Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 6 2017

Sembi yakuwombole yo Chiuta wakupereka, ndi mphasu yo yiphara zosi chifukwa yichitisa kuti tizisaniyi umoyu wamuyaya

 NKHANI YA PACHIKONKHOMBI | KUMBI MPHASU YAMAMPHA UKONGWA KUPHARA ZOSI NDI NIYI?

Kumbi Mphasu Yamampha Ukongwa Kuphara Zosi ndi Niyi?

Kumbi Mphasu Yamampha Ukongwa Kuphara Zosi ndi Niyi?

“Mphasu yeyosi yamampha ndipuso yakufikapu yituliya kuchanya. Yisika kutuwa kwa Ada a maukweru ngosi ngakuchanya.” (Yakobe 1:17) Lemba ili likamba kuti Yehova Chiuta, wo Mbada ŵidu akuchanya ngwakupaska. Pa mphasu zosi zo Chiuta wakupaska ŵanthu, pe mphasu yimoza yo yiphara zosi. Kumbi ndi mphasu wuli? Mazu ngo Yesu wangukamba ngo ngasanirika pa Yohane 3:16, ngakamba za mphasu yeniyi kuti: “Pakuti Chiuta wakuchiyanja ukongwa charu, mwakuti wakupereka Mwana waki wapade, kuti weyosi wakuvwana mwaku iyu waleki kunangika, kweni waje ndi umoyu wamuyaya.”

Mphasu yo Chiuta wakupereka ya Mwana waki, ndi mphasu yo yiphara mphasu zosi zo munthu wangalonde. Ve viyo chifukwa mphasu yeniyi yingatiwovya kuti tifwatuki ku ubudi, ukoti ndi nyifwa. (Sumu 51:5; Yohane 8:34) Chinanga tingayesesa wuli, pakutija palivi cho tingachita kuti tifwatuki ku vinthu venivi. Kweni chifukwa chakuti Chiuta watitiyanja ukongwa, iyu wakupereka chinthu cho chingatiwovya kuti tifwatuki. Pakupereka Mwana waki wapade Yesu Khristu nge sembi yakuwombole, Yehova Chiuta wakupaska ŵanthu akuvwiya mwaŵi wakuzisaniya umoyu wamuyaya. Kumbi sembi yakuwombole ntchinthu wuli? Ntchifukwa wuli njakukhumbika? Nanga tiyanduwa wuli ndi sembi yeniyi?

Sembi yakuwombole ndi mtengu wo uperekeka pakuweza chinthu cho chingutayika pamwenga kufwatuwa munthu ku ukapolu. Bayibolu likamba kuti apapi ŵidu akwamba Adamu ndi Eva angulengeka ambula ubudi. Yiwu limoza ndi ŵana wo atingi abalengi, atingi ajengi pacharu chapasi cha paradayisu kwamuyaya. (Chiyambo 1:26-28) Vakupaska chitima kuti yiwu akutaya vosi ivi chifukwa angusankha kuleka kuvwiya Chiuta ndipu angubuda. Ntchinthu wuli chinguchitika chifukwa cha vo yiwu angusankha? Bayibolu limuka kuti: “Nge mo ubudi ukuselere mucharu kuziya mwa munthu yumoza, ndi nyifwa chifukwa cha ubudi, ndipu nyifwa yikusapaliya ku ŵanthu wosi chifukwa wosi akubuda.” (Aroma 5:12) M’malu mwakuŵapaska umoyu wambula ubudi ŵana ŵaki, Adamu wakuŵapaska ubudi ndi nyifwa.

Sembi yakuwombole yikhumbika kuja yakuyanana ndi chinthu cho chatayika. Adamu wati wasankha kuleka kuvwiya Chiuta wangubuda ndipu venivi vinguchitisa kuti watayi umoyu wambula ubudi wo wenga nawu pakwamba. Mwakuyanana ndi vo Bayibolu likamba, venivi vikuchitisa kuti ŵana aku Adamu wosi aje akapolu a ubudi ndi nyifwa. Mwaviyo, pakhumbikanga umoyu wambula ubudi kuti uje sembi yo yingatifwatuwa ku ubudi ndi nyifwa. Yesu ndiyu wakupereka umoyu wenuwu. (Aroma 5:19; Aefeso 1:7) Chifukwa chakuti Chiuta wakupereka sembi, ŵanthu ŵe ndi mwaŵi wakuzija pacharu chapasi cha paradayisu. Yiwu azamuja ndi umoyu wamuyaya wo Adamu ndi Eva angutaya.—Chivumbuzi 21:3-5.

Tikayika cha kuti sembi yo Chiuta wakupereka ndi mphasu yo yiphara zosi. Sembi iyi yichitisa kuti tizisaniyi umoyu wamuyaya. Kuti tilongo kuti tiwonga mphasu “yamampha ukongwa” yeniyi, tiyeni tiwoni fundu zo takonkhosa mu nkhani yajumpha zo zichitisa kuti mphasu yije yakuzirwa.

Yifiska vo tikhumba. Weyosi wakhumba kuja kwamuyaya. (Wakutaula 3:11) Chinanga kuti pakutija tingaja cha kwamuyaya, kweni sembi yo Chiuta wakupereka ndiyu yititiwovya. Bayibolu likamba kuti:  “Pakuti malipiru nga ubudi ndi nyifwa, kweni mphasu yo Chiuta wapereka mbumoyu wamuyaya kuporote mwa Ambuyafwi Khristu Yesu.”—Aroma 6:23.

Yifiska vo tasoŵekanga. Ŵanthu angajipereke cha sembi yakuwombole. Bayibolu likamba kuti: “Mtengu wakuwombole umoyu wawu ngwakuzirwa ukongwa mwakuti munthu wangakwanisa cha kuwupereka mpaka muyaya.” (Sumu 49:8) Venivi vilongo kuti takhumbikanga kuti Chiuta watiwovyi kuti tifwatuliki ku ubudi ndi nyifwa. Mwaviyo, Chiuta wakupereka vo tasoŵekanga chifukwa wakutifwatuwa ndi “sembi yakuwombole yo Khristu Yesu wakupereka.”—Aroma 3:23, 24.

Yikuperekeka pa nyengu yakwenere. Bayibolu likamba kuti: “Po tenga teche akubuda, Khristu wangutifwiya.” (Aroma 5:8) Sembi yo Chiuta wakupereka yititisimikiziya kuti Iyu watitiyanja ukongwa chinanga kuti ndisi akubuda, chifukwa yikuperekeka “po tenga teche akubuda.” Kweniso yititiwovya kuti tilindizengi vinthu vamampha chinanga kuti tikumana ndi masuzgu ngo ngatuza chifukwa cha ubudi.

Yilongo kuti Chiuta wakuyiperekeka ndi chilatu chamampha ukongwa. Bayibolu likamba vo vinguchitisa Chiuta kuti wapereki mwana waki nge sembi. Likamba kuti: “Chanju chaku Chiuta chivumbulika kwaku isi, kuti Chiuta wangutumiza Mwana waki wapade mucharu kuti isi tisaniyi umoyu kuporote mwaku iyu. Chanju chaki ching’anamuwa kuti isi ndisi tikwanja Chiuta cha, kweni iyu ndiyu wakwanja isi.”—1 Yohane 4:9, 10.

Kumbi mungalongo wuli kuti muwonga mphasu yamampha ukongwa yeniyi? Kumbukani mazu ngo Yesu wangukamba pa lemba la Yohane 3:16 kuti “weyosi wakuvwana” mwaku iyu wazamutaskika. Bayibolu likamba kuti chivwanu “ntchigomezgu chakusimikizika cha vinthu vo vilindizgika.” (Aheberi 11:1) Kuti musimikiziyengi kuti vinthu venivi vazamuchitika nadi, mukhumbika kuziŵa uneneska waki. Mwaviyo, titikupemphani kuti musambiri vakukwaskana ndi Yehova Chiuta yo wakupereka mphasu “yamampha ukongwa” yeniyi. Mukhumbika so kusambira vo mutenere kuchita kuti muzisaniyi umoyu wamuyaya wo mwazamulonde chifukwa cha sembi yaku Yesu.

Mungasambira fundu zinandi za m’Malemba zo zisanirika pa www.jw.org. Akaboni aku Yehova angakuwovyani. Tigomezga kuti asani mungasambira vakukwaskana ndi mphasu yikulu ukongwa yeniyi kweniso mo yititiwovye, mukambengi kuti: “Wawongeki Chiuta kuporote mwa Ambuyafwi Yesu Khristu!”—Aroma 7:25.