Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Jani Masu!  |  Na. 1 2017

“Tingukwaskika Ukongwa Kuwona Chanju Cho Angutilongo”

“Tingukwaskika Ukongwa Kuwona Chanju Cho Angutilongo”

PA Chisulu, pa 25 April 2015, ku Nepal, kunguchitika chidiririsi chikulu. Charu ichi che ndi mapiri nganandi ndipu che kunkhondi kwa India. Chidiririsi ichi chinguchitika pa mtunda wa makilomita pafupifupi 80 kunkhondi, chakumazulu kwa tawuni yikulu ya Kathmandu. Chakupasa chitima ntchakuti ŵanthu akujumpha 8,500 angufwa. Palivi ngozi yachilengedu yinyaki yo yikubayapu ŵanthu anandi ukongwa ku Nepal kuphara iyi. Nyumba zakujumpha 500,000 zingunangika. Ku Nepal kwe Akaboni aku Yehova akukwana 2,200 ndipu anandi ajanga ko kunguchitika chidiririsi chenichi. Ndipu chakupasa chitima ntchakuti Kaboni yumoza ndi ŵana ŵaki ŵaŵi akufwa pa ngozi iyi.

Kaboni munyaki zina laki Michelle wangukamba kuti: “Chidilirisi ichi chichitika ndipu Akaboni ŵe ku mawunganu. Asani chinguchitika ŵe kunyumba, tikayika cha kuti anandi atingi afwengi pamwenga kupwetekeka.” Ntchifukwa wuli wo ŵenga ku mawunganu angutaskika? Ivi venga viyo chifukwa cha mo Nyumba za Ufumu zikuzengeke.

“SONU NDIPU TIWONA UMAMPHA WAKI!”

Nyumba za Ufumu zo zizengeka mazuŵa nganu ku Nepal, zija zakukho ukongwa. Ivi vitovya kuti zilekengi kuwa asani kwachitika chidilirisi. Munthu munyaki zina laki Man Bahadur yo wazengaku Nyumba za Ufumu wangukamba kuti: “Kanandi ŵanthu atifumbanga kuti ntchifukwa wuli tizenga fawundeshoni yakukho chinanga kuti Nyumba za Ufumu zo tizenga zimanazimana. Kweni sonu ndipu tiwona umampha waki!” Chidilirisi chati chajumphapu, abali wo awonere ntchitu yidu ku Nepal anguzomereza kuti ŵanthu ajengi mu Nyumba za Ufumu. Chinanga kuti Akaboni aku Yehova kweniso ŵanthu anyaki angutimbanyizika maŵanaŵanu chifukwa cha vo vinguchitika, kweni ajivwanga kuti mbakuvikiririka ŵati asamiya mu Nyumba za Ufumu.

Akaboni aku Yehova ndi ŵanthu anyaki angusamiya mu Nyumba za Ufumu

Ŵara angwamba kufufuza abali ndi azichi wo aziŵikanga cha kuti ŵepani. Kaboni munyaki zina laki Babita wangukamba kuti: “Ŵara anguŵika panthazi vakukhumba va abali ndi azichi m’malu mwakudanjiza vakukhumba vawu. Tingukwaskika ukongwa kuwona chanju cho angutilongo.” Mawa laki ŵanthu atatu a mukomiti yakuwonere ntchitu ya Akaboni aku Yehova ku Nepal, limoza ndi akuwonere madera pamwenga kuti wo atende mipingu angwamba kwende mipingu kuti awoni vinthu vo vakhumbikanga kweniso kuti awovyi ŵara a mipingu yo yingukwaskika.

Gary Breaux, wa ku likulu la Akaboni aku Yehova wanguyende abali wo angukwaskika ndi chidilirisi

Pati pajumpha mazuŵa 6 kutuliya po chidilirisi chinguchitikiya, Gary Breaux, yo wangutuliya ku likulu la Akaboni aku Yehova ku United States, wanguza ku Nepal limoza ndi muwolu waki Ruby. Reuben yo wateŵete mu komiti yakuwonere ntchitu ya Akaboni ku Nepal wangukamba kuti: “Chifukwa cha chimtimbaheka ndipuso kutimbanyizika maŵanaŵanu kwa ŵanthu mtawuni ya Kathmandu, takayikanga kuti M’bali Breaux wazengi nadi. Kweni iyu wakhumbisisanga kuti wazi, ndipu wanguza nadi. Abali ndi azichi anguwonga ukongwa chifukwa chakuti wanguza.”

‘TINGUWONA KUTI ABALI ŴIDU ŴENASI PAMOZA’

Silas, yo wateŵete ku maofesi nga Akaboni ku Nepal, wangukamba kuti: “Mafoni ngati ngayamba kugwira ntchitu, tingwamba kulonde mafoni nganandi msana ndi usiku! Akaboni anyidu pacharu chosi atifipiyanga mtima. Chinanga kuti anyaki alongolonga vineneru vo talekanga kuvivwa,  kweni tajivwanga kuti atitiyanja ndipuso kuti akhumbisisa kutiwovya.”

Akaboni wo aziŵa za chipatala wo angutuwa ku Europe anguwovya wo angupwetekeka

Pati pajumpha mazuŵa ngamanavi chidilirisi chati chachitika, Akaboni anguza ndi chakurya ku Nyumba za Ufumu kuti azipaseku ŵanthu wo ajanga kwenuku wo ŵengavi chakurya. Kusazgapu yapa, Komiti Yakuwonere Ntchitu Yakupereka Chovyu yingujalikisika. Ndipu chovyu cha abali ndi azichi a ku Bangladesh, India, ndi Japan chingwamba kuza. Pati pajumpha mazuŵa ngamanavi, Akaboni anyaki wo aziŵa za chipatala anguza kutuliya ku Europe ndipu angwamba kugwirisiya ntchitu Nyumba ya Ufumu yimoza nge chipatala. Yiwu angwamba kovya ŵanthu wo angupwetekeka ndi chidilirisi kweniso kuŵawovya kuti aleki kusuzgika ukongwa maŵanaŵanu.

Pakukamba za mo ŵanthu anandi avwiyanga pa nyengu iyi, munthukazi munyaki zina laki Uttara wangukamba kuti: “Chidilirisi ichi chenga chakofya ukongwa. Kweni pa nyengu iyi tinguwona kuti abali ŵidu ŵenasi pamoza.” Kukamba uneneska, ŵanthu aku Yehova anguleka cha kwanja Yehova kweniso anyawu chifukwa cha chidilirisi ichi. M’malu mwaki, yiwu angulutiriza kuchita venivi.

Ziŵani Vinandi

MAFUMBU NGO ŴANTHU AFUMBA KAŴIKAŴI

Kumbi Akaboni aku Yehova Atovya Ŵanthu wo Akumana ndi Masoka Ngachilengedu?

Ziŵani mo titovvye Akaboni pamwenga ŵanthu anyaki wo akumana ndi masoka ngachilengedu.