAKU CHIUTA?

Bayibolu—Lineneska pa Vinthu Vosi

Bayibolu—Lineneska pa Vinthu Vosi

Lineneska pa Nkhani za Sayansi

CHINANGA kuti Bayibolu ndi buku la sayansi cha, kweni lineneska asani likamba vinthu vo vichitika m’chilengedu. Mwakuyeruzgiyapu, wonani vo likamba pa nkhani ya mo vuwa yipangikiya kweniso mo mwana wapangikiya.

MO VUWA YIPANGIKIYA

MO VUWA YIPANGIKIYA

Bayibolu likamba kuti: “[Chiuta] waguziya muchanya madonthu nga maji. Madonthu ngenanga ngasintha kutuwa ku nyankhuŵinda, ndipu ngapanga vuwa. Pavuli paki, mitambu yidira vuwa pasi.”—Jobu 36:27, 28.

Yapa, Bayibolu likonkhosa nthowa zitatu zo zilongo mo vuwa yipangikiya. Chiuta yo wakupanga kufunda, “waguziya muchanya madonthu nga maji” mwa (1) kusintha maji kuti ngaje mvuchi. Pavuli paki, (2) mvuchi usintha kuja maji. Kumbi venivi vichitika wuli? Mvuchi wo wakwera kuchanya, upanga mitambu. Mitambu yeniyi ndiyu (3) yisungunuka ndi kuja vuwa. Mpaka sonu, ŵanthu wo awona za nyengu avwisa mbwenu cha vosi vo vichitika kuti vuwa yipangiki. Mphakuvwika kuti Bayibolu lifumba kuti: “Kumbi walipu yo wangavwisa mo mitambu yitambasukiya?” (Jobu 36:29) Kweni Mulengi widu waziŵa vosi vo vichitika kuti vuwa yipangiki ndipu wangukambiya munthu munyaki kuti walembi venivi m’Bayibolu. Fundu yeniyi yikulembeka kali ukongwa ŵanthu ŵechendaziŵi mo vuwa yipangikiya.

MO MWANA WAPANGIKIYA

MO MWANA WAPANGIKIYA

Fumu Davidi yo wangulembaku Bayibolu wangukambiya Chiuta kuti: “Masu nginu ngangundiwona ndichiyamba waka kupangika mumoyu mwa ama, ndipu viŵalu vangu vosi vingulembeka mubuku linu.” (Sumu 139:16) Yapa Davidi wangukamba mwandakatulu kuti asani mwana watamba waka kupangika, viŵalu vaki vipangika mwakulondo ulongozgi wa “m’buku” pamwenga mwakulondo pulani. Vakuziziswa limu kuti mazu yanga ngakulembeka vyaka pafupifupi 3,000 vajumpha.

Kweni pangujumpha nyengu yitali kuti ŵanthu aziŵi mo taŵanthu tipangikiya. Mwakuyeruzgiyapu, mu vyaka va m’ma 1800, ndimu Gregor Mendel wa ku Austria wanguziŵiya fundu zinyaki zakukwaskana ndi majini. Mu April 2003, ndimu asayansi anguziŵiya vinthu vinyaki vakukwaskana ndi majini ngo ngasanirika muliŵavu la munthu. Yiwu angusaniya kuti majini ngasanirika mumaselu nga muliŵavu ndipu ngatuŵa ndi ulongozgi wa mo mwana yo wabalikengi watenere kuwoneke. Angusaniya so kuti ulongozgi wenuwu uŵikika mwandondomeku nge mo vilembu ndi mazu ngalembeke mudikishonale. Viŵalu va mwana vipangika mwakulondo ulongozgi wenuwu ndipu vipangika mwandondomeku kweniso pa nyengu yakwenere. Utamba ndi wongu, mtima, mapapu ndipuso mbaŵala. Mphaki kuti asayansi akamba kuti majini ndi “buku la umoyu.” Ntchinthu wuli cho chinguwovya Davidi kuti walembi mwauneneska fundu yeniyi m’Bayibolu? Iyu wangukamba kuti: “Mzimu waku Yehova ungulongoro kuziya mwaku ini, ndipu mazu ngaki ngenga palilimi langu.” *2 Samuele 23:2.

 Likamba Mwauneneska vo Vichitikengi Kunthazi

VAKUSUZGA kuti ŵanthu aziŵi nyengu kweniso vo vingachitika kuti maufumu ndi misumba viŵeku pamwenga vibwanganduliki. Kweni Bayibolu likukambiya limu vosi vo vazamuchitika kuti maufumu nganthazi ndipuso misumba yikuluyikulu yibwanganduliki. Tiyeni tikambisani ŵaka maufumu ngaŵi.

KUBWANGANDULIKA KWA BABILONI

Kwa vyaka vinandi, msumba wa Babiloni wenga likulu la Ufumu wa Babiloni wo walamuliyanga chigaŵa cha kuzambwi kwa Asia. Nyengu yinyaki, msumba uwu wenga ukulu ukongwa pacharu chosi chapasi. Kweni kwati kwaja vyaka pafupifupi 200, Chiuta wangukambiya limu kuziya mwaku Yesaya kuti msumba wenuwu wazamubwangandulika ndipu mwazamujaso ŵanthu cha mpaka muyaya. Wangukamba so zina la munthu yo wazamubwanganduwa msumba wenuwu kuti ndi Sirusi. (Yesaya 13:17-20; 44:27, 28; 45:1, 2) Kumbi ivi vinguchitika nadi?

MBIRI YAKALI

Sirusi wangubwanganduwa msumba wa Babiloni usiku umoza pe. Ivi vinguchitika mu October 539 B.C.E. Pati pajumpha nyengu, ngalandi zo mwayendanga maji zingukamuka. Kuzifika mu 200 C.E., mumsumba uwu mwengavi munthu weyosi. Mazuŵa nganu, po penga msumba wa Babiloni ndi mahami. Vo Bayibolu lingukamba ndivu vikuchitika nadi, msumba uwu “ukuja mahami pe.”—Yeremiya 50:13.

Kumbi Yesaya wanguviziŵa wuli vinthu venivi vo vinguzichitika kunthazi? Bayibolu likamba kuti uwu wenga “uthenga wakukwaskana ndi Babiloni wo Yesaya mwana waku Amozi wanguwona kuziya m’chiwona.”—Yesaya 13:1.

NINEVE WAZAMUJA ‘WAKUMILA NGE CHIPALAMBA’

Msumba wa Nineve wenga likulu la Ufumu wa Asiriya. Msumba uwu, unguzengeka mwapachanya ukongwa. Wenga ndi misewu yisani, malu ngakutowa, nyumba zakusopiyamu kweniso nyumba zikuluzikulu zachifumu. Kweni mchimi Zefaniya wangukambiya limu kuti msumba uwu wazamuja ‘chipululu ndipuso wakumila nge chipalamba.’—Zefaniya 2:13-15.

Msumba wa Nineve ungubwangandulika ndi gulu la asilikali a Babiloni ndi Amede mu vyaka va m’ma 600 B.C.E. Buku linyaki likamba kuti “kwa vyaka 2500, ŵanthu anguluwaku” kuti kwenga msumba wa Nineve. Ŵanthu akayikiyanga kuti Nineve wengaku nadi. Kweni mu vyaka va m’ma 1800 B.C.E., ŵanthu wo afukuwa vinthu vakali anguluta kuchifukuwa po penga Nineve. Mazuŵa nganu, vinthu vo vikusanirika pamalu yanga vivunda ndipu ŵanthu atuba ndi kuphwasuwa vinthu venivi. Ivi vachitisa kuti wupu wa Global Heritage Fund utcheŵesi ŵanthu kuti: “Vinthu vo vikusanirika pa mahami nga Nineve vimaliyengi limu.”

Kumbi Zefaniya wanguviziŵa wuli vinthu venivi vo vinguzichitika kunthazi? Iyu wangukamba kuti ‘mazu ngaku Yehova nganguza kwaku iyu.’—Zefaniya 1:1.

 Bayibolu Limuka Mafumbu Ngakukhumbika Ukongwa

BAYIBOLU limuka mafumbu ngakukhumbika ukongwa. Tiyeni tiwoni vakuyeruzgiyapu ivi.

NTCHIFUKWA WULI PACHARU PACHITIKA VINTHU VIHENI KWENISO MASUZGU?

Nkhani yakukwaskana ndi vinthu viheni kweniso masuzgu yikambika ukongwa m’Malemba. Bayibolu likamba kuti:

  1. “Munthu wapweteka munthu munyaki pakumulamuliya.”Wakutaula 8:9.

    Ŵanthu wo alamuliya mwambula urunji achitisa masuzgu nganandi.

  2. “Nyengu ndipuso vinthu vamabuchibuchi viwiya weyosi.”Wakutaula 9:11.

    Vinthu vamabuchibuchi nge kutama ukongwa, ngozi pamwenga masoka ngachilengedu vingachitikiya weyosi, kwekosi ndipuso pa nyengu yeyosi.

  3. “Kuziya mwa munthu yumoza ubudi ukusere mucharu ndipu nyifwa yikuza chifukwa cha ubudi.”Ŵaroma 5:12.

    Ŵanthu akwamba ŵati alengeka, kwengavi ubudi ndi nyifwa. Ubudi “ukusere mucharu,” pa nyengu yo ŵanthu yaŵa anguleke dala kuvwiya Mulengi wawu.

Bayibolu likamba so kuti pambula kuswera masuzgu ngamalengi. Lilayizga kuti Chiuta watuzgengepu vinthu viheni ndipuso “wazamuleska masozi ngosi mu masu ngawu, ndipu nyifwa yazamuŵapu so cha, chinanga nkhuliya, chinanga nkhukuta, chinanga mburwirwi kuti vazamuŵapu so cha.”—Chivumbuzi 21:3, 4.

NTCHINTHU WULI CHO CHICHITIKA ASANI MUNTHU WAFWA?

Bayibolu likonkhosa kuti asani munthu wafwa waziŵa kanthu cha ndipuso wachita chechosi cha. Lemba la Wakutaula 9:5 likamba kuti, “Pakuti amoyu aziŵa kuti azamukufwa kweni akufwa aziŵa kekosi cha.” Asani munthu wafwa, ‘vosi vo waŵanaŵananga vimaliya penipo.’ (Sumu 146:4) Mwaviyo, asani munthu wafwa wongu uleka kugwira ntchitu ndipu wachita chechosi cha, watuvwa chechosi cha ndipuso waŵanaŵana cha.

Kweni Bayibolu likamba fundu yinyaki yakuchiska ukongwa. Likamba kuti akufwa azamuyuskika.—Hoseya 13:14; Yohane 11:11-14.

NTCHIFUKWA WULI TE NDI UMOYU?

Bayibolu likamba kuti Yehova Chiuta ndiyu wangulenga Adamu ndi Eva. (Chiyambo 1:27) Ndichu chifukwa chaki likamba so kuti Adamu wenga “mwana waku Chiuta.” (Luka 3:38)  Ŵanthu angulengeka kuti ajengi pa ubwezi ndi Awusewu akuchanya, ajengi mwalikondwa ndipuso azazi charu chapasi. Mwaviyo, ŵanthu wosi ŵe ndi mtima wakukhumba kusambira vakukwaskana ndi Chiuta. Mphaki Bayibolu likamba kuti: “Mbakutumbikika wo aziŵa kuti akhumbika Chiuta.”—Mateyu 5:3.

Bayibolu likamba so kuti: ‘Mbakukondwa ŵanthu wo atuvwa mazu ngaku Chiuta ndi kungasunga.’ (Luka 11:28) Bayibolu lititiwovya kuziŵa vakukwaskana ndi Chiuta pe cha, kweni lititiwovya so kuziŵa vo tingachita kuti tije ndi umoyu walikondwa sonu ndipuso kuti tizije ndi umoyu wamuyaya kunthazi.

Mungaja pa Ubwezi ndi Mweneku wa Bayibolu

PAVULI pakuwona maukaboni nganandi, ŵanthu mamiliyoni nganandi pacharu chapasi asimikiza kuti Bayibolu ndi buku lapade. Yiwu asimikiza so kuti Bayibolu likulembeka mwakulongozgeka ndi Chiuta ndipu iyu wakambisana nasi kuziya m’buku lenili. Kuziya m’Bayibolu, Chiuta watikupemphani kuti mumuziŵi kweniso wakhumba kuti muje bwezi laki. Likamba kuti: “Ndereni kufupi ndi Chiuta, ndipu nayu wanderengi kufupi ndi imwi.”—Yakobe 4:8.

Kuŵerenga Bayibolu ndipuso kuŵanaŵaniya vo mwaŵerenga kungakuwovyani ukongwa. Kumbi kungakuwovyani wuli? Asani munthu waŵerenga buku lo likulembeka ndi munthu munyaki, waziŵa maŵanaŵanu nga mweneku wa buku lo. Mwakuyanana waka, kuŵerenga Bayibolu kungakuwovyani kuti muziŵi maŵanaŵanu ngaku Chiuta, mweneku wa Bayibolu. Kungakuwovyani so kuziŵa mo wavwiya pa nkhani zakupambanapambana. M’Bayibolu musanirika so:

Kumbi mungayanja kuziŵa vinandi? Akaboni aku Yehova angakuwovyani. Yiwu angasambira namwi Bayibolu kwawezi. Venivi vingakuwovyani kuti muje pa ubwezi ndi Yehova Chiuta, yo ndi mweneku wa Bayibolu.

Nkhani iyi yakonkhosa maukaboni nganyaki ngo ngalongo kuti Bayibolu likulembeka nadi mwakulongozgeka ndi Chiuta. Kuti muziŵi vinandi wonani mutu 2 m’buku lakuti, Kumbi Tingasambiranji m’Bayibolu? lo likulembeka ndi Akaboni aku Yehova ndipu lisanirika pa www.jw.org/tog. Pamwenga jambulani kachidindu yaka

Mungawonere so kavidiyo kakuti, Kumbi Ndiyani yo Wakulemba Bayibolu? ko kasanirika pa www.jw.org/tog

Wonani po palembeka kuti, MABUKU > MAVIDIYO

^ ndimi 10 Bayibolu likamba kuti zina laku Chiuta ndi Yehova.—Sumu 83:18.

Ziŵani Vinandi

PEMPHANI SAMBIRU LA BAYIBOLU

Nchifukwa Wuli Tikhumbika Kusambira Bayibolo?

Bayibolo litovya ŵanthu anandi kusaniya kwamuka kwa mafumbu ngo ngatitisuzga pa umoyu. Kumbi mungayanja kusaniya kwamuka kwa mafumbu ngenanga?