Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  January 2016

“Tilutengi Namwi”

“Tilutengi Namwi”

“Mwaŵanthu imwi tilutengi namwi chifukwa tavwa kuti Chiuta we namwi.”ZEK. 8:23.

SUMU: 32, 31

1, 2. (a) Kumbi Yehova wangukamba kuti ndi vinthu wuli vo vazamuchitika mu nyengu yidu? (b) Kumbi tikambiskanengi mafumbu wuli mu nkhani iyi? (Wonani chithuzi cho che pachanya.)

PAKUKAMBA za nyengu yo tilimu, Yehova wangukamba kuti: “Mu mazuŵa ngo, anthurumi 10 akutuwa mu vineneru vosi va amitundu azamukolesa chakuvwala cha Myuda ndi kukamba kuti: ‘Mwaŵanthu imwi tilutengi namwi chifukwa tavwa kuti Chiuta we namwi.’” (Zek. 8:23) Myuda wamiya ŵanthu wo Chiuta waŵasankha ndi mzimu wakupaturika. Yiwu adanika so kuti “Yisraele wauzimu.” (Ŵag. 6:16) Anthurumi 10 amiya ŵanthu wo azamuja pacharu chapasi kwamuyaya. Yiwu aziŵa kuti Yehova watumbika Akhristu akusankhika ndipu awona kuti ndi mwaŵi kuteŵete nawu limoza.

2 Yesu nayu wangukamba kuti ŵanthu aku Chiuta azamukoliyana. Iyu wangukonkhoska kuti akusambira ŵaki ŵe mu magulu ngaŵi. Wo aluta kuchanya wangukamba kuti mba “kagulu ka mbereri,” penipo wo azamuja pacharu chapasi mba “mbereri zinyaki.” Kweni wangukamba kuti wosi azamuja “gulu limoza” ndi “mliska yumoza.” (Luka 12:32; Yoh. 10:16) Chifukwa chakuti pe magulu ngaŵi, anyaki angajifumba kuti: (1) Kumbi a mbereri zinyaki  akhumbika kuziŵa mazina nga Akhristu wosi akusankhika? (2) Kumbi Akhristu akusankhika atenere kujiwona wuli? (3) Kumbi mutenere kuchitanji asani munthu munyaki mumpingu winu wayamba kurya chiŵandi ndi kumwa vinyu pa Chikumbusu? (4) Kumbi mutenere kufipa mtima chifukwa chakuti chiŵerengeru chaku wo aturya chiŵandi ndi kumwa vinyu chikwera? Tiyeni tikambiskani fumbu lelosi pakulija.

KUMBI TIKHUMBIKA KUZIŴA MAZINA NGA AKHRISTU WOSI AKUSANKHIKA?

3. Nchifukwa wuli tingaziŵa cha mazina nga ŵanthu wo azamukuŵa mugulu la Akhristu a 144,000?

3 Kumbi a mbereri zinyaki akhumbika kuziŵa mazina nga Akhristu wosi akusankhika? Awa. Chifukwa wuli? Chifukwa asani munthu wasankhika kuti waluta kuchanya, ching’anamuwa kuti Chiuta wasimikizga kakumaliya cha. Ve viyo chifukwa Satana wachitiska kuti kuje “achimi aboza . . . kuti alandizgi ŵanthu, ndipu asani nkhwamachitika alandizgi chinanga mbakusankhika.” (Mat. 24:24) Palivi yo wangaziŵa kuti Mkhristu wakusankhika wazamuluta kuchanya kwambula kuti Yehova wamuyeruzga kuti ngwakwenere. Yehova wayeruzga munthu wakusankhika kuti ngwakwenere asani waja kamanavi kuti wafwi pamwenga asani kwazija kamanavi kuti “chisuzgu chikulu” chiyambi. (Chiv. 2:10; 7:3, 14) Mwaviyo, tingaziŵa cha mazina nga ŵanthu wo azamukuŵa mugulu la Akhristu a 144,000. [1]

4. Asani tingaziŵa cha mazina nga Akhristu wosi akusankhika, nanga a ‘tingaluta nawu’ wuli?

4 Asani tingaziŵa cha mazina nga Akhristu wosi akusankhika, nanga a mbereri zinyaki ‘angaluta nawu’ wuli? Bayibolu likamba kuti anthurumi 10 “azamukolesa chakuvwala cha Myuda ndi kukamba kuti: ‘Mwaŵanthu imwi tilutengi namwi chifukwa tavwa kuti Chiuta we namwi.’” Chinanga kuti lemba ili lizumbuwa Myuda yumoza, kweni mazu ngakuti “namwi” ngamiya ŵanthu anandi. Yipu Myuda wamiya munthu yumoza cha, kweni wamiya Akhristu wosi akusankhika. Mwaviyo, tikhumbika kuziŵa Myuda weyosi pakuyija cha ndi kwamba kumulondo. M’malu mwaki tikhumbika kuziŵa gulu la Akhristu akusankhika ndi kuteŵete nawu limoza. Bayibolu likana kuti tilondongi munthu. Yesu ndiyu Mulongozgi widu.Mat. 23:10.

KUMBI AKHRISTU AKUSANKHIKA ATENERE KUJIWONA WULI?

5. Kumbi Akhristu akusankhika atenere kuŵanaŵaniya fundu niyi, ndipu nchifukwa wuli?

5 Ŵanthu wo aturya chiŵandi ndi kumwa vinyu pa Chikumbusu atenere kuŵanaŵaniya vo Paulo wangutcheŵeska pa 1 Ŵakorinte 11:27-29. (Ŵerengani.) Kumbi Paulo wang’anamuwanji pa lemba ili? Mkhristu wakusankhika wangaryiyamu bweka chiŵandi pamwenga kumwa vinyu asani waleka kugomezgeka kwaku Yehova. (Ŵah. 6:4-6; 10:26-29) Fundu iyi yitovya Akhristu akusankhika kukumbuka kuti atenere kugomezgeka asani akhumba kuti “azisaniyi mphotu ya mdanu wakuchanya waku Chiuta kuziya mwaku Khristu Yesu.”Ŵaf. 3:13-16.

6. Kumbi Akhristu akusankhika atenere kujiwona wuli?

6 Paulo wangupempha Akhristu akusankhika kuti ‘ayendengi mwakwenere mdanu wawu wo akudanika.’ Kumbi angalongo wuli kuti atenda mwakwenere? Paulo wangulutirizga kukamba kuti: “Muyendengi mwakujiyuyuwa, kufwasa, kuzikira ndi kuvwisisana mu chanju. Muyesesengi ndi mtima wosi kusunga umoza mwakuja mwachimangu cho chititimanga pamoza. Mzimu ndiwu utitiwovya kuti tije amoza.” (Ŵaef. 4:1-3) Mzimu waku Yehova  utovya kuti tije akujiyuyuwa, akujikuzga cha. (Ŵakol. 3:12) Akhristu akusankhika aziŵa kuti akulonde mzimu unandi cha kuphara ŵanthu wo azamuja pacharu chapasi. Yiwu atijiwona kuti aziŵa vinthu vinandi cha kuluska wo azamuja panu pasi. Kweniso atijiwona kuti mbapachanya cha kuluska wo azamuja panu pasi. Mkhristu wakusankhika weyosi wakambiya anyaki cha kuti nawu asankhika ndipu angayamba kurya chiŵandi ndi kumwa vinyu chifukwa waziŵa kuti Yehova ndiyu wasankha.

7, 8. Kumbi ndi vinthu wuli vo Akhristu akusankhika akhumbika cha kuchita, ndipu nchifukwa wuli?

7 Chinanga kuti ndi mwaŵi kudanika kuchanya, Akhristu akusankhika akhumba cha kuti ŵanthu aŵapasengi ulemu wapade. (Ŵaef. 1:18, 19; ŵerengani Ŵafilipi 2:2, 3.) Mzimu waku Yehova uchitiya ukaboni Mkhristu wakusankhika weyosi pakuyija. Yehova wangukambiya munthu weyosi cha kuti yiwu asankhika. Mwaviyo, azizwa cha asani ŵanthu anyaki akayikiya kuti mbakusankhika nadi ndi mzimu wakupaturika. Aziŵa kuti Bayibolu likamba kuti tingagomezganga liŵi cha asani munthu wakamba kuti wasankhika ndi Chiuta. (Chiv. 2:2) Akhristu akusankhika akambiya anyawu cha kuti asankhika. Achita viyo kuti ŵanthu aleki kuŵapasa ulemu wapade. Kweniso atijiŵikamu cha kuti atiya kuchanya.1 Ŵakor. 1:28, 29; ŵerengani 1 Ŵakorinte 4:6-8.

8 Akhristu akusankhika awona kuti akhumbika kucheza ndi akusankhika anyawu pe cha. Yiwu afufuza akusankhika anyawu cha kuti akambengi nawu nkhani yakusankhika kwawu pamwenga kupanga magulu ngawu kuti asambirengi Bayibolu. (Ŵag. 1:15-17) Kuchita viyo kungachitisa kuti mpingu ugaŵikani. Ivi vingaŵa vakupambana ndi vo mzimu wakupaturika uchita wo utitiwovya kuti tije akukoliyana.Ŵerengani Ŵaroma 16:17, 18.

KUMBI MUTENERE KUCHITANJI?

9. Nchifukwa wuli mutenere kuphwere ndi mo muchitiya vinthu ndi ŵanthu wo aturya chiŵandi ndi kumwa vinyu pa Chikumbusu? (Wonani bokosi lakuti, “ Chanju ‘Chichita Vinthu Vambula Kwenere Cha.’”)

9 Kumbi mutenere kuchita nayu wuli munthu yo waturya chiŵandi ndi kumwa vinyu pa Chikumbusu? Yesu wangukambiya akusambira ŵaki kuti: “Mosi ndimwi abali.” Wangukamba so kuti: “Weyosi wakujikweza wasisikengi, kweni weyosi yo ngwakujiyuyuwa wakwezekengi.” (Mat. 23:8-12) Mwaviyo tikhumbika cha kukweza ŵanthu, chinanga angaŵa abali aku Khristu. Bayibolu lititichiska kuti tiyezgengi chivwanu cha ŵara mumpingu. Kweni likana kuti tikambengi munthu munyaki kuti ndi mulongozgi widu. (Ŵah. 13:7) Mbuneneska kuti Bayibolu likamba kuti ŵanthu anyaki tiŵapasengi “ulemu ukulu.” Kweni ŵanthu aviyo titiŵapasa ulemu chifukwa chakuti mbakusankhika cha, kweni chifukwa chakuti “alongozga umampha” ndipuso “alimbikiya kulongoro ndi kusambiza.” (1 Tim. 5:17) Mwaviyo, Akhristu akusankhika angachita soni asani ŵanthu anyaki atiŵapasa ulemu mwakujumphisa. Chinthu chiheni ukongwa nchakuti tingatichitisa kuti ayambi kujikuza. (Ŵar. 12:3) Palivi yo wakhumba kuguŵiska abali aku Khristu!Luka 17:2.

Kumbi mutenere kuchita nayu wuli munthu yo waturya chiŵandi ndi kumwa vinyu pa Chikumbusu? (Wonani ndimi 9-11)

10. Kumbi tingalongo wuli kuti titiŵapasa ulemu ŵanthu Akhristu akusankhika?

10 Kumbi tingalongo wuli kuti titiŵapasa ulemu wakwenere ŵanthu wo Yehova wasankha? Titenere cha kuŵafumba mafumbu ngakukwaskana ndi mo akusankhikiya. Asani tichita viyo, tilongo kuti tikana kuseleriyapu pa nkhani zo zileka kutikwaska. (1 Ŵat. 4:11;  2 Ŵat. 3:11) Titenere cha kuŵanaŵana kuti apapi ŵawu, munthu yo akutorana nayu pamwenga abali ŵawu, nawu asankhikengi. Ubali pamwenga nthengwa vikoliyana cha ndi kusankhika. (1 Ŵat. 2:12) Tikhumbika so cha kufumba munthu yo akutorana nayu mo wavwiya chifukwa chakuti wazamuja yija pacharu chapasi kwambula munyaki. M’malu mwakufumba mafumbu ngo ngangachitiska chitima anyidu, tosi titenere kuja ndi chigomezgu chakuti Yehova wazamukhorwesa vakukhumba va chamoyu chechosi.Sumu 145:16.

11. Kumbi titijivikiliya wuli asani tileka kukweza ŵanthu?

11 Asani tileka kuwona Akhristu akusankhika kuti mbapachanya ukongwa titijivikiliya taŵeni. Bayibolu likamba kuti mumpingu mungaŵa “abali aboza.” (Ŵag. 2:4, 5; 1 Yoh. 2:19) Ŵanthu yaŵa angayamba kukamba kuti mbakusankhika. Kweniso Akhristu anyaki akusankhika angaleka kugomezgeka. (Mat. 25:10-12; 2 Pet. 2:20, 21) Asani tileka kukweza ŵanthu, vitiwovyengi kuleka kulondo anyidu, chinanga angaŵa Akhristu akusankhika pamwenga Akhristu wo aziŵika ukongwa. Ndipu asani aleka kugomezgeka pamwenga atuwamu mumpingu, isi tingaleka cha kugomezgeka kwaku Yehova pamwenga kumuteŵete.Yuda 16.

KUMBI TITENERE KUFIPA MTIMA ASANI CHIŴERENGERU CHIKWERA?

12, 13. Nchifukwa wuli titenere kufipa mtima cha ndi chiŵerengeru cha ŵanthu wo aturya chiŵandi ndi kumwa vinyu pa Chikumbusu?

12 Kwa vyaka vinandi, chiŵerengeru cha ŵanthu wo aryanga chiŵandi ndi kumwa vinyu pa Chikumbusu chasikanga. Kweni mazuŵa nganu chiŵerengeru ichi chikwera. Kumbi titenere kufipa mtima chifukwa chakuti chiŵerengeru chikwera? Awa. Tiyeni tikambiskani vifukwa vaki.

13 “Yehova waziŵa ŵanthu ŵaki.” (2 Tim. 2:19) Abali wo aŵerenga ŵanthu wo aturya chiŵandi ndi kumwa vinyu pa Chikumbusu angaŵaziŵa cha ŵanthu wo mbakusankhika nadi. Ve viyo chifukwa chakuti anyaki wo aturya chiŵandi ndi kumwa vinyu aŵanaŵana kuti mbakusankhika, penipo mbakusankhika cha. Anyaki wo aryanga chiŵandi ndi kumwa vinyu pa Chikumbusu akuleka. Anyaki agomezga kuti amuwusa ndi Khristu kuchanya chifukwa chakuti mitu yawu  yitenda umampha cha. Mwaviyo, tiziŵa umampha cha chiŵerengeru chayichu cha Akhristu akusankhika wo ŵeche pacharu chapasi.

14. Kumbi Bayibolu likamba kuti mbakhristu akusankhika alinga wo azamuja pacharu chapasi asani chisuzgu chikulu chaziyamba?

14 Akhristu akusankhika azamukuŵa mu malu ngakupambanapambana pa nyengu yo Yesu waziyengi kuti waziŵatore kuchanya. Pakukamba za nyengu iyi, Bayibolu likamba kuti: “Wazamutuma angelu ŵaki ndi mbata yikulu, ndipu azamuwunganiska akusankhika kutuliya ku mphepu zosi zinayi, kwamba kuvigoti vakuchanya mpaka kuvigoti vinyaki vakuchanya.” (Mat. 24:31) Bayibolu lilongo kuti mu mazuŵa ngakumaliya kwazamukuŵa Akhristu amanavi akusankhika. (Chiv. 12:17) Kweni likamba cha kuti mbakhristu akusankhika alinga wo azamuŵaku pa nyengu yo chisuzgu chikulu chiyambiyengi.

15, 16. Kumbi tikhumbika kuziŵanji pa nkhani ya Akhristu a 144,000 wo Yehova wasankha?

15 Yehova ndiyu waziŵa nyengu yo wangasankhiya. (Ŵar. 8:28-30) Yehova wangwamba kusankha Akhristu akusankhika Yesu wati wayuka. Ndipu viwoneka kuti Akhristu wosi akwambiriya ŵenga akusankhika. Kwa vyaka vinandi, ŵanthu anyaki wo akambanga kuti alondo Yesu ŵenga Akhristu aboza. Yesu wanguŵayeruzgiya ndi “duru.” Chinanga kuti venga viyo, Yehova wangulutirizga kusankha Akhristu anyaki akugomezgeka kuti aziluti kuchanya. Yiwu angulongo kuti ŵenga nge “tirigu” nge mo Yesu wangukambiya. (Mat. 13:24-30) Mu mazuŵa ngakumaliya, Yehova walutirizga kusankha ŵanthu kuti aje mu gulu la Akhristu a 144,000. [2] Mwaviyo, asani wakhumba kuzisankha Akhristu akusankhika charu chepafupi kumala, kumbi isi te ayani kuti tikayikiyi zeru zaki? (Yes. 45:9; Dan. 4:35; ŵerengani Ŵaroma 9:11, 16.) [3] Titenere kuphwere kuti tileki kuja nge ŵanthu wo adandawulanga ndi vo mbuyawu wanguchitiya antchitu wo angwamba kugwira ntchitu mu ora lakumaliya.Ŵerengani Mateyu 20:8-15.

16 Ndi wosi cha wo alindiza kuluta kuchanya wo ŵe mu gulu la “muŵanda wakugomezgeka ndi wakuwamu.” (Mat. 24:45-47) Nge mo ve nge mu nyengu ya Akhristu akwambiriya, mazuŵa nganu napu Yehova ndi Yesu agwiriskiya ntchitu ŵanthu amanavi kuliska ŵanthu anandi. Mu nyengu yakali, Yehova wangugwiriskiya ntchitu Akhristu amanavi kulemba Malemba Ngachigiriki. Mwakuyanana waka, mazuŵa nganu Akhristu amanavi a mu gulu la 144,000 ndiwu akusankhika kuti aperekengi chakurya chauzimu ‘pa nyengu yaki.’

17. Kumbi mwasambiranji mu nkhani iyi?

17 Kumbi tasambiranji mu nkhani iyi? Yehova wasankha kupereka mphotu ziŵi. Ayuda auzimu aluta kuchanya, penipo anthurumi 10 azamuja pacharu chapasi. Yehova wakhumba kuti wosi agomezgekengi. Magulu ngosi ngaŵi ngatenere kujiyuyuwa kweniso kukoliyana. Magulu ngosi ngaŵi ngatenere kuyesesa kuti mumpingu muje chimangu. Po charu chepafupi kumala, tosi tikhumbika kulutirizga kuteŵete limoza nge gulu limoza lakulongozgeka ndi Khristu.

^ [1] (ndimi 3) Lemba la Sumu 87:5, 6 lilongo kuti akhumba mazina nga ŵanthu wo amuwusa ndi Yesu kuchanya ngazamuziŵika kunthazi.Ŵar. 8:19.

^ [2] (ndimi 15) Chinanga kuti lemba la Machitidu 2:33 lilongo kuti ŵanthu asankhika ndi mzimu wakupaturika kuziya mwaku Yesu, kweni Yehova ndiyu wasankha ŵanthu.

^ [3] (ndimi 15) Kuti muziŵi vinandi, wonani nkhani yakuti, “Vo Akuŵerenga Afumba,” mu Chigongwi cha Alinda cha Chichewa cha May 1, 2007, papeji 30-31.