Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 6 2017

 VO ŴANTHU WO AŴERENGA MAGAZINI YANGA AFUMBA . . .

Kumbi Akhristu Akhumbika Kukondwere Khrisimasi?

Kumbi Akhristu Akhumbika Kukondwere Khrisimasi?

Ŵanthu anandi pacharu chosi chapasi agomezga kuti Khrisimasi ndi mwambu wakukondwere zuŵa lo Yesu Khristu wakuwiya. Kweni mukujifumbapu kuti, Kumbi Akhristu a mu nyengu ya akutumika wo achitanga vinthu limoza ndi Yesu, nawu akondweriyanga Khrisimasi? Kumbi muziŵa vo Bayibolu likamba pa nkhani ya kukumbukiya zuŵa lakuwiya? Kusaniya kwamuka kwa mafumbu ngenanga kungatiwovya kuti tiziŵi asani Akhristu akhumbika kukondwere Khrisimasi.

Chakwamba, Bayibolu likambapu cha kuti ŵanthu akondweriyanga zuŵa lakuwiya laku Yesu pamwenga ateŵeti anyaki akugomezgeka aku Chiuta. Malemba ngakamba ŵaka za ŵanthu ŵaŵi wo anguchita phwandu lakukumbukiya zuŵa lo anguwiya. Wosi ŵaŵi asopanga Yehova cha, Chiuta yo wakulemba Bayibolu. Ndipu pa nyengu yo akondweriyanga zuŵa lo anguwiya panguchitika vinthu viheni. (Chiyambo 40:20; Mariko 6:21) Buku linyaki likamba kuti Akhristu akwambiriya angususka “mwambu wakukondwere zuŵa lakuwiya wo Akhristu aboza achitanga.”—Encyclopædia Britannica.

Kumbi Yesu wakuwa pa zuŵa nili?

Bayibolu likamba cha zuŵa chayilu lo Yesu wanguwiya. Buku linyaki lo likulembeka ndi McClintock ndi Strong likamba kuti: “Zuŵa lo Khristu wanguwiya lisanirika cha mu [Chipanganu Chasonu] pamwenga mu mabuku nganyaki ngengosi.” (Cyclopedia) Asani Yesu wakhumbanga kuti akusambira ŵaki akondweriyengi zuŵa lo wanguwiya, watingi waŵakambiyengi zuŵa lo iyu wanguwiya.

Chachiŵi, Bayibolu likamba cha kuti Yesu pamwenga akusambira ŵaki akondweriyanga Khrisimasi. Mwakukoliyana ndi buku la New Catholic Encyclopedia, nkhani yakukwaskana ndi Khrisimasi yingwamba kuzumbulika “m’buku la Chiroma la Chronograph lo lingulembeka ndi Philocalus ndipu lalembekanga chaka chechosi. Buku lenili lingulembeka cha m’ma 336 [C.E.]” Viwoneke limu kuti chaka ichi ndipu amaliza kali kulemba Bayibolu kweniso ndipu pajumpha vyaka vinandi kutuliya po Yesu wenga pacharu chapasi. Mwaviyo, McClintock ndi Strong awonanga kuti “ndi Chiuta cha yo wakwambisa mwambu wakukondwere Khrisimasi, kweniso mu [Chipanganu Chasonu] mulivi fundu iyi.” *

Kumbi Yesu wangukambiya akusambira ŵaki kuti akumbukiyengenji?

Nge Msambizi Walusu, Yesu wangukambiya akusambira ŵaki vo wakhumbanga kuti achiti, ndipu venivi vikulembeka m’Bayibolu. Kweni wanguŵakambiyapu cha kuti akondweriyengi Khrisimasi. Mwakuyeruzgiyapu, msambizi wakhumba cha kuti mwana wa sukulu wachitengi vinthu vo iyu waleka kumukambiya. Mwakuyanana waka, Yesu nayu wakhumba cha kuti akusambira ŵaki achitengi “vinthu mwakujumpha vo vikulembeka” m’Malemba Ngakupaturika.—1 Akorinto 4:6.

Chinanga kuti ve viyo, pe mwambu unyaki wakukhumbika ukongwa wo Akhristu akwambiriya achitanga. Yiwu akumbukiyanga nyifwa yaku Yesu Khristu. Yesu wangukambiya akusambira ŵaki nyengu yo akhumbikiyanga kuchitiya mwambu wenuwu kweniso wanguŵalongo mo angachitiya. Fundu zenizi kweniso zuŵa chayilu lo iyu wangufwiya vikulembeka m’Bayibolu.—Luka 22:19; 1 Akorinto 11:25.

Nge mo tawone m’nkhani iyi, Khrisimasi ndi mwambu wakukondwere zuŵa lakuwiya. Ndipu Akhristu akwambiriya achitangaku cha mwambu wenuwu wo Akhristu aboza achitanga. Kweniso Bayibolu likambapu cha kuti Yesu pamwenga akusambira ŵaki akondweriyanga Khrisimasi. Mwakukoliyana ndi fundu zenizi, Akhristu anandi pacharu chosi awona kuti yiwu akhumbika cha kukondwere Khrisimasi.

^ ndimi 6 Kuti muziŵi vinandi vakukwaskana ndi mo Khrisimasi yikwambiya, wonani nkhani ya mutu wakuti, “Zimene Owerenga Amafunsa . . . Kodi ndi Zinthu Ziti Zomwe Tiyenera Kudziwa pa Nkhani ya Khirisimasi?” m’magazini ya Chichewa ya Chigongwi cha Alinda cha December 1, 2014. Mungaŵerenga so nkhani iyi pa Intaneti pa www.jw.org/ny.