Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  January 2016

“Lutirizgani Kwanja Abali”

“Lutirizgani Kwanja Abali”

“Lutirizgani kwanja abali.”ŴAH. 13:1.

SUMU: 3, 20

1, 2. Nchifukwa wuli Paulo wangulembe kalata Akhristu achihebere?

MU CHAKA cha 61 C.E, Akhristu ŵenga pa chimangu mu charu chosi cha Yisraele. Chinanga kuti pa nyengu iyi Paulo wenga mujeri ku Roma, kweni walindizanga kuti amutuzengi mwaliŵi. Timote yo wayendanga nayu ndipu amutuza ŵaka mujeri. Yiwu akhumbanga kuti akawoni abali ndi azichi ku Yudeya. (Ŵah. 13:23) Kweni pavuli pa vyaka vinkhondi, Akhristu wo ajanga mu Yudeya, ukongwa wo ajanga mu Yerusalemu, akhumbikanga kuchitapu kanthu mwaliŵi. Chifukwa wuli? Yesu wanguŵakambiya kuti azituwemu mwaliŵi asani awona waka magulu ngankhondu ngazunguliya Yerusalemu.Luka 21:20-24.

2 Pangujumpha vyaka 28 kutuliya po Yesu wangukambiya uchimi uwu. Pa nyengu iyi, Akhristu akugomezgeka wo ajanga mu Yisraele angukunthiyapu mayeseru nganandi ngo akumananga nangu. (Ŵah. 10:32-34) Kweni Paulo wanguziŵa kuti akumanengi ndi suzgu yinyaki yikulu ukongwa. Suzgu iyi yatingi yiyesengi chivwanu chawu. (Mat. 24:20, 21; Ŵah. 12:4) Iyu wakhumbanga kuti abali anozgeke masuzgu ngo atingi akumanengi  nangu. Yiwu akhumbikanga kukunthiyapu kweniso kuja ndi chivwanu chakukho kuti azitaskiki. (Ŵerengani Ŵahebere 10:36-39.) Mwaviyo, mzimu waku Yehova unguchiska Paulo kuŵalembe kalata kuti yiŵawovyi kunozgeke vo akumanengi navu. Mazuŵa nganu kalata iyi yiziŵika kuti buku la Ŵahebere.

3. Nchifukwa wuli titenere kuŵanaŵaniya vo ve mu buku la Ŵahebere?

3 Mazuŵa nganu, tosi titenere kuŵanaŵaniya vo Paulo wangulembe Akhristu achihebere. Chifukwa wuli? Chifukwa mo vinthu venge mu nyengu yawu, viyanana waka ndi mo viliri sonu. Mu nyengu zinu zakusuzga, titombozgeka munthowa zakupambanapambana. (2 Tim. 3:1, 12) Chinanga kuti ve viyo, tilongo kuti te ndi chivwanu chakukho kweniso kuti tikujipereka ndi mtima wosi kwaku Yehova. Anandi aku isi te pa chimangu mu vyaru vidu. Palivi yo watititombozga. Kweni nge mo venge mu nyengu yaku Paulo, tosi tiziŵa kuti pambula kuswera tikumanengi ndi suzgu yikulu ukongwa. Suzgu iyi yiyesengi chivwanu chidu!Ŵerengani Luka 21:34-36.

4. Kumbi lemba la chaka cha 2016 ndakuti wuli, ndipu nchifukwa wuli ndakwenere?

4 Kumbi ndi vinthu wuli vo vingatiwovya kunozgeke vo vichitikengi pambula kuswera? Mu buku la Ŵahebere, Paulo wakonkhoska vinthu vinandi vo vingatiwovya kuti chivwanu chidu chije chakukho. Chinthu chimoza chakukhumbika che pa Ŵahebere 13:1. Lemba ili ndilu lasankhika kuti lije lemba la chaka cha 2016. Likamba kuti: “Lutirizgani kwanja abali.”

Lemba la chaka cha 2016 ndakuti: “Lutirizgani kwanja abali.”Ŵahebere 13:1

KUMBI KWANJA ABALI KUNG’ANAMUWANJI?

5. Kumbi kwanja abali kung’anamuwanji?

5 Kumbi kwanja abali kung’anamuwanji? Mazu ngachigiriki ngakuti phi·la·del·phiʹ ngo Paulo wangugwiriskiya ntchitu ngang’anamuwa “kwanja m’bali.” Ichi nchanju cho munthu watuŵa nachu pa m’bali waki pamwenga mubwezi waki wapamtima. (Yoh. 11:36) Asani tikamba kuti m’bali pamwenga mzichi, tikamba waka pamulomu cha. Isi te abali ndi azichi nadi. (Mat. 23:8) Paulo wangukamba kuti: “Pakwanja abali, jani ndi chanju chauneneska pakati pinu. Pakulongorana ulemu, jani panthazi.” (Ŵar. 12:10) Mazu yanga ngalongo mo titanjiya abali. Chanju cha phi·la·del·phiʹ pamoza ndi chanju cha a·gaʹpe, chitovya kuti ŵanthu aku Chiuta ayanjanengi ukongwa kweniso aje akukoliyana.

6. Kumbi Akhristu auneneska awona kuti m’bali wawu ndiyani?

6 Mazu ngakuti “kwanja abali” ngasanirika ukongwa mumabuku ngachikhristu kuluska mumabuku nganyaki. Ayuda a mu nyengu yakali akambanga munthu kuti ndi “m’bali” asani akuwa nyumba yimoza kweniso asani ndi Muyuda munyawu. Kweni asani ndi Muyuda cha, amudananga cha kuti m’bali. Kweni Akhristu auneneska awona kuti Mkhristu munyawu weyosi ndi m’bali wawu, chinanga angasiyana nayu mtundu. (Ŵar. 10:12) Yehova watitisambiza kuti tiyanjanengi. (1 Ŵat. 4:9) Nanga nchifukwa wuli tikhumbika kulutirizga kwanja abali?

NCHIFUKWA WULI TIKHUMBIKA KULUTIRIZGA KWANJA ABALI?

7. (a) Kumbi chifukwa chikulu cho titenere kwanjiya abali ndi nichi? (b) Kambani chifukwa chinyaki cho tikhumbikiya kwanjiya abali.

7 Titanja abali chifukwa chakuti Yehova wakhumba kuti tiyanjanengi. Tingakamba cha kuti titanja Chiuta asani tileka kwanja  abali ŵidu. (1 Yoh. 4:7, 20, 21) Kweniso munthu wangaja cha yija. Titenere kuwovyana. Asani takumana ndi masuzgu ndipu tikhumbika kovyana ukongwa. Pa nyengu yo Paulo walembiyanga kalata Akhristu achihebere, wanguziŵa kuti asiyengi nyumba ndi katundu wawu. Yapa ndipu Yesu wakambapu kali mo nyengu iyi yazamuŵiya yakusuzga. (Marko 13:14-18; Luka 21:21-23) Pa nyengu iyi, Akhristu yaŵa akhumbikanga kwanjana ukongwa kuluska mo achitiyanga pakwamba.Ŵar. 12:9.

8. Kumbi tikhumbika kuchitanji sonu chisuzgu chikulu chechendayambi?

8 Pambula kuswera yapa, angelu alekengi kuko mphepu kuti chisuzgu chikulu chiyambi. (Marko 13:19; Chiv. 7:1-3) Asani chisuzgu chikulu chaziyamba, tazamukhumbika kuvwiya ulongozgi wakuti: “Imwi mwaŵanthu ŵangu, lutani mukasere muvipinda vinu vamkati, ndipu mukajali visasa. Mukabisami kwa nyengu yimanavi mpaka po ukari wajumphiyapu.” (Yes. 26:20) ‘Vipinda vamkati’ vingamiya mipingu yidu. Kwenuku ndiku tikumana ndi abali ndi azichi kuti tisopi Yehova. Kweni kuwungana kwija nkhwakukwana cha. Paulo wangukambiya Akhristu achihebere kuti pa nyengu ya mawunganu achiskanengi pa “chanju ndi ntchitu zamampha.” (Ŵah. 10:24, 25) Tikhumbika kwambapu sonu kwanja abali, chifukwa vazakutiwovya asani tazikumana ndi mayeseru ngakulu kunthazi.

9. (a) Kumbi te ndi mpata wuli wakulongore kuti titanja abali mazuŵa nganu? (b) Kambanipu mo ateŵeti aku Yehova alongore kuti atanjana.

9 Chinanga ndi sonu po chisuzgu chikulu chechendayambi, tikhumbika kuŵayanja ukongwa abali. Abali ŵidu anandi asuzgika ukongwa chifukwa cha vidilirisi, kutola kwa maji, chimphepu pamwenga masoka nganyaki ngachilengedu. Abali anyaki asuzgika chifukwa cha kutombozgeka. (Mat. 24:6-9) Kweniso anyaki atondeka kusaniya vakukhumbika pa umoyu chifukwa chakuti tija mu charu chambula urunji. (Chiv. 6:5, 6) Po masuzgu yanga ngakuliyakuliya, vititipasa mpata wakulongo kuti titanja ukongwa abali. Chinanga kuti ‘chanju cha ŵanthu anandi chazizira,’ tikhumbika kulutirizga kwanja abali.—Mat. 24:12. [1]

KUMBI TINGACHITA WULI KUTI TILUTIRIZGI KWANJA ABALI?

10. Kumbi sonu tikambiskanengenji?

10 Chinanga kuti tikumana ndi masuzgu nganandi, kumbi tingachita wuli kuti tilutirizgi kwanja abali? Kumbi tingalongo wuli kuti titiŵayanja? Paulo wati wakamba kuti “lutirizgani kwanja abali,” wangukamba nthowa zinandi zo Akhristu angalongore kuti atanja abali. Tiyeni tikambiskanepu nthowa 6 pe.

11, 12. Kumbi kulonde alendu kung’anamuwanji? (Wonani chithuzi cho che papeji 7.)

11 “Mungaluwanga cha kulonde alendu.” (Ŵerengani Ŵahebere 13:2.) Mazu ngakuti “kulonde alendu” ngo Paulo wangugwiriskiya ntchitu ngang’anamuwa “kuchitiya lisungu ŵanthu ambula kuŵaziŵa.” Mazu yanga ngatitikumbuska vo Abrahamu ndi Loti anguchita. Wosi ŵaŵi anguchitiya lisungu ŵanthu wo aŵaziŵanga cha. Ŵanthu yaŵa ŵenga angelu. (Chiy. 18:2-5; 19:1-3) Paulo wangukamba vo Abrahamu ndi Loti anguchita ndi chilatu chakuti wachiski Akhristu achihebere kuti alondiyengi abali.

12 Kumbi mudana anyinu kuti muziryi nawu chakurya, kuzicheza nawu ndi kuchiskana? Tikhumbikiya vakurya vakudula pe cha kuti tilonde alendu. Kweniso tikhumbika cha  kudana ŵanthu wo tiwona kuti azakutiweze. (Luka 10:42; 14:12-14) Titenere kudana anyidu kuti tichiskani, m’malu mwakukhumba kuŵakondwesa ndi vakurya! Chinanga kuti wakuwonere dera ndi muwolu waki titiŵaziŵa umampha cha, kumbi titiŵadaniya kunyumba kwidu? (3 Yoh. 5-8) ‘Tingaluwanga cha kulonde alendu’ chifukwa chakutangwanika ukongwa.

13, 14. Kumbi ‘tingaŵakumbuka wuli wo ŵe mujeri’?

13 “Kumbukani wo ŵe mujeri.” (Ŵerengani Ŵahebere 13:3.) Pa lemba ili, Paulo wakambanga ŵanthu wosi cha wo ŵe mujeri. Kweni wakambanga ŵanthu wo angumangika chifukwa cha chivwanu chawu. Nayu wenga mujeri kwa vyaka pafupifupi vinayi pa nyengu yo walembiyanga Akhristu achihebere mazu yanga. (Ŵaf. 1:12-14) Wanguŵawonga abali chifukwa chakuti achitiyanga ‘lisungu ŵanthu wo ŵenga mujeri.’ (Ŵah. 10:34) Mwakupambana ndi Akhristu wo awovyanga Paulo pa nyengu yo wenga mujeri, Akhristu achihebere yaŵa ŵenga kutali ndi iyu. Kumbi atingi amukumbukengi wuli? Atingi amukumbukengi mwakumurombe kutuliya pasi pa mtima.Ŵah. 13:18, 19.

14 Mazuŵa nganu, nasi tingaŵa kutali ndi abali wo ŵe mujeri. Tingafiska cha kuŵapasa vinthu nge mo abali wo aja kufupi achitiya. Kweni tingalongo kuti titiŵayanja asani titiŵazumbuwa mumarombu ngidu. Mwakuyeruzgiyapu, kumbi titiŵakumbuka abali, azichi ndi ŵana anandi wo ŵe mujeri mu charu cha Eritrea? Anyaki mwa abali yaŵa ndi Paulos Eyassu, Isaac Mogos ndi Negede Teklemariam. Abali yaŵa aja mujeri vyaka vakujumpha 20.

15. Kumbi tingalongo wuli kuti titumbika nthengwa yidu?

15 “Nthengwa yije ya ulemu kwaku wosi.” (Ŵerengani Ŵahebere 13:4.) Tingalongo so kuti titanja abali asani tileka kuchita ureŵi. (1 Tim. 5:1, 2) Asani munthu wangajumpha mphaka ndi kuryiya masuku pamutu m’bali ndi mzichi pamwenga munthu wa mu banja laki mwakuchita nayu ureŵi, vingachitisa kuti aleki kugomezgana. (1 Ŵat. 4:3-8) Kweniso, ŵanaŵaniyani mo munthukazi wangavwiya asani waziŵa kuti murumu waki wawonere vinthu vamsiku. Kumbi kuchita viyo kungalongo kuti watanja muwolu waki ndipuso watumbika nthengwa?Mat. 5:28.

16. Kumbi kukhorwa ndi vo tenavu kungatiwovya wuli kuti tiyanjanengi?

16 “Mukhorwengi ndi vo mwenavu.” (Ŵerengani Ŵahebere 13:5.) Tikhorwa ndi vo tenavu chifukwa tithemba Yehova. Asani tikhorwa ndi vo tenavu tiwona vinthu vakuliŵavu mwakwenere. (1 Tim. 6:6-8) Kweniso kutitiwovya kuti tiwonengi ubwezi widu ndi Yehova ndipuso abali kuŵa wakukhumbika ukongwa kuphara kuja ndi katundu. Munthu yo wakhorwa ndi vo wenavu wadandawula cha pamwenga kusaniya anyaki vifukwa. Iyu wachitiya sanji anyaki cha ndipuso watuŵa ndi mbunu cha. Kudandawula, kusaniya anyidu vifukwa, sanji ndi mbunu vingachitiska kuti abali ndi azichi aleki kwanjana pa mpingu. Kweni asani tikhorwa ndi vo tenavu, vitovya kuti tiŵi ndi mtima wakupasa.1 Tim. 6:17-19.

17. Kumbi ‘kuja achiganga’ kutitiwovya wuli kuti tiyanjanengi?

17 “Muje achiganga.” (Ŵerengani Ŵahebere 13:6.) Kuthemba Yehova kutitiwovya kuti tije achiganga ndi kukunthiyapu masuzgu  ngakupambanapambana. Chiganga chitovya kuti tiwonengi masuzgu mwakwenere. Asani tiwona masuzgu mwakwenere tichiskanengi ndi kupembuzgana ndi abali. Ivi vingalongo kuti titiŵayanja. (1 Ŵat. 5:14, 15) Chinanga mpha chisuzgu chikulu, ‘tazamukuma jo ndi kuyunuska mitu yidu,’ chifukwa tazamuziŵa kuti utaski widu waŵandika.—Luka 21:25-28.

Kumbi muwonga ntchitu yo ŵara atitichitiya? (Wonani ndimi 18)

18. Kumbi tingalongo wuli kuti titiŵayanja ukongwa abali ŵara?

18 “Kumbukani wo alongozga.” (Ŵerengani Ŵahebere 13:7, 17.) Asani tiŵanaŵaniya ntchitu yo ŵara atitichitiya kwambula malipiru, vititiwovya kuti tiŵayanjengi ukongwa ndi kuŵawonga. Tikhumba cha kuti alekengi kukondwa pamwenga kudandawula chifukwa cha vakuchita vidu. Asani titiŵavwiya tilongo kuti titiŵayanja “ndi kuŵatumbika ukongwa chifukwa cha ntchitu yawu.”1 Ŵat. 5:13.

SAZGIYANIKU CHANJU CHINU

19, 20. Kumbi tingachita wuli kuti tisazgiyeku kwanja abali kuluska mo tichitiya sonu?

19 Ŵanthu aku Yehova aziŵika kuti atanjana. Paulo nayu waziŵanga kuti abali ayanjananga mu nyengu yaki. Kweni wanguŵachiska kuti ‘asazgiyeku kuchita viyo.’ (1 Ŵat. 4:9, 10) Nyengu zosi paja mpata wakuti tingasazgiyaku chanju chidu!

20 Mwaviyo, po tiŵerenga lemba lidu la chaka lo liŵikika kunthazi kwa Nyumba ya Ufumu, tiŵanaŵaniyengi mafumbu yanga: Kumbi ndingasazgiyaku chanju changu pa nkhani ya kulonde alendu? Kumbi ndingaŵakumbuka wuli abali wo ŵe mujeri? Kumbi ndivwiya dangu laku Chiuta lakuti nthengwa yije ya ulemu kwaku wosi? Kumbi ndi vinthu wuli vo vingandiwovya kuti ndikhorwengi ndi vo ndenavu? Kumbi ndingachita wuli kuti ndimuthembengi ukongwa Yehova? Kumbi ndingachita wuli kuti ndiŵavwiyengi ukongwa wo alongozga? Asani tichita vinthu 6 venivi, ndikwesa lemba lidu la chaka lo le mu Nyumba ya Ufumu lijengi waka nge chikwangwani cha. Kweni litiwovyengi kuvwiya ulongozgi wakuti: “Lutirizgani kwanja abali.”Ŵah. 13:1.

^ [1] (ndimi 9) Kuti muziŵi mo Akaboni aku Yehova alongore chanju pa nyengu ya masuzgu, wonani Chigongwi cha Alinda cha July 15, 2002, peji 8-9, ndi buku la Jehovah’s WitnessesProclaimers of God’s Kingdom, mutu 19.