Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Chigongwi cha Alinda  |  Na. 5 2017

 NKHANI YAPACHIKONKHOMBI | KUMBI BAYIBOLU LIKAMBANJI VAKUKWASKANA NDI ANGELU?

Uneneska Wakukwaskana Ndi Angelu

Uneneska Wakukwaskana Ndi Angelu

Kumbi mungayanja kuziŵa uneneska wakukwaskana ndi angelu? Mungajifumba kuti, kumbi yiwu mbayani, kumbi akutuliya pani ndipuso kumbi agwira ntchitu wuli? Kulivi kunyaki ko tingasaniya kwamuka kwa mafumbu yanga kuluska mu Bayibolu, lo ndi Mazu Ngaku Chiuta. (2 Timote 3:16) Kumbi Bayibolu likambanji pa nkhani iyi?

  • Chiuta ndi mzimu ndipu angelu nawu ndi mizimu yambula kuwoneka. Yiwu ‘alivi liŵavu la nyama ndi viwanga.’ Angelu akugomezgeka aja kuchanya ndipu atimuwona Chiuta.—Luka 24:39; Mateyu 18:10; Yohane 4:24.

  • Nyengu zinyaki angelu asinthanga liŵavu lawu ndipu awonekanga nge ŵanthu kuti afiski ntchitu yo Chiuta waŵatuma pacharu chapasi. Kweni pavuli paki ajanga so nge mo ŵenge pakwamba ndipu aweriyanga kuchanya.—Ŵeruzgi 6:11-23; 13:15-20.

  • Chinanga kuti pakukamba za angelu Bayibolu likamba nge kuti mbanthurumi ndipu pa nyengu yo awonekiyanga ku ŵanthu awonekanga nge mbanthurumi, kweni yiwu mbanthurumi cha ndipuso mbanthukazi cha. Yiwu ato cha ndipuso abala cha. Ŵanthu anyaki agomezga kuti angelu mbanthu wo pakwamba ajanga pacharu chapasi. Kweni ndimu viliri cha, yiwu akulengeka ndi Yehova. Ndichu chifukwa chaki Bayibolu litiŵadana kuti “ŵana aku Chiuta.”—Jobu 1:6; Sumu 148:2, 5.

  • Bayibolu likamba za ‘malilimi nga ŵanthu ndipuso malilimi nga angelu,’ kulongo kuti angelu ŵe ndi chineneru ndipu alongoro. Chinanga kuti Chiuta wangugwirisiya ntchitu angelu kuti wakambiyi ŵanthu uthenga waki, iyu watitizomereza cha kuti tipempherengi kwaku yiwu ndipuso kuti tiŵasopengi.—1 Ŵakorinte 13:1; Chivumbuzi 22:8, 9.

  • Angelu alipu mabiliyoni nganandi. *Danyele 7:10; Chivumbuzi 5:11.

  • Angelu ŵe ndi “nthazi ukongwa” ndipu palivi munthu yo wangayanana nawu kweniso ŵe ndi zeru ukongwa kuluska weyosi. Yiwu atenda liŵi ukongwa kuluska mo taŵanthu tingaŵanaŵaniya.—Sumu 103:20; Danyele 9:20-23.

  • Chinanga kuti angelu ŵe ndi zeru ukongwa kweniso nthazi, kweni pe vinthu vinyaki vo yiwu angachita cha ndipuso pe vinthu vinyaki vo aleka kuviziŵa.—Mateyu 24:36; 1 Petro 1:12.

  • Angelu alipu akupambanapambana. Yiwu akulengeka ndi mijalidu yinyaki yaku Chiuta ndipuso ŵe ndi wanangwa. Mwakuyanana ndi ŵanthu, yiwu angasankha kuchita chamampha pamwenga chiheni. Chakupasa chitima ntchakuti angelu anyaki angusankha kugarukiya Chiuta.—Yuda 6.

^ ndimi 8 Buku la Chivumbuzi lilongo kuti pe angelu “masawuzandimasawuzandi.” Ivi vilongo kuti pe angelu mamiliyoni nganandi pamwenga mabiliyoni!