Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda—Chakusambira  |  January 2016

Kugwira Ntchitu ndi Chiuta Nkhwakukondwesa Ukongwa

Kugwira Ntchitu ndi Chiuta Nkhwakukondwesa Ukongwa

“Penipo tigwira ntchitu ndi iyu, titikupemphani so kuti muleki kulonde lisungu likulu laku Chiuta ndi kumbwita chilatu chaki.”2 ŴAKOR. 6:1.

SUMU: 28, 14

1. Chinanga kuti Yehova ndi Chiuta Wanthazizosi, kumbi wapempha ŵanthu ndi angelu kuti achitenji?

YEHOVA ndi Chiuta Wanthazizosi. Ndiyu wakupanga vinthu vosi. We ndi zeru kweniso nthazi zinandi. Jobu wanguziŵa vosi ivi. Iyu wangukamba kuti: “Ndiziŵa kuti mungachita vinthu vosi, ndipu palivi vo mungatondeka kufiska.” (Jobu 42:2) Chinanga kuti Yehova wangafiska kugwira yija ntchitu, kweni wapempha ŵanthu ndi angelu kuti agwirengi nayu ntchitu ya kufiska khumbu laki. Iyu wachita ivi chifukwa chakuti watiŵayanja.

2. Kumbi Yehova wangumupasa ntchitu wuli Yesu?

2 Chiuta wangwamba kulenga Yesu, yo ndi Mwana waki wapade. Pavuli paki, wangumugwiriskiya ntchitu pa kulenga vinthu vinyaki vosi, vakuchanya ndi vapacharu chapasi. (Yoh. 1:1-3, 18) Pakukamba zaku Yesu, Paulo wangukamba kuti: “Kuziya mwaku iyu vinthu vinyaki vosi vikulengeka, vakuchanya ndi va panu pasi. Vinthu vakuwoneka ndi vambula kuwoneka, kaya ndi  mipandu yachifumu, pamwenga ambuya, pamwenga maboma, pamwenga maulamuliru. Vinthu vosi vikulengeka kuziya mwaku iyu ndipuso chifukwa chaku iyu.” (Ŵakol. 1:15-17) Mwaviyo, Yehova wangutumbika Mwana waki mwakumupasa mwaŵi wakugwiraku ntchitu yakulenga kweniso kuziŵisa ŵanthu ntchitu yo Mwana waki wachitanga.

3. Kumbi Yehova wangumupasa ntchitu niyi Adamu, ndipu nchifukwa wuli?

3 Yehova wangupempha so ŵanthu kuti agwirengi nayu ntchitu. Mwakuyeruzgiyapu, wangukambiya Adamu kuti wadani mazina nyama. (Chiy. 2:19, 20) Adamu watenere kuti wakondwanga ukongwa kuwona nyama, kuziŵa mo zichitiya vinthu kweniso kupasa nyama yeyosi zina lakwenere. Yehova watingi wazidanengi yija mazina chifukwa ndiyu wakuzilenga. Kweni chifukwa chakumuyanja, wangukambiya Adamu kuti ndiyu wazidani mazina. Chiuta wangumupasa so ntchitu yakusaziyaku munda wa Edene. (Chiy. 1:27, 28) Kweni vakupasa chitima kuti Adamu wanguleka kugwira ntchitu limoza ndi Chiuta. Ivi vinguzisa masuzgu ngakulu kwaku iyu ndi ŵana ŵaki.Chiy. 3:17-19, 23.

4. Kumbi ŵanthu anyaki angugwiraku ntchitu wuli pakufiska khumbu laku Chiuta?

4 Pavuli paki, wangupempha ŵanthu anyaki kuti amuwovyi kufiska khumbu laki. Mwakuyeruzgiyapu, wangutuma Nowa kuti wakhomi chingaraŵa. Chingaraŵa chingutaska Nowa ndi banja laki pa nyengu ya Chigumula. Wangutuma so Mosese kuti wakataski Ayisraele ku Egipiti. Yoswa wanguseleza Ayisraele mu charu chakulayizgika. Solomoni wanguzenga nyumba yakusopiyamu ku Yerusalemu. Mariya wangubala Yesu. Ateŵeti akugomezgeka yaŵa ndi anyaki anandi agwiranga ntchitu limoza ndi Yehova kuti afiski khumbu laki.

5. (a) Kumbi ndi ntchitu niyi yo tikhumbika kugwiraku? (b) Kumbi Yehova watingi watondekengi kugwira yija ntchitu iyi? (Wonani chithuzi cho che papeji 28.)

5 Mazuŵa nganu, Yehova watitipempha kuti tigwirengi ndi mtima wosi ntchitu za Ufumu. Pe mauteŵeti nganandi ngo tingachita. Chinanga kuti anyaki angafiska cha kuchita mauteŵeti nganyaki, kweni tosi tingagwiraku ntchitu yakupharazga uthenga wamampha wa Ufumu. Yehova watingi wachitengi yija ntchitu iyi. Watingi waŵapharazgiyengi yija ŵanthu kutuwa kuchanya. Yesu wangukamba kuti Yehova wangachitisa mya kukambiya ŵanthu za Fumu ya Ufumu Waki. (Luka 19:37-40) Kweni Yehova watizomerezga kuti tije “antchitu anyaki.” (1 Ŵakor. 3:9) Wakutumika Paulo wangukamba kuti: Penipo tigwira ntchitu ndi iyu, titikupemphani so kuti muleki kulonde lisungu likulu laku Chiuta ndi kumbwita chilatu chaki.” (2 Ŵakor. 6:1) Ndi thumbiku likulu ukongwa kugwira ntchitu limoza ndi Chiuta. Tiyeni tikambiskani vifukwa vo tikambiya viyo.

TIKONDWA ASANI TIGWIRA NTCHITU NDI CHIUTA

6. Kumbi Yesu wavwanga wuli chifukwa chakuti wagwiranga ntchitu ndi Awiski?

6 Kwamba kali, ateŵeti aku Yehova akondwa asani agwira nayu ntchitu. Mwana waki wakwamba wechendazi pacharu chapasi, wangukamba kuti: “Yehova wangundilenga nge chiyambi cha nthowa yaki . . . Ndenga nge mumisili waki. Zuŵa ndi zuŵa wakondwanga ukongwa ndi ini. Nani ndakondwanga nayu pa masu paki nyengu zosi.” (Nthanthi 8:22, 30) Yesu wakondwanga kugwira ntchitu limoza ndi Awiski. Iyu wakondwanga ndi vo wachitanga kweniso chifukwa chakuziŵa kuti Yehova watimuyanja. Nanga isi?

Palivi ntchitu yinyaki yakukondwesa kuluska kusambiza munthu uneneska. (Wonani ndimi 7)

7. Nchifukwa wuli tikondwa asani tipharazga?

 7 Yesu wangukamba kuti tikondwa asani tilonde kweniso asani tipasa vinthu anyidu. (Mac. 20:35) Tikondwa chifukwa tikusambira uneneska. Tikondwa so asani tikambiya anyidu uneneska wo tikusambira. Asani tisambira Bayibolu ndi ŵanthu, tiwona mo akondwe asani ayamba kuziŵa Chiuta ndi Mazu ngaki. Tikondwa ukongwa asani tiwona kuti ayamba kusintha mijalidu yiheni yo ŵenga nayu. Tiziŵa kuti kukambiyaku anyidu uthenga wamampha nkhwakukhumbika ukongwa. Kutovya ŵanthu kuti aje pa ubwezi ndi Chiuta kweniso kuti azisaniyi umoyu wamuyaya. (2 Ŵakor. 5:20) Palivi ntchitu yinyaki yakukondwesa kuluska kovya ŵanthu kuti azisaniyi umoyu wamuyaya.

8. Kumbi anyaki akambanji chifukwa chakugwira ntchitu ndi Yehova?

8 Tikondwa so chifukwa tiziŵa kuti Yehova wakondwa kweniso wawonga vo tichita pakumuteŵete. (Ŵerengani 1 Ŵakorinte 15:58.) Marco yo waja ku Italy, wangukamba kuti: “Ndikondwa ukongwa chifukwa ndiziŵa kuti ndipasa Yehova vo ndingafiska. Ndipasa munthu cha yo wangaluwa liŵi vo ndachita.” Franco yo so waja ku Italy, nayu wangukamba kuti: “Chinanga kuti taŵeni tingawona kuti palivi cho tichita, kweni Yehova watitikumbusa zuŵa lelosi kuziya mu Mazu ngaki ndi vinthu vauzimu kuti watitiyanja kweniso kuti vosi vo titimuchitiya vakuzirwa. Ndichu chifukwa chaki ndikondwa ukongwa kugwira ntchitu ndi Chiuta.”

ASANI TIGWIRA NTCHITU NDI CHIUTA, TIJA PA UBWEZI NDI IYU KWENISO NDI ANYIDU

9. Kumbi penga ubwezi wuli pakati paku Yehova ndi Yesu? Ndipu nchifukwa wuli?

9 Asani tigwira ntchitu ndi ŵanthu wo titiŵayanja, tija nawu pa ubwezi kweniso titiŵaziŵa umampha. Tiziŵa vo akhumba kuchita pa umoyu wawu kweniso venivo achita kuti avifiski. Yesu wagwiranga ntchitu ndi Yehova kwa vyaka mabiliyoni nganandi. Ivi vinguwovya kuti ubwezi wawu ukho. Mwakuti pengavi cho chatingi chitimbanyizengi ubwezi wawu. Yesu wangukamba za ubwezi wawu ndi Yehova kuti: “Ini ndi Ada te amoza.” (Yoh. 10:30) Yiwu akondwanga kugwiriya ntchitu limoza.

10. Nchifukwa wuli ntchitu yakupharazga yititiwovya kuti tije pa ubwezi ndi Yehova kweniso abali ndi azichi?

10 Yesu wangupempha Yehova kuti waŵawoneriyengi akusambira ŵaki. Chifukwa wuli? Iyu wanguromba kuti: “Aje amoza nge mo isi tiliri amoza.” (Yoh. 17:11) Asani tilondo fundu zaku Chiuta kweniso tigwiraku ntchitu yakupharazga, titamba kuyivwisa mijalidu yaki. Tiziŵa chifukwa cho tikhumbikiya kulondo ulongozi waki ndi kumuthemba. Po tindere kufupi kwaku Chiuta, nayu wandere kufupi kwidu. (Ŵerengani Yakobe 4:8.) Tija so pa ubwezi ndi abali kweniso azichi chifukwa tosi tikumana ndi masuzgu ngakuyanana,  vo vitiŵakondwesa ndivu nasi vititikondwesa kweniso te ndi vilatu vakuyanana. Titeŵete nawu limoza, tikondwe limoza kweniso tikunthiyapu limoza. Octavia yo waja ku Britain wangukamba kuti: “Kugwira ntchitu ndi Yehova kwandiwovya kuti ndije pa ubwezi ndi abali kweniso azichi.” Iyu wangukamba kuti ve viyo chifukwa chakuti tosi te ndi “chilatu chimoza kweniso titende fundu zimoza.” Nasi ndimu tiwone. Asani tiwona phamphu lo abali ndi azichi ŵe nalu pakuteŵete Yehova, vititichiska kuti tije nawu pa ubwezi.

11. Nchifukwa wuli mu charu chifya tazamuja pa ubwezi wakukho ndi Yehova kweniso anyidu?

11 Sonu te pa ubwezi ndi Chiuta kweniso ndi ŵanthu. Kweni ubwezi uwu, wazamuja wakukho ukongwa mu charu chifya. Ŵanaŵaniyani ntchitu yakukondwesa yo tazamuchita mu charu chifya. Tazamulonde ŵanthu wo azamuyuka ndi kuŵasambiza vo Yehova wakhumba. Tazamugwira ntchitu yakunoza charu kuti chije Paradayisu. Chazamuja chakukondwesa kuzigwiriya limoza ntchitu zenizi mpaka po tazamujaliya arunji mu muwusu waku Khristu. Ŵanthu azamuyanjananga ukongwa kweniso azamuyanjanga Chiuta, yo wazamupasa ‘chamoyu chechosi vo chikhumba.’Sumu 145:16.

KUGWIRA NTCHITU NDI CHIUTA KUTITIVIKILIYA

12. Kumbi ntchitu yakupharazga yititivikiliya wuli?

12 Tikhumbika kuvikiliya ubwezi widu ndi Yehova. Titenere kuchita viyo chifukwa tija mu charu cho chiwusika ndi Satana Diabolo. Kweniso chifukwa te ŵanthu ambula urunji, nchakusuzga cha kwamba kuŵanaŵana ndi kuchita vinthu vo ŵanthu achita m’charu ichi. Mzimu wa charu we nge mweza mumsinji wo utitiguziya ko isi tileka kukhumba. Tikhumbika kusambira ndi nthazi zidu zosi kuti tileki kukukurwa. Mwakuyanana waka, tikhumbika kuyesesa kuti tileki kutoleka ndi mzimu wa charu chaku Satana. Asani tipharazga, tiŵika mtima pa vinthu vambula kwenere cha vo vingananga chigomezgu chidu, kweni pa vinthu vauzimu. (Ŵaf. 4:8) Kupharazga kutovya kuti chivwanu chidu chije chakukho chifukwa kutitikumbusa marangu ngaku Chiuta kweniso vinthu vamampha vo wazakutichitiya kunthazi. Kutitiwovya so kuti tije ndi mijalidu yo yingativikiliya kwaku Satana ndi charu chaki.Ŵerengani Ŵaefesu 6:14-17.

13. Kumbi Kaboni munyaki ku Australia wanguti ntchitu yakupharazga yitimuwovya wuli?

13 Asani titangwanika ndi ntchitu yakupharazga kweniso vinthu vinyaki vauzimu, tifipa mtima ukongwa cha ndi masuzgu ngo tikumana nangu. Ivi vititivikiliya. Joel yo waja ku Australia, wangukamba kuti: “Ntchitu yakupharazga yitindiwovya kuti ndileki kuluwa mo umoyu uliri mu charu. Yitindikumbusa masuzgu ngo ŵanthu akumana nangu kweniso vitumbiku vo ndasaniya chifukwa chakugwiriskiya ntchitu fundu za m’Bayibolu. Ntchitu yakupharazga yitindiwovya kuja wakujiyuyuwa, kuthemba Yehova kweniso abali ndi azichi.”

14. Kumbi ndi vinthu wuli vo vilongo kuti te ndi mzimu waku Chiuta?

14 Ntchitu yakupharazga yititiwovya so kusimikiza kuti mzimu waku Chiuta we nasi. Tiyeruzgiyi kuti mugwira ntchitu yakugaŵiya ŵanthu buledi muchigaŵa chinu. Muhole cha ndipu ndalama zo mugwiriskiya ntchitu pakugwira ntchitu iyi atikuweziyani cha. Pavuli paki, mbwenu mutuvwa kuti ŵanthu anandi atimukhumba cha buledi. Anyaki atikutinkhani chifukwa chakuŵapasa buledi.  Kumbi mungalutirizga kugwira ntchitu iyi? Ivi vingakugongowesani ndipu mungaleka. Kweni isi tileka cha kupharazga ndipu tigwiriskiya ntchitu ndalama zidu pakuchita ntchitu iyi chinanga kuti ŵanthu atitinyoza kweniso awonga cha. Kumbi ivi vilongo cha kuti te ndi mzimu waku Chiuta?

TILONGO KUTI TITANJA CHIUTA NDI ŴANTHU ASANI TIGWIRA NAYU NTCHITU

15. Kumbi ntchitu yakupharazga uthenga wamampha yikoliyana wuli ndi khumbu laku Chiuta?

15 Kumbi ntchitu yakupharazga uthenga wamampha yikoliyana wuli ndi khumbu laku Yehova? Iyu wakhumbanga kuti ŵanthu aje pacharu chapasi kwamuyaya. Chinanga kuti Adamu wakunanga, Yehova wakusintha cha khumbu laki. (Yes. 55:11) Kweni wakunozga kuti ŵanthu ataskiki ku ubudi ndi nyifwa. Ndichu chifukwa chaki Yesu wanguza panu pasi ndi kupereka umoyu waki. Kweni kuti tiyanduwi ndi sembi iyi, titenere kuvwiya Chiuta. Mwaviyo, Yesu wasambizanga ŵanthu vo Chiuta wakhumba. Wangukambiya so akusambira ŵaki kuti nawu achitengi viyo. Asani titovya ŵanthu kuti aje pa ubwezi ndi Chiuta, titovyana nayu pa kutaska ŵanthu ku ubudi ndi nyifwa.

16. Kumbi ntchitu yakupharazga yikoliyana wuli ndi marangu ngakulu ngaku Chiuta?

16 Asani titovya ŵanthu kuti ayambi kwenda pa nthowa yakuya ku umoyu wamuyaya tilongo kuti titiŵayanja. Tilongo so kuti titanja Yehova yo “wakhumba kuti ŵanthu amitundu yosi atasiki ndipuso aziŵi unenesa.” (1 Tim. 2:4) Ŵati amufumba kuti dangu likulu ndi nili, Yesu wangumuka kuti: “‘Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi.’ Lenili ndilu dangu likulu kweniso lakwamba pa marangu ngosi. Lachiŵi lakuyanana nalu ndi ili: ‘Uyanjengi munyaku nge mo utijiyanjiya wamweni.’” (Mat. 22:37-39) Asani tigwiraku ntchitu yakupharazga, tilongo kuti tivwiya marangu ngenanga.Ŵerengani Machitidu 10:42.

17. Kumbi mutiyiwona wuli ntchitu yakupharazga?

17 Yehova watitumbikika ukongwa! Iyu watipasa ntchitu yakupharazga. Ntchitu iyi yititiwovya kuja akukondwa, kuja pa ubwezi ndi iyu ndi anyidu kweniso yititivikiliya. Yititipasa so mwaŵi wakulongo kuti titanja Chiuta ndi ŵanthu. Ŵanthu aku Yehova apambana mu vinthu vinandi. Kweni kaya mbakukota, mbachinyamata, mbakukhupuka, mbakavu, ŵe ndi nthazi pamwenga alivi nthazi, anandi ayesesa kukambiyaku anyawu vo agomezga. Tikayika cha kuti mungakoliyana ndi vo wangukamba Chantel yo waja ku France. Iyu wanguti: “Munthu wanthazi ukongwa kuchanya ndi pacharu chapasi, yo wakulenga vinthu vosi, Chiuta walikondwa, watiti: ‘Luta! Kakambi! Kakambi m’malu mwangu, ukakambi kutuliya pasi pa mtima waku. Ndikupasengi nthazi, Bayibolu, angelu, ŵanthu akwenda nawu, masambiru kweniso ulongozgi wa pa nyengu yaki.’ Ndi mwaŵi ukulu ukongwa kuchita vo Yehova watitituma ndi kugwira nayu ntchitu!”