Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Jani Masu!  |  Na. 2 2017

Asani Ŵana Ndipuso Achinyamata ŵe ndi Chitima

Asani Ŵana Ndipuso Achinyamata ŵe ndi Chitima

Kumbi mwe ndi chitima chifukwa cha nyifwa ya mubali winu? Asani ve viyo, kumbi mungachita wuli kuti chitima chimaleku? Wonani mo Bayibolu linguwovye achinyamata atatu kuti amalani ndi suzgu lenili.

NKHANI YAKU DAMI

Dami

Pakwamba vawonekanga nge kuti ada atuvwa ŵaka mutu. Kweni urwirwi wati walutiriya, ama angudanisa ambulasi. Ndikumbuka vo vachitikanga madokotala ngachiŵato. Kwenuku ndiku kwenga kulayirana ndi ada. Pati pajumpha mazuŵa ngatatu, ada angutayika ndi nthenda yakutupa kwa misipi ya muwongu. Pa nyengu iyi ndenga ndi vyaka 6 pe.

Kwa vyaka vinandi ndajimbanga mlandu chifukwa cha nyifwa ya ada. Ndajanga nge kuti ndiwona vo vachitikanga pa zuŵa lo madokotala ngaŵatoliyanga kuchipatala. Ndipu kanandi ndajifumbanga kuti, ‘Ntchifukwa wuli ndawoneriyanga ŵaka? Ntchifukwa wuli ndengavi kuchitapu chechosi kuti ndiŵawovyi?’ Asani ndawona ŵanthu akukota wo asuzgikanga ndi matenda ngakupambanapambana, ndajifumbanga kuti, ‘Ntchifukwa wuli yaŵa ŵe ndi umoyu kweni ada ŵangu akufwa?’ Pati pajumpha nyengu, ama angundiwovya kuti ndifwatukengi kukonkhosa mo ndivwiya mumtima. Chifukwa chakuti ndisi Akaboni aku Yehova, mpingu widu ungutiwovya ukongwa.

Ŵanthu anyaki aŵanaŵana kuti munthu wangalongo chitima chikulu asani mubali waki watayika ŵaka, kweni asani nyifwa yaŵikika, chitima chimala. Ndimu venge cha ndi ini chifukwa ndingwamba kuja ndi chitima ukongwa ndati ndajumpha vyaka 12.

Ndikhumba kukambiya achinyamata wo mpapi wawu wakutayika kuti, “Mukambiyengi munthu munyaki mo muvwiya mumtima. Vingachitika kuti asani mwakambiyaku munthu mo muvwiya, mungaleka kusuzgika ukongwa maŵanaŵanu.”

Kukamba uneneska, vija vakuŵaŵa kuwona kuti ndifiska vinthu vinyaki pa umoyu wangu kweni ada palivi kuti tikondwe limoza. Kweni ndipembuzgika ndi layizgu lo lisanirika pa Chivumbuzi 21:4 po pakamba kuti Chiuta “wazamuleska masozi ngosi mu masu ngawu, ndipu nyifwa yazamuŵapu so cha, chinanga nkhuliya, chinanga nkhukuta, chinanga mburwirwi kuti vazamuŵapu so cha.”

NKHANI YAKU DERRICK

Derrick

Ndikumbuka kuti kanandi ndaŵejanga limoza ndi ada ndipuso takanga kumapiri. Yiwu angayanjanga ukongwa mapiri.

Ada atamanga nthenda ya mtima. Ndeche mwana, ndikumbuka kuti tingulutapu kuchiŵawona kuchipatala. Chifukwa chakuti ndenga mwana, ndaziŵanga cha kuti nthenda yo atamanga njikulu. Ada angutayika chifukwa cha nthenda yeniyi nde ndi vyaka 9.

Ada ŵati atayika ndinguliya ukongwa. Ndavwanga nge kuti mtima wangu uphanika ndipu ndakhumbanga cha kukambiskana ndi munthu weyosi. Ndenga ndechendakumanepu ndi vinthu vakuŵaŵa viyo pa umoyu wangu ndipu ndaŵanaŵananga kuti palivi cho ndingachita. Kagulu ka achinyamata ka tchalitchi lo ndengamu, kangundiwovya kwa kanyengu kamanavi kweni pavuli  paki kanguleka. Ŵanthu akambanga vinthu vinandi. Mwakuyeruzgiyapu, akambanga kuti ada ŵangu “nyengu yawu yingukwana,” “Chiuta wakuŵato” pamwenga “sonu ŵe kuchanya.” Vo akambanga vingundifika pa mtima cha, kweni ndaziŵanga cha vo Bayibolu likamba pa nkhani yeniyi.

Pavuli paki, ama angwamba kusambira Bayibolu ndi Akaboni aku Yehova ndipu ini ndi mku wangu nasi tingwamba kusambira. Kusambira Bayibolu kungutiwovya kuziŵa vo vichitika asani munthu wafwa kweniso kuti Chiuta wakulayizga kuti wazamuyuska akufwa. (Yohane 5:28, 29) Lemba la Yesaya 41:10 lingundiwovya ukongwa. Pa lemba ili Chiuta wakamba kuti: “Ungachitanga mantha cha, chifukwa ndenawi. Ungafipanga mtima cha pakuti ndini Chiuta waku. Ndikukhwimisengi, hinya, ndikuwovyengi, ndikukolesengi nadi ndi janja langu lamaryi laurunji.” Ndingupembuzgika ukongwa kuziŵa kuti Yehova wandiwovyengi kumalana ndi chitima cho ndenga nachu, ndipu mpaka sonu weche kundipembuzga.

NKHANI YAKU JEANNIE

Jeannie

Ama angutayika ndi khansa panyengu yo ndenga ndi vyaka 7. Venga nge kutulu. Ndikumbuka kuti angufwiya kunyumba ndipu ambuya ŵenga penipo. Pazuŵa ili, weyosi wenga ndi chitima. Ndikumbuka kuti tinguryiya mazira ngakukazinga. Pa zuŵa ili vinthu vingundiyende cha ndipu ndawonanga nge kuti charu chanditinkha.

Kwa vyaka vinandi kutuliya po venivi vinguchitikiya, ndaŵanaŵananga kuti nditenere kubisa chitima cho ndenga nachu kuti ndiwovyi muvurwa wangu. Mazuŵa nganu napu, nyengu zinyaki ndibisa chitima cho ndija nachu, kweni mbumampha cha kuchita venivi.

Akaboni aku Yehova anyidu angutilongo chanju ndipuso angutiwovya. Chinanga kuti ndipu tayamba ŵaka kuwungana ku Nyumba ya Ufumu, Akhristu anyidu atiwovyanga nge kuti tinguja nawu kwa vyaka vinandi. Ndikayika kuti ada angubikapu chakurya chamazulu kwa chaka champhumphu chifukwa Akhristu anyidu azanga nachu.

Lemba la Sumu 25:16, 17 ndilu litindichiska ukongwa. Pa lemba ili wakulemba sumu wangupempha Chiuta kuti: “Ng’anamukiyani kwaku ini ndipu mundilongo lisungu, pakuti nde ndija ndipu palivi wakundiwovya. Masuzgu nga mumtima wangu nganandi ukongwa, ndiwovyeni kuti ndileki kusuzgika ukongwa maŵanaŵanu.” Ndichiskika ukongwa kuziŵa kuti pe munthu munyaki yo wangandiwovya asani nde ndi chitima. Chiuta ngwakunozgeka kuti wandiwovyi. Bayibolu landiwovya ukongwa kuti chitima cho ndenga nachu chimali kweniso kuti ndiŵanaŵaniyengi vinthu vamampha vo Chiuta wakulayizga. Mwakuyeruzgiyapu, wakutilayizga kuti wazamuyuska ŵanthu akufwa. Ndilindiza kuziwona so ama panyengu yo azamuja ndi umoyu wamampha ukongwa mucharu chifya.—2 Petro 3:13.

Kuti muziŵi uthenga wakupembuza wa m’Bayibolu wo ungawovya ŵanthu wo ŵe ndi chitima, pangani dawunilodi kabuku kakuti, “Asani Munthu yo Mutanja Watayika” pa www.jw.org. Lutani po palembeka kuti MABUKU > MABUKU & TIMABUKU.